Короодогу эшектер. Архив

Элди чуу түшүргөн эшек бизнесинин артында ким турат? Иликтөө

7616
(жаңыланган 14:56 14.12.2019)
,
Милиция эшектер багылган коргондун ээси Ош шаардык сотунун мурдагы судьясы Рамазан Кожомкуловго таандык экенин билдирди. Андан кыргызстандык жана кытайлык ишкердин "Береке Майнинг" компаниясы ижарага алган. Бирок жергиликтүүлөр эшектин багылышына каршы чыгууда.

Кара-Суу районунун Мады айылында багылып жаткан эшектер кайрадан талкууга түштү. Социалдык тармакта андан чучук жасап, этин сатып жатат деген кептер тарады. Расмий орган бул маалыматты тастыктаган жок, ал эми 1000 эшектин кармалып турганын далилдеди.

Sputnik Кыргызстан агенттиги элдин нааразычылыгына карабай, эшек бизнесин жүргүзүп жаткандарды сүрүштүрдү.

Айылдыктарды түйшүккө салган бизнес

Эшектер багылып жаткан короо Ош шаарынын борборунан 20 чакырым алыстыктагы айылдын четинде жайгашкан. Жергиликтүү жашоочулар этин сатпаган чакта деле коопсуздукка коркунуч жаратарын айтып тынчсызданууда. Коргондон чыккан сасык жыт айылды каптап, жайкысын чымын-чиркейлердин чордонуна айланып каларын айтышат. Бул ар кандай ооруларды пайда кылышы мүмкүн деп чочулашууда.

Мады айылынын тургуну Сажида Турдуева түйшүк тартканы аз келгенсип, башкаларга шылдың болуп жатканын белгиледи.

"Эшек багылган короо дөңсөөдө, айыл анын ылдый тарабында жайгашкан. Күн ысыганда эле шамал менен кошо жагымсыз жыт уруп чыдатпайт. Чымын-чиркей толуп, бала-чаканы көчөгө чыгаргандан деле коркуп калдык. Мады айылы Курманжан датканын кыштоосу болгон. Булар биз туу тутуп жүргөн энебиз баскан жерди эшеккана кылышты. Жер Катта-Талдык айыл өкмөтүнө караштуу, киреше Рамазан Кожомкуловго түшөт. Ал эми уятка калган биз болуп жатабыз. Эшектин этин жейт экенсиңер деп шылдыңдашууда", — деди Турдуева.

Мады айыл өкмөтүнүн башчысы Жамшит Матанбаев да жергиликтүүлөрдөн арыздануулар көп түшөрүн билдирди.

"Үч жыл болуп калды. Эшектерди ушул жерден семиртип багып, көбөйгөндөн кийин Кытайга алып кетишет экен. Тынбай эле арызданып жатабыз, депутаттарга да кайрылдык, жыйынтык жок", — деди Матанбаев.

Ал эми Катта-Талдык айыл өкмөтүнүн башчысы Кантөрө Жантөрөев аталган коргон 1997-жылы жеке менчикке өтүп, учурда ага Рамазан Кожомкулов ээлик кыларын ырастады. Ал мурдагы эт, сөөк иштетүүчү заводду 12 гектар жери менен кошо сатып алган экен.

Короо бош калыптыр

Sputnik Кыргызстандын аймактык кабарчысы Мады айылына барганда эшектер жок болуп чыкты. Короодон үч-төрт эле коделекти көргөн. Ал жерде иштеген жумушчулар эшектердин баарын 11-декабрда Кытайга жүктөп кетишкенин айтышты.

  • Ослиная ферма в Ошской области
    Кабарчы Мады айылына барганда короодон үч-төрт эле коделекти көргөн
    © Sputnik / Зульфия Тургунова
  • Ослиная ферма в Ошской области
    Ал жерде иштеген жумушчулар эшектердин баарын 11-декабрда Кытайга жүктөп кетишкенин айтышты
    © Sputnik / Зульфия Тургунова
  • Ослиная ферма в Ошской области
    Эшектерди Кыргызстандын ичинен жана Тажикстан менен Өзбекстандан алып келип ушул жерде чогултушат
    © Sputnik / Зульфия Тургунова
  • Ослиная ферма в Ошской области
    50дөй адам эшектердин жем-чөбүн берип семиргенче карайт.
    © Sputnik / Зульфия Тургунова
1 / 4
© Sputnik / Зульфия Тургунова
Кабарчы Мады айылына барганда короодон үч-төрт эле коделекти көргөн
"Эшектерди Кыргызстандын ичинен жана Тажикстан менен Өзбекстандан алып келип ушул жерде чогултушат. 50дөй адам жем-чөбүн берип семиргенче карайбыз. Көбөйгөндөн кийин тобу менен алып кетишет", — деди жумушчулардын бири.

Териси табылган, этинен дайын жок

Деген менен Жогорку Кеңештин депутаты Тынчтык Шайназаров эшектердин тирүү алып чыгып кетишинен шек санап жатат.

"2019-жылдын январында кыргыз-кытай чек арасында жүк кармалып, кылмыш иши козголгон. Тактаган документке "Токойлуу сай" деген фирма ондатырдын териси деген документ менен 1570 эшектин терисин алып бараткан. Анын эти кайда кетти, базарга саттыбы же колбасага өткөрдүбү? Жок кылынганы же көмүлгөнү туурасында акт жок. Мадылыктар мага өлгөн эшектер талаада курттап, сасып жаткан видеолорду жиберип арызданууда. Мунун артында коррупция турат, башка себебин көрбөй жатам. Буга Ветеринардык жана фитосанитардык инспекциянын директору Калысбек Жумаканов өзү аралашкан", — деди депутат.

Милициянын маалыматы

Эшек багылып жаткан жерди Ош облустук милициясы, Ветеринардык жана фитосанитардык коопсуздук боюнча башкармалыгы, Санэпидемиологиялык көзөмөл борбору, айыл өкмөт башчылары барып текшерген. Алар 1000ге чукул эшек кармалып турганына күбө болуп, бирок ал жерден союп, этин таратуу фактысы аныкталбаганын айтат.

"Береке Майнинг" компаниясы эшек бизнеси менен алектенген. Анын ээлери Лова Щимар жана Медетбек Сапаралиев экени белгилүү болду. Экөө тең Кыргызстандын жараны. Анын астында дагы эшектерди чогултуп, ташый турган туунду компаниялары бар экен. Учурда такталып жатат. Ал эми Рамазан Кожомкулов жерин ижарага берген. Коргонду "Гром" күзөт агенттиги кайтарат", — деп билдирди Ош облустук милициясы.

Мындан улам кабарчы бул бизнеске аралашкан адамдарды издеп тапты. Бирок алар расмий органдын маалыматын төгүнгө чыгарууга аракет кылууда.

"Органда иштеген абройлуу адаммын"

Кабарчы жердин ээси делген Рамазан Кожомкулов менен байланышканда, ал коргонго такыр эле тиешеси жоктугун айтып чыкты.

"Жердин менчик ээси мен эмесмин. Азыр башка адамдын атына катталган. Коргонду кытайлар ижарага алып иштетет. Тиешем жок, мен ортодогу адаммын. Ишеним кат менен иштерине жардам беришим мүмкүн... Милициянын айтканын четке кагам. Тактап жазгыла, мен органда иштеген абройлуу адаммын", — деди Кожомкулов.

Бул сөзүнөн улам Кожомкуловдун эмгек жолуна үңүлүп көрүүнү чечтик. Көрсө, ал Ош шаардык сотунда судья болуп иштеп 2016-жылы кызматтан бошотулган экен.

2015-жылы прокуратура Кожомкуловду "баңгизат менен кармалган тажик жаранынын күнөөсүн жашырып койду" деп айыптаган. Аны катуу дисциплинардык жоопко тартуу сунушу менен Кыргызстандын Соттор кеңешине кайрылган. Себеби ал айыпкерге 500 миң сом айып салуу менен бошотмок болгон. Кийин облустук сот Кожомкуловго чыккан өкүмдү жокко чыгарып, айыпкердин мүлкүн конфискациялоо менен 14 жылга эркинен ажыраткан.

Учурда Рамазан Кожомкуловдун уулу Алайбек Кожомкулов Алай райондук сотунун судьясы болуп иштейт.

Кожоюну көп компания

Эшек бизнеси менен шугулданган "Береке Майнинг" ишканасы Юстиция министрлигине баалуу металлдардын рудасын казуу жана байытуу менен алектенет деп катталган. Эшек экспорттоо боюнча бир жеринде да жазылган эмес. Компаниянын негиздөөчүсү катары Нурболот Шурубеков менен Чынаркан Шамшиева көрсөтүлгөн. Директорлук кызматты да Шамшиева аркалайт. Ал эми милициянын жетекчилери компаниянын ээлери Лова Щимар менен Медетбек Сапаралиев деп маалымат берип жатат.

Информация о фирме Береке Майнинг на сайте Юстиции КР
скриншот с сайта Министерства юстиции КР
Эшек бизнеси менен шугулданган "Береке Майнинг" ишканасы Юстиция министрлигине кен казуу менен алектенет деп катталган.

Sputnik Кыргызстандын кабарчы Сапаралиев менен байланышканда алгач бул компанияга эч кандай тиешеси жоктугун айтып актанды.

"Мен Бишкекте болчумун, атым чыгып кеткенин угуп түнү менен Ошко келип териштирип жүрөм. Мен дагы тууган-урукка уят болуп жатам. Азыр жетекчилери менен жолугушуп тактайбыз", — деп айткан Сапаралиев.

Деген менен бир күндөн кийин "Береке Майнингдин" юридикалык дарегинде катталган номерге чалганда Сапаралиевдин өзү алды. Бул ирет ал "кытайлыктар келгенде компания ачып берүүгө жардам бергем" деп чыкты. Бир аз убакыттан кийин редакцияга келип дагы башкача сүйлөдү.

"Директор Чынаркан Шамшиева менин жубайым, Нурболот Шурубеков тааныш иним болот. Алар "Береке Майнингди" ушул жылдын 25-ноябрында Лова Щимар менен кытай жараны Вэй Сянлунга саткан", — деп келишим кагазын көрсөттү Сапаралиев.

Документы фирмы Береке Майнинг
© Sputnik / Табылды Кадырбеков
"Береке Майнинг" компаниясынын жетекчилери жакында эле башка жарандарга өткөрүп берген

Юстиция министрлигинин сайтында Медетбек Сапаралиевге таандык үч компания катталган. Алар көмүр казган Avisent, баалуу металл казуучу "Шабдан Майнинг" жана көп түрлүү товарларды дүңүнөн саткан "Дружба" компаниясы. Мындан сырткары, ал "Таш-Кара-Добо", "Тундук", "Бишкек-Чен Гун" (ИУ-Китай) ишканаларынын негиздөөчүлөрүнүн бири.

Кен казган компания кантип эшек экспорттоп жатат?

"Береке Майнинг" ЖЧКсы кен казуу менен алектенсе, ага кандайча эшек багып, экспорттоого уруксат берилгени суроо жаратты. Бирок Ветеринардык жана фитосанитардык мамлекеттик инспекциянын директору Калысбек Жумаканов компаниянын башка дагы иштер менен шугулданууга лицензиясы болгондуктан уруксат берилгенин айтат. Ошондой эле ал Кыргызстан боюнча эшек багылган жер бир эле Мадыда бар экенин белгиледи.

"Ишкерлер өзү тегерек четин тосуп, ветеринардык-санитардык талаптарга ылайыктап логистикалык борбор куруптур. Биз эшектерди тирүү алып чыгып кетишине уруксат бергенбиз. Анткени анын териси башка өлкөлөрдө баалуу экен. "Менталитетке туура келбейт" дешет, чочкону деле багып, сатып атышпайбы. "Жагымсыз жыт чыгат" дейт, эмне чочко жыттанбайт бекен? Жаап же башка жакка көчүрөлү десек ишкерликке тоскоолдук кылган болобуз. Мыйзам бузулган жок да", — деди Жумаканов.

Эшек фермасын кайтарган "Гром" күзөт агенттигинин негиздөөчүлөрүнүн бири — ЖК депутаты Азамат Арапбаевдин бир тууганы Аким Арапбаев. Ал эми директору Акмал Суеткулов. Ушул эле жаран депутат өзү түптөгөн "Азия-Юг" ишканасын дагы жетектейт.

7616
Белгилер:
компания, коргонуу, жумуш, ишкердик, бизнес, эшек
Тема боюнча
Кыргызстандын төрт продукциясынын экспорттук көлөмү өстү. Тизме
Кыргызстанда этти кайра иштеткен 296 ишкананын үчөө гана стандартка төп келет
Евробиримдиктин желеги. Архивдик сүрөт

Вашингтон Европаны чындап жазалоого белсенди

94
(жаңыланган 22:32 13.07.2020)
Саясий баяндамачы Иван Данилов Евробиримдик АКШнын "каарына" суверенитетке ээ болуу аракети үчүн калып жатканын айтат.

Facebook, Google жана Amazon сымал IT үлкөндөрү менен начар мамиледе болгонуна карабастан Дональд Трамп америкалык корпорацияларды европалык салыкчылардан коргоо үчүн Кошмо Штаттар менен Евробиримдиктин ортосундагы трансатлантикалык тилектештик жана ак ниеттүүлүктүн калдыктарын да курмандыкка чалууга даяр экенин көрсөттү.

Бир топ жылдан бери бышып-жетилип калган жаңжал ушул тапта миллиарддаган долларга жыга турган каржылык сокку урууларга алып келди. Евробиримдик америкалык корпорацияларды жарга такагысы бар. Алар ондогон жылдардан бери Европа биримдигинин аймагында салык төлөбөстөн иштеп келишкен. Ал эми Кошмо Штаттар минималдык фискалдык суверенитетке ээ болуу аракети үчүн Евробиримдикти жазалоого киришти.

Трамптын командасына баа бербей кое албайсың, себеби алардын кек алышы кыйла даректүү. "АКШнын европалык колонияларында" иштеген америкалык IT бизнес салык төлөөгө тийиш деген оюн ортого салууга дааган, эркиндикке карай европалык умтулуунун авторун атап, дароо каршы жооп кайтарылды. "Google, Facebook жана Amazon корпорацияларынан салык алууну" демилгелеген киши Франциянын президенти, Европаны дүйнөлүк күч уюлу катары калыптандыруу жөнүндө кеп кылгандан жадабаган Эммануэль Макрон болуп чыкты. Ак үйдүн каарына калган компаниялардын тизмеси Елисей ордосун болушунча чайпалткыдай түрдө түзүлгөн.

АКШ Сирияны колдоого алган Россия менен Кытайды жазаламай болду. Видео

Американын каржылык CNBC телеканалы: "Франциялык үлкөн компаниялардын акциялары бул категориядагы айрым товарларга АКШда жогорку тариф бекитилери боюнча жарыяланары менен арзандап кеткен. Келерки жылдын январь айынын аягынан тарта күчүнө кире турган жаңы тарифтерге ылайык, АКШнын Соода өкүлчүлүгү (Тышкы соода мамилелери боюнча федералдык агенттиги – ред. тактоосу) Франциядан мындай товарлардын импортунан 100 пайызга чейинки төлөм жыйнай алат. Болжонгон сумма (жаңы тарифтерге камтылчу импортко таандык — ред. тактоосу) 2,4 миллиард долларды түзөт. Франциялык акциялардын арзандашы Louis Vuitton, Hennessy, Hermes, Christian Dior, Gucci, Yves Saint Laurent жана Balenciaga ээлик кылган ири компанияларын солгундатат", — деп билдирет.

"Жүз пайыз — бул өтө көп. Бул тариф эмес. Жүз пайыз дегени – бул айып пул", — деген пикирин билдирген Chanel үйүнүн президенти Бруно Павловский америкалык The Wall Street Journal басылмасына. Америкалык аткаминерлердин бул окуяларга карата өз версиялары бар экенин белгилей кетели. Алар чындап келсе булардын баарына Евробиримдиктин аймагындагы дал америкалык компанияларды жок кылгысы келген Макрон күнөөлүү дегенден артка кайтышпайт. Мындай айыптоо мекенчил маанайдагы америкалык маалымат каражаттарынын да шектенүүсүн жаратууда.

Борбор Азия жана Кавказга биолаборатория курууда АКШнын көздөгөнү эмне?

"Кошмо Штаттар француз салыгынын түзүлүшү Facebook, Google жана Amazon өңдүү америкалык интернет ишканаларына багытталган деп эсептейт. Анткен менен бөлөк өлкөлөр да өз рынокторунда миллиарддаган доллар киреше тапкан фирмалардан салык алуунун жолун табууга улам ашыгып келишет", — деп маалымдайт Politico басылмасы.

Трамп тараптан өч алуу инструментин тандоо, балким, "франциялык люкс" инвесторлор ишенимдүүлүктүн аралчасы жана "мээлүүн жай" деп саналгандыгына байланыштуу болушу мүмкүн. Алар өтө бардар керектөөчүлөр менен гана иш алып барган франциялык компаниялар коронавирус эпидемиясынын, соода согуштарынын таасиринен мыкты корголгон деп боолголоп келишкен.

Эпидемия менен күрөшүүгө сүңгүгөн Франция терең экономикалык туңгуюктан улам люкс классындагы компаниялар жарык нуру жана үмүттүн шооласы, ошондой эле салттуу өнөр жай тармагында Германия же Кытай менен атаандаша албаса да, эл аралык аренада кандайдыр атаандаштык артыкчылыгынын символу катары каралып келген.

Россияны дүйнөгө жаман көрсөткүсү келгендер "кой терисин" жамынганбы?..

Бул символду тебелеп-тепсөө, иш жүзүндө аталган компаниялардын америкалык рынокко киришине бөгөт коюу – эгер франциялык президенттин администрациясын коркутуп коюуга, жалпы европалык салык саясатына таасир этүүгө багытталган болсо, жакшы амал.

Француздар чечиминен кайтпай, америкалык компанияларга салык киргизиши (куру дегенде эле улуттук деңгээлде) мүмкүн, бирок немис аткаминерлери мындай түрдөгү жалпы европалык салыкты киргизүүнү колдору күмөн. Алардын, маселен, немис автомобилдерине 100 пайыздык тариф алууга тобокелге барышы арсар.

Экинчи жагынан, кеп мында жеке экономикалык жаңжал туурасында. Бул – көбүнесе европалык саясатчылардын өздөрүнүн макамы жөнүндөгү талаш сымал. Иш жүзүндө тигил же бул аймакка таандык экенин көрсөтүп турган аныктоочу фактор – жергиликтүү бизнесмендердин кимге салык төлөрү жөнүндөгү маселе.

АКШнын Кытайга карата кытмыр планы: пандемиядан улам ачылган көшөгөлөр

Кимдин мындай салыкты киргизип, жыйноого акылуу болсо, ошол белгилүү аймактагы бийлик ээси болуп саналат эмеспи. Тарыхта кай бир чет өлкөлүк көпөстөр же ишкерлер белгилүү бир өлкөдө төгүмсүз жана салыксыз соода же кызмат көрсөтүү укугуна ээ болгон учурлары болгон. Бирок андай көрүнүштөр ал согуштан жеңилип же аскер күчтөрүн колдонуу коркунучу менен кандайдыр көз карандылык шарттарына кол койгон учурларда гана орун алган. Америкалык компаниялар шарттуу Франциянын онлайн жарнама жана интернет соода рыногунда үстөмдүк кылган оюнчуга айланып, француз ишканаларынан миллиарддаган евро таап (аны менен бирге каалаган француз бизнесин кеминде эле аларды интернетте натыйжалуу жарнамалап же өз товарын сатуу мүмкүнчүлүгүнөн арылтып коюу менен эле "кыйратып кое алгыдай" күчкө ээ), бирок франциялык бюджет бул жагдайда бир да тыйын ала албаганы – Франция мында толук экономикалык суверенитетке ээ эмес экенин туюндурат. Үч пайыздык жупуну салыкты киргизүү чечимин бюджетти толуктоо каалоосу гана эмес, экономикалык көз карандылыгын калыптандыруу аракети десек болот.

Францияны жазалоо боюнча Трамптын администрациясынын аракеттерин АКШнын Республикалык да, Демократиялык партияларынын өкүлдөрү да колдоп чыкты.

Мурдагы коркутууларга Франция бийлиги, ал түгүл Германиянын өкүлдөрү артка кетенчиктебестен, көз карандысыз экономикалык саясатты киргизүү укугун коргоого даяр экенин көрсөтүшкөн.

"Баррели миң доллардан": америкалык план мунай рыногун "муңайтышы" ыктымал

Эгер кырдаал дале бул сценарий менен улана берсе, анда АКШдагы күзгү шайлоодо кимдин утканына карабай, Вашингтон — Париж жана Вашингтон — Берлин мамилеси бузулгандан бузула берчүдөй.

Эгер жакынкы келечекте Chanel атырын же Hermes сумкасын америкалык керектөөчү аткезчиликтин арты менен гана сатып ала алса, анда европалыктар америкалык социалдык медиа булактарына альтернатива издөөгө аргасыз болуп калышы ажеп эмес. Экономикалык деглобализациянын тамырлары турукташып калган эл аралык байланыш "асфальтын" жарып чыгып жаткандай.

Ааламдашкан экономиканын азыркы тутумуна ичи чыкпаган өлкөлөр үчүн бул – өткөндүн каталарын оңдоп, деглобализацияланган келечекте ыңгайлуу ордун камсыз кылууга соңку жана урунттуу мүмкүнчүлүгү.

94
Белгилер:
салык, саясат, экономика, Евробиримдик, IT компаниялары, АКШ
Тема боюнча
Атаандаштыкка чыдабай... Европа менен Азия АКШнын суюлтулган газынан баш тартууда
Бешинчи муундагы F-35 Lightning II учагы. Архивдик сүрөт

F-35тин мүчүлүштүктөрү: америкалык учактын мандеми эмнеде?

215
(жаңыланган 11:39 27.06.2020)
Физиканын мыйзамдары америкалык авиаконструкторлордун аракеттерин көз жаздымда калтырып, кыйла кымбат баалуу долбоорлорун "тушап коет".

Бешинчи муундагы F-35 Lightning II учагы кынтыксыз эмес, бирок АКШ инерция боюнча глобалдык милдет жана курал-жаракты бардык жагынан бышып жетиле элек авиатехникага жүктөөгө тырышууда. F-35 бортундагы B61-12 термоөзөктүк бомбалары үнгө чейинки крейсердик ылдамдыкты, радарлардын "көзүнө илиниши", кырсыкка кабылуу коркунучунун бийиктиги жана ынанымсыздыгын жайкап койчудай ойлошот. Америкалык учактын оош-кыйышын аскерий баяндамачы Александр Хроленко талдап көргөн.

The Aviationist басылмасы апта башында америкалык Эдварс (Калифорния штатында) авиабазасынын чет жакасында F-35A Lightning II истребителин (Convetional Take Off and Landing модификациясындагы, башкача айтканда, учушу жана конушу стандарттык) өзгөрүлмө кубаттуулуктагы B61-12 термоөзөктүк бомбасын колдонуу боюнча сыноодон өткөрүлгөнүн жазып чыкты.

Кош багыттагы өзөктүк курал ташуучу учактын тастыкташтырылышы 2023-жылдын январына пландалган. Программалык камсыздоосун (азыркы Block 3A версиясынан Block 4 версиясына чейин) жаңыртуу менен бирге F-35А истребителдери пландалгандай термоөзөктүк бомбаларды ташып жана пайдалана алат. Ал гана эмес, АКШнын Куралдуу аба күчтөрүнүн куралдануу системасына B61-12 жуурулушкан соң F-15E жана F-16нын "өзөктүк истребителинин культтук ролу" F-35A учагына өтөт. Заманбапташтырылган B61-12 авиабомбасын байкоо системасы жана өзгөрүлмө кубаттуулуктагы (50 килотоннага чейин) аскердик бөлүгү айырмалайт.

"Посейдон" сыноодон өтүүдө: Батыш мүнөздөгөндөй "кыямат күндүн торпедасыбы"?

F-35 Lightning II көп багыттуу истребитель-бомбалоочу учагын жасоо программасына 1,3 триллион доллардын тегерегиндеги каражат кеткен. F-35тин ар кыл модификациялары 2011-жылдан бери сериялык түрдө чыгарылып келет. Бул машинага АКШда адегенде чоң үмүт артышкан, бирок иш жүзүндө аны пайдаланууда адистердин көңүлү калууда. Мурда Пентагонго ыктаган Defense News басылмасы F-35 Lightning II учагын бир топ сындап жазды. Фактылар айгинелеп тургандай, F-35 – форсажда бир мүнөттөн ашпаган убакытта ылдамдай алган үнгө чейинки истребитель, ал эми 1 Махтан өйдө ылдамдыкта бир мүнөттөн кийин ысып кеткен корпусу талкаланып калышы мүмкүн. 1,6 Махтан жогорку ылдамдыкта учактын куйругу түшүп калышы ыктымал.

Бешинчи муундагы истребителдин дайымкы (крейсердик) ылдамдыгы 1,4 Махтан төмөн боло албайт, андан улам технологиялык үзгүлтүгү болгон эмес. Иш жүзүндө F-35 төртүнчү муундагы учак бойдон калды, термоөзөктүк бомбалар – ал үчүн көтөрө алгыс жүк.

Компенсациялык чаралар

Өткөн жылы "бешинчи муунга жетүүгө тырышкан" F-35 истребителинин негизги кемчиликтеринин санын бешке чейин төмөндөтө алышты. Бул деле 100 миллиондук машина үчүн өтө көп болуп саналат.

Пентагон анын "эксплуатациялык мүнөздөмөлөрүн" дароо оңдой койгон, азыр F-35 кыска ыкчамдай алган үнгө чейинки ылдамдыктагы учак болуп саналат.

Жогорку ылдамдык планердун, F-35тин атайын стелс-катмарынын, учактын арткы бөлүгүндөгү сансыз антенналарынын бузулушуна коркунуч туудурат. Аскердик-деңиз күчтөрү жана деңиз пехотасы үчүн F-35B жана F-35C модификациялары 1,2 Махтын тегерегиндеги ылдамдыкта уча ала турган секунддар аныкталды.

Америка да алсам дейт. Калашников автоматы дүйнөнү багынтууда

Учуп-конушу стандарттык F-35A учагынын истребителдеринин варианттарында да программалык камсыздоодон дабышсыз жана радарларга көрүнүп калышы (ал тургай, сырткы асмасына курал-жарак артылган болсо, үнгө чейинки ылдамдыкта да) өңдүү сапаттарына чейинки ушундай эле кемчиликтер бар. Учактын аброю биротоло түшкөндөй эле болгон, бирок, аны пайдаланууда дагы да күтүлбөгөн кемчиликтери байкалып калууда. 24-июнда Air Force Magazine журналы америкалык F-35A истребителдерине түнөргөн булуттарга 25 милден (40 чакырымга чукул) азыраак аралыкка чейин жакындоого тыюу салынганын маалымдады.

Көрсө, инерттик газды генерациялоонун боттук тутумунун (OBIGGS) конструктивдик өзгөчөлүктөрү атмосфералык электр разрядынан абада истребителдердин май куюлган бактарынын жарылып кетишине алып келиши мүмкүн. OBIGGS системасы мурда эле ар кандай пикир жаратып келген, 2014-жылы заманбапташтырылса да жарылып кетүү коркунучу эмнеге жоюлбаганы кызык.

Жаңы F-35 Lightning II учактарынын бир нече ирет кырсыкка кабылышынан улам башка жагымсыз "ачылыштары" да чыгарын, ал түгүл жай жагдайда да F-35тин пайдаланышы кооптуу болорун болжоого болот. Бешинчи муундагы россиялык Су-57 истребителдери же радиоэлектрондук күрөш каражаттарына абада кокус туш келип калса, бул америкалык "чагылгандар" эмнеге кабыларын айтпай эле коелу.

Белгисиздикке карай учуш

Кошмо Штаттар F-35 учактарын европалык союздаштарына активдүү сатууга умтулууда. Заманбапташтырылган B61-12 термоөзөктүк авиабомбасы да башынан эле Европага багытталган. Сериялык өндүрүшү быйылкыга белгиленген, ошол эле убакта америкалыктар B61-12 бомбаларын Европада жайгашкан өздөрүнүн базаларына жайгаштырууга ниеттенет. Ошентсе да, учушта (форсажда) бортундагы өзөктүк курал жүктөлгөн истребителдин куйругу түшүп калышы же чагылган уруп коюшу да мүмкүн. Башка варианттары да болушу мүмкүн, бирок кандай болгон күндө да союздаштарына кыйын эле болот. Америкалык куралдар Европа үчүн улам кооптуу болуп барат. Германиянын каршылыгы улам күч алууда. Франция да: "F-35ти таңуулоону токтоткула" деп ачык айткан. Бул – АКШнын аскердик авиакурулуш жаатындагы технологиялык мүмкүнчүлүктөрүн ашкере баалоонун мыйзам ченемдүү жыйынтыгы. Мурда да бешинчи муундагы F-22 Raptor истребителин жасоо тажрыйбасы ийгиликсиз деп табылган. Анын дагы радиосиңирүү катмары ишенимсиз, метрлик диапазондо радарлардын "көзүнө чалдыгат", аракет радиусу – 750 гана чакырым, сериялык машинанын баасы өтө кымбат (350 млн доллар турат). Бешинчи муундагы (катталышы боюнча) F-22 жана F-35 учактарынын алгылыктуу абалга жеткирбей жатып эле америкалыктар аскердик авиациясынын келечегине үмүттүү карашат.

Дүйнөдө Т-15 "Арматанын" теңдеши жокпу? Cууга чөкпөс, отко күйбөс курал

Вашингтондун планы боюнча алтынчы муундагы биринчи истребителдер 2030-жылга чейин учуп калышы зарыл эле. Сүрөттөлүшүнө караганда душман да алар үчүн даяр имиш. "Күрөшүүгө тийиш болгон тынчокеандык театрдагы ири аралыкты эске алуу менен" кошумча май куйбай туруп эле алыс аралыкка учурууну пландашат. Радиоэлектрондук күрөш комплексинин эсебинен абадагы артыкчылыгы арбын, абдан чыдамкай болот деп ишенишет.

Бирок "бешинчи муундагы" F-35 Lightning II учагынын кыйла кымбатка түшкөн ийгиликсиз учуштарынан кийин америкалык конгресс 2021-жылы алтынчы муундагы истребителдерди жасоо программасын каржылоону 85 пайызга кыскартууга ниетин билдирген.

215
Белгилер:
истребитель, курал-жарак, Аскер, Европа, өзөктүк курал, АКШ, учак
Тема боюнча
Аралыктан мина коюп... Россия Жеңиш парадында соңку үлгүдөгү системасын көрсөтөт
Тест-системалар. Архивдик сүрөт

Россия гумжардам катары Кыргызстанга 100 миңден ашык тест-система берди

0
(жаңыланган 00:03 14.07.2020)
Саламаттыкты сактоо министрлиги кыргыз өкмөтүнүн атынан Россия Федерациясына жана Роспотребнадзорго ыраазычылык билдирди.

БИШКЕК, 13-июл. — Sputnik. Коронавирус инфекциясына каршы күрөштүн алкагында Россиядан Кыргызстанга гуманитардык жардам келди. Бул туурасында өкмөттүн маалымат кызматы билдирди.

Анда COVID-19ду аныктоочу тест-системалардын бир нече партиясы берилгени айтылат.

"Жалпысынан жардам иретинде 80 720 изилдөө жүргүзүү үчүн 820 ПЦР тест-системасынын комплектиси, 24 000 изилдөө үчүн толук эмес 480 топтом келди", — деп жазылат маалыматта.

Роспотребнадзордун жетекчиси кыргыз медиктеринин кесипкөйлүгүнө баа берди

Саламаттыкты сактоо министрлиги кыргыз өкмөтүнүн атынан Россия Федерациясына жана Керектөөчүлөрдүн укуктарын коргоо чөйрөсүндөгү көзөмөл боюнча федералдык кызматына көмөктөшүүсү үчүн ыраазычылык билдирип, коронавирус менен мындан аркы күрөшүүдө жемиштүү кызматташууга ишеним артты.

0
Белгилер:
аныктоо, тест, гуманитардык жардам, Россия
Тема:
Коронавируска байланыштуу Кыргызстандагы кырдаал
Тема боюнча
Ферганадан Баткенге гуманитардык жардам келди
Кыргызстанга Кытайдан 500 кычкылтек концентратору алып келинди. Сүрөт