Экинчи дүйнөлүк көчмөндөр оюндарынын ачылыш аземи. Архив

Кемтигин эмес, артыгын издейли. Журт башчылары тууралуу

981
(жаңыланган 20:35 22.12.2018)
"Өлкөгө жетекчи болуу — миллиондордон бирөөнө буюрган милдет, тагдыр. Каалайбызбы же жокпу, мамлекеттин тарыхынын бир үзүмү анын аты жана амалы менен тыгыз байланышта" дейт колумнист Нуржигит Кадырбеков.

…2017-жылдын 24-ноябры. Бирде толкунданып, бирде сыймыктанып телени тиктеп отурдум. Анткени Кыргызстандын тарыхында алгачкы жолу эл шайлаган эки президент катар туруп, бири экинчисине бийлик деген бийик аманатты жакшы маанайда мыйзамдуу өткөрүп берип жаткан. Бири-бирине рахмат айтып, ак бата багыштаган. Удаалаш башкарган башка өлкө жетекчилеринин сүрөттөрүн көрүп, бизге качан ушундай саясий маданият келет деп суктанган элем. Анткени өлкөнү капсалаң учурда убактылуу жетектеген Роза Отунбаеваны эске албаганда, бир дагы башчыбызды тактыдан жакшылык менен узатпаптырбыз. Эгемендүү Кыргызстандын таржымалы ак-кара боёктун аралашмасындай болгон алгачкы эки ажосу мындай турсун, мекен үчүн кара жанын карч ура иштеген Искак Раззаков, чейрек кылым өлкө жүгүн аркалаган Турдакун Усубалиев, бийлик башында туруп таптаза бойдон калуунун өрнөгүн дагы бир жолу көрсөткөн Апсамат Масалиев да "зордун түбү кор" дегендей, бир ооз жылуу сөз укпай, тескерисинче, сындалып, таланып, түрткүнчүк болуп кетишкен экен бийликтен. Ошол көрүнүшкө чекит коюлуп жатканына кантип кубанбайсың? Өлкөгө жетекчи болуу — миллиондордон бирөөнө буюрган милдет, тагдыр. Каалайбызбы же жокпу, мамлекеттин тарыхынын бир үзүмү анын аты жана амалы менен тыгыз байланышта. Демек, аларды сыйлоо, жок дегенде кызматтан адеп менен адамча узатуу — бул бийик саясий жана ички маданияттын көрсөткүчү.

Бирок жөндүү жөрөлгө, жакшы саясий салт түптөлдү деген кубанычыбыз көпкө узабады. Эки лидердин ошондогу урабас дубалдай бекем сезилген достугун, ортодогу ишенимин бир жылга жетпей ордун сыйпалап таппай калдык. Көз алдыбызда позитив негативге, достук душмандыкка, кызматташуу күрөшүүгө, биримдик тирешүүгө айланып кетти. Көңүл бурбай койгудай — бул көрүнүш мектептеги эки класстын атамандарынын эрегиши эмес. Таасири таасын, сөзүндө сөөлөт, башында дөөлөт бар эл тандаган башчылардын мамилелеринин чыңалуусу…

Жообу жок суроо

Экөөнүн мамилеси эмнеден бузулду? Кимден кетти? Ушул суроолорго жооп издебей эле коёлу, байболгурлар. Эгерде издесек, анда акыйкаттын түбүнө жетпей суй жыгылып, шек-күмөндүн сазына батып, сормосуна чөгүп кетебиз. Анткени ар кимдин өз чындыгы бар. Талаш-тартыштын аягы "мен буудай, сен саман, мен жакшы, сен жаман" менен аяктайт. Бул жүрөктөрдү андан бетер алыстатып, көңүлдөрдү көк муздай тоңдурат.

Ынтымак бир тарабы "сен жакшы, мен жаман" деген шартта гана келет. Башкаларын билбейм, бирок саясий чөйрөдө мындай руханий айкөлдүктү кезиктирүү оголе кыйын. Андыктан, арадагы арасат маселелерди тактап, орток пикирге келип, жалпы тил табуу жагын эки лидердин өздөрүнө калтыралы. Артына бир эле кылчайса, экөөнүн жүрөктөрүн бирдей жылытчу миң себеп табышар. Анткени тагдырдын тайгак жолдорунда далай сыноолорду ийиндешип бирге жеңип, далай ийгиликтерди чогуу багындырган. Бири үчүн бири алтын башын тобокелге байлап, чымындай жанын аябай алда кандай азаптарды баштан кечиришкен. Анан калса, саясаттын бир жакшы жагы бар: тараптар ар убак компромисске жол издешет. Демек, азыркы абалдын жакшылык менен аякташына үмүт зор. Кантип эле жыйырма жылдык жылуу мамиленин улуу мунарасын жарым жылдагы түшүнбөстүктөр биротоло түздөп, тегиздеп таштасын. Күйгөн же кулаган көпүрөнү кайра курууга болгондой эле бузулган алаканы оңдоо да колдон келчү иш, керек болсо милдет. Анткени кимде-ким жакынына үч күндөн ашык таарынып жүрүп акыретке кетсе азапталат деген кеп бар…

Калганыбыз кантебиз? Кеп мына ушунда…

Сөзү, анан өзү…

Бирөөдөн айып издеген жерде уруш ырбашы мүмкүн, асти басылбайт. Маселени чечүүнүн бир гана жолу —ар ким айыпты өзүнөн издегени дурус. "Ыймандуу адамдын бир көзү бирөөнүн мыкты жактарын, бир көзү өз кемчилдиктерин көрөт" деген акылман сөз тегин жерден айтылбаган чыгар. Дегеним, мындай кырдаалдын түзүлүшүнө кайсыл бир деңгээлде эки лидердин колтуктарына суу бүркүп жатып биз, жарандар да себеп болдук. Социалдык түйүндөрдөн, гезит беттеринен экөөнүн ортосуна чок сала турган не деген гана сөздөрдү сүйлөбөдүк, коллаждарды, карикатураларды жарыялабадык. Комментарийлер, бөлүшүүлөр, аларга коюлган лайктар жана дизлайктар тууралуу айтпай эле коёюн. Эки кишинин башы бириккен жерде саясаттын жаагын жара талдап, талкуулап, ар кандай кыйбат-ушактарды айтып алардын акыларына кирдик. Ортодо жылан уусундай ачуу сөздөрдү ташып абалды оорлоткондор да жок эмес. Эки лидер ошого карабай бир нече ай жакшы мамилесин сактап кала алды. Бирок акыры келип ынтымагы бузулду, калк көзүнчө кайым айтыша баштады. А дегенде сөзү, анан өзү болот деген ушул. Сөз деген жөн гана тыбыш жана тамга эмес. Сөз деген — энергия. Ошончо ыплас сөздөргө көмүлгөн, чөмүлгөн рухтар, дилдер, пикирлер кантип таза, саламат бойдон калсын.

Качан экөөнүн эрегишүүсү башталганда канча адамдар көксөгөн максатына жеткенсип, энеси эбактан тилеп жүрүп акыры уул төрөгөндөй кубанып, жеңил дем алып калышты. Конфликт оту өчүп баратканда жалынды жандантып коюу үчүн күйүүчү май издей башташты. Алда Кудай ай, адам неге уруш-талаштан мынчалык ракаттанат?! Корозго корозду, итке итти, Хабибге Конорду, "Реалга" "Барселонаны" салып, чабыштырып, алыштырып маашырлана кубанган адамдай кумарпоз макулук болбосо керек. Ошондой инстикттин жетегинде келип, эл-жерибизди башкарган эки башчыны кагыштырып тындык. "Бир уйдун мүйүзү сынса, миң уйдун мүйүзү зыркырайт" дегендей, бул инсандардын келишпестиги журналисттердин, саясатчылардын, маалымат каражаттарынын жана саясий күчтөрдүн эле эмес, элдин ичинде да бөлүнүп-жарылууга себеп болору турган иш. Анткени лидер деген лидер, таасири мол, сөзү өтүмдүү болот.

Кимге пайда?

Жакшылык бар жерде адамдын кызганычы, ичи тардыгы, көралбастыгы кошо болот экен, аттиң. Эки лидердин ынтымагына шүгүр айтып, сүйүнүш ордуна ичи тарып, кадимкидей кызыл өңгөчүн тарткандар бар. Көралбастык адамды тез карытат дейт. Эки лидердин тиреши — ушундайлардын ден соолугуна гана шыпаа болбосо, көпчүлүк үчүн зыянынан башка пайдасы жок. Ынтымак кеткен жерде кайдагы береке, кайдагы кут? Ошондуктан эки лидер мүмкүн болушунча тез ысык ымалага келиши үчүн калганыбыз жок дегенде уктаарда дуба кылалы.

СССР өнөр жайлуу, аскери күчтүү мамлекет эле. Бирок урап жок болду. Эмне үчүн? Анткени андагы элдердин, адамдардын жүрөктөрү бири-биринен алыстап, ынтымагы ыдырай баштаган. Зор СССРди ураткан келишпестик Кыргызстан үчүн андан да жүз эсе кооптуу. Мына ушуну түшүнбөй, эки лидердин ортосуна от жагууну уланта берсек, өзү отурган бутакты аралаган акылсыздын кейпин киебиз.

Ынтымактуу менен Жараткан да бирге болуп, береке тартуулайт. Ынтымак бар жерде шайтанга жол жабылып, жакшы амалдарды кылуу жеңил болот. Бирок "Ырыс алды — ынтымак" деген макалды көрүнгөн дубалга илип коюу менен эле ынтымак келбейт. Ал адам адамга арам ойлобой салам жолдогон, даам таттырып белек тартуулаган, артынан мактап бата багыштаган, жумшак сүйлөп жүрөктөн ырайым кылган жерде болот. Адам адамдын кемчилдигин кечирип, артыкчылыгын баалап, катасына дароо ачууланбаган чөйрөдө болот.

Бириккендин сообу, бөлүнгөндүн күнөөсү оор. Ал эми лидерлер аларды ээрчиген миллиондордун сообуна да, айыбына да шериктеш болорун унутпаса.

981
Белгилер:
ынтымак, лидер, президент, Нуржигит Кадырбеков
Тема боюнча
Тандоо – укук, ынтымак - парз. Шайлоо өттү, бирок шайтан калды
Кеменин түбүн тешпе, бир боорум. Мекен менен соодалашпа!
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

1652
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

1652
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Кишилер шайлоо участкасында. Архив

Шайлоодон кийин депутаттар кантип "жыргашат". Келечек үчүн элде эки тандоо бар

980
(жаңыланган 16:15 15.09.2020)
Саясий жарышка аттанган 16 партиядан 1 952 талапкер депутаттыкты арзып турган чагы. Эмне үчүн мандатты мелжегендер көп? Кыргызстанда парламенттин укуругу канчалык узун да, депутаттын таасири кандай? Учурда эл эки тандоонун ортосунда калды.

Журналист Эламан Карымшаков шайлоонун шарапаты кызып турган маалда эл эске алчу эки нерсени айткысы келген.

Аз күндөн кийин парламенттик шайлоо өтөт. Бул күнү биз жөн гана добуш бербейбиз, келечегибизди тандайбыз, колубуздагы бийликти бирөөгө ишенип тапшырабыз. Буга өзүбүзгө жар тандап жаткандай эле мамиле кылуу зарыл деп эсептейм. Себеби шайлоодон кийин депутаттарга беш жыл, алар түзгөн системага бери жагы 10 жыл чыдашыбыз керек. Бизди эр кылган да, кара жер кылган да ушулар болот.

Парламент кандай укукка ээ?

Жогорку Кеңештин депутаттары мыйзам чыгарып эле отурат деп ойлогон жоксузбу? Эгер андай десеңиз мандат мынчалык талаш болмок эмес. Мандаттын жыргалчылыгы башкада...

Шайлоодон уткан депутаттар жаңы өкмөттү бекитет. Ал үчүн ар бир партияга квота берилет, мисалы, менин партиям сунуштаган адам айыл чарба министри кызматына, сиздин партияңыздыкы Бажынын башчылыгына дайындалат. Ошентип өкмөттүн курамын түзүп, премьер-министрди дайындашат. Ошол өкмөт анан өлкөнүн тагдырын чечет. Ниети түз болсо өргө тартат, болбосо "өгүз өлбө, араба сынба" принциби менен эптеп иштейт.

Карыз жөнүндө көп кеп кылабыз. Өкмөт чет өлкөдөн насыя алып жатканда бир тыйынына чейин парламент менен макулдашат. Депутаттар карыз кандай максатта алынып, качан төлөнөрүн билген соң ратификациялайт.

Мындан сырткары, партиялар Борбордук шайлоо комиссиясы, Жогорку сот, Конституциялык палата сыяктуу органдарга өзүнүн адамдарын коё алат.

Байыркы бабам кандай эле?.. Эл энчисиндеги эгемендик тууралуу эки ооз сөз

Парламенттин күчүн ушундан байкасаңыз болот, жада калса бир дагы министр депутаттардын макулдугусуз кызматка отура албайт. Жыл сайын өкмөт аткарган иши тууралуу отчёт берет. Эгер аны парламент жактырбай койсо отставкага кетет. Сапар Исаковду дал ушундай жол менен ээрден алып түшүшкөн. Эсеп палатасы менен Улуттук банк дагы парламентке баш иет.

Кыргызстандын мамлекеттик түзүлүшү — парламенттик-президенттик башкаруу. Демек, сиз шайлаган депутаттардын ичинен бирөөсү төрагалыкка шайланат да, президенттен кийинки эле өлкөнүн экинчи адамы болуп калат.

Кыскасын айтканда, бизде парламенттин ролу абдан чоң, кыбыр эткендин баары депутаттар аркылуу чечилет. Азыр сиздин колуңузда опол тоодой бийлик турганын түшүнүп жатасызбы? Ал каалайсызбы-каалабайсызбы 4-октябрдан кийин күчүн жоготот. Мен сизди максаттуу пайдаланууга чакырам.

Сизде эки тандоо бар

Биринчи тандоо:

VI чакырылыштын 100дөн ашуун депутаты кайра мандат алууга ашыгып жатат. Арасында буга чейин эки-үч жолу депутат болгондору бар. Кээ бирлери канча жыл иштесе да жыйынтык көрсөтүүгө жарабаган, галстугу бар, бирок калыстыгы жок оомо депутат катары эсте калды. "Башкасына баш оорутпайм, бизнесимди гүлдөтсөм болду" деп келе жаткандар да бар. Болбосо бир мандат үчүн 500 миң долларды (39,4 миллион сом) ким эле садага чапсын.

Талапкерлердин ооз көптүрүп айткан убадаларын угуп жатканда баскан жолуна да көз чаптырып коюңуз. Баарына көз жумуп, кайра эле ушулар бийликке келишин каалап турсаңыз, биринчи тандоо сиздики болот.

Ошол учурда сизге бир нерсени эскерте кетейин...

Кайсы партияда жогорку билимдүү талапкерлер көбүрөөк? Рейтинг

Парламент өлкө тагдырын ишенип тапшырган өкмөттүн дараметин пандемия башталганда көрдүк. Бюджетте кошумча акча жок, карыз менен жан баккан мамлекет экенибизди түшүндүк.

Июлдагы апаатта саламаттык сактоо системасынын таш-талканы чыкканын жоон терибиз менен сездик. Чекеден кырылып калабызбы деген коркунуч жаралбады беле. Миңден ашуун үй-бүлө жер кучактап отуруп калганын унуткан жоксузбу? Адистер өз убагында медицина тармагына көңүл бурулбаганын айтышууда. Мунун кесепетинен учурда замандаштарыбыз мээрим төккөн энесинен, таянар тоо болчу атасынан, боор тарткан бир тууганынан, чырактай уул-кызынан жана бир жаздыкка башын жөлөгөн жубайынан ажырап, кан жутуп отурушат.

Экинчи тандоо:

Өлкөгө азыр тайманбас, курч, реформатор, сабаттуу жана саясий эрки бар адамдар керек. Агымга каршы сүзө алгандарды тандоо да сиздин эркиңиз. Жаңыланууга карай кадам таштасак, жаркын жашоону кура алабыз.

Мени күйдүргөнү, элдин жашоосун жакшыртууга жарабагандар, калктын жакырчылыгынан пайдаланып колундагы бийлигин 2000 сом менен сатып алууга аракет кылууда. Муну элди шылдыңдоо катары сыпаттайт элем.

Кээ бирлери карантин маалында тараткан жардамын бетине кармап, үгүт ишин аткарууда. Анысына рахмат, бирок билип коюңуздар, биз кайрымдуулук фондунун директорун эмес, мамлекеттин тагдырын чече турган адамдарды шайлап жатабыз.

"Өзүбүздүн бала" деген түшүнүктөн арылып, айылга эки машина шагыл төгүп бергендерге алданбай, "тууганым суранды эле" дегенди жыйыштырып, өз эркибиз менен тандоо жасайлы.

Кайсы партия жаштарды көбүрөөк чогултту? Жаш курак боюнча инфографика

Эч качан кайдыгер болбоңуз, шайлоого барып, колуңуздагы бийликти ишенимдүү адамга тапшырып бериңиз. Ошондо андан талап кыла аласыз. Азыр эч кимге добуш бербей койсоңуз, кийин бийликке нааразы болууга моралдык укугуңуз жок.

Адам сатып алган буюмун каалагандай колдонорун билесиз. Ошол сыңары эле добушуңузду сатып алгандан кийин өз билгениндей бийлик жүргүзөт. Андыктан ойгонуп, активдүүлүктү көрсөтүүгө убакыт келди.

"Элине жараша бийлиги" дейт, мен сиздерге аябай ишенип, үмүт артып турам. Бир күндүк оокат менен эмес, келечек үчүн күйөлүчү!

P.S: Мен эч бир партиянын курамында жокмун. Жөнөкөй жаран жана журналист катары пикиримди жазууну чечтим.

Автордун пикири редакциянын көз карашы менен дал келбей калышы мүмкүн.

980
Белгилер:
келечек, укук, парламент, депутат, тандоо, үгүт, шайлоо
Тема:
Шайлоо-2020
Тема боюнча
Бир эле телеканалга 3 млн. сом берип... Партиялар акчасын кайда чачып жатат
Катарында жумушу жок талапкерлер басымдуулук кылган партиялар. Инфографика
Кайсы учурда депутат мандат ала албай калат. Маалымдама
Абсолюттук мушкерлер чемпионатынын (UFC) президенти Дана Уайт. Архив

Уайт: Нурмагомедов Гэтжи беттеши UFC тарыхындагы эң ири таймаш болот

0
(жаңыланган 19:03 21.10.2020)
Азырынча эң ири беттеш катары Нурмагомедов менен Макгрегордун беттеши саналууда. Кармаштын түз алып берүү укугун 2,4 миллион колдонуучу сатып алган.

БИШКЕК, 21-окт. — Sputnik. Абсолюттук мушкерлер чемпионатынын (UFC) президенти Дана Уайт россиялык Хабиб Нурмагомедов менен америкалык Жастин Гэтжи кармаш промоушендин тарыхында эң ири беттеш болорун белгиледи. Бул тууралуу ал TMZ Sports маалымат булагына билдиргенин РИА Новости жазды.

Спортчулар 24-октябрда "Мушкерлер аралы" спорттук жайында өтүүчү UFC 254 мелдешинде жекеме-жеке чыгышат. Марада учурда Нурмагомедов ээлик кылган промоушендин жеңил салмактагы чемпиондук кур турат.

"Бул ири беттеш экени көп күттүрбөй эле маалым болот. Кармаштын эртесинде, дүйшөмбү күнү эле биз буга күбө болобуз. Көпкө созулбайт, бейшемби күнү эмес, жума күнү да эмес, беттештен кийинки эле дүйшөмбү күнү...",  — дейт Уайт маегинде.

Эң мыкты ыкмалары камтылган! Хабибдин турнир алдындагы проморолиги чыкты

Анын маалыматы боюнча, Нурмагомедов — Гэтжи таймашына кызыккандардын саны күн сайын арбып баратат. Уайт бул беттеш акы төлөнүүчү трансляциялардын сатылганы боюнча UFC уюмунун рекордун жаңыртат деп күтүлгөнүн билдирет. Бул жаатта азырынча эң алдыңкы көрсөткүч Хабиб Нурмагомедов менен Конор Макгрегордун беттешине таандык. 2018-жылдын октябрь айында жеңил салмактын чемпиондугу үчүн болгон кармаштын түз алып берүү укугун 2,4 миллион колдонуучу сатып алган.

Эскерте кетсек, бүгүн Бишкек убактысы боюнча 19:00дө бул титулдук беттештин алдындагы маалымат жыйын өтөт.

0
Белгилер:
трансляция, беттешүү, Жастин Гэтжи, Хабиб Нурмагомедов, Дана Уайт, UFC
Тема боюнча
Ооруга карабай... Нурмагомедов менен Гэтжинин кармашына эл келиши мүмкүн
UFC: Хабиб көз караштар таймашында жеңилип калды. Тамашалуу ролик