Экс-президент Алмазбек Атамбаев, жубайы Раиса Атамбаева жана кызы Алия Шагиева. Архив

Амансызбы, бурадар? Өлкөдө 10:15. Көп балалуу аталар парады

154
(жаңыланган 11:38 17.09.2018)
Жакшы жатып, жай турдуңузбу, мекендеш?

Тирүүлүктүн бүгүнкү күнүнө кадам таштоо менен кечээ болгон маанилүү делген окуяларды Бурадарга тизмектедик.

Кайсы бир чыгармада жазылгандай, ууру мышыкча жылып, күз да келди… Анткен менен күндүн табы кайта электей. Синоптиктер Бишкекте +22…+24 болсо, Ошто +28…+30 градуска чамалап барарын билдирди. Күн чубактап алчулар болсо, мүмкүнчүлүктү колдон чыгарбагыла. Мындай аба ырайында Ысык-Көлгө барып чумкуп келүү ашыктык кылбас.

Суучул кой. Ал арада Ысык-Көлдү сүзүп өткөн койдун видеосу интернетке тарап, көптөрдүн кызыгуусун арттырды. Көл жээгиндеги бөбөктөр бүк түшүп жатып калган койдун карды ачты го деп чебелектеп жүргөнүн көрүүгө болот. Ал видеонун алдына кээ бир интернет колдонуучулар "суунун аркы өйүзүнөн бери жагына конокко келе жаткан окшобойбу" деген тамашасын жазып калтырышыптыр.

Конок демекчи, Кыргызстан көчмөндөрдүн дүйнөлүк III оюндарын өткөрүп, меймандар менен катышуучуларды узатып, өх-ххх… деп калган чагы. Аталган иш-чаранын башкы режиссеру Алтынбек Максутов көчмөндөр оюндарын сахналаштырууга үч айга чукул убакыт даярдык жүргөнүн айтты.

Тойдун тойдой шарапаты болот эмеспи. Аалы Туткучев Көчмөндөр оюнунан эки тулпар минип кайтты. Акын "атка жакын жаным эки күлүктү тең Бишкекке алып келип, үйдө эмес ипподромдо жашап калдым" деп тамашалады.

Ал арада Sputnik Кыргызстандагы көп балалуу саясатчы аталар туурасында материал дарядады. Аларды алдынын 12ден баласы бар экен. Сап башында экс-президент Алмазбек Атамбаев, депутат Пархат Тулендыбаев жана дагы бир топ биз тааныган кишилер бар.

Саясатчы туурасында сөз болуп жаткан соң, кечээ сайтка чыккан кадимки эле Башар Асад туурасындагы "Батышка багынбаган Башар Асад. Президент тууралуу 10 факты" деп аталган материалды сунуштайбыз.

Валюта наркы. Сомдун баасы долларга карата орто эсеп менен 69.69 (сатып алуу) жана 69.92 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.00 сом, АИ-92 үлгүсүндөгү май 43.50 сом, ал эми дизель майы 44.80 сомдон сатылууда.

Соңку сөз: Балалуу үй — базар, баласыз үй — мазар

Иш аптаңыздардын ийгиликтүү өтүшүн каалап, Нургүл Максутова

154
Белгилер:
валюта, Мунай, Башар Асад, Кыргызстан
Пикирлер