БИШКЕК, 21-июл. — Sputnik. Россиялык танкисттер Афганистандын чек арасына жакын жерде Харб-Майдон полигонунда машыгуудан өттү. Бул туурасында Россиянын борбордук аскер округу кабарлаганын РИА Новости жазды.
"Жакында боло турган тактикалык окуулардын алкагында Тажикстан аймагында жайгашкан россиялык 201-базанын танкисттери Ляура полигонунан чыгып, 200 чакырым жол басып Афганистандын чек арасына жакын жайгашкан Харб-Майдонго барды", — деп кабарлаган.
Марштын алкагында Т-72 танкасынын экипажы колонналарды аскердик жактан кайтарууга алуу, кооптуу делген жерлерди басып өтүү, диверсиялык-чалгын топтордун жана душмандын абадан жасаган кол салуусунун мизин кайтаруу боюнча машыгууларды жасады. Полигонго келгенден кийин экипаж позицияларды инеженердик жабдуулары жана аскердик техникаларды жашыруун жайгаштыруу боюнча иштеген. Аскерлер башкаруу жайлары орун ала турган жерлерди камдап, түптөп, душмандын көзүнө билинбегендей кылып техникаларды чүмбөттөө боюнча окуулардан өткөн.
Афганистанда өкмөттүк күчтөр менен "Талибан" кыймылынын согушкерлеринин кагылышуусу жүрүп жатат. Экинчи тараптагылар аталган өлкөнүн айыл жергесиндеги бир топ райондорунун аймагын басып алып, ири шаарларга тап коюшууда. Афганистандагы туруктуулук АКШ администрациясы 11-сентябрга чейин аскерлерин алып чыгып кетерин билдиргенден кийин жок боло баштады.
