Ысык-Көлдө эс алгандар. Архивдик сүрөт

Саратанда кимге көлгө барууга болбойт? Ысык-Көлдөгү 7 кооптуу көрүнүш

(жаңыланган 12:37 11.08.2018)
Ата-эне баласынын уктап жатканына сүйүнүп, наристе эсин жоготконун алгач элес албай да калышы ыктымал. Биздин медициналык колумнист Улугбек Жоомартов жайкы эс алуу маалында мындай көрүнүш байма-бай кездешерин белгилейт.

Адеп Ысык-Көлдүн жээгине кимдерге таптакыр эс алууга болбой тургандыгын айтайын. Ооба, албетте, бул тизмеге кирген тааныштарыңыз көлгө барып, сопсоо эле кайтканын мисал келтирет чыгарсыз, бирок саламаттыкты тобокелге салуунун зарылдыгы канчалык?!

Кооптуу тизмедегилер:

Кант диабети бар;

Гипертониялык дарты бар;

Тери ооруларынан азап чеккендер;

Жакын арада оор операция же химиятерапияны баштан кечирген адамдар;

Кош бойлуулар (алгачкы жана соңку үч айлык кезинде).

Ээми Ысык-Көлдө эс алуучуларга башкы кооптуулуктар туурасында эскертип өтөлү. 

Беременная женщина идет по улице. Архивное фото
© AFP 2021 / ROSLAN RAHMAN
Ультрафиолет нурлануусунан айрыкча кош бойлуулар оолак болушу кажет, себеби, түйүлдүккө зыян

1. Ультрафиолет. Бул күндүн түз нуру эмес, толкундары, сизди алардан калкаланган чатыр да сактай албайт. Ультрафиолет нурлануусунан айрыкча кош бойлуулар оолак болушу кажет, себеби, түйүлдүккө зыян. Бул терини жабыркаткан дарттарды, тагыраак, ракты пайда кылат. Жүзүндө, денесинде көп же көлөмдүү меңи болгон адамдар абайлоого тийиш.

2. Күнгө күйүү. Эпидермистин үстүңкү клеткалары өлүп, сезгенип калгандыктан, тери кызарып, аллергия болуп, шишип кетиши мүмкүн.

Күнгө күйүп калган терини дарылоо абдан жеңил, ага муздак компресс (таңгыч) коюу керек. Эмен кабыгы же ат кулактын кайнатмасы жакшы жардам берет, бирок эс алууга баратып, бул чөптөрдү баштыгына ким сала бармак эле. Ошентсе да бул күнгө күйгөн териге камкаймак же арак сүйкөп айыктырып аласыз дегендикке жатпайт! Камкаймак денеге майлуу чел кабык болуп жайылып, ашыкча ысыктын денеден чыгып кетишин бөгөттөйт, мындайда күйүктү ырбатып алышыңыз ыктымал. Ал эми спирт андан бетер жаман: андан тери кургап, жараланып, кесилип кетиши мүмкүн.

Күнгө күйгөн терини дарылоонун дурус ыкмасы — майдаланган бадыраңды жабуу. Картошка да жакшы. Бирок адегенде күйгөн жерлерди жакшылап аккан сууга муздатып алуу зарыл. 

Отдыхающие на пляже в Майами, штат Флорида. США
© AFP 2021 / TIMOTHY A. CLARY
Күнгө күйгөн терини дарылоонун дурус ыкмасы — майдаланган бадыраңды жабуу. Картошка да жакшы. Бирок адегенде күйгөн жерлерди жакшылап аккан сууга муздатып алуу зарыл

3. Күн өтүү. Мындай көрүнүш чоңдор тургай, жаш балдар үчүн да кооптуу. Мындай учурду элестетип көрөлү: бала ойноп жүрүп эле бир маалда чыргоолоно баштайт. Анан тез эле шайы ооп, уктап кетет. Тилекке каршы, таптакыр ойгонбой калган учурлар да кездешет. Бала мындай кырдаалда кандай абалда болорун тактап көрөлү. Өзүн начар сезе баштайт, башы ооруп, тегеренет, көңүлү айныйт. Бул балага күн өтүп кеткенинин белгиси. Андан кийин баланын организми кубат үнөмдөөчү режимге өтөт да наристенин мууну бошоп, көңүлү ачылбай, уйкуга кетет. Бирок уйку убагында ал эсин жоготуп, чарчап калышы да ыктымал.

Жоопкерчиликтүү ата-эне эмне кылат? Баласынын оюнун бир саамга токтотуп, көлөкөдө эс алышын улам талап кылып, денесиндеги табигый бүгүштөрдү текшерип турат. Алар ным болушу шарт.

Жабыркаган адамга алгачкы көмөктү кантип көрсөтүү керек? Аны муздак жайга алып келип, муздагыраак (таш муздак эмес!) суусундуктан ууртатуу абзел. Чекесине нымдалган сүлгүнү басыңыз. Анан албетте, врач чакырууну эстен чыгарбаңыз.

Баса, абдан калың матадан панама (жазы талалуу жайкы баш кийим) кийген балдарды көп көрөм, алар ого бетер ысытат. Жайкы баш кийимдин жеңил жана ачык түстөгү кездемеден тигилгенин алыңыз.

4. Суук тийгизип алуу. Акылга сыйбас нерсе сезилип, Ысык-Көлдө саратанда кайдагы суук дээрсиз. Бирок, көл тегерегинде күндүн убагына жараша аба кескин өзгөрө берерин баары жакшы билишет эмеспи. Эгер күндүз күндүн табы 30 градуска чыкса, кечинде чагылган чартылдап, катуу шамал болуп, ал эми абанын температурасы 10 градуска чейин төмөндөшү толук мүмкүн.

Бир эс алуучуну мисалга алалы. Керээли кечке көл жээгинде жатат, кызытуучу ичимдик ичет дейли. Кеч курун илме бут кийим, чолок шымчан жамгырда жүрө берет, анткени ысып жатат да. Буга күндүн аптабынан кан тамырлары кеңейе түшкөнү себеп, спирт ичимдиги кырдаалды ого бетер курчутуп жиберген. Мындай абалдагы киши жылуу кийинбесе же жылуу бөлмөгө кирбесе, суукка урунушу турган иш. 

Пляж санатории Кыргызское взморье на берегу Иссык-Куля ночью
© Sputnik / Табылды Кадырбеков
Күндүз ысык болгону менен кеч курун кадыресе салкындай түшөт. Андыктан кечинде жылуураак кийинүү зарыл

5. Суу ичинде тарамыштардын карышып калышы. Эгер тайыз жерде сүзүп жүргөн болсоңуз, жээкке өз алдынча чыга аласыз. Тарамыштарды кылдат чойгулап койсоңуз, жазыла түшөт. Терең сууда тырышып калганы өтө жаман. Андай жагдайда кадимки төөнөгүчтүн жардамы тиет, аны жаныңызга ала жүргөнүңүз оң, абдан камылгалуу киши экендигиңизге ишенейин. Тарамышка анын учун сайып, жардамга киши чакырууга аракет кылыңыз.

6. Пирстен секирик. Эгер күнгө тотугуп алып муздак сууга секирсе, кишинин кан тамырлары түйүлө түшөт да, адам эс-учун жоготуп, чөгүп кетиши да ыктымал. Ошондуктан пирстен секирүүдөн оболу муздак сууга бир чумкуп алган оң. 

Температура воды на Иссык-Куле сейчас около 15-18 градусов
© Sputnik / Табылды Кадырбеков
Пирстен секирүүдөн оболу муздак сууга бир чумкуп алган оң

7. Тамактан уулануу. "Күнгө күйбөсөң, тамактан ууланбасаң, анда эс алууң ойдогудай өтпөптүр" деген тамаша кеп айтылып калат эл арасында. Сактоо мөөнөтүнөн өтүп кеткен азыкты жегенден да толук быша элек жашылча-жемиштен уулануу кооптуу. Аларга сайылган, себилген ар кандай химиялык заттар организмден жакшы чыкпайт, ички органдардын иштешине олуттуу зыян келтирет.

Көлдүн жээгинде сатылчу балык дагы кооптуу. Адатта форель (көк чаар) менен сельдь балыктарын сүрсүтүлгөн жана ышталган түрдө сунушташат. Сүрсүтүлгөн балык дээрлик көпкө сакталганы менен ысык тапта ышталып жатып азык жыттана түшөт. А бирок ар кандай татымалдар кошулгандыктан, жагымсыз жытын сезбей да калышыңыз мүмкүн. Адистер балыктын башын жыттап көрүүгө кеңеш беришет, андайда бузулуп баратканы жеңил аныкталат.

Тамактан уулануунун белгилерин ар бир киши ажырата билет: кусуу, ич өтүү, дене табынын көтөрүлүшү. Эгер абал өтө начарлап баратса, жабыркаган адамдын ашказанын үй шартында жууп тазалоого болот. Анүчүн сууну көп-көп ичип, эки манжаны оозго салуу зарыл, куса алсаңыз, ашказанды жеген тамагыңыздан тазалай аласыз.

Мындай убакта активдештирилген көмүр да чоң көмөкчү. Аны салмактын 10 килосуна бир таблетка эсеби менен ичүү зарыл. Уулануудан сууну көп ичүү менен жан сактай аласыз, бирокошентсе да сөзсүз дарыгерге бир көрүнгөнүңүз дурус.

Белгилер:
оору, күн, эс алуу, суу, Ысык-Көл
Тема боюнча
Ысык-Көл КМШнын мыкты курортторунун тизмесинде экинчи орунга татыды
Ысык-Көлгө олимпиадалык база куруу пландалууда
Военнослужащий войск НАТО во время учений в Латвии

"НАТОнун иши": россиялык чек араларда эмне башталмакчы? Сереп

(жаңыланган 20:11 17.04.2021)
Крымдын чектерин абадан чалгындоо, Кара деңиздеги НАТО кемелери, масштабдык окуулар жана АКШдан Украинага жеткирилген сырдуу жүктөр...

Соңку күндөрү түндүк атлантикалык альянс Чыгыш Европада кескин түрдө активдешти. Бул Киев тарабынан Донбасска чектешкен жерге аскердик бөлүк жана техниканы алпарууга, ошондой эле өлкө ичиндеги россиялык күчтөрдү жайгаштырууга болгон реакция экенин эч ким жашырбайт. Аталган чек араларда эмне болуп жатканын Андрей Коц талдап көргөн.

Фронттун үстүнөн көз салган учкучсуздар

Донбасста кырдаал дагы курчугандан бери НАТО өлкөлөрүнүн авиациясы бул жакта көп пайда боло баштады. Чектешкен жерде дайым асмандан RQ-4 Global Hawk дрон-чалгынчылары айланып, Донбасс эл республикасы, Луганск эл республикасынын армияларынын даярдыгына көз салууда. Анан, албетте, учкучсуздар менен тартылган сүрөттөр заматта киевдик жетекчилердин столуна жетери бышык. Украина куралдуу күчтөрүнүн өзү да абадан чалгындоону активдештирген. Элдик кошуунчулар Түркиядан сатып алынган Bayraktar TB2 сокку уруучу дрондорун дароо байкашкан. Жердеги буталарга чабуул коюшкан эмес, учкучсуз аппараттардын операторлору азырынча согуштук аракеттердин потенциалдуу театрын гана изилдөөдө.

Украинанын куралдуу күчтөрүнүн ушул типтеги алты дрону бар. Дагы кошумча аппараттарды сатып алууга келишимге президент Владимир Зеленскийдин Түркияга болгон жакындагы эле иш сапарында кол коюлган. Мындан сырткары, батыш авиациясы дээрлик күн сайын Крымдын жээктерине байкоо салат.

Кара деңиздин бейтарап сууларын британиялык жана америкалык Boeing RC135W жана Lockheed P-3Corion радиоэлектрондук чалгындоо учактары, ошондой эле P-8Aposeidon айланат. Алардын негизги милдети – Кара деңиз флотунун кемелеринин багытына баам салып, жарым аралда уюштурулган аскердик топтордун абадан коргонуу позицияларын ачыктоо.

Сырдуу жүктөр

НАТО чөлкөмдө аскердик-деңиз күчтөрүн да бекемдөөдө. Апрелдин аягына дейре Кара деңизге АКШнын аскердик-деңиз күчтөрүнүн эки ракеталык эсминеци келүүгө тийиш. Пентагондун расмий версиясы боюнча кемелердин келиши "кадыресе мүнөздө". Бирок Кремль ага карата кескин көз карашта. Бул эсминецтер элүүдөн ашуун "Томагавк" канаттуу ракеталарын ташып жүрсө да таң калып болбойт.

"Кошмо Штаттардын Кара деңизде аскердик активдешүүсү, анын ичинде кемелери байма-бай өтүүдө, — деп белгилейт Россиянын ТИМ башчысы Сергей Лавров. — Азыр бул абдан өзгөчө өжөрлүк, агрессивдүүлүк менен коштолууда. Россия Федерациясы Украинага чектешкен жерде эмне кылууда деп суроо салышууда. Жооп жөпжөнөкөй, биз ал жакта жашайбыз, бул биздин өлкө. Украинада НАТОнун алкагында ар кандай иш-чараларды уюштурган аскер кызматкерлери кемелери менен Кошмо Штаттар бул аймактарда – өз территориясынан миңдеген чакырым аралыкта эмне кылып жүрөт? Бул соболубуз жоопсуз калууда".

Ушундай эле дагы бир бүйүр кызыткан суроого жооп боло элек: Киевге АКШнын аскердик-аба күчтөрүнүн аскердик-транспорттук учактары ташып жаткан жүк эмне? Адистер FlightRadar интернет-сервисинин көрсөткүчтөрүнө көңүл бурушат, анда "АКШ, Германия жана Прибалтикадан учуп чыккан америкалык C-17 жана C-130 Борисполь аэропортуна конуп, жүгүн түшүрүп, кайра учуп кетип жатышканы" боюнча маалымат камтылат. Аскердик эксперт Алексей Леонковдун пикиринде, Украинага Вашингтон радиоэлектрондук күрөш комплекстерин жеткирүүдө, бул Украинанын Куралдуу күчтөрүнүн тез арадагы чабуулунан кабар бериши мүмкүн. Ал АКШнын Куралдуу күчтөрүнүн "Чөлдөгү бороон" операциясындагы тактикасын мисалга келтирди. Ошондо жаңжалдын алгачкы күндөрү америкалыктар Саддам Хусейндин армиясына көз ачырган эмес.

Ушундай эле версия Донбасс эл республикасынын жетекчилигинин жакындагы эле билдирүүсүндө да кездешет. Анда аймакка аскердик техникалардын жапырт алып келинип жатканын жашыруу үчүн украиналык күчтөр ЕККУ (Европа коопсуздук-кызматташтык уюмунун) миссиясынын учкучсуздарынын башкаруу каналдарын жана GPS датчиктеринин сигналдарын басаңдатып жатканы айтылат. Анткен менен Россия да буга кол куушуруп отуруп калбайт.

"Эгер кырдаал курчуп кете турган болсо, албетте, биз өзүбүздүн жана жарандарыбыз кайда жүрүшпөсүн, коопсуздугун камсыздай турганыбыз шексиз, — деп белгилейт Россия ТИМ орун басары Сергей Рябков. — Мындай болжолдуу тирештин кесепетине жоопкерчилик толугу менен Киевде жана анын Батыштагы кураторлорунда болот. АКШга да биз Крымдан, Кара деңиздеги биздин жээктерден алыс турууну эскертебиз. Бул алардын өзүнө эле жакшы".

Машыгууларга даярдык

Россиялык чек араларга жакын батыш өлкөлөрүнүн күчтөрүнүн активдешүүсүнүн дагы бир себеби — НАТОнун Defender Europe 2021 машыгууларына даярдыгы. Ал келерки айдын ортосунда башталат. Окуулардын уламышына ылайык, НАТОнун күчтөрү Калининград областын алып, Россиянын батыш областтарын бөгөттөп, ошондой эле "орустардын жапырт чабуулунун" мизин кайтарышмакчы.

Мурдагы жылдардагыдан айырмаланып быйыл Чыгыш эмес, Түштүк Европага өзгөчө көңүл бурулат. Машыгуулар Черногория, Косово жана Албанияда өткөрүлмөкчү. Болгария жана Румынияда абадан коргонуу жана "жер – жер" классындагы ракеталар менен атуу боюнча машыгышат. Ал эми Венгрия бекем тыл болмокчу. Бул жылкы аскердик окууларга украиналык аскер кызматкерлери да катышат.

Америкалыктар Европага бир топ күчтү, анын ичинде 1-кавалериялык жана 82-аба-десанттык дивизиянын бөлүктөрүн алып бармакчы. Атлантика аркылуу ар кыл багыттагы аскердик техниканын жүздөгөн бирдигин жеткирет. Булардан сырткары Флорида штатынан 53-пехоталык бригадасын да катыштырат. Мурдагы машыгууларда адат болуп калгандай эле бул ирет да куралдардын бир бөлүгүн америкалыктар Европада "унутуп калары" ажеп эмес. Адистердин көз карашында, Пентагон ушундай амал менен жыл сайын чөлкөмдө чабуул коюу мүмкүнчүлүктөрүн көбөйтүүдө.

АКШнын Европадагы Кургактагы күчтөрүнүн расмий сайтында жарыяланган пресс-релизде быйылкы окуулар АКШнын НАТОдогу союздаштары жана өнөктөштөрүнүн ортосундагы стратегиялык жана ыкчам даярдыкты жана өз ара аракетти жогорулатууга багытталганы айтылат. Машыгуулар үчүнчү өлкөлөргө коркунуч туудурбай турганы баса белгиленет. Бирок Defender Europe 2021 окууларынын Россияга каршы күн тартиби айдан ачык.

Үч тараптуу байланыш тобундагы Украинанын спикери Алексей Арестович бул туурасында "окуунун маңызы Балтиядан Кара деңизге чейинки аймакта Россия менен согушка машыгууда" экенин ачык эле билдирген. Буга жооп катары Россия менен Беларусь сентябрда "Батыш – 2021" окууларын өткөрөрү турулуу иш. Мурда Беларусь коргоо министри Виктор Хренин билдиргендей, "чогуу машыгуулар жогорку урбанизацияланган жерлерде бирдиктүү штурмдук бөлүктөрдүн биргелешкен аракеттеринин жаңы ыкмаларын сыноого", ошондой эле "курал жана техниканын жаңы жана заманбап үлгүлөрүнүн майнаптуулугун баалоого" мүмкүндүк берет.

РФ коргоо министри Сергей Шойгунун айтымында, азырынча аталган өлкөнүн батыш чек араларына аскердик даярдыгын текшерүү алкагында эки армия жана аба-десанттык күчтөрдөн үч бирикме жеткирилген.

Белгилер:
Аскер, курал, Донбасс, Украина, машыгуу, Пентагон, чек ара, Россия, АКШ, НАТО
Тема боюнча
"Циркон" Россиянын жээктеринен батыш кемелерин "кубалады"
"Чогуу жооп беребиз". НАТО Россиядан сырткары кимден кооптонот?
Көчөдө бараткан кыз. Архив

Кабар алып туралычы! Эже-карындашына кайдыгер ага-инилерге кайрылуу

Аялдарга карата зордук-зомбулук коомдогу эң көйгөйлүү маселелердин бири бойдон калууда. Колумнист Мирбек Сакенов кыздарды зомбулуктан сактоодо ага-инилердин ролу тууралуу ой толгоду.

Ала качуунун курмандыгы болгон Айзада Канатбекованын өлүмүнөн кийин оюмдан бир нерсе такыр кетпей койду. Кыздын жакындары "ала качкан киши Айзаданы меники болбосоң, апаңды өлтүрүп кетем, апаң экөөң жалгыз экенсиң" деп коркутуп жүрүптүр деп айтышты. Кыязы, зөөкүр "мунун сурап алары жок" дегендей мамиле кылган окшойт.

Бирок азыркы күндө атасы, ага-инилери бар кыздар деле башына кыйынчылык түшкөндө таянарга тоо таппай калган учурлар болуп жатат.

Бала кезден чогуу ойноп, чогуу чоңойгон көчөлөш баланын карындашы Жибектин (аты өзгөртүлдү — ред.) окуясын айтып берейин. Биз жогорку класстарда окуп жүргөндө Жибек мектеп босогосун жаңы аттаган, чачына ак бантик тагынган секелек болчу. Агасы экөөбүз малга барсак дагы, көлгө түшсөк дагы артыбыздан калбай жүрүп, мага өз карындашымдай болуп калган. Алысыраак жерге барсак, кичинекей неме чарчаганын көрүп, алмак-салмак аркабызга көтөрүп келчүбүз. Алма-өрүк жесек, ага эң кызылын, эң даамдуусун алып берчүбүз...

Кийин жашоо ар кимибизди ар кайсы жакка таратты. Эки жыл мурда үйдөгүлөр кошунанын кызы Жибек турмушка чыкты деп калышты. Көрсө баягы кичинекей кыз бойго жетип, Бишкектеги окуу жайлардын биринде 2-курста окуп жүрүптүр. Апам "ал зээндүү, токтоо кыз болуп чоңойгон. Анысына кызыккандар куда түшүп келе берип, ата-энеси бир таанышынын уулуна күйөөгө берип коюшту" деди.

Ошол бойдон аны деле унутуп калыптырмын. Бир күнү Бишкектен Жибектин агасы, баягы айылдык досумду жолуктурдум. Шаарда турат экен, үй-бүлөлүү, иштеген иши бар, айтор, жашоосу дурус экенин айтып отурду. Балалыкты эстеп, аркы-беркини сүйлөшүп отуруп Жибек эсиме түштү.

"Турмушка чыкты деп уктум эле, көнүп кеттиби, балалуу болдубу?"деп сурадым. Ал "жакшы, жакшы" деп башын ийкеп койду да, сөздү башкага бурду. Чынын айтсам, мен Жибек тууралуу сүйлөшкүм келген. Анткени ал биздин бала кездеги достугубуздун ажыратып алгыс бир бөлүгү болчу.

Мен анын ой-боюна койбой эле карындашы тууралуу сурап туруп алдым, күйөө бала эмне иш кыларына кызыктым. Аягында өзү ыңгайсыз болуп кетти окшойт, "мен аны менен көп деле сүйлөшпөйм, жеңеси сүйлөшөт" деп айтты.

Арадан дагы бир нече ай өтүп кеткен. Бир күнү апам шаарга келди. Айыл-апа, кошуна-колоңдор тууралуу сүйлөшүп отуруп, "коңшубуз небересин багып жатат, кызы Жибек жолдошу менен ажырашып кеткен. Бир жашка чыга элек уулун таштап, Россияга иштегени кетти" деп кейиди.

Көрсө Жибектин күйөөсү чоң муштум чыгып, кош бойлуу кезинде кол көтөрчү экен. Атасынын таанышына келин болгон байкуш кыйналганын айта албай жүрүп, бир ирет өз жанын кыюуга аракет кылыптыр. Атургай окуяга милиция аралашып калгандыктан, ал тууралуу жаңылыктарга дагы чыккан экен.

Бул жерде эмнени айткым келет? Жаш кыздын ушундай тагдырга туш болушуна, албетте, көп кишинин күнөөсү бар. Бирок эмне үчүн агасы жаңы турмушка аттанып, жашоосунун өтө маанилүү, жоопкерчиликтүү, морт учурунда ал-жайын сурап, колдоо көрсөтүп койбойт деген ой мээмен кетпей койду.

Жеңеси сүйлөшүп жатат дейт. Жеңенин орду башка да. Менимче, кыз кишиге агасынын "Коркпо, мен бармын!" деген сөзү бир топ дем-күч берет.

Жигиттер, аялзаты табиятынан назик, коргоого, колдоого муктаж аяр жан. Кыз-келиндер жашоодо канчалык күчтүү, ийгиликтүү болбосун, кээде өзүн алсыз сезип ага-инисине таянгысы келет. Аларга эркелеп майда-барат маселелерин айтып, жок дегенде колдоо, мактоо сөздөрүн уккусу келет. Ошондой учурда агалар өзүбүздүн эч нерсеге арзыбаган сөзүбүздү, убактыбызды бөлүүгө жарабай жатабыз.

Окуганы же иштегени кеткен карындаштарыбыздан кабарыбыз жок. Алардын каякта окуп, ким менен жатаканада жашап, кандай адамдар менен мамиле куруп жатканына кызыгып да койбойбуз. Ата-энесинин камкордугунан бир нече чакырымга алыстаган секелек кыздарыбызды турмуштун тегирменине жалгыз таштап коюудабыз.

Турмушта жолу болбой ажырашып, бала-бакырасы менен ара жолдо калган жакындарыбыздан качып калдык. Адамдын көңүлүн ооруткан, кейиткен ушундай окуяларга көпчүлүгүбүз күбө болуп жүрөбүз. Ошол учурда аялзаты ээн талаадагы сормо сазга түшүп калган чаарчыктай тыбырчылап жатып күчтүүлөрү чыгып кетип жатат. Алы жогучу?..

Кээде эркектердин алсыздыгына, кайдыгерлигине көзү жеткенде өз арабасын өзү согуп, эч кимден жардам күтпөй, турмушун улантууда.

Жигиттер, бизди Жараткан күчтүү кылып, аялзатын коргосун деп жараткан. Апабызбы, эже-карындашыбызды, жубайыбызды, кыздарыбызды калкалашыбыз керек.

Белгилер:
көйгөй, жардам, кыз, Кыргызстан
Тема боюнча
Мамашова: Айзада чиновниктин эмес, жөнөкөй адамдын кызы болгону үчүн өлдү
Уурдалып, киши колдуу болгон Айзаданын окуясы боюнча жаңы жагдайлар айтылды
Врач измеряет артериальное давление. Архивное фото

Оору менен кырсыктан камсыздандырылган жарандарга 14 млн. сом төлөндү

Былтыр камсыздандыруу келишимин 37 миңдей киши түзгөн. Алардын миңге жакыны ар кандай окуяга туш болуп каражат алган.

БИШКЕК, 18-апр. — Sputnik. Өткөн жылы оору менен кырсыктан өзүн камсыздандырган кыргызстандыктарга 14,2 миллион сом берилди. Бул тууралуу Улуттук статистика комитетинин маалыматында айтылат.

2020-жылы бул жаатта ыктыярдуу түрдө 36 724 келишим түзүлгөн. Камсыздандыруунун жалпы суммасы 11,9 миллиард сомду түздү. Ал документ толтурган адам ооруганда же кырсыкка учураганда төлөнмөк. Ал эми камсыздандыруу боюнча баштапкы төлөм катары (камсыздандыруу үчүн каражат) 62,8 миллион сом түшкөн.

Улуттук статистика комитети келишим түзгөндөрдүн 858и ар кандай учурга туш келип, 14,2 миллион сом алганын айтты.

Белгилер:
төлөм, камсыздандыруу, кырсык, оору, Улуттук статистика комитети, Кыргызстан
Тема боюнча
Сооронбаев: коңурук тарткан адам ар кандай оору менен жабыркайт