Улуу Ата Мекендик согуштун жоокерлери. Архив

Жеңишке 10 мүнөт жетпей калган өмүрлөр... Ардагерлер кан майданды эскерет

1302
(жаңыланган 17:53 31.05.2018)
Жеңиштин 73 жылдыгынын урматына саны жылдан жылга суюлуп бараткан ардагерлердин эскерүүсү биз үчүн, келечек муун үчүн бир доордун үнүн жаңырткан тарых болуп бара жатат.

1942-жыл. Согуш жүргөн жерге жакын жайгашкан госпиталдын биринде хирург Зыфар Эгембердиев жарадар болгон жоокерлерге катардагы операциялардын бирин жасап жаткан маалы. Ал кезде бейтап жоокердин аты-жөнү операция жасалып бүткөн соң такталчу экен. Мына ошондой операциялардын биринен кийин медайымга жооп берип жаткан жарадар аскердин тек-жайын угуп, бир нече мүнөт мурун өзүнүн бир тууган инисин аман алып калганын билет. Ошентип эки бир тууган согуштан капыстан жолугуп калышкан деп таенем Улуу Ата Мекендик согуш менен байланыштуу биздин үй-бүлөнүн окуясын айтып берген.

Архивное фото президента Кыргызской Республики Сооронбая Жээнбекова
© Пресс-служба президента КР / Султан Досалиев
Мен ал хирург таякемди көрбөй калдым, атын алыстан угуп, сыймыктанып, айтылуу Иса Ахунбаевдин замандашы жана кесиптеши, профессор, согуш маалындагы саламаттык сактоо министри, хирург Зыфар Егембердиев деп эле жүргөм. Таенемдин баянынан кийин кичүү таякем Самыйбек Эгембердиев менен, аны биз "геолог таяке" деп койчубуз, бир сүйлөшүп көрсөм деп ичимен ойлоп койчумун. Арадан бир топ жыл өтүп, баягы геолог таякемдикине барып, Улуу Ата Мекендик согуш туурасында айтып берүүсүн өтүнгөм. Интервью 2007-жылы алынган.

Геолог таякем менен сүйлөшкөндөн кийин бул маек менен чектелүү туура эмес экенин түшүндүм. Ардагерлер союзуна барып, кан майданды кечип келген аталарыбыз менен баарлаштым. Окурман журтчулугуна аңгемени кыскача сунуштап турган учурум. Азыр бул маектештеримдин баарынын көзү жок…

Лейтенант Самыйбек Эгембердиев. 1942-жыл. Сталинград шаары

Лейтенант Самыйбек Эгембердиев

— Бир тараптан бул өтө зор, эң эле кубанычтуу майрам, анткени немистик фашисттерди жеңип, мекенибизди сактап калдык, экинчи жагынан өтө эле кайгылуу, өтө эле түйшүктүү күндөрдү элестетет. Бул согушта миллиондогон мекендештерибиз курман болду, канчалары майып болуп кайтышты, канчасы жетим-жесир болду, мына, уруштун кесепети ушундай. Мен өзүм ушул уруштун катышуучуларынын биримин. 1942-жылдын 3-августунда Сталинград шаарына келдим. Мини аткычтар взводунун командири кылып дайындашты. Дал ушул Сталинградда эң эле катуу, каардуу жана кандуу салгылашуулар болду. Кармаш алты айга жакын созулду. Биздин армиябыз Сталинграддын түндүк-чыгыш тарабынын орун алып, душмандарды шаарга киргизбей, Волгага өткөрбөө милдетин алып, аны абиийрдүүлүк менен аткара алдык.

Колго түшкөн биздин солдаттарды атып өлтүрүп койгондору көп болду. Мыкаачылык жактарын жакшы билебиз. Сталинградда алардын (немис баскынчылары — ред.) концлагери болгон жок. Колго түшпөй койбойт экен урушта. Колгон түшкөндөрүн аяган жок алар, бирөөнү дагы аябай атып салган убактары болду. Аны мен жакшы билем.

Кыргыз эл акыны Сооронбай Жусуев. 1945-жыл, 8-май

Кыргыз эл акыны Сооронбай Жусуев

— 8-май күнү согушуп жатканбыз. Түшкө чейин согуш болду да түштөн кийин "Согушта атышты токтоткула" деген буйрук келди. Анан биздин жаныбызда замбиректердин батареясы турган болчу, 5-6 снаряд калыптыр,"жөн эле жата бербесин жүк болуп, ушуну прицелди жогору коюп туруп, душман жакты атып жиберели" деп атып жибергенин мен өз көзүм менен көргөм. Биз алдыга кеттик, чалгынчылар алдыга кеткен болчу. Алар немистерди алып келе башташты. Немистер колго түшүп багынып бере башташты. Капитуляция болду. Жанагы эле согуш болуп жаткан жерге бардык. Баарыбыз — биздикилер, немистин солдаттары, жаш жоокерлер жапжашыл болуп жаңыдан чөп чыгып, дарак гүлдөгөн кезде ошол жерде өлүп жаткан солдаттарды көрдүк. Бул согуштун эң акыркы курмандыктары болчу. Буга чейин деле көп өлүмдү көргөнбүз, бирок ошол согуштун эң аягында, жеңишке жарым саат, 10 мүнөт, 5 мүнөт калганда өлгөн солдаттар биз үчүн абдан аянычтуу көрүндү. Бизге окшоп үйлөрүнө, ата-энесине, сүйгөнүнө, туугандарына кайра кетишмек да алар деле…

Катардагы жоокер Дубаш Бегматов 1941-жыл, июнь айы. Украина

Катардагы жоокер Дубаш Бегматов

— СССРдин коргоо министри маршал Семен Тимошенко болчу, ошол Тимошенконун буйругу менен Батыш Украинага аскер бөлүгүнө кеттим. Так мен барган күндүн эртеси согуш башталды. Июндун 19унда Грозныйдан чыкканбыз, 20сында Киевде болуп, анан 21-июндун түнүндө Кременец деген шаар Батыш Украинадагы жерден башталды. Кременец деген шаар чек арадан 40-60 чакырым жерде болчу, биз чыккандан кийин эле саат 12де Молотов сүйлөдү. "Биздин ишибиз ак, жеңиш биздики болот" деп согуш башталганын жарыялады, анан биз ошол замат фронтко жөнөп кеттик.

Ага сержант Туңгучпай Апасов. (Датасы белгисиз)

Ага сержант Туңгучпай Апасов

— Кыйын мезгил эле. Тиякка өтүп кеткендер болду. Ошондо Сталин "Об измене Родине" деген жарлыгын чыгарып, чыккынчыларды турган жеринен атып салууну буюрду. Мен ошол саясий кызматты аркалап калдым. Биздин дивизияда мусулмандар көп болчу — кыргыз, өзбек, казак, тажик, түркмөн. Көбү орусча билбейт. Кат жазып берчүмүн, сүйлөшчүмүн, көп убара кылышты. Арасында былжырап ыйлап отургандары да болчу. Ошолор менен далай иш жүргүздүм. "Коркпогула, алтындан төрөлдүң беле, баарыбыз эле жүрбөйбүзбү, эмне ыйлайсың" дечүмүн…

Минометтук взводдун командири Олжобай Орозобаев. 904-армян дивизиясы, Миллеровка айылы

Минометтук взводдун командири Олжобай Орозобаев

— Взводубуздун командири армян эле, атын унутуп калдым. Ал ок тийип каза таап, мен анын ордун басып калдым. Бир күнү ротанын командири менин взводумду "алдыга жыла бергиле, анан ошондо чабуулга өтөбүз, сен ар бир минометтон 15тен ок чыгырасың" деди. Биз миномет менен ата баштаганда эле тигилер (немистер — ред.) бизди карай ок чыгара баштады. Жүгөрү талаа, кыргызда "жамгыр бир жааса, терек эки жаайт" деп коет. Баягы бышып турган жүгөрүнүн ичине ок келип тийгенде жүгөрү мөндүрдөй жаады тыбырап. Он чакты ирет аткандан кийин жатып калдык, биздин аскерлер чабуулга өтүштү. Мөндүрдөй жааган октон өлбөгөн эми ок тиймек беле деп, туруп, палатканы кургатып алайын деп окоптун жээгине отураарым менен эле артыман бирөө штык менен сайгандай болду. Артымды карасам эч ким көрүнбөйт, көрсө артыма келип ок тийген экен. Окоптун сыртына жыгылганымды бир билем. Анан ичине кулап түштүм. Связной бар эле Чупров деген, ошол окоптон чыгарып, медайымдар алып кетиптир. Мен 13-сентябрда жарадар болдум.

Эрдигиңерге таазим! Эч нерсе эч качан унутулбайт!

1302
Белгилер:
эскерүү, ардагер, Улуу Ата Мекендик согуш
Тема боюнча
Ата мекендик согуш учурундагы документтердин электрондук архиви ишке кирди
Өз мүрзөсүнө келип томсоргон жоокер: атам тирүү экеними укканда эле оңбой калды
Кыз бетип жабып отурат. Иллюстративдик сүрөт

Карындашыңа кайдыгер болсоң күйөөсү кордойт. Агалар кызга таянар тоо бололу

5161
Журналист Эламан Карымшаков эркек таянар тоосу, сурап алар адамы жок аялдарды сабашы мүмкүн деп эсептейт. Мындан улам ал кыздарды күйөөсүнүн муштумуна салып бербеш үчүн агаларга жана ата-энелерге өз оюн сунуштоону эп көргөн.

"Жыгачтын жумшагын курт жейт, адамдын жумшагын адам жейт" деп кашкайган чындыкты айтышкан. Адам баласы ушундайбыз, алсыздарга кыйын болууга машпыз. Достордун арасында, окууда же жумушта болобу, эгер бирөө бир аз эле бош болсо, аны артка түртө салабыз. Менимче, үй-бүлөдө деле ушундай, аял таяк жесе да унчукпаса, күйөөсү урганын токтотпойт. Эгер бир кишини урууга алың жетпегенин аңдасаң, аны менен урушпай жай сүйлөшүүнүн амалын издейсиң да.

Менин оюмча, аялын алсыз эрекектер урушу мүмкүн. Жубайынын көңүлүн алгысы келбейт, бардык маселени муштум менен чечүүгө өтөт. Дагы бир мисал, көчөдө бараткан жигитти сабап койсоң, кайра ал достору менен келип бетиңди талкалап кетерин же түрмө азабына салып, акчаңды очойто аларын билесиң, мындан улам ал канча жиниңе тийсе дагы унчукпайсың.

Кечээ тараган видеодон аялдын артында таянар тоосу болуп бере турган адамдары жок экенин түшүндүм. Сурап алары болбогондон кийин эркек мыкаачылык кылуудан да кайра тартпай калган өңдүү. Адам канчалык өзүн жоготуп же жини келип турса дагы кесепетин ойлойт. Жөнөкөй эле мисал, мен курактуу жигиттер мас болгондо досторунун арасында тополоң салып, калжактап айланы кетирет. Бирок үйүнө келгенде түптүз басып эле ата-энесине көрүнбөй кирип кеткенге шашат.

Эгер тиги аялга ушунчалык жини келип бир-эки чаап жиберсе, ачуу менен жасалган иш катары түшүнсө болот. Муну салыштыруу үчүн гана айтып жатам, негизи аялга кол көтөрүүнү жактабайм. Анан колун артка байлап, мойнуна дүңгөлөктөрдү илип, башынан ылдый суу куюп, бетке чаап, анысын видеого тарттырып "башкаларга сабак болсун" дегенин аялды адам катары көрбөй калган деп сыпаттадым. Ал буга чейин деле сабап, тескерисинче анысына маашырканып, жазаланбаганын түшүндүм. Же аялынын туугандары алдында, же укук коргоо органдарына жооп берген эмес. Демек ал жөн эле сабаганга алымсынбай калган, ушунтип мазактап эрдемсингиси келген. Каны суюк жаш жигит болсо бир жөн, 52 жашка чыгып калган кишинин буга кантип дити барды? Аны көргөн балдары эмне болот? Эгер билсе, ал өзүнүн тегерегиндегилерге гана зыян келтирбестен, жаш муундун бир бутагын сындырды, бүт кыргыз эркектерине көө жапты. Жаш кыздар "күйөө деген ушул болсо, андан көрө жөн эле жүргөнүм жакшы" деп калды, эркектер зөөкүр, мыкаачы деген түшүнүктү таңуулап койду. Ооба, "бирөөнүн үй-бүлөсү башкага караңгы токой" дейт. Канткен күндө да бул окуя — коомдун трагедиясы.

Бул бир эле көрүнүш, ошол киши өлүм жазасына тартылса дагы маселе чечилип кетпейт. "Аялдардын укугу" деп көчөгө кыйкырып чыгуудан да натыйжа болбойт.

Мен үй-бүлөлүү эмесмин, турмуштун ачуу-таттуусун жон терим менен сезе элекмин. Ошентсе да көргөн-билгендериме таянып ой-туюмдарымды айтууну эп көрдүм.

Эркек досторума кайрыларым, карындашыңарга көңүл бургула, ачык сүйлөшкүлө. "Тиги менен жүрбө, бул жакка баспа" деп үйдө камап, ар бир кадамына тыюу сала бербегиле. Адамды эч качан күч менен кармап тура албайсың. Андан көрө аң-сезимин ойготуп, дүйнө таанымын кеңейтип, жашоодогу ак-караны айрый билишине жардам бергиле.

Менин эки карындашым бар, бири былтыр турмушка чыкты, кичүүсү 2-класста окуйт. Улуу карындашым менен баарын ачык сүйлөшөм. Ким менен мамиле куруп жатканы тууралуу да ачык эле айтып берчү. Ага кеп-кеңешимди айтам. Себеби өткөөл курактагы кыздарга кооз сүйлөгөндөр эле идеалдуу көрүнүп, чыныгы жүзүн биле албай калышат. "Жигиттер менен сүйлөшпө" деп чек койгон эмесмин. Артынан чуркагандарды көрсөтсө, ал кандай адам, максаты эмне, баарын териштирип көрүп өзүмдүн оюмду айтар элем. Баары эле сүйүүнүн отуна малынгысы келет, аны чектеп коё албайсың. Ошондуктан мен карындашымдын өзүнө татыктуу адамды тандашына жардам бергем.

Дагы бир жери, агасы же атасы таяныч тоо болуп бере албаган кыз ал сезимди башка эркектерден издейт. Коркунучтуусу — ал башын жөлөгөн эркектин максаты кандай экени караңгы. Ошондуктан, достор, калп эле олуттуу боло бербей карындашыңар менен достошкула. Анын бактылуу болушун кааласаң өз оюн ачык айткан, эркин болушуна шарт түзүп бергиле. Кагып-силкип уруша бергенден көрө аң-сезимин ойготуу керек. Мен карындашыма "сага ишенейин, биздин үй-бүлөнү уят кылба, сени жанындай көргөн чоң ата, чоң энебиз бар, алардын жүзүн жер каратпа" деп айтчумун. Ошондо кыз мен минтсем агам же атам урушат дебей, аларды уят кылбайын деп ойлонуп калат.

"Токчулук эркекти, жокчулук аялды бузат" деген сөз бар. Ошондуктан студент карындашыңарга жактырган көйнөгүн алып берип же жөн эле керегиңе жарат деп 1000-2000 сом берип койгон жакшы. Эгер сен кош көңүл болуп, кайдыгер мамиле жасап, баскан-турганын гана тескеп, ичинде эмне болуп жатканын билүүгө кызыкпасаң, сырын башка эркекке айтат. Анан башында айткандай "адамдын жумшагын адам жейт" болуп, кызды канчалык сүйүп турса дагы "артында таянар тоосу жок, эмне кылып алмак эле" деп орой мамиле менен башкарууга өтүшү мүмкүн.

Кээ бир үй-бүлөлөр кызы мектепти бүтөрү менен күйөөгө бергенге шашат. "Жүрө берсе жаман жолго түшүп кетпесин, кой, аманатын тапшырайын" дейт. Эмне үчүн алар жоопкерчиликтен качат? Эмнеге кызына үйдөн татыктуу тарбия берип, окутуп, бир кесипке үйрөтүп, коопсуздугун камсыздап бергиси келбейт? Айылда жүргөн баёо кыздар шаарга келгенден кийин эки жылда өзгөрөт. Жашоого башкача карап, адамдын ким экенин аз да болсо аңдап калат. Менимче, өз үйүнөн жакшы тарбия алган кыз шаарга келсе деле жаман жолго түшпөйт. Ар бир кадамы чектелип, коркуу менен чоңойгон кыз эркиндикке чыкканда өзүн жоготуп коюшу мүмкүн.

Эгер кызыңыздын кор болуп жашашын каалабасаңыз, билим алышына, дүйнө таанымынын кеңейишине шарт түзүп бериңиз. Кызыңызды өз алдынча болгонго, оюн ачык айтканга үйрөтүңүз. Ошондо гана кечээгидей окуялар азаят деген ойдомун.

"Бирөөнүн үй-бүлөсүнө киришпе" деген стереотип бар. Карындашың күйөөсү менен жаңжалдашса, ачуу үстүндө бир окуя болсо өз ара чечип алсын деген жакшы. Эгер катуу сабап жатса, анда киришиш керек деп эле айтам. Унчукпасаң дагы кайталанышы мүмкүн.

Негизи чымчыктын да уясынын бузулушун каалабайм. Бирок аялзатынын бир келген өмүрдүн жыргалчылыгына бата албай, күйөөсүнөн кордук көрүп баш көтөрө албай басынып жашашын да каалабайм. Биздин коомдо аялды алсыз бир адам катары эмес, балдарынын келечегине кам көргөн, улутту тарбиялаган асылзат айым катары көрүп сыйлаган эркектер толтура.

Ошол эле учурда эркектерге да жакшы тарбия берип, ыймандуу, нысаптуу, билимдүү кылып чоңойтуш керек. Караңгы болуп калса мурдунан алысты көрө албай, ар кандай иштерди жасай берет. Жеке эле өзүмдү айтайын, окуп, иштеп ар кандай адамдар менен пикир алышып, улуулардын кеп-кеңешин уккан сайын күндөн-күнгө жашоого болгон көз карашым өзгөрүүдө.

Соңунда эки сөз менен оюмду жыйынтыктайын.

Ата-энелер, бизге окшогон уул-кызыңарга татыктуу тарбия берип, билим алуусуна шарт түзүп бериңиздерчи. Өлкөдө билим берүүнүн деңгээли төмөн, мамлекеттен ушуга көңүл бурууну сурайм.

Акылы тунук асылзаадалар, кечээки окуяга муңайып, үмүт шамын өчүрбөңүздөр. Силерге тоодой бакыт тартуулай алчу жигиттер түгөнгөн жок, БИЗ БАРБЫЗ!

5161
Белгилер:
тарбия, билим, сабоо, ур-токмокко алуу, кордук, ата-эне, үй-бүлө, күйөө, аял
Тема боюнча
КРге донорлор үй-бүлөлүк зомбулук менен күрөшүү үчүн 200 миң доллар бөлдү
Кишилер китептерди окуп жатат. Архив

Жети элдин тилин бил. Тил үйрөнгөн адамдын артыкчылыгы жана ийгилиги

976
(жаңыланган 13:06 07.06.2020)
“Канча тил билсең – ошончо адамсың” деген кеп бар. Тил аркылуу биз бир элдин сүйлөгөнүн эле эмес, дүйнө таанымын, руханий дөөлөттөрүн, көөнөрбөс баалуулугун кошо үйрөнөбүз дейт колумнист Нуржигит Кадырбеков.

Тил билген адам эл жеткен ийгиликке ортоктош болуп, акыл жана рух казынасынын алтын ачкычын колго алат. Ошондон шыбага жана үлүш алууга мүмкүнчүлүк жаралат. Тилин өздөштүрүү менен ар бир калктын дилине сүңгүп кирип, алар тууралуу сырттан байкоо салганда көзгө урунбаган акыйкатты көрөбүз. Айтор элди, улутту таанып, түшүнүп, аңдоо үчүн анын тилин билүү аба менен суудай керек.

Ошон үчүн улуулардан “жети элдин тилин бил” деген накыл калыптыр. Бабаларыбыз бул насаатты тек гана айтып койбостон, жашап көрсөтүшүптүр. Кайсыл заман, кайсыл доор болбосун, элибиздин сөз баккан, илим-билимге кызыккан, кат тааныган, кыл калем кармаган акылдуулары бир эмес бир нече тилди өздөштүргөнүн тарых тастыктайт. Жусуп Баласагын, Махмуд Кашгари, Сарахси, Оши сыяктуу аалым бабаларыбыз эне тилибизден бөлөк жок эле дегенде фарсы жана араб тилдерин ийне-жибине чейин өздөштүрүшкөн. Кечээги эле Токтогул, Тоголок Молдо, Молдо Нияз, Жеңижок, Молдо Кылыч, Абдираим сыяктуу залкар акындар жана калемгерлер өзбек, казак, тажик тилдерин мыкты билишкени айтылат. Андан берки Касым Тыныстанов, Жусуп Абдырахманов, Баялы Исакеев, Төрөкул Айтматов, Исхак Раззаков сыяктуу мамлекеттик жана коомдук ишмерлердин бүтүндөй плеядасы болсо орус тилин терең үйрөнүшүп, ошол аркылуу дүйнөлүк илим-билимдин агымына аралашыптыр. Азыркы жаштардын арасында орус, англис, кытай, француз, алман, түрк, араб, фарсы, корей, жапон тилдерин жер жаңгактай жеңил чаккан көп тилдүүлөр көбөйүп барат. Бул өтө жакшы көрүнүш. Эне тилибиз, албетте, уюткулуу улутубуздун улуу уңгусу, акыл, маданият, билим көрөңгөбүздүн тарам-тарам тамыры, байманалуу пайдубалы, берекелүү башаты. Бирок биз үчүн дүйнөгө ар тараптан эшик-терезе ачкан дүйнөлүк тилдер, ар кандай элдер, мамлекеттер жана маданияттар менен байланыштырган алтын көпүрөнүн милдетин аткарууда жана аткара бермекчи.

Жеке өзүм да бир нече тилди үйрөндүм. Тил үйрөнгөнгө чейинки балалыгымда эне тилимди гана жетик билүү бир өмүрдүн ысык-суугу, оош-кыйышы, оомат-ийгилиги үчүн жетиштүү деп боолгочумун. Жогорку окуу жайда орус тайпасында окуп калып, кыргыз тайпасына которулууга айла-амал таппай кыйналгам. Көрсө, орусча окуп калганым тагдырыма буюрган Жараткандын өтө чоң белеги болгон экен. Тилди өздөштүргөн сайын анын даамы дагы да даана жана таттуу сезиле берди. Бара-бара кесибими терең үйрөнүүгө жана адам катары өсүшүмө себеп болгон китептерди биринин артынан бирин окуй баштадым. Пушкиндин, Толстойдун, Достоевскийдин, Есениндин, Тургеневдин түп нускасын окугандагы туйган жан дүйнө ырахатын сүрөттөө кыйын.

Англис тилин да кыргызча билбеген орус мугалимден үйрөндүм. Ал мезгилде түз эле кыргыз тилинен окуп өздөштүрүү үчүн даярдалган окуу-методикалык эмгектер жокко эсе болчу. Япон тилин болсо англис тили аркылуу акылыма сиңирдим.

Араб тили менен орус тилинин структурасы, грамматикасы оголе окшош. Араб тили менен жеңил-желпи таанышып кетишимдин башкы себептеринин бири ушул.

Ошентип ар бир тил өмүрүмдөгү орчундуу максаттарга алып барган чыйыр жол сыяктуу ак кызматын өтөп берди жана өтөп жатат. Теребелге, дүйнөгө бир тараптагы бир эле терезеден эмес, чоң-кичине, түркүн-түрдүү терезеден саресеп салган керемет болорун жон терим менен сездим. Ошон үчүн ушул күндөрү да жаңы тилдерди өздөштүрүү менен алпурушуп жүрөм.

Тил, бирок ишенимсиз дос. Бир аз көңүл бөлбөй койсоң таштай качат. Ошон үчүн аны унутта калтырбай, ар дайым пайдаланып, колдон келсе өнүктүрүп-өстүрүп, байытып отуруу керек. Бир тилдин зыяны башка тилге тийбегендей болсун. Чет өлкөлөрдүн биринде мурдагы СССРден көчүп кеткен Табакиндердин үй-бүлөсү менен таанышып калгам. Алардын кичүү кызы жергиликтүү тилди өздөштүрүүгө баш-оту менен киришип кетип, орус тилин унута баштаган экен. Ошондо ага апасы “кызым, жок болсо мейли эле. Колуңда турган бар улуу байлыгыңды жоготуп жатканың кандай? Канча адам жетпей жүргөн, жетем, үйрөнөм, билем деп умтулган эң сонун тилди унута баштаганың өтө чоң чекилик" дегендей кейип кеңеш айтып жатканын уккам. Эң туура ой. Ошондуктан жаңы тил менен алек болуп жатып, жаттаган тилиңди кароосуз калтыра көрбө. Барды сактай жана таптай билүүнүн өзү акылдуулук. Жылдап тер төгүп мээнет кылып үйрөнгөн тилиңди эс тутумдан өчүрүп алуу — узак убакытта кыйналып курган мунараны ураткандай эле кесирлик.

Эне тилибизди аздектейли, асырайлы, даңазалайлы. Башка тилди, балким, бир-эки жылда мыкты үйрөнсөң болот, бирок эне тилди өмүр бою өздөштүрөсүң. Чет өлкөгө кетип, ошол жакта отурукташып калгандардын бала-бакырасын айыптоо кыйын, бирок өз мекениңде жүрүп өз эне тилиңде чала-чарпыт сүйлөсөң, бул өз тамырыңа жана маданиятыңа кылган улуу кыянаттык.

976
Белгилер:
эне тил, маданият, тил
Тема боюнча
Кел, келе бер, Китеп майрамы! Быйыл сени жарык жүз менен тосуп алабыз
Караколдо тамтыгы чыккан имаратта рентгенге тартат

Караколдо тамтыгы чыккан имаратта рентгенге тартат. Дарыгердин түшүндүрмөсү

0
(жаңыланган 19:55 12.07.2020)
Эски үйгө окшош имаратта 1967-жылы чыгарылган рентген-томография иштетилет. Бул облус боюнча жападан жалгыз аппарат.

БИШКЕК, 12-июл. — Sputnik. Каракол шаардык кургак учук диспансеринин директору Жаңыл Акунова эмне себептен рентген-аппарат авариялык абалдагы имаратта жайгашканын айтып берди. Анын билдирүүсүн өкмөттүн Ысык-Көл облусундагы өкүлчүлүгүнүн маалымат кызматы жарыялады. 

Аварийное здание, где находится единственный рентген-аппарат в Караколе Иссык-Кульской области.
© Фото / Жаныбек Кожоев
Караколдо тамтыгы чыккан имаратта рентгенге тартат

Буга чейин социалдык тармактарда дубалдары көчкөн эски үйгө окшогон имаратта рентген тартып жатканы туурасында жазышкан.

Ысык-Атанын ооруканасында эртеден бери дарыгерлер жокпу? Министрликтин жообу

Акунова ал аппарат кургак учук менен ооруган бейтаптарга гана колдонула турганын жана жабдыктын иштөө убактысы чектелүү экенин билдирди.

“Бул 1967-жылы чыгарылган эски рентген-томограф, муну эчак эле колдонуудан чыгарыш керек болчу. Бирок облус боюнча бир эле ушул аппарат болгондуктан иштетүүгө туура келет. Учурда томографияга гана тартып жатабыз, рентген иштебей калды. Биз кургак учук менен ооруган бейтаптарды гана тейлейбиз. Бул аппаратты эч качан ордунан жылдырбаш керек, болбосо таптакыр эле  жарактан чыгып калат”, — деди дарыгер.

Ошондой эле ал каражаттын жоктугунан имарат оңдолбой турганын кошумчалады.

0
Белгилер:
оңдоо, дарыгер, имарат, рентген, Каракол
Тема боюнча
Көлдөгү кургак учукту дарылаган борбор COVID жуктургандарга берилеби? Расмий жооп
Ысык-Атанын ооруканасында жарык өчүп, аппараттагы бейтап көз жумду
№1 шаардык оорукананын медигинин кайрылуусу боюнча башкы дарыгер текшерилет