Продажа MegaСom в КР

Кен казуудан IT тармагына "секирген" инвестор. MegaCom операторун ким сатып алмакчы?

814
(жаңыланган 13:28 08.02.2018)
,
MegaCom компаниясына сунуш берген компаниянын түзүүчүсү Германияда каттоодон өтүп, бир айдан кийин эле ишкерлигин Кыргызстандан баштаган

БИШКЕК, 25-янв. — Sputnik. Үстүбүздөгү жылдын январь айында "АКА минералз энд майнинг" аттуу компания MegaCom бренди менен таанымал "Альфа Телеком" жоопкерчилиги чектелген коомун сатып алуу сунушун бергенин Мамлекеттик мүлктү башкаруу фондусунан маалымдашкан.

Мындан улам Sputnik Кыргызстан агенттиги аталган компания качан, кайда катталып, кимге караштуу экенин иликтеп чыкты.

Кыргызстандын Юстиция министрлигинин сайтындагы маалыматка караганда MegaCom компаниясын сатып алууну көздөгөн "АКА минералз энд майнинг" 2014-жылдын 13-октябрында каттоодон өткөн. Ал Германияда катталган "АКА петролеум" ЖЧКсы менен Касым Курбанов аттуу жаранга таандык экени жазылган. Ошондой эле ишкана жаратылыш минералдарын жана тоо тектерин казуу менен алектенери көрсөтүлгөн.

  • Сведения о АКА минералз энд Майнинг
    Юстиция министрлигинин сайтындагы маалыматка караганда, "АКА минералз энд майнинг" 2014-жылдын 13-октябрында каттоодон өткөн
    © Фото / официальный сайт Минюст КР
  • Сведения о АКА минералз энд Майнинг
    Юстиция министрлигинин сайтындагы маалыматка караганда, "АКА минералз энд майнинг" 2014-жылдын 13-октябрында каттоодон өткөн
    © Фото / официальный сайт Минюст КР
1 / 2
© Фото / официальный сайт Минюст КР
Юстиция министрлигинин сайтындагы маалыматка караганда, "АКА минералз энд майнинг" 2014-жылдын 13-октябрында каттоодон өткөн

Бир күндө аты менен заты өзгөргөн компания

19-январда "MegaCom компаниясын сатып алууга сунуш түштү" деген жаңылык тарагандан кийин эле ошол эле күнү "АКА минералз энд майнинг" ишканасы "АКА Инвест" деген аталыш менен кайрадан каттоодон өтүп, өзүнүн иш багытын "маалыматтык технология жана эсептөөчү техника тармагы" деп өзгөртүп койгон.

Жалпак тил менен айтканда, бул компания буга чейин IT-тармагында иштеп көргөн эмес. Эгер сүйлөшүүлөр оңунан чыкса MegaCom алардын маалыматтык технология тармагындагы биринчи тажрыйбасы болмокчу.

Таштанды үчүн төлөнгөн 100 сом

Ачык бюджет порталындагы маалыматка караганда, "АКА Инвест" болуп өзгөргөн "АКА минералз энд майнинг" ишканасы 2015-жылы таштанды үчүн 100 сом төлөгөн. Ошол эле жылы Мамлекеттик геология агенттигинин эсебине аукционго катышуу үчүн 6 миллион 121 миң 950 сом кепилдик каражатын которгон. 

Сведения о АКА минералз энд Майнинг с сайта Минюст КР
© Фото / портал "Открытый бюджет"
"АКА минералз энд майнинг" ишканасы 2015-жылы Мамлекеттик геология агенттигинин эсебине аукционго катышуу үчүн 6 миллион 121 миң 950 сом кепилдик каражатын которгон

Бирок Өнөр жай, энергетика жана кен пайдалануу мамлекеттик комитетинин маалымат катчысы Рысбек Токтоналиев аталган каражат кайра эле компанияга кайтарылып берилгенин билдирди.

"Аталган компания 2015-жылдын 16-октябрында Жалал-Абад облусунун Чаткал районундагы Терек-Сай айыл аймагында жайгашкан "Терек" кенинин "блок — XVII-C1" деген түштүк участогундагы сурьма чыккан жерин иштетүү үчүн аукционго катышкан. Лицензиянын баасы 100 миң доллар болчу", — деди Токтоналиев.

Анын айтымында, кытайлык "Хуасинь" компаниясы 130 миң доллар сунуштап аукционду жеңип алган. Ал эми "АКА минералз энд майнинг" 110 миң доллардан ашык сумма сунуштабаганы үчүн жеңилген.

ЖМКда аты аталган Нурмамэт Кудрэт деген ким?

Юстиция министрлигинин сайтындагы маалыматка таянсак, MegaCom компаниясына көз кырын салган "АКА минералз энд майнинг" (азыркы "АКА Инвест") ишканасын Германиядан каттоодон өткөн "АКА петролеум" ЖЧКсы менен Касым Курбанов аттуу Кыргызстандын жараны түзгөн.

Жергиликтүү бир катар маалымат каражаттары Кыргызстандын Инвестицияны илгерилетүү жана коргоо агенттигине шилтеме берип "АКА петролеум" ЖЧКсынын жетекчиси Нурмамэт Кудрэт аттуу немец жарандыгын алган кытайлык уйгур экенин жазып жатышат.

Маалыматты тактоо максатында Sputnik Кыргызстан агенттигинин кабарчылары AKA Petroleum компаниясынын сайтында көрсөтүлгөн номерлерге чалып байланыша алган жок.

Анткен менен Global Company Intelligence аттуу эл аралык компаниялардын маалымат базасында münchen AKA Petroleum түзүлгөндөн (2014-жылдын 8-майында) бир жарым жыл өткөндөн кийин эле компания жетекчиси Нурмамэт Кудрэт иштен кетип, анын ордуна Дубайда жашаган 53 жаштагы Абдукадыр Хабибула (Abdukadyr Khabibula) дайындалганы көрсөтүлгөн.

Ошондо компаниянын чыныгы жетекчиси ким? ЖМКларда байма-бай ысымы аталып жаткан Нурмамэт Кудрэтпи же башкабы деген сыяктуу бир катар суроолорго жооп алуу үчүн Мамлекеттик мүлктү башкаруу фондусуна кайрылганыбызда маалымат кызматынын өкүлү Махабат Мансурова ведомство азырынча бул компания тууралуу эч кандай маалымат бербей тургандыгын айтты.

Ал эми Инвестицияларды илгерилетүү жана коргоо агенттигинин башчысы Эсенкул Момункулов Нурмамэт Кудрэт немец жарандыгын алган кытайлык уйгур экенин тастыктап, бирок толук маалыматты "Акылдуу шаар" долбоорун "АКА минералз энд майнинг" менен биргеликте ишке ашырганы жаткан кытайлык Huawei компаниясынан тактоону сунуштады.

Бул арада Sputnik Нурмамэт Кудрэттин өзү менен байланышка чыкканы менен ал журналисттердин суроолоруна жооп берүүдөн баш тартты. Бирок AKA Petroleum компаниясынын башчысы эместигин, болгону менеджмент тармагын жетектей турганын ырастады. Ал эми ишкананын азыркы директору ким экенин атоодон баш тартты.

Жогоруда аталган Global Company Intelligence аттуу эл аралык компаниялардын маалымат базасында AKA Petroleum ишканасынын 53 жаштагы жетекчиси деп көрсөтүлгөн Абдукадыр Хабибула (Abdukadyr Khabibula) тууралуу кенен маалымат табууга мүмкүн болгон жок. Бирок ушундай эле ат менен Facebook социалдык тармагында катталган жалгыз баракчаны көрүүгө болот. Андагы маалымат боюнча дагы Хабибула учурда 53 жашта, 16-февралда 54кө толот. Баракчасында жалпы алты досу болсо алардын арасында маркум депутат Улан Чолпонбаев бар. 
Пользователь Facebook Абдукадыр Хабибула, возможный владелец  AKA Petroleum
© Фото / Facebook
Facebook социалдык тармагында AKA Petroleum ишканасынын жетекчиси делген кишинин ысымы менен катталган жалгыз баракча бар

(Белгилей кетчү жагдай, Facebook баракчасына Абдукадыр Хабибула деген ысым менен катталган адам AKA Petroleum ишканасынын жетекчиси эмес, башка адам болуп калышы дагы мүмкүн)

Баса, "АКА минералз энд майнингди" түзгөн дагы бир жаран Касым Курбанов менен Sputnik агенттигинин кабарчылары байланышты, бирок ал дагы комментарий берүүдөн баш тартып койду.

АКА Petroleum алгачкы бизнесин Кыргызстандан баштаганбы

Германиянын ишканалар реестринин расмий сайтындагы маалыматка караганда, AKA Petroleum 2014-жылдын 8-майында немец шаары Мюнхенде Kronstadter Str. 1, 81677 дареги боюнча катталган. Анын уставдык капиталы 25 миң еврону түзөт.

Ишкананын негизги багыты — пайдалуу кен казуу, газ, мунай өндүрүү, сактоо, бөлүштүрүү, пайдалануу жана капиталдык салымдын бардык түрүн алуу. Кийинчерээк эксплуатация, мейманканаларды ижаралоо жана лизинг менен дагы алектене баштаган.

Компания жаңы түзүлгөндөн бир ай өткөндөн кийин эле, тагыраагы 2014-жылдын 12-июнунда, Кыргызстанда "Терексай жаштары" ЖЧКсын Юстиция министрлигинен каттоодон өткөргөн

Кийин Жалал-Абад облусуна караштуу Чаткал районундагы Терек-Сай айылында жайгашкан "Кассан" сурьма кенин иштетүүгө жарыяланган аукциондо 4 миллион 521 миң доллар сунуштап жеңип алган

"Терексай жаштары" 2014-2017-жылдар аралыгында мамлекетке 274 миллион 932 миң 772 сом салык төлөгөн. 

Выплаченный государству налог компании Терексай жаштары
© Фото / портал "Открытый бюджет"
AKA Petroleum түзгөн "Терексай жаштары" 2014-2017-жылдар аралыгында мамлекетке салык жана кызматтарга 274 миллион 932 миң 772 сом төлөгөн

Белгилей кетсек, АКА Petroleum "Терексай жаштары" компаниясын Чолпон Элмуратова аттуу жаран жана Синьзянь эл аралык "Бизниснур" соода ЖЧКсы менен биргеликте түзгөн. Ал эми Токтосун Туманбаев деген киши ишкананын директору болуп эсептелет. Ушул эле адам турак жай куруу менен алектенген "Спец Гидро Строй" ЖЧКсынын түзүүчүсү болуп эсептелет.

MegaCom жетекчилиги эмне дейт

"Альфа Телеком" жоопкерчилиги чектелген коомунун генералдык директору Азат Базаркулов аталган компания тууралуу азырынча эч кандай маалыматы жок экенин айтты.

"MegaCom компаниясы "Ака минералз энд майнинг" ишканасына презентация өтүп бере элек. Себеби презентация учурунда аларга көп маалыматтарды ачып беришибиз керек болот. Ал үчүн алар сырды сактоо боюнча келишимге кол коюшу керек. Азырынча мындай келишимдер кабыл алына элек", — деди Базаркулов.

Анын айтымында, Мамлекеттик мүлк фондусу MegaCom компаниясына мамлекеттин атынан акционер болгондуктан эки тараптуу сүйлөшүүнү, сунуш түшкөн тараптын ишенимдүүлүгүн текшерүү милдеттерин тийиштүү органдар менен биргеликте өзү аткарат.

814
Белгилер:
изилдөө, компания, инвестициялар, АКА Petroleum, MegaCom
Тема:
"Альфа Телеком" (MegaCom) жабык акционердик коомун менчиктештирүү (30)
Тема боюнча
Багы ачылабы? MegaCom компаниясын сатып алууну каалагандар пайда болду
MegaCom компаниясы ортомчулар аркылуу сатылышы мүмкүн
Маммүлк MegaCom Нагорнаяга эмне үчүн сатылбай калганын түшүндүрдү
MegaCom Елена Нагорнаяга сатылбай калды
АКШнын Вашингтондогу Ак үй имараты. Архив

"Кара схема": ички душманы АКШны соо койбой, Россияны сактап калышы мүмкүн

231
(жаңыланган 11:45 31.07.2020)
Бүгүн АКШнын Демократиялык партиясынын конвентинде (онлайн форматта өтө турган) мурдагы вице-президент Жо Байден Кошмо Штаттардын болочок президентин, тагыраак, президент айымын жеке өзү шайлашы ыктымал.

Бир нече ирет өткөн сурамжылоолор боюнча Байден ушул тапта өз атаандашынан — азыркы америкалык президент Дональд Трамптан эки, төрт, сегиз же ал түгүл он пайызга озуп чыкты. Сурамжылоого катышкан америкалыктардын басымдуу бөлүгү Трамптын ишине канааттанбаганын улам билдирип келет деп жазат РИА Новости.

Ал эми негедир эл алдына интернет жана теле аркылуу да чанда чыккан, көп учурда сөзүнөн адашкан, андан улам көпчүлүк тарабынан анын акыл саламаттыгынан шек саналган 77 жаштагы Байдендин кийинки президент болушу кепилденген сыяктуу.

"Сыяктанат" дегенибиз – Хиллари Клинтондун да президент болушу кепилденген, бирок реалдуулук өз түзөтүүлөрүн бул божомолго киргизбей койбоду. Жо Байден президенттик ант бере турган болсо да, ал убакка чейин 78 жашка чыгып калат. Кабинетти (АКШ президентинин иш бөлмөсү — ред.) ээлей турган эң карыя президент гана болбостон, рекорд койгон 70 жаштагы Дональд Трампты да караандатпай калат. Мурдагы президенттердин өмүр жолун эске алуу менен демократиячыл талапкердин эмгек милдеттенмелерин аткаруу маалында дүйнө алмаштырып кетиши да мүмкүн экенин баары түшүнүп турат. Кокус андай болуп кетсе, "милдетин аткаруучу" гана эмес, АКШнын чыныгы, жүз пайыз президенти болуп Байдендин төрт жылдык мөөнөтүнүн эң аягына чейин вице-президент калат. Байден президенттик тактыга отургандын эртеси эле өтүп кетсе, эл тарабынан шайланбаса да толук мыйзамдуу президент 2025-жылга дейре батыштагы ири өзөктүк державаны башкарат. Байден саналуу күндөр ичинде дал ошол кишинин ысымын атамакчы. Алдын ала белгилүү бир нерсе бар: бул кызматка аял киши келет, Байден бул туурасында тээ көктөмдө эле убада кылган. Кайсы айым келери эң башкы америкалык саясий конвентти утурлай күндемине айланды.

Трамп ноябрга белгиленген президенттик шайлоону жылдырууну сунуштады

Эң кеңири белгилүү талапкерлердин арасында жыл башында Демократиялык партиянын ички ат салышуусунда Байденге өз добуштарын алдырган сенатор Элизабет Уоррен; Мичиган штатынын губернатору Гретхен Уитмер (48 жашка келип калса да "жаш жана таза кан" деп саналат); Ирактагы согуштун ардагери, сенатор Тэмми Дакворт (Иракта эки бутунан ажыраган, тай кытайлар тегинен); конгрессвумен Вэл Демингс (кызыл терилүү жана мурдагы полиция кызматкери); Карен Басс (кара тору жана баңгизатка каршы күрөшчү); Сьюзан Райс (кызыл терилүү жана улуттук коопсуздук боюнча Обаманын мурдагы кеңешчиси); Камала Харристин (жарым-жартылай кызыл терилүү, индиялык жана Калифорниянын мурдагы башкы прокурору) ысымдары аталууда. Баса, демократиячылардын ички жарышында вице-президенттикке булардын соңку экөөнө басым жасалууда.

Boston Globe өңдүү басылмалар Байден вице-президенттикке дал кызыл терилүү айымдардан тандоого тийиш деген тейде ачык эле жазып чыкты. Кара тору вице-президент тандоо менен республикачылардын жана Трамптын расисттик жүзүн көрсөткүсү – азчылыкты куугунтуктоо саясатынын бетин ачуу аракети жасалып, ал эми Байден Обаманын тушунда коомдо мындай болбогонун, анын вазыйпасы өлкөнү бириктирүү болгонун баса белгилегиси келет. Бирок мындай тандем деле элди бириктире албай турганын, ал түгүл Трамптын убагынан да жаман болорун белгилегендер бар.

Коннектикут университетинин профессору Петр Турчин мындан он жыл оболу эле быйыл АКШда саясий туруксуздук башталарын жоромолдогон. Ага негизги факторлордун бири катары коом каймактарынын кайра жаралышын атаган. Бул – бай адамдардын пайызынын жогорулашы. Биз ойлоп келгендей, байлар менен жакырлардын ажырымынын чоңдугу мында анчалык кооптуу болбой калат окшобойбу. 1970-жылы калктын 62 пайызын түзгөн орто класстын болжолдуу үчтөн эки бөлүгү жакырланбастан, дал коом каймактарына айланган. Ал тургай, ашкере байлардын да саны экиден ашык пайызга артты. Он миллиондон ашуун доллар (1995-жылкы наркында) байлыгы бар үй-бүлөлөр 1983 жана 2010-жылдар ортосунда беш эсеге жогорулаган. Азыр андан да көп болушу ыктымал. АКШда ушул тапта "камкаймактар" чындап толтура, миллионерлерден эле дээрлик 19 миллион (бул бүтүндөй Румыния же Казакстандай бар), децимиллионерлер — жарым миллиондой, ал түгүл миллиардерлерден эле 650 чакты киши чыгат.

НАТОну соода менен алмаштырып алды. Россия эмнеге "Чоң жетиликти" каалабай турат

Бул жагымдуу көрүнүш катары сезилгени менен терс жагы да жок эмес. Адамдар байыганда алар табигый түрдө бийликке умтула башташат. Экономикалык күчүн сезет, аны саясий күчкө айландыргысы келет. Шаар жетекчилиги, штат, конгресс, Ак үйдөн орун алууга ашыгышат. Бирок бийликтеги орундардын саны көбөйүп кеткен жок. 450 орундуу конгресс бардык миллионерлерди да батыра албайт. Мындан улам элитанын арасындагы шериктештик жоюлат да, кыл чайнашкан күрөш башталат. Айтмакчы, ага байлар гана катышат деп ойлоого болбойт. Башкалар да жөн калбайт.

Газ жана Израиль: Европа дагы бир жол таптыбы?

Натыйжада соңку жылдары АКШда калктын санынан да кыйла ашкан юрист, саясат таануучу жана "коомдук илимдер боюнча адистер" ушунчалык тездик менен көбөйдү. Башкача айтканда, теориялык жактан кийин саясий карьераны баштап кете турган бардык адистиктердин ээлери арбыды. Алардын көпчүлүгү саясатта чыйыр гана салып тим болбостон, бул багытта ийгиликке жетери да турулуу иш. Алар кыжырданган, ызалангандар, анан азыркы Американын жалбыртташына да каршы эмес. Анткени бирөөнө каатчылык – башкасына мүмкүнчүлүк. Планетанын эң олуттуу державаларынын бири болгон Американын азыркы жана кийинки тагдыры дүйнөдөгү бир топ өлкөлөрдүн, анын ичинде Россиянын каймактарына да ачык сабак болор. Анткени дүйнөнүн кай мамлекети болбосун, элиталар бири-биринен эч айырмаланбайт эмеспи.

231
Белгилер:
президент, Дональд Трамп, шайлоо, АКШ
Тема боюнча
Трамп ноябрга белгиленген президенттик шайлоону жылдырууну сунуштады
Ооруканадагы дарыгерлер. Архив

Инфекционист, эпидемиолог көздөн учту. Жети дубандын эли кантип дарыланууда

354
(жаңыланган 20:41 30.07.2020)
Кыргызстандын ар кыл аймагында медицина кызматкерлеринин жетишсиздиги маселе жаратып келет. Өзгөчө эпидемиолог, эндокринолог, реаниматолог, инфекционисттер жетишпейт. Мунун кесепетин коронавирус инфекциясынан улам келип чыккан пандемия маалында жон терибиз менен сездик.

Соңку маалымат боюнча, республикада жалпы жонунан 2 743 медицина кызматкери COVID-19 жуктуруп алган. Анын ичинен 1 664 медик айыгып чыкса, 73 кызматкер көз жумган. 

Бүгүн премьер-министр Кубатбек Боронов эпидемиологиялык абал Ысык-Көл, Жалал-Абад жана Чүй облустарында оор экенин билдирди.

Sputnik Кыргызстан агенттиги республиканын аймагындагы жети облуста медициналык кадр маселесине кайрылып, маалымат чогултту.

Коронавирус медицина каймактарын терип кетти. Дарттан көз жумган медиктер

Ысык-Көл облусу

Ушу тапта бул облуста абал кыйын болуп жатканын статистикадан көрүүгө болот. Бир суткада коронавирус жуктуруп алгандардын саны боюнча аймак биринчи орунга да чыккан.

Облуста үстүбүздөгү жылдын 27-июлунда Ысык-Көл райондук аймактык ооруканасынын жандандыруу бөлүмүнүн башчысы Сарбагыш Иманалиев эки тараптуу пневмониядан улам каза болду. Ага чейин аталган райондогу Үй-бүлөлүк дарыгерлер тобунун башчысы, 62 жаштагы Бүбүайым Жээнбаева коронавирустан улам көз жумган.

Өкмөттүн Ысык-Көл облусундагы өкүлүнүн орун басары Элмира Усенованын айтымында, буга чейин облуста дарыгерлер жетишпей ажиотаж жаралган.

"Бишкекте абал жакшырды, бирок аймактарда бир аз оор болуп жатат. Бир жума мурун Ысык-Көлдө врачтар жетишпей тынчсыздануу болду. Кырдаал күч алгандан бери дарыгерлер бир сыйра ооруп да чыгышкан. Ал ортодо Россиядан тогуз медик келди. Азыр облустун кайсы районунда оору күч алса, ошол жакка медиктерди жиберип жатабыз. Негизинен буга чейин эле Ысык-Көлдө эндекринолог жана эпидемиологдор жетишсиз болуп келген. Эпидемиологиялык кырдаал күчөгөндө медиктердин жетишпестиги аябай билинди. Ошол себептен мурда кесибин таштап кеткендерди жана ординаторлорду чогултуп, жалпысынан ооруканага 22 врач алып келдик. Азыр дүрбөлөңгө түшө турган маселе жок", — деди ал.

Пол жууп болсо да кол кабыш кылып кетчүмүн. Ысык-Көлдөгү ыктыярчылардын мээнети

Анын айтымында, облус боюнча Жети-Өгүз районунда абал курч болуп, "Кумтөрдө" иштегендердин көбү ооруп калгандыктан, статистикага таасирин тийгизген. Учурда Жети-Өгүздөгү Кызыл-Туу айылына үч врач жиберилди.

Ысык-Көл районунун акими Данир Иманалиевдин айтымында, учурда райондогу абал туруктуу.

"Азыр Саламаттык сактоо министрлиги тарабынан реанимация бөлүмүнө үч врач жөнөтүлгөн. Андан тышкары, Караколдон келген бир реаниматолог бар. Бишкектен реаниматолог Автандил Умаржанов да чакырылган. Жугуштуу оорулар бөлүмүндө эки врач, хирургияда эки дарыгер, соматикалык оорулар бөлүмүндө эки врач иштеп жатат. Ал эми "Алтын Балалык" стационарына үч дарыгер келген", — деди аким.

Чолпон-Ата шаарынын жашоочусу, 30 жаштагы атын атагысы келбеген ыктыярчы чындыгында абал абдан оор болуп, медиктер жетишпей Чолпон-Атанын стационарында 84 бейтапты эки врач карагандыгын билдирди.

"Бишкекте абал оор болуп турган убакта райондун акимине "Жаштар жарандык коргоо" уюму "жолду жабууга жардам бергиле, азыр борбордон көп киши келип жатат, абал оорлоп кетпесин" деген сунуш менен киргенбиз. Анткени ошол убакта Бишкектеги эпидемиологиялык абалдан кооптонгондор, эс алуучулар Чолпон-Атага көп келе баштаган. Андан көп өтпөй эле Ысык-Көлдө оору жугузгандардын саны көбөйүп кетти. Чолпон-Атада жаңы ачылган стационардагы орундар эки күндө толуп, медиктер жетишпей, 84 бейтапты эки врач жана он чакты медайым дарылаган учур болду. Башында медиктердин коргоочу костюмдары начар болгондуктан көбү ооруду. Жумушта иштеп жүрүп эле эсин жоготуп жыгылгандарды көрдүк. Бир топ эле кыйын болду. Бирок азыр абал турукташып бара жатат", — деди ал.

"Сактап кал" деп жалдыраган көздөр жүрөгүмдү тилип кетти. Ыктыярчылардын маеги

Нарын облусу

Саламаттык сактоо министрлигинин Нарын облустундагы координатору Мурат Алияскаровдун айтымында, Нарында да медиктер жетишпей, жергиликтүү ооруканалар болгон мүмкүнчүлүгү менен иштеп жатышат.

Облуска Россиядан сегиз дарыгер келген. Алар облустагы беш районду кыдырып, үч же беш күндөн иштеп, тажрыйба бөлүшүп, жардам берип жатышат.

"Россиядан келген врачтар бүгүн Ак-Талаа районунан келип, Жумгал районуна кетишет. Ал жактан кырдаалга жараша иштешет. Эпидемиологиялык абал орто болсо үч күн, оорураак болсо беш күн иштешет. Иштөө тартиби ошондой экен. Бөлүмдөрдү кыдырып болгон кеңештерин берип, тажрыйбасы менен бөлүшүп жатышат. Азыр пневмонияга кабылгандар жана алардын өтө оор абалдагыларына өзгөчө көңүл бурулуп, россиялык медиктер менен иштешип жатабыз. Пневмония болгон бейтаптардын дарылоосуна бир катар оңдоолор киргизилди. Жергиликтүү бийлик менен биргеликте иш алып барып жатабыз, жалпы кырдаал акырындык менен жакшырып бара жатат", — деди ал.

Ата-энем COVID жуктуруп алган соң ишке кириштим. Нарындык ыктыярчы кыздын маеги

Алияскаров билдиргендей, Нарынга министрлик тарабынан жиберилген пульмонолог, реаниматолог жана терапевт келген.

"Облуста жалпысынан абал бирдей, пневмония өзгөчө өсүп кетти деген аймак жок. Күндүзгү стационарлардын иштеши менен ооруканалардын иши жеңилдеди. Нарында КММАнын кадрларды кайра даярдоо борборунун филиалы бар, атайын тапшырма менен кыска аралыкта адистерди кайра даярдоо курстарынан да өткөргөнбүз. Бирок кызыл зонага кесипкөй адистерди гана киргизип жатабыз. Ал эми кайра даярдоодон өткөн медиктерди мобилдик топторго бөлдүк", — деди координатор.

Маалыматка ылайык, учурда Нарын облусунда 365 врач, 1 500 орто медициналык билимге ээ кызматкер иштеп жатат. Облуска 135 дарыгер жетишпейт.

Талас облусу

Саламаттык сактоо министрлигинин координатору Айжамал Шабдинова облуста жалпы 251 врач иштеп жатканын билдирди. Анын айтымында, иштеп жаткан дарыгерлерден тышкары 65 жаштан өйдө 51 врач бар, алар милдеттүү медициналык эс алууда. Бирок айлык акылары сакталып калат. Облуста жалпы 934 медайым бар, алардын ичинен 28инин курагы 65 жаштан жогору болуп, атайын категорияга кирет.

"Пандемияга чейин эле Талас облусунда ар кандай багыттагы 108 врач жетишпей келген. Үй-бүлөлүк дарыгер, эндокринолог, реаниматолог, неанатолог жок. Азыр кызыл зонада 261 медицина кызматкери иштеп жатат. Бейтаптарды кароого врачтар жетпей, өзгөчө кырдаал жаралган жок, ошентсе да медиктер чыңалган шартта иштешти. Бирок ишти жөнгө салып келе жатабыз", — деди ал.

Шабдинова билдиргендей, Талас облусу Саламаттык сактоо министрлигине Кара-Буура районунун Чат-Базар айылына бир инфекционист сурап кайрылган.

Учурда облуста күнү-түнү иштеген тогуз стационар бар. Мындан тышкары, бейтаптарды күндүз тейлөөчү жайлар да иштөөдө. Күндүзгү стационарлар суткасына 1 800 кишини кабыл алып жатат.

Жалгыз таштабайбыз: Россия COVID менен күрөшүүдө коңшуларына жардам кылууда

Жалал-Абад облусу

Жалал-Абад облустук Үй-бүлөлүк медицина борборунун директорунун орун басары Кадича Пратованын маалыматы боюнча облуста жалпы 184 дарыгер жетишпейт. Алардын көбү үй-бүлөлүк дарыгерлер, эпидемиолог, инфекционист жана реаниматологдор.

Негизинен облуста жалпы 6 152 медик иштейт. Алардын 1 661и дарыгер.

Пратованын айтымында, Жалал-Абад облусу боюнча 86 врач, 163 медайым коронавирус жуктуруп алган.

"Жалал-Абад облусу боюнча оору жуктургандар көп катталып, аларга орун жетишпегендиктен облустун аймагында жалпы 753 кошумча орун менен күндүзгү стационарлар ачылган. Мобилдик бригадалар да иштеп жатат. Бирок акыркы беш күн ичинде чакыруулар бир топ азайды. Жалал-Абадда үй-бүлөлүк дарыгерлердин көбүнүн жашы 60тан өйдө, кооптуу топко киргендер. Министрликтин атайын буйругу менен дарыгерлер 14 күн иштеп, 7 күн эс алышууда", — деди ал.

Пандемия маалында облуста эки врач, бир медайым көз жумган.

Ош облусу

Саламаттык сактоо министрлигинин Ош шаарындагы координатору Кыялбек Ташболотов Ошто иштеп жаткан дарыгерлердин саны жетиштүү экенин билдирди.

"Шаарда изолятордо 372 медик иштеп жатат. Алардын 127си врач, 130у медайым жана 117си медициналык тейлөө кызматкерлери. Күндүзгү жана түнкү стационарларда 60 медик эмгектенип жатат. Ал эми изоляторго бейтаптар үчүн 1 150 орун даярдалып, анын алты жүзүндө киши дарыланууда", — деди ал.

Министрликтин Ош облусундагы координатору Шаятбек Абдурахмановдун айтымында, Бишкектен жана Россиядан Ошко 18 врач келген. Алар Ош облустук жана Ош шаардык ооруканасында иштеп, дарыгерлерге жардам көрсөтүп, учурда Алай өрөөнүндө жүрүшөт.

"Ош облусунда жалпы 1 971 врач, 6 707 медайым бар. Булардын ичинен 166 дарыгер, 169 медайым жана техникалык персоналдын 107 кызматкери коронавирус жугузуп алган. Пандемиядан улам 9 врач, төрт медайым жана бир медкызматкер каза болгон", — деди Абдурахманов.

Жети облустагы Тез жардам кызматынын учурдагы абалы

Баткен облусу

Саламаттык сактоо министрлигинин Баткен облусу боюнча координатору Арзыбек Борубеков билдиргендей, облуста 800 врач жана 3,5 миң медайым эмгектенүүдө.

Аталган аймакта жүздөн ашык медицина кызматкери коронавирус инфекциясын жугузуп, учурда алардын көбү сакайып чыккан.

"Пандемияга чейин эле облуста жалпы 88 врач жетишсиз болчу. Эпидемиологиялык абал күч алып турган учурда дарыгерлердин тартыштыгы аябай байкалды. Бирок кадрлар менен туура иштешип, маселени жеринде чечүү менен чоң жоготууга учурабай, оор кырдаалдан чыгып кеттик. Башка аймактардагыдай эле инфекционисттер менен эпидемиологдордун тартыштыгы бизде да бар", —  деди ал.

Бишкекте оору күч алып турган мезгилде Баткен жергесинен медиктердин эки тобу борбордогу кесиптештерине жардамга келишкен. Бүгүн алар үйлөрүнө жөнөтүлдү.

Элди мобилизациялай алдык. Баткендеги ыктыярчылар кантип жардам берүүдө

Чүй облусу

Саламаттык сактоо министрлигинин Чүй облусу боюнча координатору Асел Адамалиеванын билдирүүсү боюнча облуста 1 354 дарыгер, 3 141 медайым болсо, медициналык тейлөө кызматында иштегендердин саны —  1 146.

Пандемия маалында оорудан улам сегиз врач каза болуп калган. Ал эми 87 дарыгер, 203 медайым жана 17 медициналык тейлөө кызматкери ооруп өргүүгө чыккан.

Маалыматка ылайык, Чүй облусундагы ооруканаларга 72 врач, 93 медайым жана 63 медициналык тейлөө кызматкери керек.

Азыркы абал

Учурда Кыргызстан боюнча 9 321 бейтап стационарда дарыланып жатат. Анын ичинен 3 801 учур лабораториялык изилдөөлөр аркылуу тастыкталган. Калган 5 520 учур клиникалык белгилери аркылуу аныкталганы айтылды.

Пандемия башталгандан бери өлкөдө коронавирус жуктуруп алган учурлардын саны 35 143кө жетти. Анын ичинен 24 474 киши ооруну жеңип, айыкты. Тилекке каршы, коронавирус 1 364 кишинин өмүрүн алды.

354
Белгилер:
коронавирус, дарыгерлер, КР Саламаттык сактоо министрлиги, Кыргызстан
Тема боюнча
Жалгыз таштабайбыз: Россия COVID менен күрөшүүдө коңшуларына жардам кылууда
Кыргызстанда COVID-19дан каза болгон медиктердин так саны айтылды
Мэрия: шаардагы медиктер июлдун айлык акысын убагында алышат
Кыргыз Республикасынын желеги. Архивное фото

Кыргызстандын туусу тартылган ажаткана каражаттары онлайн-сатыкка чыкты

0
(жаңыланган 19:00 06.08.2020)
Жарнамада сатуучулар Кыргызстандын мамлекеттик туусунун сүрөтү тартылган ажаткана, ванна каражаттарынын үч аксессуар топтомун сунуш кылышууда.

БИШКЕК, 6-авг. — Sputnik. Бир катар электрондук коммерциялык аянтчаларда Кыргызстандын мамлекеттик желеги тартылган килемче, ванна жана ажаткана каражаты сатыкка чыгарылды.

Орунсуз жерге КРдин мамлекеттик символикасы камтылган жарнаманы Sputnik Кыргызстан редакциясына окурмандар жиберди. Алар популярдуу америкалык интернет дүкөндөрдүн жана соода тармактардын сайттарына жайгаштырылган. Жарнамада сатуучулар Кыргызстандын мамлекеттик туусунун сүрөтү тартылган ажаткана, ванна каражаттарынын үч аксессуар топтомун сунуш кылышууда.

Коврик и крышка унитаза с государственной символикой КР продаваемая на платформе электронной коммерции
скриншот с сайта walmart.ca
Бир катар электрондук коммерциялык аянтчаларда Кыргызстандын мамлекеттик желеги тартылган килемче, ванна жана ажаткана каражаты сатыкка чыгарылды

Кыргызстандын Маданият, маалымат жана туризм министрлиги окуя боюнча үн катып, жосунсуз жорук экенин белгиледи.

"Бизде желектер тартылган футболкаларды, баш кийимдерди кийишет, айрымдар кийимдин ар кайсы бөлүктөрүнө символ коюшат. Бирок бул сатуучулар сунуштаган нерсе моралдык жактан туура эмес деп ойлойм", — дейт министр Азамат Жаманкулов.

Кыргыз Республикасынын Жоруктар жөнүндө кодексинин 175-беренесине ("Мамлекеттик символдорду мазактоо") ылайык, Кыргыз Республикасынын мамлекеттик гербин, мамлекеттик туусун же мамлекеттик гимнин мазактоо, I категориядагы айып пул (20-30 миң сом) же болбосо II категориядагы коомдук жумуштарга (40-60 саат) тартуу түрүндөгү жазага алып келери айтылат.

Электрондук коммерциялык аянтчаларда башка мамлекеттердин да желек, туусу сатыкта турат.

Катуу шамалдан улам "Ала-Тоо" аянтындагы желек тытылып кетти. Сүрөт

Эске салсак, 2019-жылы Бишкекте пенсиядагы айым компаниялардын биринин жанындагы аймакты тазалап жатканда желектин сүрөтүн ленталарга салып, аларды автоунаа токтоочу жайдын тосмосу катары кызмат кылган кабель менен байлап койгону үчүн айыптаган.

0
Белгилер:
дүкөн, интернет, Америка, жорук-жосун, Символ, желек, Кыргызстан
Тема боюнча
Оренбургдан 20 автобус кыргызстандык келди