Өзбекстандын желеги. Архивдик сүрөт

Өзбекстандын ЕАЭБге байкоочу статусун сенат жактырды. Вице-премьердин билдирүүсү

92
(жаңыланган 22:50 12.05.2020)
11-майда Олий Мажилис сенатында парламенттин жогорку палатасынын пленардык жыйыны болгон. Анда Өзбекстандын ЕАЭБге байкоочу өлкө катары катышуу сунушу жактырылган.

БИШКЕК, 12-май — Sputnik. Өзбекстандын Евразия экономикалык биримдикке байкоочу өлкө катары катышып жатканы республикада жүрүп жаткан реформага терс таасирин тийгизбейт. Мындай оюн Өзбекстандын вице-премьери, экономикалык өнүктүрүү жана жакырчылыкты кыскартуу министри Жамшид Кучкаров билдиргенин Sputnik Өзбекстан жазды. 

Жакында эле Олий Мажилис сенатында парламенттин жогорку палатасынын пленардык жыйыны болгон. Анда Өзбекстандын ЕАЭБге байкоочу өлкө катары катышуу сунушу жактырылган.

"Бул Өзбекстанда жүрүп жаткан реформага терс таасирин тийгизбейт деп ишендирип кетейин. Эң биринчи кезекте өлкө ЕАЭБге байкоочу катары кириши керек. Бул деген Өзбекстан биримдикте чечим чыгаруу процессинен башка жумушчу органдарынын бардык ишмердүүлүгүнө катыша алат дегенди түшүндүрөт. Мындай кадам мамлекетте атаандаштыкты күчөтөт. Кааласак-каалабасак да биз бул рынокто өзүбүздүн ордубузду табышыбыз керек. Ал үчүн экономика тармагында атаандаштык жөндөмдүүлүгүн күчөтүшүбүз зарыл", — деген Кучкаров.

Вице-премьер кандай реформа болбосун анын негизин макроэкономикалык туруктуулук түзөрүн айтып, ЕАЭБге бардык мүчө өлкөлөр бюджеттин дефицитин үч пайыздан ашырбоо боюнча сүйлөшкөнүн кошумчалады.

Кучкаров ЕАЭБге байкоочу өлкө катары катышуу экономиканы талкалабай турганын, тескерисинче, аны өнүктүрүп, Өзбекстанда жүрүп жаткан реформага түрткү болорун баса белгилеген.

Аткаминер сенаторлорду байкоочу өлкө статусу Өзбекстандын экономикалык реформа жасоосуна эч кедергисин тийгизбей турганына ишендирип кетти. Ал президент Шавкат Мирзиёев мамлекет өзүнүн экономикалык саясатын эркин жүргүзө аларын бир нече жолу айтканын да эскерткен.

92
Белгилер:
сенат, статус, байкоочу, Евразиялык экономикалык биримдик, Өзбекстан
Тема боюнча
COVID-19: ЕАЭБ өлкөлөрү вирус менен бирге күрөшүү боюнча долбоор дайындады
Бактыгулов: ЕАЭБ ичинде жеңилдиктерди киргизүү каралууда
Жумушчу жогорку чыңалуудагы электр чубалгысын монтаэ кылып жатат. Архив

Казакстандан 500 млн. кВт/саат энергия импорттоо макулдашылды. Баа өзгөрөбү

93
(жаңыланган 13:36 27.05.2020)
Мындан сырткары, Кыргызстан менен Казакстан 300 миллион киловатт-саатты алмашат: электр кубаты жайкысын Казакстанга жиберилсе, күзүндө кайра кайтарылат.

БИШКЕК, 27-май — Sputnik. Казакстандан 500 миллион киловатт-саат электр энергия алуу боюнча макулдашылды. Бул тууралуу Улуттук энергохолдингдин башчысы Айтмамат Назаров брифинг учурунда билдирди.

Анын айтымында, быйыл суунун аз болгондугунан электр энергияны импорттоо пландалууда. Мындан сырткары, Кыргызстан менен Казакстан 300 миллион киловатт-саатты алмашат: электр кубаты жайкысын Казакстанга жиберилсе, күзүндө кайра кайтарылат.

"Ошондой эле 500 миллион киловатт-саат энергияны импорттоо боюнча макулдашуу бар. Ал декабрь айынын соңунан баштап келе баштайт. Мындайча айтканда, 300 миллион киловатт-саат өзүнчө товар алмашуу. Азырынча келишимге кол коюла элек", — деди Назаров.

Жарыктын баасы айтылган жок. Себеби электр энергиясын сатуу боюнча Тажикстан жана Түркмөнстан менен сүйлөшүүлөр жүрүп жатат.

Суу  сактагыч. Архивдик сүрөт
© Пресс-служба президента КР / Султан Досалиев
Ошол эле маалда Улуттук энергохолдингдин жетекчиси жаралган абалга байланыштуу Кыргызстанда электр энергиясына баа өзгөрбөй тургандыгын кошумчалады.

"Миллиард киловатт-саат энергия сатып алууну пландап жатабыз. Анын баасы элге бергенге караганда кымбат, бирок баа көтөрүлбөйт ", — деп айтты Назаров.

Жогоруда аталган көлөмдөгү энергияны сатып алуу үчүн Кыргызстан коңшу мамлекеттер менен сүйлөшүүлөрдү жүргүзүүдө.

93
Белгилер:
Суу, сатуу, электр энергиясы, Кыргызстан
Тема боюнча
Электр энергиясына коюлган жаңы тариф 1-июлдан тарта күчүнө кирет
Кыргызстан Түркмөнстан баштаган өлкөлөрдөн электр энергиясын сатып алат
Москвадага Кремль. Архивдик сүрөт

Россия кыргыз-тажик чек ара көйгөйүндө ортомчу болууга даяр

435
(жаңыланган 12:06 27.05.2020)
Россия тарап Тажикстан менен Кыргызстандын чек арасындагы кырдаал курчуп баратканын белгилеп, аларга көмөк көрсөтүүгө даяр экендигин билдирген.

БИШКЕК, 27-май — Sputnik. Россия Кыргызстан менен Тажикстандын чек ара маселесин жөнгө салууда ортомчулук кызмат көрсөтүүгө даяр. Бул тууралуу аталган мамлекеттин ТИМ башчысы Сергей Лавров шейшемби күнү ЖККУнун тышкы иштер министрлер кеңешинин видеоконференция форматында өткөн жыйынынан кийин билдирди.

Чогулушту RT түз эфирден көрсөттү.

"Тажикстан менен Кыргызстандын чек арасындагы дайыма түшүнбөстүк болуп келет. Тилекке каршы, абал курчуп баратат. Биз союздаштарды күч колдонуудан мүмкүн болушунча баш тартып, сүйлөшүүгө чакырабыз. Ортомчулук кызматыбызды көрсөтүүгө даярбыз. Кырдаал канчалык тез жөнгө салынса, ошончолук жакшы", — деген министр.

Лавровдун айтымында, бул маселе тууралуу Россия тарап Жамааттык коопсуздук келишим уюмунун тышкы иштер министрлеринин кеңешининин онлайн жыйынында да өз өнөктөштөрүнө билдирген.

Эске сала кетсек, май айында кыргыз-тажик чек арасында эки ирет ок атышуу болду. Алгач 8-майда Кыргызстан менен Тажикстандын чектешкен аймагындагы жергиликтүү жашоочулар Баткен районунун Чек айылында 50 сотых жерди талашып, жаңжалдаша кетишкен. Мунун айынан эки мамлекеттин чек арачылары атышып, Кыргызстандын үч жоокери ок жеген.

Ал эми 24-майда Баткендин Мойнок аймагына Тажикстандын "Ворух" анклавынын жашоочулары мал жаюуга аракет кылып, буга Кыргызстандын чек арачылары жол берген эмес. Анын айынан да чек арачылар атышкан.

Тажик тарап кыргызстандык малчылар чек араны кесип өтүп, Согду облусунун аймагына кирип кеткендиктен, кайым айтышуу болуп кеткендигин айтып чыгышкан. Ок атышуудан тажикстандык бир чек арачы жабыркаган.

435
Белгилер:
жардам, маселе, чек ара, Тажикстан, Россия, Кыргызстан
Тема боюнча
КРдин Чек ара кызматы тажикстандык кесиптештерин абалды курчутпоого чакырды
Чек арадагы чатак боюнча Тажикстандын маалыматы
Коронавируска анализ жүргүзүп жаткан лаборатория кызматкери. Архив

Соль-Илецк менен Бузулуктан келген канча адамдан вирус табылганы айтылды

9
(жаңыланган 10:56 28.05.2020)
Россиянын Оренбург облусунун эки аймагынан жалпысынан 1000дей киши кайткан. Алардын арасынан күн сайын вирус жуктургундар аныкталып жатат.

БИШКЕК, 28-май — Sputnik. Оренбургдун Соль-Илецк шаарынан келген 101 кыргызстандыктан, ал эми Бузулук районунан кайткан сегиз кишиден коронавирус аныкталган. Бул тууралуу саламаттык сактоо министринин орун басары Нурболот Үсөнбаев брифинг учурунда билдирди.

Модератор андан Россиянын Оренбург облусунун эки аймагынан келген канча кишиден оору табылганын сураган.

"Учурда стационарларда жаткандар бар, алардан кошумча ПЦР-тесттер алынат. Лабораториялык тастыктоолор улантылып жатат. Бүгүнкү күндө Соль-Илецкиден кайткан 101 адам, Бузулук районунан келген сегиз киши вирус жуктурганы белгилүү болду. Мындан тышкары, 52 курсанттан илдет аныкталган. Арасында Санкт-Петербург эле эмес, Россиянын башка шаарларынан келгендер да бар", — деди Үсөнбаев.

Эске салсак, буга чейин Бузулуктан Бишкекке автобус менен 413 кыргызстандык алып келинген. Ал эми Соль-Илецкиден 541 жаран мекенине кайткан.

Кыргызстанда коронавирус жуктуруп алгандардын саны кескин өсүп, бир суткада 74 адамдан вирус табылды. Муну менен жуктургандардын жалпы саны 1594кө жетти. Коронавирустан 1066 бейтап айыгып чыгып, тилекке каршы, 16 адам көз жумду.

11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.

Өлкөдөгү абал тууралуу Sputnik Кыргызстан тексттик баяндама жүргүзүүдө.

Кабарларды ыкчам, ыңгайлуу шартта окуу үчүн Telegram каналыбызга баш багыңыз.

9
Белгилер:
коронавирус, Соль-Илецк, Кыргызстан
Тема:
Кыргызстандагы коронавирус жуктуруп алгандар
Тема боюнча
Облустардагы COVID-19: сырттан келген бейтаптардын статистикасы
Мындай боло элек болчу! Бир суткада 27 медик коронавирус жуктурду
12 кишинин абалы оор, алтоо реанимацияда. Дарыланып жаткандардын абалы