Тоннельде бараткан киши. Архивдик сүрөт

Жаным көзүмө көрүнгөндө... Өмүргө тете бир күндүн баяны

9288
(жаңыланган 14:33 17.09.2017)
Ар бир күндүн өз тарыхы бар. Дүйшөмбү күнү дүңгүрөсөңүз, эртеси мүңкүрөп калышыңыз мүмкүн экен. Анткен менен андан сабак алып жашоо керек. Колумнист Исмаил Мамытов башынан өткөн окуяны өмүр бою унутпаймын дейт.

Facebook тармагында фейктер менен айтышып, интернеттен илимпоздукту жактап отурган ойчулдарга суроо. Адамдын жүрөгү менен жаныбардын жүрөгүнүн айырмасы эмнеде? Ушул суроого жооп издеп көрүңүзчү…

Адаттагыдай сааттын шыңгырашына бир мүнөт калганда туруп, бети-колду жуудум да тамакты жылытууга кириштим. Муздаткычты ачаарым менен көңүл айнып кетти. Бул ашказан бүгүн бунт баштап жатат деген белги эле. Табит такыр жоголду. Эмнедегер ич ооругансыйт. Ашказан биринчи ирет ооруп жатпагандыктан, өтүп кетээр деген ойдо "Мезимден" ичтим да, кийине баштадым. Даяр болуп астананы аттай берээрде абал курчуй берди. Бирок ал мени токтото алган жок. Анткени менин түз эфирим бар эле. Энтигип эч болбосо эфирдеги жаңылыкты окуп анан кайтам деген ойдо жолго чыктым. Жыйырма мүнөткө жетпеген жолдо күн сайын жүргөндүктөн жумушка жетип алыш оңой сезилди. Көрсө…

Саат 08:25тер чамасында маршрутка Чүй проспектиси менен келип Ибраимов көчөсүнө бурула бергенде андан бир жигит чуркап чыкты да жер кучактап отуруп калды. Тизеси асфальтка катуу тийгендиктен кан кетип, ак чолок шым кан аралаша чаңга боелду. Канаты сынган таранчыдай тыпырап, андан ары жөрмөлөп барып окшуп эле отуруп калды. Жерге катуу кулагандыктан оң бутундагы бут кийими чечилип кетти да колдогу телефон ыргып барып үйүлүп турган жалбырактын үстүнө түштү. Маршрутка болсо бейкапар сапарын улады.

…Өзүмө келсем окшуп отурган экенмин. Ашказаным аңтарылып, оозума кептелип эле калыптыр. Көздөн жаш буурчактап, денемди муздак тер каптаган. Алыстан келе жаткан поезддей болуп муунум акыры-ын калчылдап жатат. Башым сынып кетчүдөй болуп, мына-мына жарылам деп турат. Ашказан, боор, бөйрөктөрүм болк этип оозумдан чыга калчудай… Аалам демин ичке тартып, асканын жаңырыгындай болуп жүрөгүмдүн гана согушу угулат. Дүк, дүк, дүк…

Окуя Бишкектин чок ортосунда, эл көбөйгөн убакта болуп жаткандыктан чый-пыйы чыгып 3-4 киши чуркап келе калды. Заматта бирөөсү жакынкы дүкөндөн суу алып, колума куя баштады. Экинчиси дароо Тез жардам чакырып, кийинкиси жүз аарчысын сунду. Колума куйган суу менен бетими жуусам эле кан жыттанат. Жакшылап карап көрсөм бетимди суу менен эмес, кан менен сүртүп жатыпмын. Колумда жүз аарчы эмей эле жашоодон үмүтүн үзүп, санаанын арты менен саргарып кеткендей түр калтырган жалбырак турат…. Эсимди жыйсам, жанымда эч ким жок. Көрсө, жанагынын баары менин фантазиям экен. Көрсө, жашоо кинодогудай эмес тура. Көрмөксөн болуп ары жакта күзөтчү турат. Ал ортодо бака-шака болуп окуучулар өтүп кетти. Көчө шыпырыгыч, анын артынан эки аял, анан башка көп адамдар ары-бери өтүп жатат. Жардам бермек турсун, жакын жолочудай эмес. Аңгыча 6-7 жашар тилемчи цыган кыз мени көрүп, ушул тарапка бет алды. Неси болсо да жаштардын жүрөгү таза эмеспи. Анан да кыз бала боорукер келет деген чын окшойт. Боору ооруп карап коет. Жаныма келип токтоп калды да, андан ары арышын улады. Түшүнбөй эле карап турам. Мени айланып өтүп, чогулуп турган жалбырактарга бара жатат. Мени бир карайт, жалбырактарды бир карайт. Жаш кыздын оюнда жакшылык эмес, жерде жаткан телефонго жетүү экенин эми түшүндүм.

"Жок дегенде тапичкемди ташта!" деп кыйкырсам үнүм чыкпады. Катуу окшуганда тилим чайналып калыптыр. Шыбырап, анан жер муштап гана кала бердим. Көрбөй калдыбы, же көрмөксөн болдубу, ар жактагы күзөтчү үн катпады. Аңгыча таксилер чогулуп, эл кыйла көбөйүп калыптыр. Бир чай кайнам убакыт отурдум. Анан акырын өзүмө келип, таксилер жакка жөнөдүм. Көп жолу ашказаным ооруп ооруканага баргандыктан алардын дары гана жазып берип коерун жакшы билем. Андыктан таксини үйгө айдаттым. Бирок жолдон дарыканага тийип кетүүнү өтүндүм. "Чыгыш-5" кичи районундагы аялдаманын жанындагы дарыканага бир аз өтүп токтоду. Мени суранат дедиби, айтор, айдоочу дароо ары карап туруп алды. Аксап дарыканага жөнөдүм. Көпчүлүк жакшы билет, дарыканын жанында Тез татым бар. Ошол жерге жеткенде майдын жытынан көңүлүм айный баштады. Дарыканага кире бергенде дарынын жыты мурунга урду го. Чуркап чыгып эле окшуп калдым. Баягы эле баян. Арыкка эки тизелеп отуруп алып, өгүздөн бетер өкүрүп жатам. Кумурскадай болгон элдин бири да карап койбойт. Ал турсун дары саткан эже көрүп туруп, көрмөксөн болду. Көпкө отуруп калдым окшойт, алыстан таксист байкенин карааны көрүндү. Атамды көргөндөй сүйүнүп, азыр ушул келип колтугуман сүйөсө эле ашказан тып басылчудай. Жок. Андай болбоду. Менин тизелеп отуруп калганымды көрүп, "качып кетпептир" дегендей кылды да кайрылып кетип калды. Эптеп туруп дарыканага кирдим да дарыны алдым. Ашказанга газдалган суу жакшы эле. Сурасам, 90 сомдугу гана калды, арзаны жок дейт. Аны алсам таксиге акчам жетпей калчудай. Өлгөндүн үстүнө көмгөн экен деп артка бурула берсем кадимки эле 25 сомдук суу турат. Бул эмне десем, "ий, бар турбайбы" деп коет. Болбосо бир катар турат. Күттүргөнүм үчүн таксиден кечирим сурап, жолубузду уладык. Үйгө жетип таксиге акча берсем майдасы жок экенин айтып, 50 сом ашыгы менен алып койду. Бир чети күттүм дегениби же дүкөн аралап акча майдалатууга чамам жок экенин көрдүбү, айтор кудуңдап гана алган бойдон кетти.

P.S Учурда абал жакшы. Акырындык менен ашказанды дарылап жатам. Ашказанды го дарыласа болот. Жүрөктү кантебиз?..

9288
Белгилер:
колумнист, абал, ден соолук, Исмаил Мамытов
Тема боюнча
Эркектер гана ооруй турган 5 дарт
Кимдин башы канчага бааланат? Кун тууралуу
Кыз бетип жабып отурат. Иллюстративдик сүрөт

Карындашыңа кайдыгер болсоң күйөөсү кордойт. Агалар кызга таянар тоо бололу

5161
Журналист Эламан Карымшаков эркек таянар тоосу, сурап алар адамы жок аялдарды сабашы мүмкүн деп эсептейт. Мындан улам ал кыздарды күйөөсүнүн муштумуна салып бербеш үчүн агаларга жана ата-энелерге өз оюн сунуштоону эп көргөн.

"Жыгачтын жумшагын курт жейт, адамдын жумшагын адам жейт" деп кашкайган чындыкты айтышкан. Адам баласы ушундайбыз, алсыздарга кыйын болууга машпыз. Достордун арасында, окууда же жумушта болобу, эгер бирөө бир аз эле бош болсо, аны артка түртө салабыз. Менимче, үй-бүлөдө деле ушундай, аял таяк жесе да унчукпаса, күйөөсү урганын токтотпойт. Эгер бир кишини урууга алың жетпегенин аңдасаң, аны менен урушпай жай сүйлөшүүнүн амалын издейсиң да.

Менин оюмча, аялын алсыз эрекектер урушу мүмкүн. Жубайынын көңүлүн алгысы келбейт, бардык маселени муштум менен чечүүгө өтөт. Дагы бир мисал, көчөдө бараткан жигитти сабап койсоң, кайра ал достору менен келип бетиңди талкалап кетерин же түрмө азабына салып, акчаңды очойто аларын билесиң, мындан улам ал канча жиниңе тийсе дагы унчукпайсың.

Кечээ тараган видеодон аялдын артында таянар тоосу болуп бере турган адамдары жок экенин түшүндүм. Сурап алары болбогондон кийин эркек мыкаачылык кылуудан да кайра тартпай калган өңдүү. Адам канчалык өзүн жоготуп же жини келип турса дагы кесепетин ойлойт. Жөнөкөй эле мисал, мен курактуу жигиттер мас болгондо досторунун арасында тополоң салып, калжактап айланы кетирет. Бирок үйүнө келгенде түптүз басып эле ата-энесине көрүнбөй кирип кеткенге шашат.

Эгер тиги аялга ушунчалык жини келип бир-эки чаап жиберсе, ачуу менен жасалган иш катары түшүнсө болот. Муну салыштыруу үчүн гана айтып жатам, негизи аялга кол көтөрүүнү жактабайм. Анан колун артка байлап, мойнуна дүңгөлөктөрдү илип, башынан ылдый суу куюп, бетке чаап, анысын видеого тарттырып "башкаларга сабак болсун" дегенин аялды адам катары көрбөй калган деп сыпаттадым. Ал буга чейин деле сабап, тескерисинче анысына маашырканып, жазаланбаганын түшүндүм. Же аялынын туугандары алдында, же укук коргоо органдарына жооп берген эмес. Демек ал жөн эле сабаганга алымсынбай калган, ушунтип мазактап эрдемсингиси келген. Каны суюк жаш жигит болсо бир жөн, 52 жашка чыгып калган кишинин буга кантип дити барды? Аны көргөн балдары эмне болот? Эгер билсе, ал өзүнүн тегерегиндегилерге гана зыян келтирбестен, жаш муундун бир бутагын сындырды, бүт кыргыз эркектерине көө жапты. Жаш кыздар "күйөө деген ушул болсо, андан көрө жөн эле жүргөнүм жакшы" деп калды, эркектер зөөкүр, мыкаачы деген түшүнүктү таңуулап койду. Ооба, "бирөөнүн үй-бүлөсү башкага караңгы токой" дейт. Канткен күндө да бул окуя — коомдун трагедиясы.

Бул бир эле көрүнүш, ошол киши өлүм жазасына тартылса дагы маселе чечилип кетпейт. "Аялдардын укугу" деп көчөгө кыйкырып чыгуудан да натыйжа болбойт.

Мен үй-бүлөлүү эмесмин, турмуштун ачуу-таттуусун жон терим менен сезе элекмин. Ошентсе да көргөн-билгендериме таянып ой-туюмдарымды айтууну эп көрдүм.

Эркек досторума кайрыларым, карындашыңарга көңүл бургула, ачык сүйлөшкүлө. "Тиги менен жүрбө, бул жакка баспа" деп үйдө камап, ар бир кадамына тыюу сала бербегиле. Адамды эч качан күч менен кармап тура албайсың. Андан көрө аң-сезимин ойготуп, дүйнө таанымын кеңейтип, жашоодогу ак-караны айрый билишине жардам бергиле.

Менин эки карындашым бар, бири былтыр турмушка чыкты, кичүүсү 2-класста окуйт. Улуу карындашым менен баарын ачык сүйлөшөм. Ким менен мамиле куруп жатканы тууралуу да ачык эле айтып берчү. Ага кеп-кеңешимди айтам. Себеби өткөөл курактагы кыздарга кооз сүйлөгөндөр эле идеалдуу көрүнүп, чыныгы жүзүн биле албай калышат. "Жигиттер менен сүйлөшпө" деп чек койгон эмесмин. Артынан чуркагандарды көрсөтсө, ал кандай адам, максаты эмне, баарын териштирип көрүп өзүмдүн оюмду айтар элем. Баары эле сүйүүнүн отуна малынгысы келет, аны чектеп коё албайсың. Ошондуктан мен карындашымдын өзүнө татыктуу адамды тандашына жардам бергем.

Дагы бир жери, агасы же атасы таяныч тоо болуп бере албаган кыз ал сезимди башка эркектерден издейт. Коркунучтуусу — ал башын жөлөгөн эркектин максаты кандай экени караңгы. Ошондуктан, достор, калп эле олуттуу боло бербей карындашыңар менен достошкула. Анын бактылуу болушун кааласаң өз оюн ачык айткан, эркин болушуна шарт түзүп бергиле. Кагып-силкип уруша бергенден көрө аң-сезимин ойготуу керек. Мен карындашыма "сага ишенейин, биздин үй-бүлөнү уят кылба, сени жанындай көргөн чоң ата, чоң энебиз бар, алардын жүзүн жер каратпа" деп айтчумун. Ошондо кыз мен минтсем агам же атам урушат дебей, аларды уят кылбайын деп ойлонуп калат.

"Токчулук эркекти, жокчулук аялды бузат" деген сөз бар. Ошондуктан студент карындашыңарга жактырган көйнөгүн алып берип же жөн эле керегиңе жарат деп 1000-2000 сом берип койгон жакшы. Эгер сен кош көңүл болуп, кайдыгер мамиле жасап, баскан-турганын гана тескеп, ичинде эмне болуп жатканын билүүгө кызыкпасаң, сырын башка эркекке айтат. Анан башында айткандай "адамдын жумшагын адам жейт" болуп, кызды канчалык сүйүп турса дагы "артында таянар тоосу жок, эмне кылып алмак эле" деп орой мамиле менен башкарууга өтүшү мүмкүн.

Кээ бир үй-бүлөлөр кызы мектепти бүтөрү менен күйөөгө бергенге шашат. "Жүрө берсе жаман жолго түшүп кетпесин, кой, аманатын тапшырайын" дейт. Эмне үчүн алар жоопкерчиликтен качат? Эмнеге кызына үйдөн татыктуу тарбия берип, окутуп, бир кесипке үйрөтүп, коопсуздугун камсыздап бергиси келбейт? Айылда жүргөн баёо кыздар шаарга келгенден кийин эки жылда өзгөрөт. Жашоого башкача карап, адамдын ким экенин аз да болсо аңдап калат. Менимче, өз үйүнөн жакшы тарбия алган кыз шаарга келсе деле жаман жолго түшпөйт. Ар бир кадамы чектелип, коркуу менен чоңойгон кыз эркиндикке чыкканда өзүн жоготуп коюшу мүмкүн.

Эгер кызыңыздын кор болуп жашашын каалабасаңыз, билим алышына, дүйнө таанымынын кеңейишине шарт түзүп бериңиз. Кызыңызды өз алдынча болгонго, оюн ачык айтканга үйрөтүңүз. Ошондо гана кечээгидей окуялар азаят деген ойдомун.

"Бирөөнүн үй-бүлөсүнө киришпе" деген стереотип бар. Карындашың күйөөсү менен жаңжалдашса, ачуу үстүндө бир окуя болсо өз ара чечип алсын деген жакшы. Эгер катуу сабап жатса, анда киришиш керек деп эле айтам. Унчукпасаң дагы кайталанышы мүмкүн.

Негизи чымчыктын да уясынын бузулушун каалабайм. Бирок аялзатынын бир келген өмүрдүн жыргалчылыгына бата албай, күйөөсүнөн кордук көрүп баш көтөрө албай басынып жашашын да каалабайм. Биздин коомдо аялды алсыз бир адам катары эмес, балдарынын келечегине кам көргөн, улутту тарбиялаган асылзат айым катары көрүп сыйлаган эркектер толтура.

Ошол эле учурда эркектерге да жакшы тарбия берип, ыймандуу, нысаптуу, билимдүү кылып чоңойтуш керек. Караңгы болуп калса мурдунан алысты көрө албай, ар кандай иштерди жасай берет. Жеке эле өзүмдү айтайын, окуп, иштеп ар кандай адамдар менен пикир алышып, улуулардын кеп-кеңешин уккан сайын күндөн-күнгө жашоого болгон көз карашым өзгөрүүдө.

Соңунда эки сөз менен оюмду жыйынтыктайын.

Ата-энелер, бизге окшогон уул-кызыңарга татыктуу тарбия берип, билим алуусуна шарт түзүп бериңиздерчи. Өлкөдө билим берүүнүн деңгээли төмөн, мамлекеттен ушуга көңүл бурууну сурайм.

Акылы тунук асылзаадалар, кечээки окуяга муңайып, үмүт шамын өчүрбөңүздөр. Силерге тоодой бакыт тартуулай алчу жигиттер түгөнгөн жок, БИЗ БАРБЫЗ!

5161
Белгилер:
тарбия, билим, сабоо, ур-токмокко алуу, кордук, ата-эне, үй-бүлө, күйөө, аял
Тема боюнча
КРге донорлор үй-бүлөлүк зомбулук менен күрөшүү үчүн 200 миң доллар бөлдү
Кишилер китептерди окуп жатат. Архив

Жети элдин тилин бил. Тил үйрөнгөн адамдын артыкчылыгы жана ийгилиги

976
(жаңыланган 13:06 07.06.2020)
“Канча тил билсең – ошончо адамсың” деген кеп бар. Тил аркылуу биз бир элдин сүйлөгөнүн эле эмес, дүйнө таанымын, руханий дөөлөттөрүн, көөнөрбөс баалуулугун кошо үйрөнөбүз дейт колумнист Нуржигит Кадырбеков.

Тил билген адам эл жеткен ийгиликке ортоктош болуп, акыл жана рух казынасынын алтын ачкычын колго алат. Ошондон шыбага жана үлүш алууга мүмкүнчүлүк жаралат. Тилин өздөштүрүү менен ар бир калктын дилине сүңгүп кирип, алар тууралуу сырттан байкоо салганда көзгө урунбаган акыйкатты көрөбүз. Айтор элди, улутту таанып, түшүнүп, аңдоо үчүн анын тилин билүү аба менен суудай керек.

Ошон үчүн улуулардан “жети элдин тилин бил” деген накыл калыптыр. Бабаларыбыз бул насаатты тек гана айтып койбостон, жашап көрсөтүшүптүр. Кайсыл заман, кайсыл доор болбосун, элибиздин сөз баккан, илим-билимге кызыккан, кат тааныган, кыл калем кармаган акылдуулары бир эмес бир нече тилди өздөштүргөнүн тарых тастыктайт. Жусуп Баласагын, Махмуд Кашгари, Сарахси, Оши сыяктуу аалым бабаларыбыз эне тилибизден бөлөк жок эле дегенде фарсы жана араб тилдерин ийне-жибине чейин өздөштүрүшкөн. Кечээги эле Токтогул, Тоголок Молдо, Молдо Нияз, Жеңижок, Молдо Кылыч, Абдираим сыяктуу залкар акындар жана калемгерлер өзбек, казак, тажик тилдерин мыкты билишкени айтылат. Андан берки Касым Тыныстанов, Жусуп Абдырахманов, Баялы Исакеев, Төрөкул Айтматов, Исхак Раззаков сыяктуу мамлекеттик жана коомдук ишмерлердин бүтүндөй плеядасы болсо орус тилин терең үйрөнүшүп, ошол аркылуу дүйнөлүк илим-билимдин агымына аралашыптыр. Азыркы жаштардын арасында орус, англис, кытай, француз, алман, түрк, араб, фарсы, корей, жапон тилдерин жер жаңгактай жеңил чаккан көп тилдүүлөр көбөйүп барат. Бул өтө жакшы көрүнүш. Эне тилибиз, албетте, уюткулуу улутубуздун улуу уңгусу, акыл, маданият, билим көрөңгөбүздүн тарам-тарам тамыры, байманалуу пайдубалы, берекелүү башаты. Бирок биз үчүн дүйнөгө ар тараптан эшик-терезе ачкан дүйнөлүк тилдер, ар кандай элдер, мамлекеттер жана маданияттар менен байланыштырган алтын көпүрөнүн милдетин аткарууда жана аткара бермекчи.

Жеке өзүм да бир нече тилди үйрөндүм. Тил үйрөнгөнгө чейинки балалыгымда эне тилимди гана жетик билүү бир өмүрдүн ысык-суугу, оош-кыйышы, оомат-ийгилиги үчүн жетиштүү деп боолгочумун. Жогорку окуу жайда орус тайпасында окуп калып, кыргыз тайпасына которулууга айла-амал таппай кыйналгам. Көрсө, орусча окуп калганым тагдырыма буюрган Жараткандын өтө чоң белеги болгон экен. Тилди өздөштүргөн сайын анын даамы дагы да даана жана таттуу сезиле берди. Бара-бара кесибими терең үйрөнүүгө жана адам катары өсүшүмө себеп болгон китептерди биринин артынан бирин окуй баштадым. Пушкиндин, Толстойдун, Достоевскийдин, Есениндин, Тургеневдин түп нускасын окугандагы туйган жан дүйнө ырахатын сүрөттөө кыйын.

Англис тилин да кыргызча билбеген орус мугалимден үйрөндүм. Ал мезгилде түз эле кыргыз тилинен окуп өздөштүрүү үчүн даярдалган окуу-методикалык эмгектер жокко эсе болчу. Япон тилин болсо англис тили аркылуу акылыма сиңирдим.

Араб тили менен орус тилинин структурасы, грамматикасы оголе окшош. Араб тили менен жеңил-желпи таанышып кетишимдин башкы себептеринин бири ушул.

Ошентип ар бир тил өмүрүмдөгү орчундуу максаттарга алып барган чыйыр жол сыяктуу ак кызматын өтөп берди жана өтөп жатат. Теребелге, дүйнөгө бир тараптагы бир эле терезеден эмес, чоң-кичине, түркүн-түрдүү терезеден саресеп салган керемет болорун жон терим менен сездим. Ошон үчүн ушул күндөрү да жаңы тилдерди өздөштүрүү менен алпурушуп жүрөм.

Тил, бирок ишенимсиз дос. Бир аз көңүл бөлбөй койсоң таштай качат. Ошон үчүн аны унутта калтырбай, ар дайым пайдаланып, колдон келсе өнүктүрүп-өстүрүп, байытып отуруу керек. Бир тилдин зыяны башка тилге тийбегендей болсун. Чет өлкөлөрдүн биринде мурдагы СССРден көчүп кеткен Табакиндердин үй-бүлөсү менен таанышып калгам. Алардын кичүү кызы жергиликтүү тилди өздөштүрүүгө баш-оту менен киришип кетип, орус тилин унута баштаган экен. Ошондо ага апасы “кызым, жок болсо мейли эле. Колуңда турган бар улуу байлыгыңды жоготуп жатканың кандай? Канча адам жетпей жүргөн, жетем, үйрөнөм, билем деп умтулган эң сонун тилди унута баштаганың өтө чоң чекилик" дегендей кейип кеңеш айтып жатканын уккам. Эң туура ой. Ошондуктан жаңы тил менен алек болуп жатып, жаттаган тилиңди кароосуз калтыра көрбө. Барды сактай жана таптай билүүнүн өзү акылдуулук. Жылдап тер төгүп мээнет кылып үйрөнгөн тилиңди эс тутумдан өчүрүп алуу — узак убакытта кыйналып курган мунараны ураткандай эле кесирлик.

Эне тилибизди аздектейли, асырайлы, даңазалайлы. Башка тилди, балким, бир-эки жылда мыкты үйрөнсөң болот, бирок эне тилди өмүр бою өздөштүрөсүң. Чет өлкөгө кетип, ошол жакта отурукташып калгандардын бала-бакырасын айыптоо кыйын, бирок өз мекениңде жүрүп өз эне тилиңде чала-чарпыт сүйлөсөң, бул өз тамырыңа жана маданиятыңа кылган улуу кыянаттык.

976
Белгилер:
эне тил, маданият, тил
Тема боюнча
Кел, келе бер, Китеп майрамы! Быйыл сени жарык жүз менен тосуп алабыз
Чоң Чүй каналына түшүп кеткен кичи автобус

Кечээ Чоң Чүй каналына түшүп кеткен кичи автобустун айдоочусу табылды

0
(жаңыланган 19:27 12.07.2020)
Кечээ, 11-июлда, каналда калкып турган Mercedes-Benz Sprinter үлгүсүндөгү автоунаанын видеосу жарыяланган.

БИШКЕК, 12-июл. — Sputnik. Милиционерлер Кара жыгач токоюнда Чоң Чүй каналына түшүп кеткен кичи автобустун айдоочусун тапты. Бул тууралуу Кайгуул милициянын маалымат кызматы билдирди.

Кечээ, 11-июлда, каналда калкып турган Mercedes-Benz Sprinter үлгүсүндөгү автоунаанын видеосу жарыяланып, анын айдоочусу изделип жатканы айтылган

Талкаланыптыр! Бишкекте жеңил унаа тосмону сүзүп, чуңкурга түшүп кетти. Сүрөт, видео

Бүгүн автоунаа жана анын айдоочусу дагы табылды. Ал жол кырсыгынан эмес, кокустан сууга түшүп кеткени белгилүү болду.

"Кичи автобус Чоң Чүй каналынын чекесине токтотулган. Бирок анын кол менен тартылчу тормозу иштебей калып, машина каналга түшүп кеткен. Жабыркагандар жок", — деп билдирди Кайгуул милициясы.

Милиционерлер айдоочуга түшүндүрүү иштерин жүргүзгөн.

0
Белгилер:
айдоочу, Чоң Чүй каналы, Бишкек
Тема боюнча
Тез жардам унаасы Бишкектин чок ортосунда кырсыктан ала салды. Видео