Кыргызстандагы электрондук капчыктар. Колдонуу шарттары
(жаңыланган 17:41 20.02.2021)
Акыркы жылдары Кыргызстанда электрондук капчыктар бир топ популярдуу болуп, жарандар көп пайдалана баштады.Sputnik Кыргызстан редакциясы өлкөдө иштеген электрондук капчыктарга кантип катталса болорун жана кандай мүмкүнчүлүктөр бар экенин билип көрдү.
Улуттук банктан түшүндүрүшкөндөй, КР мыйзамдарында эл арасында кеңири колдонулуп калган "мобилдик капчык" деген түшүнүк жок. Анын ордуна "электрондук капчык" сөз айкашы пайдаланылат. Электрондук капчык — бул электрондук акча сакталып жана кимге тиешелүү экенин далилдеп турчу программалык камсыздоо.
2020-жылдын аягында өлкөдө 12 электрондук капчык бар болчу. Алар: "Элсом", Umai, "Компаньон", "Илбирс", Balance, Megapay, "О! Деньги", "Аманат", Mbank Online", Namba One, "Алтын" жана "Мобильник деньги".
Былтыркы жылдын экинчи кварталынан тарта акыркы экөөнүн иши чектелип калган. Тагыраагы, алардан акча алууга гана болот. Мындан тышкары, "Аманат" капчыгын жеке тараптар колдоно албасы белгилүү болду.
Колдонуу шарттары
Төмөндө биз негизги маалыматтарды гана бердик. Ар биринин өзгөчөлүктөрү бар, бирок тексттин көлөмү өтө чоң болуп калбашы үчүн алардын бардыгын кошо алган жокпуз. Бирок ар бир капчыкты жазып жатканда расмий сайтына шилтемелер көрсөтүлгөн. Аларга кирип, шарттары менен толук таанышып алса болот.
Баса, катталуунун эки жолу бар — онлайн жана кеңсеге барып толук идентификациядан өтүү. Онлайн-каттоодон гана өткөн капчыктарда транзакциянын көлөмү боюнча чектөөлөр бар.
"Элсом" капчыгы
Толук шарттары: https://elsom.kg/
- долбоордун ээси — KICB банкы.
- толуктоо акысы — акысыз (KICB банкында эсебиңиз болсо). Башка учурда 2 сомдон 3 пайызга чейин;
- акча алуу — акысыздан баштап (KICB картасына же эсебине которгондо) 0,3-1 пайызга чейин (аз дегенде 5-10 сом);
- башка банк жана капчыктарга акча которуу — "Элсом" капчыктарынын ортосунда 2 сомдон, "Компаньон" капчыгына — 1,5 пайыз;
- транзакциянын суммасы — миң сомдон 800 миң сомго чейин;
- кызматтарды төлөө акысы — коммуналдык жана банктык төлөөлөр акысыз. Башкалары (мамлекеттик электрондук кызматтар дагы бар) 60 сомго чейин;
- насыя алуу мүмкүнчүлүгү — айына 500 сомдон 15 миң сомго чейин (жылдык чени 30 пайыз жана насыя берилип жатканда сумманын 5 пайызы алынат);
- калдык акчага пайыз төлөө — жылына 5-10 пайыз (200 сомдон жогору).
Umai капчыгы
Кеңири шарттары: www.umai.kg
- долбоордун ээси —"Компаньон" банкы;
- толуктоо акысы — 15 сомго чейин;
- акча алуу — операция эки этап менен өтөт. Алгач "Элкарт" картасына өткөрүү (комиссия 0,7 пайыз). Андан соң картадан чыгаруу (комиссиясы сиздин банктын тарифинен көз каранды);
- башка банк жана капчыктарга акча которуу — "Элсомго" 0,7 пайыз, Balance, Megapay, "О! Деньги" сыяктуу башка капчыктарга комиссиясыз;
- транзакциянын суммасы — айына 150 миң сомго чейин;
- кызматтарды төлөө акысы — коммуналдык кызматтар акысыз;
Mbank Online
Кеңири шарттары: https://www.cbk.kg/mobile-banking
- долбоордун ээси — "Кыргызстан коммерциялык банкы";
- толуктоо акысы — акысыз (анын ичинде Pay24, Quick Pay, Umai, "Оңой" аркылуу дагы). Башка терминалдарда, банк тиркемелеринде жана электрондук капчыктарда 2 пайызга чейин;
- акча алуу — банктын тарифтерине ылайык, учурда 0-1 пайыз;
- башка банк жана капчыктарга акча которуу — "Элкарт Мобайл" — 1 пайыз, "Компаньон", Optima 24, "О!", — 1,5 пайыз, Balance жана Megapay — 2,5 пайыз.
- транзакция суммасы — күнүнө 500 миң сомго чейин;
- кызматтарды төлөө акысы — коммуналдык кызматтарды төлөө акысыз. Калгандары 1 сомдон тарта бир пайызга чейин;
- Каттоодон өтүү үчүн бул банктын картасы керек. Ээсинин айтымында, бул долбоор электрондук капчык эмес, мобилдик банкинг болуп эсептелет.
Balance капчыгы
Кеңири шарттары: https://balance.kg/
- долбоордун ээси — "Скай Мобайл" ЖЧКсы ("Билайн") жана "Дос-Кредобанк";
- толуктоо акысы — "Дос-Кредобанк", Umai терминалдарынан, "Билайн" компаниясынын офисинен акысыз. Pay24 терминалынан — 2,5 пайыз;
- акча алуу — "Beeline Элкарт" картасына которуу керек (1 пайыз), башка банктардын "Элкарт" картасы (1,5 пайыз). Ошондой эле акча алуу үчүн комиссия сиздин картанын тарифинен көз каранды;
- башка банк жана капчыктарга акча которуу — Megapay, Umai комиссиясыз, "О! Деньги " жана "Элсом" — 2 пайыз;
- Насая алуу мүмкүнчүлүгү — 30 миң сомго чейин;
- кызматтарды төлөө акысы — коммуналдык кызматтар акысыз. Башкалары 5-10 сом же 1 пайыз;
- Катталуу үчүн "Элкарт" картасы керек.
Megapay капчыгы
Кеңири шарттары: https://www.megacom.kg/megapay/ru.html
- долбоордун ээси — "Альфа Телеком" ЖАКсы (MegaCom) жана "Дос-Кредобанк";
- толуктоо акысы — банк терминалдары жана "Билайн" компаниясынын кеңселеринде акысыз;
- акча алуу — "Дос-Кредобанктын" кассасы аркылуу үч пайыз, "Элкарт" картасы (которуу комиссиясы 1 пайыз) жана кийинки акча чыгаруулар сиздин картаңыздын тарифинен көз каранды;
- башка банк жана капчыктарга акча которуу — Megapay, Balance капчыктарына акысыз. "Элсомго" 3,5 пайыз;
- кызматтарды төлөө акысы — коммуналдык кызматтарга акысыз, калганы ар кандай баада;
- транзакциянын суммасы — бир жолкусу 15 миң сомдон жогору эмес, айына 300 миң сом.
"О! Деньги" капчыгы
Кеңири шарттары: https://www.dengi.kg/
- долбоордун ээси — "Дос-Кредобанк" жана "Нур-Телеком" ЖЧКсы ("О!");
- толуктоо акысы — O!Store дүкөндөрүнөн балансты толуктоо акысыз. Ал эми компаниянын терминалдары аркылуу 3 сом комиссия төлөйсүз. Башка терминалдар аркылуу болсо, ошол банктын көрсөткөн ченемдери боюнча акы төлөгө туура келет;
- акча алуу — банк эсебине жана карталарга которуу менен чыгарып алса болот. Банк аркылуу дароо капчыктан алам десеңиз миң сомдон жогорку сумманы алуу керек. Анда 2,5 пайыз төлөйсүз. "Элкарт" картасына 1 пайыз, башка карталарга 1,5 пайыз;
- кызматтарды төлөө акысы — коммуналдык кызматтарды төлөө акысыз. Жол эрежесин бузгандар айып пул төлөө үчүн 20 сом кошуп беришет;
- транзакциянын суммасы — кеңседе идентификациядан өткөн капчыктардан бир ай ичинде 200 миң сом;
- насыя алуу мүмкүнчүлүгү — айына 500 сомдон 5000 сомго чейин 10 пайыздык чен менен берилет.
"Компаньон" капчыгы
Кеңири шарттары: https://www.kompanion.kg/ru/retail/wallet_kompanion
- долбоордун ээси —"Компаньон" банкы.
- толуктоо акысы — акысыз ("Компаньон" банкынын терминалдары, кассалары, филиалдары аркылуу). Башка банктардын терминалдары аркылуу 1-2 пайызга чейин;
- акча алуу акысы — банктын өзүнүн банкомат жана терминалдарынан 0 - 0,4 пайыз. "Компаньон" банкынын кассалары аркылуу 0,5 пайыз. Агенттер аркылуу 30 сом. Башка банктардын банкоматтарынан алсаңыз, ошол банктын шарттарына жараша төлөйсүз;
- кызматтарды төлөө акысы — коммуналдык кызматтар, интернет, уюлдук байланыш жана соода борборлорунан соода кылуу акысыз. Башка кызматтарга 5 сомдон башталат;
- башка банк жана капчыктарга акча которуу — "Компаньон" капчыктарынын ортосундагы которуу 500 сомго чейин акысыз. Андан жогору болсо суммасына жараша 2 сомдон 90 сомго чейин. "Компаньон" банкындагы эсептерге которуулар дагы акысыз. Кайсы банктыкы экенине карабай "Элкарт" картасына каражат которуу 0,5 пайыз;
- транзакциянын суммасы — кеңседен идентификациядан өткөн капчыктардан айына 6 миллион сомго чейин (бир жолку транзация 200 миң сомго чейин) акча которууларды аткарса болот;
- насыя алуу мүмкүнчүлүгү — 30, 45 же 60 күнгө 1 миң сомдон 15 миң сомго чейин 8 пайыздык (суммадан) чен менен кредит алса болот;
Namba One капчыгы
Кеңири шарттары: https://nambaone.app/
- Долбоордун ээси — "Региональные Платежные Системы" ЖЧКсы жана "Кыргызстан коммерциялык банкы" өнөктөш банк;
- толуктоо акысы — 1-2 пайыз.
- акча алуу акысы — башка электрондук капчыктар, карталар аркылуу өткөрүп же "Кыргызстан коммерциялык банкы" аркылуу накталай акча алса болот. Акысы 1-2 пайыз;
- кызматтарды төлөө акысы — коммуналдык жана мамлекеттик кызматтар акысыз. Коммерциялык кызматтар 5 сомдон башталат.
- башка банк жана капчыктарга акча которуу — орто эсеп менен 1 пайыз.
- бир күндүк транзакциянын суммасы — бир капчыкта эң көп дегенде 1 миллион сом кармоого болот. Бул сумманын ичинде транзакциялар боюнча чектөө жок.
"Илбирс" капчыгы
"Бакай банкына" тиешелүү "Илбирс" электрондук капчыгы учурда иштеген жок.
Электрондук капчыктар коопсузбу?
Улуттук банктан билдиришкендей, "Кыргыз Республикасынын төлөм системасы жөнүндө" мыйзамына ылайык, электрондук капчыктар банктар менен өнөктөш болуп, алар аркылуу гана иштей алат.
"Ал эми өлкөдө жарандардын каражатын сактоо боюнча коопсуз звено катары банк системасы эсептелет. Андыктан банк кайсы өнөктөш менен иштегенине карабай электрондук акчалар үчүн толугу менен жооп берет", — деп айтылат билдирүүдө.
Финансылык тескөөчү орган электрондук капчыкты пайдалануудан мурда анын коопсуздук шарттарын жакшылап карап көрүүнү сунуштайт. Мындан тышкары, каражатты пайдалануудагы чектөөлөргө көңүл бурулушу керек.
©
Sputnik / Табылды Кадырбеков
Ошол эле учурда Улуттук банк сөз болуп жаткан капчыктарды пайдалануу же пайдаланбоону ар бир адам өзү чечиши керектигин кошумчалады.
Стратегиялык кадам: Россия АКШ облигацияларына миллиард салды
(жаңыланган 22:32 25.02.2021)
Соңку жылдары Москва бул баалуу кагаздардан пландуу түрдө арылып келгени менен РФ Борбордук банкы өткөн жылдын декабрында Кошмо Штаттардын мамлекеттик карызына салымын дароо миллиард долларга жогорулатты.Эмне үчүн дал азыркы убакта ушундай кадамга барышты? Ушул тема тегерегинде Наталья Дембинская ой учугун чубаган.
Баалуу кагаздар баяны
АКШ Каржы министрлигинин маалыматына таянсак, дал ушул тапта Россиянын 6,011 миллиарддык америкалык мамлекеттик облигациялары бар. Алардын ичинен 1,2 миллиарддык облигация – узак мөөнөттүү, ал эми 4,8 миллиарды — кыска мөөнөттүү баалуу кагазга салынган. Декабрда анын запасы миллиард долларга толукталган.
Бул кагаздарды сатуу менен АКШ өкмөтү бюджеттин таңсыктыгын жана башка чыгымдарын жабат. Америкалык мамлекеттик карыз дээрлик 28 триллионго чыккан.
2010-2013-жылдары россиялык салымдын көлөмү 170 миллиарддан ашкан. Москва ири трежерис ээлеринин катарына кирет. Бирок 2014-жылдын апрелинде Вашингтон санкция киргизген соң, аталган мамлекет облигациялардан кутула баштаган.
2018-жылы РФ Борбордук банкы АКШнын казыналык милдеттенмелер топтомун дароо эки эсе кыскартуу менен ири сатыкты уюштурган. Эл аралык резервдердеги америкалык баалуу кагаздардын үлүшү болушунча азайган. Аларга салынган каражатты РФ башкы банкы алтын, евро жана юанга жумшаган.
Диверсификация
Америкалык мамлекеттик карыз АКШнын Каржы министрлиги тарабынан чыгарылган баалуу кагаз болуп саналат. Вексель жана мамлекеттик облигацияларды жеке жана юридикалык тараптар, штат жана мамлекеттердин бийлиги сатып алышат.
Бул кагаздардан түшкөн киреше анчалык жогору эмес, эки жарым – үч пайыздын тегерегинде. Бирок европалык жана япониялык карыздар боюнча киреше дээрлик жок же терс пайдага ээ. Анткен менен кеп башкада: Кошмо Штаттардын мамлекеттик облигациялары дүйнөдөгү эң ынанымдуу жана акчага тез айланчу инструменттердин бири болуп саналат. Аларды сатып алуу жана сатуу жеңил.
"Убактылуу бош (ашыкча болуп) турган каражаттарды АКШнын мамлекеттик карызына салуу пайдалуу. Жылдык эки-үч пайыз – миллиарддар сөз болуп турганда кыйла көлөмдүү акча. Ушул учурда саясат экономикалык чечимдерге таасир этпөөгө тийиш", — дейт РФ Мамлекеттик думасынын каржылык рынок комитетинин мүчөсү Дмитрий Скриванов.
Ошентип, трежеристин көлөмүн көбөйтүү менен Москва рыноктон орун алышын белгилегендей болду. Бул эл аралык резервдерди диверсификациялоо үчүн керек. Азыр Россиянын 590 миллиард доллары бар, анын ичинен алты миллиарды түздөн-түз АКШнын мамлекеттик карызына салынган. Талдоочулар муну Москва жалпы дүйнөлүк тенденциялар менен кадамдаш экендигин түшүндүрөт. Долларга суроо-талап өсүп келет, анткени бул валюта өзгөрүлмөлүүлүккө жана инфляцияга анча дуушар болбойт.
"Миллиард доллар — кыйла ири сумма, муну активдердин кыйла чектелген тобуна салууга болот. Алтынга суроо-талап өтө жогору, евро менен юанда ансыз деле резервдин үлүшү чоң.
Америкалык мамлекеттик карызга салым салуу — бул диверсификациялоо элементи", — деп тактайт Өнөр жайчылар жана ишкерлердин орус-азиялык союзунун президенти Виталий Манкевич.
Кытай варианты
Былтыр декабрдын аягында Кошмо Штаттардын мамлекеттик баалуу кагаздарынын ири көлөмдөгү ээси Япония болгон (1,2 триллион доллар). Андан мурда бул багытта Кытай биринчи орунда эле, азыр Пекин 1,06 триллион доллар менен экинчи сапка түшкөн. Үчтүктү 428,9 миллиард доллар менен Улуу Британия жыйынтыктайт.
Соода согушунун айынан кытайлыктар 200 миллиарддан ашуун көлөмгө кыскартуу менен бул баалуу кагаздардан пландуу түрдө арылып келген. Анткен менен Пекиндин колундагы эбегейсиз америкалык карыз — Вашингтонго кысым көрсөтүүнүн күчтүү рычагы.
Уланып келе жаткан жаңжал кокус АКШнын экинчи ири чет элдик кредитору трежеристи масштабдуу сатууну уюштурушу ыктымал деген чочулоолорду күчөтөт. Андай көрүнүштүн кесепети оңдурбайт. Биринчиден, кыска убакытта 100-200 миллиарддык облигацияларды сатуу алардын баасын түшүрөрү турулуу иш.
Натыйжада Кытайдын өзүнүн тышкы актив жана резервдеринин наркы арзандаган трежеристи сатуудан түшкөн пайда сымал эле бир топ төмөндөйт. Ал аз келгенсип доллардын куну түшөт, ал эми Пекинге андай жагдайдын зарылдыгы жок. Америкалык валютанын чабалдашы кытай экспортун кымбаттатат.
Алтын кору
Бир нече жылдан бери россиялык Борбордук банк доллардан кутулуп, алтынга басым жасап келет. 2020-жылы резервдердеги баалуу металлдардын үлүшү алгач ирет америкалык валюталардын көлөмүнөн ашкан, ал эми февралда монетардык алтын кору 136,7 миллиардга жеткен.
РФтин алтын кору жыл ичинде дээрлик 28 тоннага өстү. Универсалдуу акчалай эквивалент деп эсептелген баалуу металл пайыздык киреше алып келүүчү активдерден да пайдалуулугу артып, санкциялык тобокелдиктердин бардык түрүнөн сактап келет.
Bloomberg белгилегендей, Россия дүйнөгө экономикасы үлкөн жана алтын валюталык резервдери көп өлкө доллардык активден арылып, андан кылы кыйшайып да койбосун көрсөттү.
Жаңы толкун: нефтинин бешинчи суперцикли божомолдонууда
(жаңыланган 20:56 17.02.2021)
Пандемиядан улам баасы кескин түшүп кеткен нефть кайра качан калыбына келери түкшүмөлдөнүп жаткан малда дүйнөдөгү ири JP Morgan Chase инвестициялык банкынын экперттери сырье рыногунда кымбаттоонун бешинчи суперцикли башталганын жар салышты.Мындай көрүнүш акыркы 100 жылдан бери бешинчи ирет кайталанууда. Суперциклдин дүйнөлүк экономикада кандай мааниге ээ экени тууралуу макала РИА Новости агенттигине жарыяланды.
Эптеп калыбына келип...
2020-жылы мунай тармагы бир нече жолу өйдө-төмөн болду. Мунун көп себеби бар, негизгилери — суроо-талаптын кескин түшүп кеткен маалында өндүрүштүн эселеп көбөйүшү, пандемия жана чектөөлөр. Мартта нефтинин баасы эки эседен көбүрөөк арзандады. Бирок күздүн соңунда батышта вакциналардын сыноодон ийгиликтүү өтүшү, АКШда президенттик шайлоонун жыйынтыгы нарктын жогорулашына өбөлгө болду. Жашыл технологиялардын жактоочусу Жо Байден Дональд Трамптан айырмаланып америкалык мунайчыларды колдоодон алыс. Ошентип отуруп сегиз айдан кийин биринчи жолу баа максимумдук чекке жетти. Өндүрүштү чектөө боюнча ОПЕК+ уюмунун чечими дагы баанын андан ары жогорулашын шарттады. Натыйжада ушу күндө нефтинин бир баррели 63 доллардан сатылып жатат.
Мындай динамика тармак акырындап калыбына келип жатканынан кабар берет. Мындан аркы өсүү биринчи кезекте жашыл экономикага өтүүгө шашылбаган Азия мамлекеттеринде суроо-талаптын жогорулашы менен шартталмакчы.
Болбосо бир ай мурун туруксуз кырдаалдан улам божомолдор да көңүл жубатарлык эмес эле. Эл аралык Fitch рейтинг агенттиги вакцинацияны эртелетүү менен гана кандайдыр бир жылыштарды күтүп жатканын жарыялаган.
Бешинчи айлампа
JP Morgan Chase ири инвестициялык банкынын экономисттери февралдын башында чийки зат рыногунда өсүүнүн жаңы суперцикли башталганын айтып чыгышты. Адистер мында айыл чарба продукциясынын, металлдын кымбатташын, баррели 50 долларга баалана баштаганын негиз келтиришти.
Акыркы 100 жылда рынокто төрт ирет суперцикл болгон. Соңкусу 1996-жылы башталып, 12 жыл жогорулоонун үстүндө болуп 2008-жылы жетер чегине жеткен. Буга көмүр суутектин активдүү колдонуучусу Кытайдын экономикалык жактан өнүгүүсү да жардам берди. Ал эми азыркы суперцикл пандемиядан кийинки калыбына келүү процесси, акча-кредиттик жана бюджеттик саясаттын өтө эле жумшактыгы, доллардын алсыздыгы, инфляциянын ылдамдашы жана экологиялык саясат менен шартталууда.
©
REUTERS / Ernest Scheyder / File Photo
Платина менен жезге да суроо-талап күч болуп турат. RJO Futures активдерин көзөмөлдөгөн Жон Крузо платинага болгон суроо-талап сунуштан көп экенин, жездин запасы он жылдык минимумга жакындаганын белгиледи.
"Нефть ашкере сунуш кыскарып пандемиянын чеңгелинен кутулуп келе жатканын көрсөтүүдө", — деп жазат Bloomberg.
Туруктуу тренд
Уолл-Стрит пандемиядан кийин экономиканын тез арада калыбына келерине басым жасоодо, демек чийки зат рыногунда узак убакытка чейин дүркүрөп өсүү болору болжолдонууда.
Товар рыногунда баанын өсүшүн Goldman Sachs Group, Bank of America, Ospraie Management сыяктуу финансылык гиганттар да күтүп жатат. Алар деле экономиканы колдоо үчүн ири долбоорлорду жана жапырт вакцинацияны негиз келтиришүүдө.
Goldman Sachs төртүнчү кварталда нефтинин бир баррели 65 долларга чыгарын божомолдоп жатат. Бирок кышында керектөө суткасына үч миллион баррелге чейин кыскарарын кошумчалады. Бул Кытайдын суроо-талабынын айрым бөлүгүн гана жабары да айтылды.
Bank of America (BofA) мунай жыл жарымына чейин 60 долларга жетерин белгилеп жатат. Банктын баамында дүйнөлүк керектөөнүн жарымын камсыздаган отунга суроо-талап суткасына 1,6 миллион баррелдик таңсыктыкты жаратат. ОПЕК менен Эл аралык энергетика агенттиги да жылдын экинчи жарымында суроо-талап өндүрүштүн көлөмүнөн кыйла жогору болорун божомолдошууда. Бул пандемия башталгандан бери ашыкча өндүрүлгөн нефтинин запасын азайтмакчы.
Citigroup жыл соңунда Brent баасы 70, ал эми WTI 68 доллардан сатыларын жоромолдоп жатат. Сауд Аравиясы башында турган өндүрүшчүлөрдүн нефть казууну кыскартышы рекорддук запастан арылууга жардам берери айтылды.
Белгилер:
Өкмөт мунай заттарын сыртка ташып чыгууга тыюу салуу ниетинде
(жаңыланган 22:26 01.03.2021)
Кыргызстанда жылдын башынан тарта автоунаа майынын баасы өсүп келе жатат. Бул мезгил аралыгында бензин 14 сомго кымбаттап кеткен.БИШКЕК, 1-мар. — Sputnik. Кыргыз өкмөтү мунай заттарын Евразиялык экономикалык биримдиктин бажы чегинен сырткары ташып чыгууга убактылуу тыюу салууну сунуштап жатат.
Бул боюнча токтом долбоору өкмөттүн сайтына жарыяланды.
Бийлик муну менен Кыргызстандагы күйүүчү-майлоочу майлардын тартыштыгын алдын алууга аракет кылууда.
Эгерде токтом долбоору кабыл алынса, ал үч күндөн соң күчүнө кирип калат. Тыюу салуу ЕАЭБдин мунай жана мунай заттары боюнча жалпы рынокторун түзгөнгө чейин уланышы мүмкүн.
2021-жылдын башынан тарта 1-мартка чейин россиялык өндүрүштөн чыккан бензиндин тоннасы 300 доллардан 500 долларга чейин өскөн. Кымбаттоо 67 пайызды түзүп, орточо эсеп менен алганда күйүүчү майдын литрине 14 сомдон туура келген. Дизель майдын тоннасы 360 доллардан 470ке чыккан. Пайыздык көрсөткүч менен эсептей келгенде 14 болгон. Бул литрине сегиз сом дегенди билдирет.