28-ноябрда өлкөнүн көпчүлүк аймактарында күн ачык болорун Кыргызгидромет кызматы билдирди. Бүгүн табият бизди бир аз эркелеткидей болуп турат. Эртең менентен тарта күндүн ырайы жакшы.
Сактансаң, сактайм. Аба ырайы демекчи, суук түшкөндө шаарды аралай аккан "Ала-Арча" суусу тоңуп, нугунан ашып кетмей адаты бар. Андыктан, кооптуу аймактар, дарыя өткөн жерлер тыкыр көзөмөлгө алынганын мэриядан кабарлашты.
Жакшы кабар, оорулуу балдарга көмүр жеткирилди. Талас районунун Көк-Ой айылындагы "Бекнур" реабилитациялык борборуна боорукер кишилер 1,6 тонна көмүр бергенин билдиришти. Буга чейин алар кышкы отундун бир топ бөлүгүн жагып койгондугун айтып, балдар суукта калчылдабаса экен деп коңгуроо каккан. Аталган борбордо тубаса шал оорусу менен ооруган 20 бала тарбияланат.
Динара, ийгилик каалайбыз. Москвада өтүп жаткан Miss Asia Russia сынагында 17 кыз ат салышып, Кыргызстандын атынан Динара Сулайманова катышууда. Биздин сулууга ийгилик каалап туралы.
Башканы коюп, Манасты ук! Бишкекте жети күн-түнү тынбай Манас айтылган ирмемдерди көргүңүз келеби. Анда биздин түз алып берген каналыбызга көз салып турсаңыз болот.
Атамбаевдин күйөө баласы президент. Оюңуз дароо саясатка кетпесин, сабыр этиңиз. кеп спорт тармагы боюнча болуп жатат. Кыргызстандын Футбол федерациясынын президенти болуп президент Алмазбек Атамбаевдин күйөө баласы Семетей Султанов кайрадан шайланды. Жаңы президентти шайлоо жекшемби күнү өткөн. Анда Султанов жалгыз талапкер катары көрсөтүлгөн.
Валюта наркы. Бүгүн сомдун баасы долларга карата орто эсеп менен 69.13 (сатып алуу) жана 69.25 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.80 сом, Аи-95 үлгүсүндөгү бензин 39.00 сом, ал эми дизель майы 35.80 сомдон сатылууда.
Соңку сөз ордуна. Уста менен дос болсоң, ар кескенин аласың, ууру менен дос болсоң, бир балаага каласың
Күнүңүздөр куунак өтсүн. Аптаңыз жемиштүү болушун каалаган, Нургүл Максутова.
