БИШКЕК, 14-сен. — Sputnik. Тажикстанда бешинчи эл аралык "ТЭФИ-Шериктештик" телевизиондук фестивалы өтө турганын аталган өлкөнүн Теле- жана радиоберүү комитетинин эл аралык иштер боюнча башкармалыгынын жетекчисинин орун басары Саида Жумаева билдирди.
Фестиваль Тажикстандын борбору Душанбе шаарында 16-19-сентябрь күндөрү өтөт. Жумаеванын айтымында, иш-чара мастер-класстар, жолугушуу, бет ачар аземдери, жана тегерек столдор менен коштолот. Фестивалдын катышуучулары менен коноктору балдар телеберүүсү боюнча талкууларды жүргүзүшөт.
Мындан тышкары, катышуучулар менен эксперттик кеңештин мүчөлөрү Тажик улуттук университети менен Россия-Тажик славян университеттеринин журналистика факультетинин студенттери менен жолугушат.
Фестивалга Россия, Белоруссия, Казакстан, Кыргызстан, Армения, Азербайжан, Грузия, Молдова, Өзбекстан, Украина жана Тажикстандан келген 54 тасмага баа берилет.
