Баатырдын атын алыстан ук, жанына келсең бир киши. Белгилүү ортопед Сабырбек Жумабековдун эмгегин Гиннестин рекорддор китебине киргизүү сунушталды.
Шевченко мушташат. Эже-сиңди Шевченколорду кимдер гана тааныбайт. Антонина Шевченко өзүнүн чемпиондук титулун сактап калуу үчүн март айында рингге чыгат. Мекендешибизге жеңиш каалайбыз.
Чек арадан таш менен чабышышты. Кыргыз-тажик чек арасында эки мамлекеттин жаш балдары кермур айтыша кетип, бири-бирин таш менен чабышкан. Азыр абал туруктуу экенин Баткен районунун акими айтты. Алыскы туугандан жакынкы кошуна артык дегендей коңшулар менен достук мамилебиз чыңала берсин.
Милициянын жинине эмне тиет. Ар бир кесип ардактуу. Ошол эле учурда кызматкерлердин жинине тийип, кыжырын кайнаткан көрүнүштөр дагы болуп турат. Бул шилтемеден милицияда иштегендердин ачуусун келтирген нерселерди билип алыңыз.
Кат жазышкан замана. Эл оозуна алынып жүргөн ырчы Гүлжигит Сатыбеков чыгармачылыгы, жеке жашоосу тууралуу ачылып маек куруп берди. Эмне үчүн үй-бүлөсүн башкаларга көргөзгүсү келбей турганын да айтты. Ошондой эле азыр кыздарга караганда балдар көп кат жазып калганын кошумчалады.
Океандын ары жагында. АКШ президенттигин Дональд Трампка жаңы эле өткөрүп берген Барак Обама кызматтан кеткенден кийинки биринчи күнүн гольф ойноп өткөрдү. Ал эми Дональд Трамптын келинчеги Меланья Трамп АКШнын биринчи айымы катары алгачкы пикирин Твиттердеги баракчасына жазды.
Валюта наркы. Бүгүн сомдун баасы долларга карата орто эсеп менен 69.40 (сатып алуу) жана 69.65 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 39.40 сом, Аи-95 үлгүсүндөгү бензин 41 сом, ал эми дизель майы 36.00 сомдон сатылууда.
Соңку сөз ордуна. Башталган иш күнүбүз ийгиликтүү болуп, жасаган ишибизден рахат алалы деп Расул Үсөналиев.
