Хорватия курама команданын футболчулары. Архивдик сүрөт

20 жыл мурдагы өч, Хорватиянын өкүтү, Франциянын доору. Чемпионаттан кийинки ой

2421
(жаңыланган 17:22 23.07.2018)
Ошентип, бир айлык уйкусуз түндөр артта калып, Россиядагы футбол боюнча дүйнө чемпионаты аяктады. Бул ирет дагы футбол керемети жер шарында далайды кайгыртып, көбүн кубанычка бөлөдү. Россиянын 11 шаарына дүйнө жүзүнөн күйөрмандар агылып келип, орустардын меймандостугуна, кең пейилине ыраазы болуп кетишти.

Баш байге үчүн 15-июлда финалда Москвада Хорватия Франция менен чыныгы атаандаштыкты көрсөткөнү менен дүйнө Кубогун алдырып, арманда калды. Француздар 1998-жылдагы ийгилигин кайталап 20 жылдан кийин экинчи ирет дүйнө чемпиону аталды. 19 жаштагы Килиан Мбаппе Франциянын футбол жылдыздарынын бири катары таанылды. Бул дүйнө чемпионатынын таасири, жыйынтыктары тууралуу спорттук баяндамачы, колумнист Кабыл Макешов баяндап бермекчи.

Баш байге үчүн Хорватия менен Франциянын ортосунда кыл чайнашкан кармаш болду. Эки команда эски атаандаштардан эле. Мындан 20 жыл илгери 1998-жылы Францияда өткөн дүйнө чемпионатында плей-оффто Румынияны 1:0 эсебинде, чейрек финалда Германияны 3:0 эсебинде утуп, жарым финалда талаа ээлери француздарга 2:1 эсебинде утулуп, баш байгеге талапкер болбой, анда да арманда калган. Ошондой болсо дагы ындыны өчпөй, эгемен Хорватиянын тарыхында алгач ирет коло байгелүү болуп, III орун үчүн беттешүүдө Голландияны 2:1 эсебинде жеңип, үйүнө коло медаль тагынып кайткан.

20 жыл мурдагы өч алынбай калды…

Сборная Франции стала чемпионом мира по футболу, обыграв Хорватию со счетом 4:2. Французы становится чемпионом мира второй раз. В 1998-м году она впервые стала лучшей на мундиале
© REUTERS / KAI PFAFFENBACH
Россияда өткөн футбол боюнча дүйнө биринчилигинде Франция чемпион болду
Эми ошол 20 жыл мурдагы өчүн француздардан алууга абдан аракет кылды. Бул ирет да француздар дүйнөдөгү мыкты команда экенин далилдей алышты. Бирок, 4 миллиондон ашуун калкы бар, спортко дилгир Хорватиянын аракетине жогору баа бериш керек. Себеби, эгемендүүлүк алганына 20 жылдан ашуун убакыттын ичинде эле, алар Европадагы мыкты командалардын сабына кошулду. Россиядагы дүйнө чемпионатына жолдомо алуу да кыйынга турду.

2018-жылкы дүйнө чемпионатына мыктыларды тандоо турниринде хорваттар Европадагы футболу өнүккөн Украина, Түркия, Финляндия, Исландия жана Косово өлкөлөрүнөн арбын упай топтоо менен, Грецияны утуп алуу менен дүйнө чемпионатына жолун ачты. Ал эми Россиядагы финалдык бөлүктө хорваттар "Д" тайпасында дүйнөнүн эки жолку чемпиону Аргентина, Исландия жана Нигерия командаларын ишенимдүү утуп, 9 упай менен лидер болду. Плей-оффтогу Дания менен болгон окуя чейрек финалда дагы кайталанды. Чейрек финалда жалпы Россия сүрөөнгө алып турган оюн ээлери менен негизги жана кошумча убакыттарда 2:2 эсебинде тең чыгып, пенальти тебүүдөн гана россиялыктар жыдып, жарым финалга чыкпай арманда калганы тарыхый окуя болду. Бул ирет да хорватиялыктардын жылдызы жанып, даниялыктарды пенальтиде уткандай, россиялыктарга жеңилүү ызасын тарттырды. Бул оюнга жалпы футбол күйөрмандары да ыраазы болуп, россиялыктарга да жогору баа беришти. Натыйжада алакандай Хорватия жарым финалда футболдун мекени болгон дүйнө чемпону Англия менен мөрөй талашып, аларды да үйүнө кайтууга аргасыз кылды.

Жылдызы жанган Модрич

Футбол. ЧМ-2018. Хорватия - Нигерия
© Sputnik / Елена Руско
"Реал Мадрид" клубунун жарым коргоочусу Лука Модрич
Хорватиянын күйөрмандары команда капитаны 32 жаштагы арык чырай, Испаниянын "Реал Мадрид" клубунун жарым коргоочусу Лука Модрич баштаган футболчуларынын финалдык беттешүүдөгү аракеттерине жогору баа берди. Башты жерге салбай, 2022-жылы Катарда өтчү дүйнө чемпионатына азыртан даярдык көрүүсүн тилеп турушат. Франциялык футбол эксперти Жерар Улье да жылдызы жанган Лука Модричти борбордук бөлүктө оюнду мыкты уюштура билген чыгаан футболчу, коргонуу жана чабуул коюу тактикасын жакшы билген адис катары баалады.

Франция командасынын тумары — Килиан Мбаппе

Футбол. ЧМ-2018. Матч Франция - Перу
© Sputnik / Владимир Астапкович
Франция тандалма командасынын эң жаш чабуулчусу Килиан Мбаппе
Мындан 20 жыл илгери 1998-жылы 12-июль күнү футбол боюнча 16-дүйнө чемпионатында Франциянын курама командасы өз жеринде дүйнөнүн 5 жолку чемпиону болгон Бразилиянын командасы менен финалга чыгып 3:0 эсебинде утуп, жылдызы жанган эле. Эми минтип франциялыктар Россияда өткөн 21-дүйнө чемпионатынын чейрек финалында дүйнөнүн төрт жолку чемпиону Уругвай командасын, жарым финалда Бельгияны 1:0 эсебинде утуп, финалда Хорватияны 4:2 эсебинде жеңип, экинчи ирет баш байгенин ээси болду.

Бардык эл, улуттар кандайдыр жооптуу сапарга аттанаарда бир нерсени тумар тутуп, төлгө кылышат эмеспи. Мындай салттан француздар дагы четте калбай, бул сапар гезиттери да финалда Франция тандалма командасынын эң жаш чабуулчусу Килиан Мбаппени команданын "тумары" катары, төлгө кылышкан эле. Француздардын 19 жаштагы жигитти команданын тумары катары атап жаткандыгынын бир себеби, Франция өз жеринде футбол боюнча дүйнөнүн чемпиону болгон 1998-жылы 20-декабрда Бонди шаарында Мбаппе туулган. Футбол үчүн жаралгандай Килиан Мбаппе чеберчилиги менен таанылып, Россиядагы өтүп жаткан чемпионатта жакшы оюн көрсөтүп, финалдагы акыркы топту киргизгенине дүйнө калкы күбө болду. Маңдайы жарык, кара тору бул жигит финалда Францияга күч-кубат берип, экинчи алтын кубоктун ээси болуусуна өбөлгө болду дешип, француздар аны тумар катары кабыл алды.

15-июлда финалдык беттеште Килиан Мбаппе жана анын өнөктөштөрү дүйнө чемпионатынын алтын медалын татыктуу жеңип алды. Адистер жылдызы жанган бул баланын келечеги алдыда экенин айтышууда.

Ошентип, бир айлык спорт майрамы аяктады. Көптөрдүн эсинде Москвадагы ири стадиондогу чакалап төккөн нөшөр, жамгырда өтмө катар суу болуп, бирок футболчуларга, калыстарга, машыктыруучуларга сыйлык тапшырган президенттер, спортчулардын жаш баладай кубанган ирмемдери калды.

Бул мундиаль дүйнөгө жаңы ысымдарды тартуулады, бир нече футболчунун жылдызы жанды, бир топ мамлекеттердин лидерлерин дүйнөгө башка жагынан таанытты. Баса алардын арасында, Хорватиянын президенти, жакшынакай айым Колинда Грабар-Китарович болду.

Ал эми Россия оюнду татыктуу, жогорку деңгээлде өткөргөндүгү үчүн көптөрдүн жылуу пикирине арзыды. Ал эми жеңгендер да, жеңилүүнүн ызасын тарткан үлкөн командалар футбол боюнча дүйнөнүн келерки чемпионатына, Катардагы оюнга (2022-жыл) даярдыкты эмитен көрүү үчүн үйлөрүнө кайтты.

Автордун пикири редакциянын көз карашына дал келбей калышы мүмкүн.

2421
Белгилер:
футбол, футбол боюнча дүйнө чемпионаты, Бельгия, Хорватия, Франция, Россия
Тема:
Россиядагы футбол боюнча дүйнө чемпионаты (112)
Тема боюнча
Футбол чемпионаты жогорку деңгээлде өттү! Дональд Трамп Путинди куттуктады
Россиядагы футбол чемпионатына 3 миллиондон ашуун адам барган
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

1660
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

1660
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Кишилер шайлоо участкасында. Архив

Шайлоодон кийин депутаттар кантип "жыргашат". Келечек үчүн элде эки тандоо бар

981
(жаңыланган 16:15 15.09.2020)
Саясий жарышка аттанган 16 партиядан 1 952 талапкер депутаттыкты арзып турган чагы. Эмне үчүн мандатты мелжегендер көп? Кыргызстанда парламенттин укуругу канчалык узун да, депутаттын таасири кандай? Учурда эл эки тандоонун ортосунда калды.

Журналист Эламан Карымшаков шайлоонун шарапаты кызып турган маалда эл эске алчу эки нерсени айткысы келген.

Аз күндөн кийин парламенттик шайлоо өтөт. Бул күнү биз жөн гана добуш бербейбиз, келечегибизди тандайбыз, колубуздагы бийликти бирөөгө ишенип тапшырабыз. Буга өзүбүзгө жар тандап жаткандай эле мамиле кылуу зарыл деп эсептейм. Себеби шайлоодон кийин депутаттарга беш жыл, алар түзгөн системага бери жагы 10 жыл чыдашыбыз керек. Бизди эр кылган да, кара жер кылган да ушулар болот.

Парламент кандай укукка ээ?

Жогорку Кеңештин депутаттары мыйзам чыгарып эле отурат деп ойлогон жоксузбу? Эгер андай десеңиз мандат мынчалык талаш болмок эмес. Мандаттын жыргалчылыгы башкада...

Шайлоодон уткан депутаттар жаңы өкмөттү бекитет. Ал үчүн ар бир партияга квота берилет, мисалы, менин партиям сунуштаган адам айыл чарба министри кызматына, сиздин партияңыздыкы Бажынын башчылыгына дайындалат. Ошентип өкмөттүн курамын түзүп, премьер-министрди дайындашат. Ошол өкмөт анан өлкөнүн тагдырын чечет. Ниети түз болсо өргө тартат, болбосо "өгүз өлбө, араба сынба" принциби менен эптеп иштейт.

Карыз жөнүндө көп кеп кылабыз. Өкмөт чет өлкөдөн насыя алып жатканда бир тыйынына чейин парламент менен макулдашат. Депутаттар карыз кандай максатта алынып, качан төлөнөрүн билген соң ратификациялайт.

Мындан сырткары, партиялар Борбордук шайлоо комиссиясы, Жогорку сот, Конституциялык палата сыяктуу органдарга өзүнүн адамдарын коё алат.

Байыркы бабам кандай эле?.. Эл энчисиндеги эгемендик тууралуу эки ооз сөз

Парламенттин күчүн ушундан байкасаңыз болот, жада калса бир дагы министр депутаттардын макулдугусуз кызматка отура албайт. Жыл сайын өкмөт аткарган иши тууралуу отчёт берет. Эгер аны парламент жактырбай койсо отставкага кетет. Сапар Исаковду дал ушундай жол менен ээрден алып түшүшкөн. Эсеп палатасы менен Улуттук банк дагы парламентке баш иет.

Кыргызстандын мамлекеттик түзүлүшү — парламенттик-президенттик башкаруу. Демек, сиз шайлаган депутаттардын ичинен бирөөсү төрагалыкка шайланат да, президенттен кийинки эле өлкөнүн экинчи адамы болуп калат.

Кыскасын айтканда, бизде парламенттин ролу абдан чоң, кыбыр эткендин баары депутаттар аркылуу чечилет. Азыр сиздин колуңузда опол тоодой бийлик турганын түшүнүп жатасызбы? Ал каалайсызбы-каалабайсызбы 4-октябрдан кийин күчүн жоготот. Мен сизди максаттуу пайдаланууга чакырам.

Сизде эки тандоо бар

Биринчи тандоо:

VI чакырылыштын 100дөн ашуун депутаты кайра мандат алууга ашыгып жатат. Арасында буга чейин эки-үч жолу депутат болгондору бар. Кээ бирлери канча жыл иштесе да жыйынтык көрсөтүүгө жарабаган, галстугу бар, бирок калыстыгы жок оомо депутат катары эсте калды. "Башкасына баш оорутпайм, бизнесимди гүлдөтсөм болду" деп келе жаткандар да бар. Болбосо бир мандат үчүн 500 миң долларды (39,4 миллион сом) ким эле садага чапсын.

Талапкерлердин ооз көптүрүп айткан убадаларын угуп жатканда баскан жолуна да көз чаптырып коюңуз. Баарына көз жумуп, кайра эле ушулар бийликке келишин каалап турсаңыз, биринчи тандоо сиздики болот.

Ошол учурда сизге бир нерсени эскерте кетейин...

Кайсы партияда жогорку билимдүү талапкерлер көбүрөөк? Рейтинг

Парламент өлкө тагдырын ишенип тапшырган өкмөттүн дараметин пандемия башталганда көрдүк. Бюджетте кошумча акча жок, карыз менен жан баккан мамлекет экенибизди түшүндүк.

Июлдагы апаатта саламаттык сактоо системасынын таш-талканы чыкканын жоон терибиз менен сездик. Чекеден кырылып калабызбы деген коркунуч жаралбады беле. Миңден ашуун үй-бүлө жер кучактап отуруп калганын унуткан жоксузбу? Адистер өз убагында медицина тармагына көңүл бурулбаганын айтышууда. Мунун кесепетинен учурда замандаштарыбыз мээрим төккөн энесинен, таянар тоо болчу атасынан, боор тарткан бир тууганынан, чырактай уул-кызынан жана бир жаздыкка башын жөлөгөн жубайынан ажырап, кан жутуп отурушат.

Экинчи тандоо:

Өлкөгө азыр тайманбас, курч, реформатор, сабаттуу жана саясий эрки бар адамдар керек. Агымга каршы сүзө алгандарды тандоо да сиздин эркиңиз. Жаңыланууга карай кадам таштасак, жаркын жашоону кура алабыз.

Мени күйдүргөнү, элдин жашоосун жакшыртууга жарабагандар, калктын жакырчылыгынан пайдаланып колундагы бийлигин 2000 сом менен сатып алууга аракет кылууда. Муну элди шылдыңдоо катары сыпаттайт элем.

Кээ бирлери карантин маалында тараткан жардамын бетине кармап, үгүт ишин аткарууда. Анысына рахмат, бирок билип коюңуздар, биз кайрымдуулук фондунун директорун эмес, мамлекеттин тагдырын чече турган адамдарды шайлап жатабыз.

"Өзүбүздүн бала" деген түшүнүктөн арылып, айылга эки машина шагыл төгүп бергендерге алданбай, "тууганым суранды эле" дегенди жыйыштырып, өз эркибиз менен тандоо жасайлы.

Кайсы партия жаштарды көбүрөөк чогултту? Жаш курак боюнча инфографика

Эч качан кайдыгер болбоңуз, шайлоого барып, колуңуздагы бийликти ишенимдүү адамга тапшырып бериңиз. Ошондо андан талап кыла аласыз. Азыр эч кимге добуш бербей койсоңуз, кийин бийликке нааразы болууга моралдык укугуңуз жок.

Адам сатып алган буюмун каалагандай колдонорун билесиз. Ошол сыңары эле добушуңузду сатып алгандан кийин өз билгениндей бийлик жүргүзөт. Андыктан ойгонуп, активдүүлүктү көрсөтүүгө убакыт келди.

"Элине жараша бийлиги" дейт, мен сиздерге аябай ишенип, үмүт артып турам. Бир күндүк оокат менен эмес, келечек үчүн күйөлүчү!

P.S: Мен эч бир партиянын курамында жокмун. Жөнөкөй жаран жана журналист катары пикиримди жазууну чечтим.

Автордун пикири редакциянын көз карашы менен дал келбей калышы мүмкүн.

981
Белгилер:
келечек, укук, парламент, депутат, тандоо, үгүт, шайлоо
Тема:
Шайлоо-2020
Тема боюнча
Бир эле телеканалга 3 млн. сом берип... Партиялар акчасын кайда чачып жатат
Катарында жумушу жок талапкерлер басымдуулук кылган партиялар. Инфографика
Кайсы учурда депутат мандат ала албай калат. Маалымдама
Абсолюттук мушкерлер чемпионаты (UFC) россиялык чемпион Хабиб Нурмагомедов менен америкалык Жастин Гэтжинин көз караштар таймашы

Гэтжи менен Нурмагомедов көз караштар таймашын өткөрдү. Видео

0
(жаңыланган 23:08 21.10.2020)
Нурмагомедов менен Гэтжинин чемпиондук наам үчүн кармашы саналуу күндөрдөн кийин Абу-Дабидеги "Мушкерлер аралы" аренасында болот.

БИШКЕК, 21-окт. — Sputnik. Абсолюттук мушкерлер чемпионаты (UFC) россиялык чемпион Хабиб Нурмагомедов менен америкалык Жастин Гэтжинин көз караштар таймашынын видеосун жарыялады.

Бүгүн, 21-октябрда, мушкерлер маалымат жыйын өткөрүп, андан кийин салтка айлангандай бетме-бет жолугушту. Атлеттер бири-бирине сес көрсөтпөй, сый менен тике карашкан.

Посмотреть эту публикацию в Instagram

Публикация от ufc (@ufc)

Промоутерлик компания жүктөгөн экинчи видеодон Гэтжи утурумдук чемпион болгондогу бел курун тагынбай койгонун көрүүгө болот. Аны башында көтөрө келген. Ал эми чыныгы чемпион атыккан Нурмагомедов курун кармап кадрга түшкөн.

Посмотреть эту публикацию в Instagram

Публикация от ufc (@ufc)

Нурмагомедов менен Гэтжинин чемпиондук наам үчүн кармашы 24-октябрда UFC 254 турниринин алкагында Абу-Дабидеги "Мушкерлер аралы" аренасында болмокчу. Россиялык мушкер бел курун сактап калганга жан үрөйт.

0
Белгилер:
таймаш, видео, Жастин Гэтжи, Хабиб Нурмагомедов, UFC
Тема боюнча
Уайт: Нурмагомедов — Гэтжи беттеши UFC тарыхындагы эң ири таймаш болот