Русал ишканасында алюминий өндүрүү. Архив

Аскердик төңкөрүш бааны асмандатты. Рыноктогу орун бөлүшмөйдө ким утат?

189
Лондон биржасында алюминийдин баасы отуз жылдык максимумда, тагыраагы, тоннасы 2837,5 долларды түздү. Баанын жогорулашына Гвинеядагы аскердик төңкөрүш себеп.

Рынокко бокситтердин келиши үзгүлтүккө учуроо коркунучу жаралды. Анткени Гвинеянын үлүшү дүйнөлүк рыноктун төрттөн бир бөлүгүн түзөт. Кызыкдар тараптардын арасында россиялык "Русал" да бар. Жеңил металлдын баасы эми кандай болору, дүйнөдөгү бул жааттагы жагдай тууралуу Ирина Бадмаеванын макаласы РИА Новости сайтына жарыяланган.

Ылдамдык артты

Жыл башынан бери эле алюминий 40 пайызга жогорулады. Бул металл дээрлик бардык тармактарда — космостук, авиа жана автомобилдик техника, курулушта пайдаланылат. Анан да бул – көп нерсеге жарай турган таңгактоочу материал эмеспи, мисалы, тиричилик товарлары, банкадагы газдалган суусундуктар, фольгадагы балмуздак ж.б. Бирок аны өндүрүүгө электр кубаты көп сарпталат. Атмосфера булганат, мунай, табигый газ жана көмүр жагылат. Айрыкча Кытайда абал ушундай, анткени бул державада алюминийдин жарымы өндүрүлөт.

Кубаттуулукту катуу көзөмөлдөө жана бара-бара импортчуга айлануу менен КЭР көмүр кычкыл газынын чыгындыларын азайтуу аракетинде.

"Алюминий менен 20 пайызга камсыздаган Синьцзян провинциясында августтун аягынан тарта беш заводдо өндүрүш көлөмү кыскартылды", — деп белгилейт TeleTrade маалымат-аналитикалык борборунун башкы экономисти Марк Гойхман.

Ал эми Россия өткөн айдан бери экспорттук пошлина киргизди. Анын көлөмү баадан 15 пайыз, бирок тоннасына 254 доллардан кем эмес каражатты түзөт.

"Ушундан улам "Русал" рентабелдүүлүктүн чегиндеги ишканаларды жабуу пландарынан да кабарлаган. Жүз миңдеген тонна зыян тартып, жоготуулар миллиондогон долларга жетти", — дейт маектеш.

Кытайдагы декарбонизация кампаниясы жана россиялык пошлиналар баанын өсүшүнө себеп болду. Трейдерлер акысы жогорулап бара жаткан ташуу кызматы жана күтүлгөн таңсыктыктан пайда көрүүнү көксөп туру. Бул көрсөткүч 2024-жылы сегиз миллион тоннага жетиши мүмкүн. Ал эми суроо-талап жылына үч пайызга көтөрүлүп турат.

Биринчи жарым жылдыкта дүйнөлүк суроо-талап дээрлик 12 пайызга өстү. Ал эми өндүрүш — болгону 5,7 пайызга жогорулады.

Африкалык фактор

Баанын кымбатташына Гвинеядагы аскердик төңкөрүш да кошул-ташыл болду. Африканын батышындагы бул өлкө — бокситтер менен негизги жабдуучу. "Сырьё боюнча Кытай менен Австралиядан кийинки үчүнчү сапта, тагыраак, жылына 50 миллион тонна алат. Изилденген запас боюнча (7,4 миллиард тонна) биринчи орунда", — деп тактайт AMarkets аналитикалык департаментинин жетекчиси Артем Деев.

Гвинея өкмөтүнүн маалыматы боюнча, былтыр экспортко 84,2 миллион тонна боксит жүктөлгөн. Басымдуу бөлүгү Кытайга жөнөтүлгөн. Аталган республикадан жабдуудагы кымындай да үзгүлтүк рынокту бир топ солгундатышы ыктымал. Дүйнөдө жылына 60 миллион тоннадан ашуун алюминий алынат. Жарымынан көбү КЭРде, Россия жана Индияда төрт миллиондон өндүрүлөт. Гвинеядагы бийликти басып алган аскерлердин лидери Мамади Думбуйя тоо-кен компанияларын ишти улантууга чакырды. Өкмөт менен түзүлгөн келишимдер сакталарына убада берген. Бирок бул анчалык ынандырарлык болгон жок.

"Русал" да кабатырланууда. Анткени ага Гвинеядагы "Киндия бокситтери компаниясы", жылына өндүрүмдүүлүгү үч миллион тоннаны түзгөн Dian-Dian кени, ошондой эле Friguia бокситтик-глиноземдик (алюминийдин оксиди) комплекси таандык. Операциялык отчёттуулук маалыматы боюнча, биринчи жарым жылдыкта гвинеялык ишканалар 3,8 миллион тонна боксит алышкан.

Мамлекеттик төңкөрүштөн кийин "Русалдын" акциялары тооруктун алгачкы мүнөттөрүндө дээрлик жети пайызга көтөрүлүп, 66,75 рублге чейин чыккан. Бирок кайра ылдыйлай баштаган.

"Эгер кен казуудагы көйгөйлөр созула берсе, компаниянын өндүрүш көлөмү алда канча кыскарышы мүмкүн. Бирок келтирилген зыяндын көп бөлүгү баанын жогорулашы менен да жабылышы ыктымал, анткени бүт дүйнө мындан жабыр тартат", — дейт PFL Advisors инвестициялык компаниясынын башкаруучу өнөктөшү Федор Наумов.

"Русалдын" акцияларынын наркы алюминий баасы менен гана аныкталбайт. Инвесторлор менен мамиле да буга таасир этет. "Эгер компания дивиденд төлөп бере баштаса, баа 100 рублдин тегерегинде болмок. Позитивдүү рыноктук жагдайга карабастан ушул тапта "Русал" андай кылбайт, себеби акыркы бенефициар Олег Дерипаска санкциялардын айынан каражат ала албайт", — деп белгилейт маектеш.

Аскердик көзөмөл

Россиялык экспорттун 40 пайыздан ашууну АКШ жана Түркияга багытталат. Иштетилбеген металл рыногунда Россия 17 пайыздык үлүшү менен алдыңкы сапта.

Экинчи орунда 15 пайыз менен Канада, үчүнчү он пайыз үлүшү бар Австралия турат.

Бирок сырьёсуз эч нерсе сатылбайт. Гвинея мында — негизги бөлүк (звено). Өлкөдөгү саясий туруксуздук бокситтерди жеткирүүнү үзгүлтүккө учуратышы ыктымал.

"Бирок алар узакка созулбаса керек. Ошол себептен бааларга көп таасир этерин күтүүнүн кереги жок", — деп боолголойт Марк Гойхман.

Мамлекеттик төңкөрүштүн максаттарынын бири — алюминий рыногун көзөмөлдөө. Ошондуктан хунта чет өлкөдөгү негизги сырьё сатып алуучулар менен мамилесин тез арада жакшыртууга умтулары шексиз.

Бирок республикада кош бийлик орносо, ички жаңжал көпкө уланат. Ошондо алюминий ташуу көйгөйү жаралары талашсыз. Ошол эле учурда жогорку суроо-талап бааны улам өйдөлөтүүдө. Сентябрда алюминийдин тоннасы үч миң доллардан ашат. Жыл аягына дейре дагы кымбаттайт. Анткен менен август-сентябрдагыдай өсүш эми кайталанбайт.

189
Белгилер:
Гвинея, Африка, алюминий, рынок, Россия, боксит, төңкөрүш
Тема боюнча
"Пакистан агымы". Россия түштүккө багыт алды
Түндүк агым – 2 газопроводу

Европа россиялык газдан баш тарта алабы? Сереп

105
Европада көгүлтүр оттун кескин кымбатташына Россиянын тиешеси барбы? ЕБ жашыл экономикага өтүүгө чамынса, "Түндүк агым – 2" майнаптуу болобу? Эксперт ушулар туурасындагы ойлорунан бөлүштү.

Sputnik. "Түндүк агым – 2" газопроводунун экинчи өтмөгүнүн акыркы түтүгү Балтика деңизинин түбүнө жаткырылды. Бул туурасында 6-сентябрда долбоордун оператору Nord Stream 2 AG компаниясы маалымдады.

Ал эми 9-сентябрда фьючерстик рынокто тарыхый рекорд коюлду. Тооруктун бүтүндөй тарыхында алгач ирет газдын миң куб метринин баасы 700 долларды чапчыды.

"Түндүк агым – 2нин" ишке берилиши Европадагы тынымсыз өсүп жаткан газдын баасына кандай таасир этет? Эмнеликтен "Газпром" европалыктар жылытуу сезонуна көгүлтүр от корунун жетишсиздигинен чочулап турган маалда ЕБ рыногуна жөнөтүлгөн газдын көлөмүн көбөйтпөйт?

РФтин Улуттук энергетикалык коопсуздук фондунун алдыңкы аналитиги Игорь Юшков YouTube каналыбызга курган маегинде Россиянын энергетикалык стратегиясынын өзгөчөлүктөрүнө токтолду. Бул материалда маектин урунттуу учурларынан келтирдик.

Эмнеге Норвегияны эмес, Россияны айыпташат?

Европада газга болгон октябрдык фьючерс 9-сентябрда тарыхта биринчи ирет миң куб метрине 700 доллардан ашты. Бир ай оболу эле көгүлтүр отко фьючерс ушундай эле өлчөмгө – 550 доллар, майдын ортосунда 373 долларды түзгөн.

Европалык газ сатуучулар кырдаалды "акылга сыйгыс" деп атоодо. Ал эми бир катар европалык жалпыга маалымдоо каражаттары баа жарышын "Газпромдун" тымызын иштери деп сыпаттап жатышат. Бирок мындай жөнсүз пикирдин да туура түшүндүрмөсү бар деп эсептейт Игорь Юшков.

"Азияда баа мындан да кымбат, –  дейт ал. – Кытай газды керектөөнүн көлөмүн көбөйтүүдө. Ири керектөөчүлөр: Япония, Түштүк Корея да бар. Башкача айтканда, бүтүндөй суюлтулган жаратылыш газы толугу менен Азияга кетүүдө.

Суюлтулган табигый газды өндүрүүчүлөр, албетте, көп пайда тапкысы келет, ошондуктан 2021-жыл бою ири партиялар азиялык рынокторго агылып турду.

Эгер Европа суюлтулган жаратылыш газынын кошумча көлөмүнө зарылып турса, албетте, ага да орточо Азиядагыдай эле баада сунушталат деп түшүндүрөт Юшков. Ал эми Россия апрель айынан ушул күнгө дейре газдын бирдей эле көлөмүн берүүдө.

"Россияны вентилди бууп, Европага шантаж жасоодо деген айып тагылууда, дегеле мындайды биз чет өлкөлүк маалымат каражаттарынан тынбай тыңдап келет эмеспизби. Бирок жагдай андай эмес, – дейт Игорь Юшков. – Түтүк аркылуу газ берчүлөрдүн башкаларын да кароого болот. Ошол эле Норвегияда көгүлтүр отту казуунун көлөмү төрт жыл катары менен төмөндөп жатты. Ал газды көбүрөөк суюлтуп, Азияга жөнөтүүгө ашыгат".

Алжир да ички керектөөнүн көбөйүшүнөн улам газды азыраак экспорттой баштаганын мисал келтирген эксперт: "Эмнеге анда Россияга доомат коюлат? Европалыктар өздөрү экономикалык жактан туура акыл калчап, бирок мекенчилдиктен четтөөдө", – деп суроо салат.

Мындан сырткары, трейдерлер кеп кылган газдын кымбаттыгы голландиялык биржада коюлган бааларды туюндурат. Ал эми бул негизинен суюлтулган жаратылыш газ рыногундагы абалды чагылдырат.

Германиянын биржасы андан айырмаланат, баалар россиялык түтүк аркылуу газ берүүгө таасир этет, ошондуктан алар төмөн баада. Бул факторлордун баарын эсепке алуу абзелдигин белгилейт Игорь Юшков.

Украинанын пайда таап алышына Россия эмнеге шарт түзүшү керек?

Эксперт трейдерлер Европанын жер төлөөлөрүндөгү газ сактагычтардагы газдын кору аз деп да түйшөлүүдө. "Бирок эмнеге мындай болуп калды? Эмне үчүн кышка камылга көрүшкөн эмес? – деп ой жооруйт Юшков. – Кантсе да баа бир жыл аралыгында улам өсүп отурган. Ишканалар: азыр миң куб метрин 400 доллардан сатып алсам, кышында баа 300 долларга түшүп кетсе, зыян тартып калам деген ойдо болушкан. Анан 500гө чыкты, дал ушул баанын жеткен чеги! Азыр да ушул кайталанууда. Жер төлөөлөрдөгү сактагычтарга газ толтурууга даай албай, кышында азыркыдан арзандап кетсечи деген ойдо жүрүшөт".

Анан да көптөгөн өлкөлөр быйыл газды сактоочу жайлардан алып чыгып, учурдагы керектөө үчүн сатышты. Себеби 2020-жыл таптакыр бөтөнчө мезгил болбодубу дейт Игорь Юшков. Рынокто баа өтө төмөн: миң куб метрине 100 доллардан ылдый болуп турду.

"Албетте, кышкысын Европа тоңуп калбайт, бирок Россиядан газ алуу боюнча кошумча кубаттуулук керектелет, – деген ойдо эксперт. – Россия – газ казуунун, экспорттоонун көлөмүн өстүрө алчу дээрлик жалгыз түтүк аркылуу жеткирүүчү өлкө. Мында Россияга "Түндүк агым – 2" Европа үчүн кошумча көлөмдү кирешелүү сордурууга жол ачат".

Ушул тапта "Газпромго" көлөмдү көбөйтүү пайдасыздыгын айтат Юшков. "Украиналык багыттан башка бардык маршруттар толук кубаттуулукта иш жүргүзүүдө, - деп түшүндүрөт ал. – Эгер "Газпром" Украина аркылуу көлөмдү келишимдегиден ашырса, жогорулатылган коэффициент кошулат, толтуруу тарифи ансыз да кымбат. Тандоо маселеси коюлат: газды түтүктөргө көбүрөөк толтуруп, бул үчүн кошумча акы төлөп, анан да Европадагы баанын азайтуу керекпи же ишти мурункудай эле улантуу керекпи?". Биринчи варианттын экономикалык маңызы жоктугун белгилейт эксперт. "Россия ансыз деле узак мөөнөттүү келишимдерин так аткарып келет. Ал эми кошумча көлөмдү берүүдө үстөк кирешенин баары украиналык операторго тиет, анткени ага жогорулатылган транзитке акы төлөө шарт", - деп чечмелейт Юшков.

Жашыл экономика азыр арсарбы?

"Түндүк агым – 2" ишке берилгенде Россия кошумча көлөмдү эч көйгөйсүз бере аларын айтат Игорь Юшков.

"Биринчиден, ал толугу менен "Газпромго" таандык, башкача айтканда, өзүнүн канатындагы компанияга төлөп берүү керек, – деп түшүндүрөт ал. – Экинчиден, Ямалдан Германияга чейинки аралык Украина аркылуу маршрутка караганда 1800 чакырымга кыскараак. Мында "Газпром" азыраак кубаттуулук да сарптайт. Бул – экономикалык көз караштан алып караганда эң майнаптуу ыкма".

Жашыл экономиканын өнүгүшү "Түндүк агым – 2" долбооруна терс таасир этиши мүмкүн экенин белгилейт Юшков.

Эксперттин баамында, Европа 2050-жылга чейин казып алуучу кубаттуулуктун бардык булактарынан баш тартууга тийиш. Бирок Европа биримдиги азыр "жашыл келишимге" салган инвестициялар жетишсиз. Аларды алда канча көбөйтүү абзел.

"Ал эми бул кыйла татаал, себеби натыйжада баарына керектөөчү төлөйт, ал эми Европада электр кубаты ансыз да бир топ кымбат, – дейт Игорь Юшков. – Европа көздөгөнүнөн кайтпайт, бирок максаттарын ишке ашыруу мөөнөтү жылышы ыктымал. Менимче, дагы ондогон жылдар бою көгүлтүр отко талап күч болот".

Булардан тышкары, Россия энергетика жаатындагы жаңы көрүнүштөргө көз салат. Европа суутекке өткүсү келсе, ал табигый газдан өндүрүлөрүн эске салат Игорь Юшков.

"Ошондо Россия суутекти өндүрө алат, - деп эсептейт ал. – Ошол эле "Түндүк агым – 2" аркылуу аны жөнөтүүгө болот. Башта, балким, газ түтүгүн заманга бапташтыруу керек болор. Европалыктар газ-суутек аралашмасын пайдалангандагы өткөөл мезгилден кеп салууда. Анда газ түтүгүн заманбапташтырбай туруп деле газга 30%га чейин суутек кошуп берүүгө болот. Андан ары заманга ылайыктоого болот, бул деле техникалык жактан кол жеткис нерсе эмес. Бузулбай тургандай кылып газ түтүгүн атайын тазалап чыгуу абзел".

Кептин баары европалыктар пландарын жарыялап, бирок суутек рыногунун өзү жоктугунда экенин билдирет Игорь Юшков. "Эч ким суутекти көп көлөмдө өндүрбөйт. Алдыда жылытуу сезону турат, ал европалык саясаттын бардык акылга сыйбас тарабын көзгө сайып көрсөтүүдө. Адегенде "Газпромду" хабдарга байланыштырып баа түзүү келишимдеринин баарына кол коюуга аргасыз кылышты, ал эми мунай баасынан көз каранды газ жарым-жартылай аз. Европалыктар өздөрү баштаган энергетикалык стратегиянын эле айласын таппай туру", — деп жыйынтыктайт кебин эксперт.

Маекти толугу менен YouTube каналыбыздан көрө аласыздар: 

105
Белгилер:
газ, Түндүк агым - 2, Россия, Европа, жылуулук, отун, түтүк, суутек
Тема боюнча
Саясий жана насыялык көз карандылык: ЕБ менен биригүү Украинага эмне берди?
Саясатчы Алексей Навальный

Уурдалган миллиарддар. АКШда Жемкорлукка каршы фондунун клону түзүлгөн. Иликтөө

134
Алексей Навальныйдын Жемкорлукка каршы күрөш фондунун* (ЖКФ) америкалык клону пайда болду. Американын Массачусетс штатында Anti-Corruption Foundation, Inc. (ACF) катталган.

Аны Жемкорлукка каршы күрөш фондунун штабдарынын** мурдагы башчысы Леонид Волков жана аткаруучу директору Владимир Ашурков жетектейт.

Башкармалыкка россиялык "Пробизнесбанктын" мурдагы теңата кожоюну Александр Железняк да кирген. Бул киши Россияда банктан миллиарддаган рублди уурдоого айыпталган. Бул туурасында RT каналы Массачусетс штатынын юридикалык жактар реестринде жарыяланган документтерден тапкан.

Эксперттердин пикиринде, жаңы фонд Навальныйдын тарапташтарына Stripe төлөм тутуму аркылуу жардамга түшкөн каражаттарын кабылдоо жана америкалык өкмөттүк уюмдардан грант алуу үчүн зарыл.

Anti-Corruption Foundation, Inc. коммерциялык уюмунун түптөлгөнүнө көп боло элек. Массачусетсте 2021-жылдын 27-июлунда ачылганын аталган штаттын юридикалык жактардын реестринен (opencorporates.com) алынган көчүрмө тастыктап турат.

Бул маалыматтарга ылайык, Леонид Волков, Владимир Ашурков жана Александр Железняк – фонддун директорлору. Ошону менен бирге эле Волков ACF президенти, Ашурков — вице-президенти жана казыначысы.

Эске салсак, үчөө тең россиялык укук коргоо органдары тарабынан эл аралык издөөгө салынган. Ашурков Навальныйдын пайдасына каражат топтоодо 10 миллион рублди кымырып алган деген айып менен 2014-жылдан бери изделет. Волковго өспүрүмдөрдү мыйзамсыз митингге тарткан деген айып менен быйыл февраль айында издөө салынган.

"Пробизнесбанктын" мурдагы кожоюндарынын бири Железнякты россиялык тергөөчүлөр аталган банк жана ага караштуу "Лайф" каржылык тобунан 28 миллиард рубль уурдаган деген шек менен 2017-жылдан бери издеп келишет.

Председатель правления ФГ Лайф и ОАО АКБ Пробизнесбанк Александр Железняк на гала-ужине и благотворительном аукционе Bazar Heart Dinner в Концертном Зале Барвиха Luxury Village.
© Sputnik / Валерий Левитин
"Пробизнесбанктын" мурдагы теңата ээси Александр Железняк

Железняк иш жүзүндө Россиянын бюджетине да залал келтирген, анткени ал келтирген зыянды Аманатчыларды камсыздандыруу боюнча мамлекеттик агенттиги төлөп берген деп эсептейт юрист, Navalny Leaks долбоорунун автору Илья Ремесло. Башкача айтканда Железняк, эксперттин айтымында, ЖКФ күрөшө тургандардын бири болуп саналат.

"Жемкорлукка каршы күрөшчүлөр фонддун жетекчилигине ири уурулуука тиешеси бар адамды алып келишкени өтө кызык. Железняк мамлекеттен уурдалган он миллиарддаган каражатка заңгыраган үй сатып алган. Дал ошол турак үйгө ЖКФ жайгашкан", — дейт Ремесло.

Манхэттенге ишеним кат менен

Массачусетстеги ACF "чет элдик корпорация" катары катталган. Америкада бул термин менен алгач катталган жерден айырмаланган штат же юрисдикцияда бизнес жүргүзгөн ишкана мүнөздөлөт. Аталган фонд аталышы окшош Нью-Йорк фондунун филиалы болгону үчүн ушундай макам алган.

"Чет жердеги ишмердик жана көмөк көрсөткөн чет өлкөлүктөрдү өздөштүрүү, ошондой эле АКШнын башка штатында ишмердик жүргүзүү үчүн чет өлкөлүк корпорацияны каттатуу зарыл.

Навальныйдын кызматкерлери адегенде Нью-Йоркто ички юридикалык жакты түптөп, кийин чет өлкөлүк корпорация деп аталган бөлүмүн Массачусетсте ачышкан", — деп түшүндүрөт Ремесло.

Нью-Йорктогу ACF мындай аталышка быйыл 19-майда ээ болгон. Анткен менен уюм өзү 2020-жылдын апрелинде эле пайда болуп, ал кезде Rikolto, LTD деп аталган.

Россиялык прокуратура Навальныйдын Жемкорлукка каршы фондун экстремисттик уюм деп таануу боюнча сотко кайрылгандан бир ай өтпөй аталышы алмаштырылган. Штаттын юридикалык тараптар реестринен алынган көчүрмөгө ылайык, 27-июлдан тарта Леонид Волков Нью-Йорк ACF  корпорациясын жетектейт.

Выписка из реестра юридических лиц штата Массачусетс. Архивное фото
© Фото / NYS Department of State
Массачусетс штатынын юридикалык тараптар реестринин көчүрмөсү

Ошондой эле Бруклиндеги Rikolto корпорациясынын баштапкы дарегине ар кыл багыттагы ондогон фирмалар катталган.

"Документтеги өзгөртүүлөр болду-болбоду, 2021-жылдын май айында Нью-Йорктогу юридикалык тарап ЖКФ кызматкерлерине кайра катталган. АКШга барбастан эле интернет аркылуу электрондук тастыктама жана иишеним кат менен жүргүзүлгөн деп айта алам. Бул Кошмо Штаттарда кеңири таралган көрүнүш, юридикалык кеңсе өзүнө фирма ачып, кайра сата алат. Башынан каттоо машакаттарына чыгым болуудан көрө мындай ыкма сатып алуучуга да ыңгайлуу", — деп түшүндүрдү чет элдик активдер боюнча атын атагысы келбеген адис.

Жогоруда келтирилгендерге таянуу менен ЖКФтин америкалык версиясынын негиздөөчүлөрү жергиликтүү юристтерден "даяр" Rikolto уюмун сатып алганын боолголосок болот. Ошондо Бруклиндеги юридикалык дарек Манхэттенге алмашкан. Эми нью-йорктук кеңсе Брод-стрит, 85 дареги боюнча Каржылык кварталында. Айтмакчы, ушул эле көчөдө Нью-Йорк фондулук биржасы жана J.P. Morgan банкынын мурдагы башкы кеңсеси жайгашкан. ЖКФтин жаңы кеңсеси 12 кырдуу имараттын 30-кабатында. Андан эгиз мунаралар кыйраган жердеги 9/11мемориалына жөө он мүнөттө жетүүгө болот. 2009-жылга чейин бул жерде Goldman Sachs кеңсеси болгон. Ушул тапта имарат бизнес-борбор катары пайдаланылат.

Качып жүргөн банкирдин канатында

Аталышы алмашкандан туура эки айдан соң, тагыраак, 2021-жылдын июлунда Нью-Йорктогу фонд Массачусетсте филиал ачкан. Катталганын Массачусетс жетекчилиги тарабынан берилген чет өлкөлүк корпорация тастыктамасынын көчүрмөсү далилдейт. Анда Александр Железняк менен фонддун президенти Леонид Волковдун каттоо агентинин колу коюлган, бул – резидент эмес ишканалардын каттоо юрисдикциясы боюнча мамлекеттик органдардын байланышы үчүн жооптуу жак.

Копия выданного властями Массачусетса сертификата иностранной корпорации. Архивное фото
© Фото / The Commonwealth of Massachusetts
Массачусетс бийлиги тарабынан берилген чет өлкөлүк корпорация сертификатынын көчүрмөсү

Уюмду түзүүнүн максаты документтерде "АКШ, Россия, Европа жана дүйнөдө жемкорлукка каршы жана укук коргоо долбоорлоруна катышуу" деп көрсөтүлгөн. Корпорациянын дареги: 88 Cutler Lane, Chestnut Hill.

Кыймылсыз мүлктү сатуу боюнча ачык аянталарга таянсак, бул аянты 2 279 чарчы метрлик заңгыраган турак үй. Россиялык маалымат каражаттары жазып чыккандай, 2016-жылы үйдү 4,4 миллион долларга банкирдин жубайы Ольга Железняк сатып алган. Андай келишим болгонун кыймылсыз мүлк сатуу боюнча америкалык сайттардагы маалыматтар тастыктап турат. Checkpeople онлайн-маалымат базасы да бул дарек Ольга жана Александр Железнякка таандык экенин айгинелейт.

Особняк Ольги и Александра Железняк, площадью 2279 кв. м. по адресу 88 Cutler Lane, Chestnut Hill, MA
© Фото / priceypads.com
Кыймылсыз мүлктү сатуу боюнча ачык аянтчаларга таянсак, бул үйдүн аянты – 2 279 чарчы метр

Үй Железнякка Россияда кылмыш иши козголгондон бир жыл мурун сатып алынган. Тергөө версиясы боюнча, каражат жалган насыялоо схемасы менен уурдалып турган. "Пробизнесбанк" жалган фирмаларга атайылап кайтарымсыз насыяларды берген. Ликвиддик эмес кагаздарды сатып алуу деген түр менен ал жактан акчалар жогорку жетекчиликтин карамагындагы офшорлорго агылып турган. Жогоруда айтылган кыймылсыз мүлк да ушундай жол менен чыгарылган каражатка сатып алынганы айтылат.

Юрисдикция маселелери

Навальныйдын санаалаштары биринин аркасынан бири чет өлкөгө чыгууда. Волков жана Ашурков өңдүүлөрү бир топ мезгилден бери Россиядан тыш жашап келишет. 2021-жылы ЖКФтин негизги кызматкерлеринин көпчүлүгү Европа аймактарынан жана КМШ өлкөлөрүнөн орун тапты.

Члены Координационного совета оппозиции Владимир Ашурков, Алексей Навальный, Любовь Соболь (слева направо) на заседании Координационного совета (КС) оппозиции в гостинице Измайлово
© Sputnik / Мария Нахманович
Навальныйдын санаалаштары биринин аркасынан бири чет өлкөгө кетүүдө. Волков жана Ашурков өңдүүлөрү көптөн бери Россияда жашашпайт

Анткен менен жаңы "башкы кеңсе" катары россиялык оппозиционерлер дал АКШны тандап алышкан.

"Америка бир нече себеп менен тандалган. Алардын бири – чет өлкөлүк ЖКФке түшкөн төлөмдөрдүн оператору болгон америкалык Stripe компаниясы менен келишим түзүү үчүн юридикалык тараптын зарылдыгы", — деп эсептейт Илья Ремесло.

Чындап эле августтун башында Волков фондго көмөктөшүүнүн коопсуз жана купуялуу варианты катары Stripe сервисин каржылык көмөк көрсөтүүнүн жаңы ыкмасы экенин жарыялаган.

"Биз толугу менен россиялык банк тутуму, каржылык инфраструктурасынан кеттик", — деген Волков YouTube каналында.

Глава предвыборного штаба Алексея Навального Леонид Волков у здания Симоновского суда Москвы, где состоится рассмотрение административного дела в отношении Алексея Навального.
© Sputnik / Евгений Одиноков
Волков фондго көмөктөшүүнүн коопсуз жана купуялуу варианты катары Stripe сервисин кайрымдуулук кылуунун жаңы ыкмасы экенин өткөн айдын башында эле жарыялаган

Stripe онлайн-төлөм кызматына ЖКФ быйыл июнь айында фонд жана ага байланышкан коммерциялык эмес уюмдарды сот экстремисттик деп тапкандан кийин кайрылган. Экстремисттик уюмду каржылоо үчүн РФ жарандары кылмыш жообуна тартылышы ыктымал. Ошондуктан ЖКФ катардагы демөөрчүлөрүнүн коопсуздугу үчүн башка ыкмаларды издей башташкан. Фонддун бюджетинин 22 пайызын ошондой жардамдар түзөт. Калган 78 пайызын фонддун кызматкерлери жана чет өлкөлүк ири ишкерлер салган.

Чындыгында Stripe ЖКФке жардамын кошкон ар бир демөөрчүнүн изин текшерип турарын белгилешет маалыматтык коопсуздук эксперттери, демек, 100 пайыз купуялуулук тууралуу кеп да жок.

Купуялуулуктун жоктугун Ремесло да тастыктайт. Ал изилдөөсүндө АКШдагы ЖКФтин жаңы юридикалык жагын PayPal төлөм формасы аркылуу тапкан. Бул каражаттарды алган тарап катары көрсөтүлгөн.

"Бул маалымат банк көчүрмөлөрүндө камтылган, бул укук коргоо органдарына ачык өңдөнөт. Андан ары Росфинмониторинг аркылуу россиялык банктарга төлөм маалыматтары боюнча өтүнмөлөр жөнөтүлүп, көмөк көрсөткөндөр боюнча маалымат алынат", — деп жазат Ремесло өзүнүн Telegram каналында. Океан ар жагына көчүүнүн экинчи себебин Ремесло Навальныйдын санаалаштарынын АКШ тараптын "колдоосу" деп атаган.

"Кошмо Штаттар Навальный менен анын командасына колдоо көрсөтүүнү адатка айланткан, ал жакта Навальный NED*** ("Демократияны колдоо улуттук фонду" – ред.) грант алып турган убактан тарта байланыштары бар. Волков сыяктуу эле Йель университетинде окуган", — деп белгилейт юрист. Анын пикиринде, дегеле америкалык компания америкалык өкмөттүк фонддордон "грант алуу үчүн төп келет". Ошондой эле эксперт банкир Железняктын ролу фондду жетектөөдө катышуусу менен гана чектелбейт деген ойдо.

"Ал уурдалган акчанын эсебинен ЖКФке демөөрчүлүк кыларын боолголойм. Жеке маалыматтарым боюнча, Железняк менен америкалык атайын кызматтар да кызматташат. Ага ЖКФти Россияга өткөрбөө убадасы менен табышташкандай", — деп болжойт Ремесло.

Ал муну ЖКФтин америкалык мамлекеттик органдар менен байланышы, Россиянын ички иштерине кийлигишүүнүн далили катары баалап, жагдайга укуктук баа берүүгө ниеттенет.

"Мамлекеттик Думанын чет өлкөлүк кийлигишүүнү иликтеген комиссиясына, РФ ТИМ жана Башкы прокуратурасына кайрылайын деп турам. Америкалык өнөктөштөргө: кайсы негизде жемкорлорду колдоп, Россиянын ички иштерине аларды колдонуп жатканын суроо зарыл", — дейт Ремесло.

* ЖКФ РФ Юстиция министрлигинин 09.10.2019 чечими боюнча чет өлкөлүк агенттин функциясын аткарган коммерциялык эмес уюмдар реестрине кирген. Уюм Москва шаардык сотунун 09.06.2021 чечими менен экстремисттик деп табылып, Россиянын аймагында ишмердигине тыюу салынган.

** "Навальныйдын штабы" коомдук кыймылы Москва шаардык сотунун 09.06.2021 чечими менен экстремисттик деп табылып, Россиянын аймагында ишмердигине тыюу салынган.

*** "Демократияны колдоо улуттук фонду" (The National Endowment for Democracy) ишмердиги РФ Башкы прокуратурасынын 28.07.2015 чечими менен РФ аймагында туура келбес уюм катары табылган.

134
Белгилер:
Алексей Навальный, фонд, миллиард, доллар, АКШ, клон, жемкорлук, иликтөө
Тема боюнча
Америкалык үмүт акталбай калганда... Саммит жыйынтыгына сереп
Ок атуу болгон Россиянын Пермь мамлекеттик улуттук изилдөө университетинин жаныдагы полиция кызматкерлери

ТИМ: Пермдеги ЖОЖдо ок жегендердин арасында кыргызстандыктар жок

0
(жаңыланган 00:29 21.09.2021)
Кечээ, 20-сентябрда, Пермдеги жогорку окуу жайдын студенти имараттын ичиндегилерге ок чыгарган. Бир нече убакыттан соң полиция аны жарадар кылып, кармаган.

БИШКЕК, 21-сен. — Sputnik. Россиянын Пермь мамлекеттик улуттук изилдөө университетинде болгон окуяда жабыркагандардын жана каза болгондордун арасында кыргызстандыктар жок. Бул тууралуу ТИМдин маалымат кызматынан кабарлады.

"Пермь аймагынын компетенттүү органдарынын алдын ала маалыматы боюнча, 2021-жылдын 20-сентябрында Пермь мамлекеттик улуттук изилдөө университетинде болгон окуяда жабыркагандардын жана каза болгондордун арасында Кыргызстандын жарандары жок", — деп айтылат таратылган билдирүүдө.

Эске салсак, бүгүн эртең менен Россиянын Пермь мамлекеттик изилдөө университетинде студент имараттын ичиндегилерди аткылап, алты киши каза таап, 26сы жаракат алган. Ок чыгарган студент полиция кызматкери окуя болгон жерге барганда аны көздөй бир нече ирет аткылаган. Тартип сакчысы куралчанды жарадар кылып, мылтыгын колунан алгандан кийин биринчи жардам көрсөткөн. Жыйынтыгында ок чыгарган студент кармалган.

0
Белгилер:
Россия, Пермь, студент, ок атуу, полиция
Тема боюнча
Пермдеги элди аткан студент полиция кызматкерине да ок чыгарган. Чоо-жайы
Жапаров Путинге Пермдеги окуя боюнча көңүл айтты