Адамдар акчага баары бир тойбойт экенбиз. Болгон сайын болсун деп улам тытынып жатып өмүр, жашоо кантип өтүп кеткенин билбей калат турбайбызбы. Өткөндө бир психолог менен маектешкени барсам ал киши "адамдардын ниети бузулду. Айлана-чөйрөсүндөгүлөрдү карап аларга көз артып, суктанып, атаандашып жатып эле өмүрүн өткөрүп жатат. Жай отурган кишини азыр табуу кыйын, баары эле кайдадыр бир шашат. Бири-бирин жамандаган, артынан суу куйгандар толтура. Кычыраган үйлөр салынып, жашоо жакшырды делген менен адамдардын жан дүйнөсү ошончо жарды болуп баратат" деп кейиди. Баарын заманга байланыштырган менен ал кишинин айтканы деле туура. Ал тургай ата-энебиздин абалын сурап койгонго убактыбыз жок, "тиги жумушту бүтүрө калайын, муну бүтүрө калайын" деп күндөр өткөнүн билбей калып жатабыз.
Бурадарды окуп жатсаңыздар көзү тирүү болсо ата-энеңизге, жакындарыңызга бир чалып абалын сурап, жакшы көрөөрүңүздү айтып коюңузчу.
Ыйык айда жок дегенде кайрымдуулук кылганды унутпайлы. Бирөөнө үй салып же унаа алып бербесеңиз да чөнтөгүңүздөн чыккан акчаны кайырчыларга берип же жардамга муктаж адамдардын маанайын көтөрүп коюңуз. Айтор, көңүл оорутуп, кайдыгер болбойлучу.
Баса, кечээ сайтыбызга абдан сонун жаңылык чыкты. Ош облусунун Өзгөн районундагы Кашка-Терек айылындагы мектепти 20 жыл мурда бүтүргөндөр айылдашы, жакыр жашаган пенсионер аялга үй куруп беришти. Уулу бир нече жыл мурда каза болуп калган аял балдарга ыраазы болуп, жаңы үйлүү болгондо ыйлаптыр.
Экс-президент Роза Отунбаеваны жеке өзүм сыйлайм. Анын жасап жаткан жакшы иштерине көз жуумп коюуга мүмкүн эмес. Балдардын билим алуусуна, жаштайынан өнүктүрүүгө колдон келген салымын кошуп келе жаткан мурдагы президент менен Эркин Алымбеков маектешти.
Кайдыгерликпи? Апрель айынын башында Бишкектеги Медициналык тез жардам клиникалык балдар ооруканасына ангина оорусу менен түшкөн 8 жаштагы жеткинчек каза болуп калыптыр. Кимден күнөө кеткенин айтуу кыйын, бирок ата-энесинин абалын ойлогондр жүрөк канайт.
Бишкектин четинде жүк ташуучу унаа эки баланы коюп кеткен. Айдоочулар деги абайлагылачы, кайда шашасыңар?
Көрсө, төө куштун этинен баштап, жумурткасы, ал тургай анын сырты да баалуу экен. Кыргызстанда ишкерликтин өзгөчө түрү менен алектенген жубайлар менен Sputnik Кыргызстан агенттиги баарлашып келди.
Кечээ Астана шаарында кум аралашкан бороон болуптур. Бүгүн бизде да жамгыр жаап, шамал болору айтылып жатат. Кол чатыр алып, жылуу кийингиле!
Валюта наркы. Сомдун баасы долларга карата орто эсеп менен 68.18(сатып алуу) жана 68.45 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 42.30 сом, АИ-95 үлгүсүндөгү бензин 45.00 сом, ал эми дизель майы 43.30 сомдон сатылууда.
Соңку сөз ордуна. Дүйнөбүз түгөл болсун!
Ден соолук каалап Таалайгүл Усенбаева.
