Бишкек шаары. Архивдик сүрөт

Амансызбы, бурадар? Өлкөдө 10:15. Бишкектеги батирлердин баасын билип алыңыз

368
(жаңыланган 19:00 09.02.2019)
Кутман таң, окурман! Кар аралаштырып жааган күзгү жамгыр жана күндүн сууктугу айлаңызды кетирген жокпу? Эмнеси болсо да жылуу кийинип, чарчабай өз арабаңызды тарта бериңиз!

Кечээ Ак үй тараптан катуу добуштар угулуп турду. Адегенде КСДП фракциясынын лидери Иса Өмүркулув өз партиясынан чыгарылганы боюнча маалымат жыйын өткөрүп бир топ нерсени айтып берди.

Кызыгы, партиядан эмне себептен чыгарылганын ал өзү да билбейт экен. Эч кандай мыйзамды, тартипти бузбаганын айтууда. Анан "Атамбаевди сатпаганын, ошондой эле аны менен азырынча мамилеси жакшы экенин" белгилейт. 

Маалымат жыйындын тексттик трансляциясын окуп, видеосун көрүңүздөр

Менин деле ак көңүл досторум, кесиптеш, санаалаштарым аябай көп. Алар мени көчөгө таштабай турганына ишенем. Кечирип койгула, бирок акча алсам кечип койгонун көрө элекмин. Улуттук банк төрага Толкунбек Абдыгулов алган ссуданын калган суммасын — 4,8 миллион сомду кечип койду. Анын турак жай алуусуна көмөк болсун дешиптир. Оо-о, баракелде! Мага да ушундай жамаатты таап бергилечи!

Айтып оозумду жапканча эле Экономика министрлиги кыргызстандыктарга үй-жайлуу болууга жардам бере турган компания түзүүнү сунуштап жатканын уктум. Бул мүмкүнчүлүктөн ким пайдалана алат жана механизм кандай жол менен иштейт? Бул суроолорго аталган ведомство жооп берди

Ал эми Бишкектеги кыймылсыз мүлк рыногунда батирлер канчадан сатылып жатканына кызыксаңыз, бул жакка баш багып билип алыңыз. Баасы туура келип алып калсаңыз, алдын ала ак өргөңүз менен куттуктап коёюн!

Кечээ Кыргызстанда тартип менен тынчтыкты камсыздап, мамлекеттин бүтүндүгүн жана жарандардын укугун коргогон милиция кызматкерлери кесиптик майрамын белгиледи.

Бир кылымга чукул убакыттын ичинде өз кызматын аткарып жаткан учурунда 272 милиция кызматкери өмүрү менен кош айтышкан. Алардын акыркысы кылмышкердин колунан бычак жеп каза болгон 25 жаштагы ага лейтенант Уларбек Майрамбеков болуп калды. ИИМден тастыктагандай, бактыга жараша, былтыртан бери бул сыяктуу окуялар катталган эмес.

Доктур Эркингүл Койбакова кыргызстандык ооруканалардагы көшөгө артында болчу окуялардан баяндап, жоругу жолдо калчу энелерге кайрылды

Кыргызстандын көк бөрү чемпионатында Чүй менен Ысык-Көл облусунун командалары финалга чыкты. Кимиси чемпион болоор экен эми?..

Бүгүн өлкө боюнча күн суук болуп, жер-жерлерде кар жаашы мүмкүн. 

Валюта наркы. Сомдун баасы долларга карата орто эсеп менен 69.68 (сатып алуу) жана 69.90 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 44.00 сом, ал эми дизель майы 47.00 сомдон сатылууда.

Соңку сөз. Жүрөгүңүздөрдө жана үйүңүздөрдө жылуулук болуп турсун!

Амандыгыңызды тилеп Эламан Карымшаков

368
Белгилер:
саясат, суук, валюта, акча, аба ырайы, Мунай
Атчан киши. Архивдик сүрөт

Амансызбы, бурадар? Өлкөдө 10:15. Жыгылсаң тизеле, сөз уксаң чыйрал!

80
(жаңыланган 16:15 28.12.2018)
Жакшы жатып, жай турдуңузбу, мекендеш?

Жылдын жаңырарына саналуу күндөр калды. Көптөр быйылкы жылга саресеп салып, өткөндү таразалап, келечекти боолголоп, жыйынтык менен Кара кийик жылына, 2019-жылга аттаганы турат. Пендебиз, адамбыз, инсанбыз. Узап бара жаткан жыл жашообузда, чөйрөбүздө, ишибизде, жеке жашообузда бир топ окуяларды тартуулады. Бул сапаркы "Бурадар" окуган адамды бир аз болсо да өзүнүн жашоосуна бир жылдык саресеп кылганга жетелесе керек.

…Ар кыл окуялар болду. Бирибиз алыска сапар алдык, дагы бирибиз өлкөдөн качып-бозуп же жөн эле чыгып кеттик, бир даарыбыздын бүлөбүздө наристе пайда болду, бир катарларыбыз түгөй таптык, дагы бирибиз жакыныбыздан ажырадык, канчабыз маңдай жарыла кубандык, көптөрүбүздүн көңүлүбүз калды, бир тобубузду оору коштоду, кээ бирөөбүздө жашоого үмүт жанды. Ошентип биздин күндөр жүз кырдуу мүнөзүн көрсөтүп, жүз сыноого салды. Бул — улуу кыймыл. Ал ошонусу менен кызык тура. Жылды узата карап туруп, ушул ойлорго жетелендим.

Жыгылган сайын тизелеп тура калып; мостойткон сөз уккан кезде чыйрала жалт карап; сенден оолактаганда кара башыңа ишенип; ишиңдин кедери кеткен арабаңды бек тартып, айтор жашоону улаганга милдеттүүбүз. Себеби бул — тирүүлүк. Бул бизге берилген ырыскы, шыбага, мүмкүнчүлүк. Ошондуктан келе жаткан жылды да ойлогондой, пландагандай, максат кылганыбыздай жашап өтөлү. 2019-жылы жакындарыбызга, айланабызга, тааныган-тааныбагандарга мээрим тартуулайлы, жетимдин бешенесин сылайлы, жесирден кабар алалы, оорунун абалын билели, жакшылык жасайлы. Башкасы болбосо да, бул менин, сенин колубуздан келет, бурадар. Анан өзүбүздүн койгон максаттарыбызга жетели, баштаган ишибиздин өтөсүнө чыгалы. Аманчылыкта жашайлы, сүйүктүү ишибиз менен алек бололу.

Келе жаткан Жаңы жылыңыз менен куттуктайм, замандаш! Жакшылыктарыбыз арбысын деген тилек менен бүгүнкү "Бурадарга" жетелейин. Бул "Бурадардын" 2018-жылдагы акыркы тизмеги.

Аба ырайы. 28-декабрда Ош калаасында +6…+8, ал эми Бишкекте +6…+8 градус жылуу болот

30-декабрдан 7-январга чейин. Жаңы жылда Бишкектеги коомдук тартипке милициянын 2300 кызматкери көз салат тура

Кыштын кыраан чилдесинде. Солтон-Сары кенин кытайлыктардын иштетүүсүнө каршы экендигин билдирип Нарын эли жыйын курду

Аша чаап кеткен жокпу? Жогорку Кеңештин депутаты чет элдик туристтер үчүн Ысык-Көл визасын киргизүүнү сунуштады

Журналист, депутат, эми төраганын орун басары. Жогорку Кеңештин депутаты Аида Касымалиева жашыруун добуш берүү менен вице-спикерликке шайланды

Көрбөгөн арманда! 2018-жылдын эң мыкты видеолору. Эми… көз чачырайт!!! 

Дүкөнгө же жумушка чыгып эле кайра үйгө кайтпай калуу кандай коркунучтуу. Sputnik жыл жыйынтыгын чыгарууда. Мүрт кеткен мугалимдер, энесиз калган бөбөк… Үрөй учурган жол кырсыктары

Жылды соттошуу менен тосуп алабы? Азимбек Бекназаров, Ахматбек Келдибеков жана Кеңешбек Дүйшебаев экс-президент Алмазбек Атамбаев менен "Апрель" телеканалынын директору Дмитрий Ложниковду сотко берди. Бул саясатчылар жылды соттошуу менен тосуп алабы?

Ажалы жок экен, бирок компенсация да жок дешти. Кайыган ок жолдо кетип бараткан 57 жаштагы кишиге тийип, бирок аман кылган. Акчаңа ыраазымын, аман калдым деген окшойт. Ош шаардык ЖКККБ жетекчисинин айтымында, жабыркаган киши инспекторго эч кандай доосу жок экенин билдирген маалымат түшкөн.

Валюта наркы. Сомдун баасы долларга карата орто эсеп менен 69.78 (сатып алуу) жана 69.90 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 43.50 сом, ал эми дизель майы 45.50 сомдон сатылууда.

Соңку сөз ордуна. Колуңдан келишинче бактылуу бол! Бакыт – сенин жакындарыңдын амандыгы, маңдайыңда жаркылдап турган жарың, чүрпөлөрүң, сүйүктүү ишиң жана чың ден соолугуң.

Бардыгыңыздарга жакшылык каалап, Нургүл Максутова.

80
Белгилер:
Бурадар, бакыт, тилек, кайрымдуулук, Жаңы жыл
Тез жардам автоунаасы. Архив

Амансызбы, бурадар? Өлкөдө 10:15. Тез жардамды акыйып күткөн 47 миң учур

81
(жаңыланган 11:00 28.12.2018)
Жакшы жатып жай турдуңузбу, замандаш? Келе жаткан Жаңы жылыңыз менен куттуктайбыз! Жылга жакшы маанай, жакшы тилек менен аттайлы деп турабыз.

Бүгүнкү "Бурадарда" кечээги күнү болгон окуялардын тандалган тизмегин сунуштайбыз.

Азыр көптөрдө Жаңы жыл алдындагы майрамдык маанай. Тизмегибизди жакшы, жарык кабардан баштайлы деп чечтик.

Кечээ көптөгөн бөбөктөрдүн көзүнөн кубанычтын, толкундоонун учкунун көрүүгө болот эле. Таңгалган, суктанган, жылмайган сүрөттөр.

Ал эми президенттин кичинекейлерди куттуктап, бетинен өөп, бешенесинен сылаган видеосун бул жерден көрө аласыз.

Жаңы жыл келе жатат, жыл жыйынтыгын четинен чыгарып баштадык. Sputnik быйыл иши алдыга жылып, ити чөп жеген спортчуларды санап чыкты.

Анткен менен бир катар адамдар үчүн жыл чырлуу аяктап бара жаткандай. Депутат мандатынан ажыраганы үчүн аймактык шайлоо комиссиясын сотко бермей болду.

Сот демекчи, эмне болсо да эркиндиктен ашкан нерсе жоктур. Абактагы кишиге КР президенти кантип ырайым берери тууралуу материал сайтка жарыяланды.

Адамзат соттошуп, талашып-тартышып чындыктын түбүнө жетет чыгар. Бирок апам айтмакчы, "чыккан жан менен калган кадыр кайтып келбейт", тагыраагы, бийликтин, байлыктын түбүнө жеткен киши жок. Кезегинде котормочу, протокол бөлүмүнүн жетекчиси, Акаевдин экс-маалымат катчысы болгон Ильяс Бекболотов кечээ дүйнө салыптыр. Жаткан жери жайлуу болсун.

Бирок ажалды адам киши колунан тапкан учурларды кантебиз? Өзүнүн акыркы мүнөттөрүнө шашкан жигитпи же артынан кууган милициябы? Себепкер ким? Бишкектик автоинспекторлор артынан сая түшүп, айдоочу каза таптыбы? Кырсыктын видеосу бул жерде. Азырынча суроодон башка жообу жок жагдай.

47 миң учур… Жан көзгө көрүнгөндө, жакындарың ооруп, же балаң кыйналып, түйүлүп, ыйлап турганда дарыгер көздөн учат. Тез жардам гана абалга аралжы болчудай сезилет. Быйылкы жылдын эсебинен дарыгерлерди акыйып канча киши күткөнү тууралуу маалымат чыкты.

Валюта наркы. Сомдун баасы долларга карата орто эсеп менен 69.78 (сатып алуу) жана 69.90 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 43.50 сом, ал эми дизель майы 45.50 сомдон сатылууда.

Соңку сөз ордуна. Калган кадыр менен чыккан жан табылбайт.

Жакшылык, аманчылык тилеп Мирбек Сакенов.

81
Белгилер:
Бурадар, балаты, бала, Сооронбай Жээнбеков
Антарктида аралынын жээгиндеги кеме. Архив

Жер жүзүндөгү абасы эң таза аймак аталды

0
Адистер адам ишмердүүлүгүнүн натыйжасында жер жүзүндө абасы таза аймактар дээрлик калбай баратканын эскертишкен.

БИШКЕК, 3-июн. — Sputnik. Колорадо университетинин (АКШ) окумуштуулары австралиялык кесиптештери менен биргеликте планетадагы абасы таза жерди аныкташты. Адистердин изилдөөсү Proceedings of the Natural Academy of Sciences (PNAS) журналына жарыяланды.

Окумуштуулар Түштүк океан деп аталган Тынч, Атлантика жана Индия океандарынын аймагында аба таза экенин божомолдошкон. Адистердин айтымында, бул жерлерге башка континенттердеги булгануу жана чаң жетпейт.

Изилдөөчүлөрдүн кемеси Тасманиядан Антарктидага чейин барган. Адистер жолдо абанын үлгүлөрүн алышкан. Алар төмөнкү атмосферанын касиеттерин аныктоого жардам берген бактерияларга кызыгышкан.

"Мындай караганда, Антарктидага түштүк континенттерден бактериялар таралбайт, аймак обочолонуп турат. Бул Түштүк океандын антропогендик иш-аракеттер дээрлик таасирин тийгизбеген аймактарынын бири", — деген экспедициянын мүчөсү Томас Хилл.

Адистер адам ишмердүүлүгүнүн натыйжасында жер жүзүндө таза аймактар дээрлик калбай калганын кошумчалашкан.

0
Белгилер:
Окумуштуулар, аба, аалам, жер
Тема боюнча
Булганган аба аялдарды эмчек рагына кептейт. Иликтөө
Адамзатты каатчылык күтүп турабы? Эксперттердин изилдөөсү
Окумуштуулар: коронавирус пандемиясы адамзаттын өмүрүн сактайт