Журналисттер. Архив

Амансызбы, бурадар? Өлкөдө 10:15. Спорт журналисттери кызыл чекеге түшүп...

209
(жаңыланган 10:59 09.07.2018)
Кутман таң, күнүңүз тынч өтсүн!

Арыбагыла, туугандар! Бүгүн менин бир жумалык эмгек өргүүдөн кийинки жумушка чыгышым. Эс алуунун төрт күнүн мелмилдеген Ысык-Көлдүн жээгинде, тагыраагы спорт журналисттерине арналган мелдеште өткөрдүм.

Уюштуруучулар — Жаштар иши, дене тарбия жана спорт боюнча мамлекеттик агенттиктин өкүлдөрү азамат экен!

Эсте калган учурлар көп болду. Жети дубандан келген кырктан ашык журналисттин башы биригип, төрт командага бөлүндүк. Атыбыз эле бир тайлык: "Кочевник", "Пушки", "Алга", "Жаштык"…

Быссымылда дегенде эле жаш курак боюнча физикалык нормативден баштадык. 60 метрге чуркап, колду буттун учуна чейин чоюп, анан секирдик. Мендей салмагы оор адамдарга бул көнүгүүлөрдү жасоо оор сезилди, арыктар чегирткедей эле кыймылдап жүрүштү. Антейин десең сексенге таяп калган Канай Баяновичтин күлүктөй чуркаганычы… Жетимишке барып калган Александр Шепеленко, алтымыштан ашкан Табылды Асыгалиев менен Тахир Гафуровдун активдүү катышкандыгы жаштарга дем берди.

Андай кийин аркан тарттык. Мындайда салмагы чоңдорго кудай берди, күч жетпегенде чалкалап алсаң жакшы экен. Бирок өзүбүздөн чоң арканды тартыш оңойбу, улуу байкелер ага анаконда деп ат коюп алышкан.

Мелдештин эң кызыктуу учуру футбол болду. Чиркин, дүйнө чемпионатынан кем калышпай ойнодук го. Катуу оюн болду. Кызыл чекеге да түшүп кеттик. Чындыгында журналисттердин арасында топту катыра ойногондор көп экен. Айрымдары фаворит болгонго жетишти. Мендей ойной албагандар жок дегенде атаандаштын астын тороп, торойто коюп кеткенге жарап жатты.

Программа боюнча тогуз коргоол ойнойбуз дегенде баары "билбейбиз, тимеле койсок болмок" деп кейип-кепчип жатышкан. Бекер эле наалыптырбыз. Мелдешке чейин оюндун калысы эрежелери жана сырлары тууралуу бөлүштү. Тогуз коргоол өзүнө арбап алат деп ойлогон эмесмин. Акырында баарыбыз таштарды шуулдата санап, биринчи, экинчи орундарды алсак болобу. Оюндун калысы кетип баратканда "сизди кайдан таап, үйрөнсөк болот" дегендер арбыды. Тогуз коргоол чыныгы акыл калчаган оюн экен!

Кум үстүндөгү волейболду командада экиден гана киши ойнойт экен. Эсте калган оюндардын бири болду. Өзгөчө буттар ысык кумга тийип, күн мээге чакыйганда өзүң эле безилдеп чуркап ойнойт экенсиң. Волейбол калк арасында популярдуу оюн экендигин ушундан билиңиз, эс алып жүргөндөр кошо күйөрмандык кылып, кайсы бир командага жан тартканга үлгүрүштү.

Эң сонун учур сыйлык тапшыруу эле. Жүрөк дүкүлдөп кайсыл команданын аты чыгат деп санаага баттык. Төрт команда тең күчтүү болгондуктан алдын ала жеңүүчүнү атоо кыйынга турду. Төртүнчү "Жаштык", үчүнчү "Пушки", экинчи "Алга" дегенде эле жеңүүчү ким экендиги белгилүү болду. Залдын ичин "Кочевник" деп кыйкырган үн жарып салайын деди. Баса, бул менин командам эле. Жеңиштин даамын сүрөттөп берүү кыйын. Жашоомдогу алгачкы медаль, диплом, Кубокту ушул мелдеште жеңдим. Мага окшогондор ондоп саналды.

Жыйынтык сөз. Биринчиден мелдештин аркасы менен ЖМКлар ортосунда мамиле чыңалып, кесиптештер менен алака түзүлдү. Экинчиден, спорт жаатында жаңы идеялар пайда болду. Үчүнчүдөн, сонун эс алдык!

Эми жаңылыктарга өтөлү.

Кайрадан спорт. Социалдык медиада Бельгиянын курама командасы жана "Ливерпулдун" дарбазачысы Симон Миньоледен футболка сураган кыргызстандык күйөрман эсиңиздеби? Кесиптештер ал менен байланышып, окуя туурасында учкай маек курду.

Эгерде футбол чемпионатындагы япониялык күйөрман жөн гана отурган жерин тазалап кетсе эч ким көңүл бурмак эмес. Ал калпак кийип алыптыр.

Президент Сооронбай Жээнбеков мурдагы депутат Өмүрбек Бабановдун уулу Нурэмирди бетинен өптү. Эмне үчүн?

Ал арада Мирбек Сакенов алтын сертификат алган бүтүрүүчүлөр кайсы облуста көп экендигин аныктады.

Кесиштештерим негизи эле кыйын деп айтам го, Айида Батырбекова Таласта 11 килограмм алтын үчүн жайыт жер менен токойду ким каза баштаганын ачыктады.

Мунай баасы. Бишкекте орточо эсеп менен алганда АИ-95 үлгүсүндөгү май 47.00 сом, АИ-92 үлгүсүндөгү бензин 44.30 сом, ал эми дизель майы 45.00 сомдон сатылып жатат. 

Доллар баасына кызыккандарга. Сомдун баасы долларга карата орто эсеп менен 68.10

Соңку сөз: Иштегенди да, эс алганды да билиңиз!

209
Белгилер:
Бурадар, жаңылыктар, аба ырайы, мунай, Кыргызстан
Атчан киши. Архивдик сүрөт

Амансызбы, бурадар? Өлкөдө 10:15. Жыгылсаң тизеле, сөз уксаң чыйрал!

87
(жаңыланган 16:15 28.12.2018)
Жакшы жатып, жай турдуңузбу, мекендеш?

Жылдын жаңырарына саналуу күндөр калды. Көптөр быйылкы жылга саресеп салып, өткөндү таразалап, келечекти боолголоп, жыйынтык менен Кара кийик жылына, 2019-жылга аттаганы турат. Пендебиз, адамбыз, инсанбыз. Узап бара жаткан жыл жашообузда, чөйрөбүздө, ишибизде, жеке жашообузда бир топ окуяларды тартуулады. Бул сапаркы "Бурадар" окуган адамды бир аз болсо да өзүнүн жашоосуна бир жылдык саресеп кылганга жетелесе керек.

…Ар кыл окуялар болду. Бирибиз алыска сапар алдык, дагы бирибиз өлкөдөн качып-бозуп же жөн эле чыгып кеттик, бир даарыбыздын бүлөбүздө наристе пайда болду, бир катарларыбыз түгөй таптык, дагы бирибиз жакыныбыздан ажырадык, канчабыз маңдай жарыла кубандык, көптөрүбүздүн көңүлүбүз калды, бир тобубузду оору коштоду, кээ бирөөбүздө жашоого үмүт жанды. Ошентип биздин күндөр жүз кырдуу мүнөзүн көрсөтүп, жүз сыноого салды. Бул — улуу кыймыл. Ал ошонусу менен кызык тура. Жылды узата карап туруп, ушул ойлорго жетелендим.

Жыгылган сайын тизелеп тура калып; мостойткон сөз уккан кезде чыйрала жалт карап; сенден оолактаганда кара башыңа ишенип; ишиңдин кедери кеткен арабаңды бек тартып, айтор жашоону улаганга милдеттүүбүз. Себеби бул — тирүүлүк. Бул бизге берилген ырыскы, шыбага, мүмкүнчүлүк. Ошондуктан келе жаткан жылды да ойлогондой, пландагандай, максат кылганыбыздай жашап өтөлү. 2019-жылы жакындарыбызга, айланабызга, тааныган-тааныбагандарга мээрим тартуулайлы, жетимдин бешенесин сылайлы, жесирден кабар алалы, оорунун абалын билели, жакшылык жасайлы. Башкасы болбосо да, бул менин, сенин колубуздан келет, бурадар. Анан өзүбүздүн койгон максаттарыбызга жетели, баштаган ишибиздин өтөсүнө чыгалы. Аманчылыкта жашайлы, сүйүктүү ишибиз менен алек бололу.

Келе жаткан Жаңы жылыңыз менен куттуктайм, замандаш! Жакшылыктарыбыз арбысын деген тилек менен бүгүнкү "Бурадарга" жетелейин. Бул "Бурадардын" 2018-жылдагы акыркы тизмеги.

Аба ырайы. 28-декабрда Ош калаасында +6…+8, ал эми Бишкекте +6…+8 градус жылуу болот

30-декабрдан 7-январга чейин. Жаңы жылда Бишкектеги коомдук тартипке милициянын 2300 кызматкери көз салат тура

Кыштын кыраан чилдесинде. Солтон-Сары кенин кытайлыктардын иштетүүсүнө каршы экендигин билдирип Нарын эли жыйын курду

Аша чаап кеткен жокпу? Жогорку Кеңештин депутаты чет элдик туристтер үчүн Ысык-Көл визасын киргизүүнү сунуштады

Журналист, депутат, эми төраганын орун басары. Жогорку Кеңештин депутаты Аида Касымалиева жашыруун добуш берүү менен вице-спикерликке шайланды

Көрбөгөн арманда! 2018-жылдын эң мыкты видеолору. Эми… көз чачырайт!!! 

Дүкөнгө же жумушка чыгып эле кайра үйгө кайтпай калуу кандай коркунучтуу. Sputnik жыл жыйынтыгын чыгарууда. Мүрт кеткен мугалимдер, энесиз калган бөбөк… Үрөй учурган жол кырсыктары

Жылды соттошуу менен тосуп алабы? Азимбек Бекназаров, Ахматбек Келдибеков жана Кеңешбек Дүйшебаев экс-президент Алмазбек Атамбаев менен "Апрель" телеканалынын директору Дмитрий Ложниковду сотко берди. Бул саясатчылар жылды соттошуу менен тосуп алабы?

Ажалы жок экен, бирок компенсация да жок дешти. Кайыган ок жолдо кетип бараткан 57 жаштагы кишиге тийип, бирок аман кылган. Акчаңа ыраазымын, аман калдым деген окшойт. Ош шаардык ЖКККБ жетекчисинин айтымында, жабыркаган киши инспекторго эч кандай доосу жок экенин билдирген маалымат түшкөн.

Валюта наркы. Сомдун баасы долларга карата орто эсеп менен 69.78 (сатып алуу) жана 69.90 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 43.50 сом, ал эми дизель майы 45.50 сомдон сатылууда.

Соңку сөз ордуна. Колуңдан келишинче бактылуу бол! Бакыт – сенин жакындарыңдын амандыгы, маңдайыңда жаркылдап турган жарың, чүрпөлөрүң, сүйүктүү ишиң жана чың ден соолугуң.

Бардыгыңыздарга жакшылык каалап, Нургүл Максутова.

87
Белгилер:
Бурадар, бакыт, тилек, кайрымдуулук, Жаңы жыл
Тез жардам автоунаасы. Архив

Амансызбы, бурадар? Өлкөдө 10:15. Тез жардамды акыйып күткөн 47 миң учур

85
(жаңыланган 11:00 28.12.2018)
Жакшы жатып жай турдуңузбу, замандаш? Келе жаткан Жаңы жылыңыз менен куттуктайбыз! Жылга жакшы маанай, жакшы тилек менен аттайлы деп турабыз.

Бүгүнкү "Бурадарда" кечээги күнү болгон окуялардын тандалган тизмегин сунуштайбыз.

Азыр көптөрдө Жаңы жыл алдындагы майрамдык маанай. Тизмегибизди жакшы, жарык кабардан баштайлы деп чечтик.

Кечээ көптөгөн бөбөктөрдүн көзүнөн кубанычтын, толкундоонун учкунун көрүүгө болот эле. Таңгалган, суктанган, жылмайган сүрөттөр.

Ал эми президенттин кичинекейлерди куттуктап, бетинен өөп, бешенесинен сылаган видеосун бул жерден көрө аласыз.

Жаңы жыл келе жатат, жыл жыйынтыгын четинен чыгарып баштадык. Sputnik быйыл иши алдыга жылып, ити чөп жеген спортчуларды санап чыкты.

Анткен менен бир катар адамдар үчүн жыл чырлуу аяктап бара жаткандай. Депутат мандатынан ажыраганы үчүн аймактык шайлоо комиссиясын сотко бермей болду.

Сот демекчи, эмне болсо да эркиндиктен ашкан нерсе жоктур. Абактагы кишиге КР президенти кантип ырайым берери тууралуу материал сайтка жарыяланды.

Адамзат соттошуп, талашып-тартышып чындыктын түбүнө жетет чыгар. Бирок апам айтмакчы, "чыккан жан менен калган кадыр кайтып келбейт", тагыраагы, бийликтин, байлыктын түбүнө жеткен киши жок. Кезегинде котормочу, протокол бөлүмүнүн жетекчиси, Акаевдин экс-маалымат катчысы болгон Ильяс Бекболотов кечээ дүйнө салыптыр. Жаткан жери жайлуу болсун.

Бирок ажалды адам киши колунан тапкан учурларды кантебиз? Өзүнүн акыркы мүнөттөрүнө шашкан жигитпи же артынан кууган милициябы? Себепкер ким? Бишкектик автоинспекторлор артынан сая түшүп, айдоочу каза таптыбы? Кырсыктын видеосу бул жерде. Азырынча суроодон башка жообу жок жагдай.

47 миң учур… Жан көзгө көрүнгөндө, жакындарың ооруп, же балаң кыйналып, түйүлүп, ыйлап турганда дарыгер көздөн учат. Тез жардам гана абалга аралжы болчудай сезилет. Быйылкы жылдын эсебинен дарыгерлерди акыйып канча киши күткөнү тууралуу маалымат чыкты.

Валюта наркы. Сомдун баасы долларга карата орто эсеп менен 69.78 (сатып алуу) жана 69.90 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 43.50 сом, ал эми дизель майы 45.50 сомдон сатылууда.

Соңку сөз ордуна. Калган кадыр менен чыккан жан табылбайт.

Жакшылык, аманчылык тилеп Мирбек Сакенов.

85
Белгилер:
Бурадар, балаты, бала, Сооронбай Жээнбеков
Медициналык кызматкер вакцина менен. Архив

Бишкекте дагы эки эмдөө пункту ачылды, 60тан өткөндөр "Спутник V" алса болот

0
"Спутник V" вакцинасын 60 жаштан жогорку курактагылар жана өнөкөт оорусу барлар (дарыгердин багыттамасы болсо) ала алышат.

БИШКЕК, 24-июн. — Sputnik. Бишкек шаарында дагы эки эмдөө пункту ачылды. Каалоочулар ал жерден "Спутник V" вакцинасын ала алышат. Бул тууралуу мэриядан билдирди.

Пунктулар Ленин райондук (64 45 57, 0505 111 330) жана Свердлов райондук (63 51 22; 0505 286 670) бириктирилген үй-бүлөлүк борборлорунда жайгашкан.

Учурда Бишкекте 24 убактылуу эмдөө пункту иштеп жатат. Дареги:

  • Октябрь райондук бириктирилген үй-бүлөлүк медицина борбору — 57-09-15, 0 (703) 29-37-93;
  • Биринчи май райондук бириктирилген үй-бүлөлүк медицина борбору — 32-55-71, 0 (550) 70-10-02;
  • Биринчи май райондук бириктирилген үй-бүлөлүк медицина борборунун №7 үй-бүлөлүк борбору — 62 09 62;
  • Свердлов райондук бириктирилген үй-бүлөлүк медицина борборунун №8 үй-бүлөлүк борбору — 43 39 03; 0551 117 744.

Белгилей кетсек, "Спутник V" вакцинасын 60 жаштан жогорку курактагылар жана өнөкөт оорусу барлар (дарыгердин багыттамасы болсо) ала алышат.

Кытайлык Sinopharm препаратынын экинчи дозасын саюу дагы уланууда (№4, 9, 14, 15, 16, 17, 19 үй-бүлөлүк медицина борборлору).

0
Белгилер:
үй-бүлөлүк медицина борбору, вакцина, коронавирус, Бишкек
Тема:
Коронавируска каршы эмдөө
Тема боюнча
COVID: эмделер алдында антителого тест тапшыруунун зарылдыгы барбы
Казак өкмөтү: Кыргызстанга вакцина берүү пландалган эмес