БИШКЕК, 27-апр. — Sputnik. Sputnik Кыргызстан агенттиги коронавирустан улам коңшу жана өнөктөш мамлекеттерде түзүлгөн кырдаалга абай салды.
Казакстан
Алматы шаарында жугуштуу илдеттер ооруканасынын курулушу бүтүп, коронавирус жуктуруп алган бейтаптарды кабыл ала баштады. Бул тууралуу Sputnik Казакстан кабарлады.
Баса, Казакстанда коронавирус жуктуруп алгандардын саны 2717ни түзөт. Акыркы маалыматтар боюнча, COVID-19 вирусунан 682 бейтап айыкса, 25 адам көз жумган.
Коңшу мамлекетте да коронавирус көп катталган аймактарына өзгөчө абал режими киргизилген. Карантинде үйдө отургандан тажаган балдар президентке соцтармактан видео аркылуу кайрыла башташты.
Посмотреть эту публикацию в Instagram
Ал арада Казакстандын президенти Касым-Жомарт Токаев өзгөчө абал режимин 11-майга чейин узартуу чечимин кабыл алды.
Өзбекстан
27-апрелге карата Өзбекстанда 1887 адамдан коронавирус аныкталды. Бирок Казакстанга салыштырмалуу бул мамлекетте айыккандардын саны көп. Вирустан 789 бейтап сакайды. Тажрыйбасы менен бөлүшүү максатында бул өлкөгө да Кытайдан 15 медик барган.
Тажикстан
Кыргызстанга коңшу мамлекеттердин ичинен Тажикстанда коронавирус каттала элек. Бирок өлкөнүн Билим берүү жана илим министрлиги 27-апрелден 10-майга чейин мектеп, бала бакчаларды кезексиз каникулга таратты. Министрлик муну карантин эмес, убактылуу каникул деп түшүндүрдү. Дүйнөлүк саламаттык сактоо уюмунун (ДССУ) эксперттери Тажикстан менен Түркмөнстанга барып коронавирустун бар-жогун текшерери айтылган.
Миллиондогон кыргыз мекендештери иштеп, оокат кылып жүргөн Россияда коронавирус жуктургандардын саны 80 949 болду. COVID-19 747 адамдын өмүрүн алса, андан 6767 бейтап айыккан. Кыргызстан Россиядан келе албай жаткан мекендештерди чекесинен алып келүүдө. Россиянын вирусолог, биологдору өкмөткө изоляция режимин 12-майга чейин узартууну сунушташты.
Кытай
Оорунун очогу аталган Кытай кадимки жашоого акырындап кайта баштады. Бул мамлекетте коронавирус жуктурган учурлар бирин-серин катталууда. Бирок көп эмес. Акыркы суткада Кытайда коронавирус үч гана кишиден табылып, 80 бейтап айыгып чыккан. Жалпы 82 830 киши коронавирус жуктурса, анын 77 474ү айыгып чыгып, 4633 адам каза болгондугу маалымдалды.
Кыргызстан
Кыргызстанда да Өзбекстандагыдай айыккандардын саны көбөйө баштады. Акыркы маалыматтар боюнча, коронавирус жуктурган жалпы 695 учур катталды. Анын ичинен 395и айыкса, COVID-19 сегиз адамдын өмүрүн алган.
