Телефондон сүйлөшкөн киши. Архивдик сүрөт

Жоругуңар желкени жонуп бүттү! Мага окшогон бир байкуш журналисттин баяны

1173
(жаңыланган 14:20 04.05.2019)
Ушул нерсе мага аябай кызык болчу, көп ойлонот элем. Ал — башка ааламда дагы мага окшогон Эламан жашайбы деген ой болчу. Мага окшоп журналист болуп, маалымат катчылар менен иштешип жатканын элестетип, аны менен сүйлөшкүм келчү. Күндөрдүн биринде ошол Эламанга жолугуп, ичтеги бугун уктум.

Ал жашаган мамлекет "Бактылуубуз" деп аталат экен. Бирок ал анча бактылуу боло албай жүргөнүн айтып, кокосуна сайган көйгөйлөрдү айтып берди. Тагыраак айтканда, жоопкерчиликсиз маалымат катчылардын жоругу желкесин жонуган экен. Аны угуп отуруп байкушка боорум ооруп кетти.

"...Жер планетасынын кымындай бир бурчун ээлеп, тоолордун кучагында жайгашкан чакан "Бактылуубуз" деген мамлекет бар. Ал менин киндик каным тамган, тузун татып чоңойгон жер. Элибиз да, бийлик башчыларыбыз да өзгөчө, башка мамлекеттер менен салыштыруу кыйын. Дегеним, бул мамлекетти башкарган аткаминерлер өзү менен өзү бактылуу, акча жегенди аябай жакшы көрүшөт. Сатканга же уурдаганга эч нерсе калбай баратса, элден чогултуп же башка өлкөдөн карызга сурап жешет. Акчага талгак болгон келиндей эле жутап калганын көрүп жаным кейийт. Алар тууралуу кийинчерээк кенен-чонон баяндап берермин. Азыр мени түйшөлтүп жаткан бир учурду гана айтып берейин", — деп сөзүн баштай электе эле оозум ачылып калды. Ушундай адамдар да болот экен да.

— Бизде "Эптеп-септеп" деген министрлик бар. Аты атагандай эле бул жакта маалымат катчылар эптеп-септеп, таш бака менен жарыша кыбырап иштейт. Жөнөкөй эле маселе менен кайрылсаң "макул, тактап берем" дейт да, "элек сураганы кеткен кыз эрге тийип кетиптир" болуп эки күнгө жоголуп кетет. "Шефи" жаза басканын сындап жазып койсоң, душманындай көрүп өчөшүп алат. Кийин телефон чалсаң албайт, кымындай эле бир маселени тактап беришин сурасаң расмий кат жазышыңды талап кылат. Жакында эле бир маселе боюнча кат жөнөткөм. Негизи мыйзам боюнча 14 күндүн ичинде жооп бериши керек. Эки-үч күндөн кийин чалсаң "эмне шашып жатасың, биздин убактыбыз бар" дегенсип кебелбей койду. Макул, сүйгөн кызым алыста жүргөндө эки ай күткөм. Муну да чыдап күтүп коёюн дедим. Бүгүн 15 күн болду, катка жооп келбеди. Чалып сурасам "ии азыр" деп анан кечке жуук жөнөттү. Булардын маалымат катчысы арамзабы же шефтери өз ишин билбейби, айтор, кууратып жатышат. Министринен интервью ала албай эки жума артынан чуркадым.

— Аа... байкуш! Ушул кантип болсун, бул эмне деген министрлик. Бизде эч качан мындай болгон эмес.

— Өтүгүмдү төргө илем деген органдын маалымат катчылары телефонду кандай максатта колдонот түшүнбөйм. Жигитине таарынган кыздай болуп чалсаң такыр албайт. Жини келсе бир-эки күнгө чейин же уюлдук телефонун, же жумушчу телефонун көтөрбөй коёт. Мен ага сүйүүмдү арнап жибермек белем, иш боюнча сурайм да. Чын эле колу бошобой жатабы же мени жактырбай жатабы, билбейм. Редакциядагы кесиптештеримде да ушундай көйгөй бар. Анан кокус эле сайтка чыккан материалдан бир кынтык таап калса булуттан чыккан айга окшоп пайда болуп калат. Бул маалымат катчыга чалгандан көрө, шефине чалсаң батыраак жооп берет.

— Ой, тообо!.. Ушундай дагы маалымат катчылар болот экен. Мен керектүү маселени бир жолу чалып эле жооп алам, заматта даярдап айтып беришет.

— Бизде дагы "Кечиккен махабат" деген министрлик бар. Анын маалымат катчылары ыкчам иш бүтүргөндү билбейт. Дайым сураган маалыматыңды "таз таранганча той таркайт" кылып кечиктирип жөнөтөт. Телефон аркылуу көбүрөөк сүйлөшкөндөн уялышат. Аларга кооз кылып сүйүү каттарын жиберишиң керек. Анда да назданган тейде бери жагы 10 күн, ары жагы бир айда жооп жазат. Мейли эми, кыз кылыгы менен бааланат да. Бирок азыраак наздансаңар жакшы болмок. Минтип отура берип кара далы болуп каласыңар. Кечиккен махабатыңарга бир өмүр арман кылып жүрбөгүлө дегим келет.

— Иий, байкушум ай, куураган экенсиң да. Биздин Кыргызстанда мындай маалымат катчыларды эбак эле кызматтан кетирмек. Негизи эле андай кызматкерлер жокко эсе. Кыйналбай кантип иштеп жатасың?

— Айтып жатам го, биз баарынан башкачабыз. Анан да "Жалкоолукту жайылтуу" деген ведомство бар. Мында иштеген маалымат катчылар жалкоолук боюнча мелдеш өтсө биринчи орунду алмак. Жада калса ордунан козголуу оор. Отурганы отурган, же тиешелүү адистердин номерин бербейт же өзү маалымат таратпайт. Берген сурооң күч келе түшсө "бул бизге тиешелүү эмес, тиги орган жооп берет" деп шылтап салат уялбай эле. Ушинтип ар кандай шылтоону айта бергенде баш чайкап отуруп калам.

— Кандай гана өкүнүчтүү...

— Айта берсе толтура, бир маалымат катчы "болгону айына 10 миң сом айлык алабыз. Силердин эле ишиңер менен алектенбейм, бул жакта бизге толтура жумушту жүктөп койгон. Эптеп чыдап жатабыз да" дейт. Кечирип кой, эгер айлыгыңа ынанбасаң, ишиңди сүйбөсөң ал жерде эшектин тезегин терип отурасыңбы. Же мекемесин жакшы пиар кылбай же бизге маалымат бербей, ашка жүк, башка жүк болбой кет да башка жакка. Иштейм дегендер келсин.

Баса, жанымда отурган кесиптешим жөнөткөн сурамга жооп келген. Караса жооптун жарымы жок. Кайра чалса катты жөнөткөн адис бир баракты жөнөтүп, экинчи барагын жөнөтүүнү унутуп калыптыр. Кайра жөнөтүп коюшун суранса, ал адис "эмгек өргүүгө чыгып кетти" деп дагы 10 күн күтүүгө мажбур кылды. Ушу кантип болсун эми...

— Сага аябай боорум ооруп жатат. Ушунун баарына чыдаган сабырың күч экен. Мен болгондо чыдамак эмесмин.

— Эх-хх... Эмнесин айтасың. Менин "Бактылуубуз" деген өлкөм дагы деле кагаз ташымайдан арыла элек. Соңку эки жылдан бери санариптешебиз деп төш какканы менен жогору жакка кат жазганда электрондук түрдө жөнөтө албайсың. Сөзсүз бир сааттай убактыңды кетирип, кабылдамасына өзүң барып жазган катты таштап келишиң керек. Таң калам, эгер электрондук вариантын жиберип койсок принтерден чыгарганга өкмөттүн кагазы кетет деп аяп жатышабы?

Анан да биздин мамлекеттик тилден сырткары, расмий тилибиз бар. Айрым мамлекеттик мекемелердин маалымат катчылары эне тилинде сүйлөй албайт. Жазган катыңа расмий тилде жооп берип, пресс-релиз таратып отура беришет. Буга дагы бир ирет таң калып коюш керек.

— Ооба, таң калбай коюу кыйын. Ошончо чоң мекеменин маалымат кызматында иштеп мамлекеттик тилде жаза албаганы өкүнүчтүү. Бизде деле расмий тил бар, бирок баары эне тилде чакылдап сүйлөшөт. Дегеле жакшы иштеген маалымат катчылар барбы?

— Ой менин өлкөмдүн маалымат катчыларынын баарын жаман көрбөгүлө! Арасында жакшы иштеп, сураган маалыматыңды заматта тактап бергендери да бар. Аларды өз ишине так болгону үчүн сыйлайм жана рахмат айтам!

Мага окшогон Эламанды кыйнаган маалымат катчылар, мага айтып койгулачы, эмнеге ушундайсыңар?.. Балким, шефиңер ушундай кырдаалга кептеп жаткандыр? Силер ошол мекеменин жөн гана кызматкери эмес, элдин, журналисттердин ортосундагы көпүрө экениңерди билесиңерби? Эгер ушуну жетекчилери окуп калсаңар, эске алып коюңуздарчы.

Автордун пикири редакциянын көз карашы менен дал келбей калышы мүмкүн

1173
Белгилер:
министрлик, кат, жооп, телефон, жумуш, жалкоолук, журналист, маалымат катчысы, бакыт
Тема боюнча
Бетиңерге эле айтайын, Instagram жалганчылардын уюгуна айланып баратат!
Өздөрүн Кудай сезет! Дарыгерлер кыжырды кайнатканда
Талап кылганды эле билесиңер! Депутаттар кыжырды кайнатканда
Аскар Акаевдин Индияга иш сапары (Сактанбек Кадыралиев оң жактан үчүнчү)

Кыргызды сагынганда “Ала-Тоо таңшыйтты” баштан-аяк ырдап... Дипломаттардын баяны

478
(жаңыланган 14:36 26.10.2020)
Дипломатия өзгөчө адистик. Бул кесиптин ээлери — мамлекеттүлүктүн өбөлгөсү. Ошол эле учурда абдан оор кесип.

Өлкөнүн кызыкчылыгы үчүн бир маселени чечүү бир нече дипломаттын өмүр жашын алышы мүмкүн. Кылдат чеберчилик жана иш билгилик талап кылынат. Кыргызстандын дипломаттары далай сыноодон өтүүдө. Алар ар дайым өлкөнүн улуттук намысы үчүн эмгектенип келет. 24-октябрда кесиптик майрамын белгилеген дипломаттардын башынан өткөн окуяларын колумнист Алмаз Батилов жазып алган.

КР атайын жана ыйгарым укуктуу кенже элчиси Сактанбек Кадыралиев

  • Сактанбек Кадыралиев (слева второй) вместе со спикером парламента Баварии. Мюнхен. 2000 год
    КР Атайын жана Ыйгарым укуктуу кенже элчиси Сактанбек Кадыралиев (сол жактан экинчи)
    © Фото / из личного архива Сактанбека Кадыралиева
  • Сактанбек Кадыралиев вместе с супругой Чолпон . Бангладеш. 1987 год
    Сактанбек Кадыралиев Чолпон жубайы менен
    © Фото / из личного архива Сактанбека Кадыралиева
1 / 2
© Фото / из личного архива Сактанбека Кадыралиева
КР Атайын жана Ыйгарым укуктуу кенже элчиси Сактанбек Кадыралиев (сол жактан экинчи)

Ата Мекенге кусалык

— 1984-жылы Кыргыз ССРинин Министрлер советинин орун басары Курманбек Аташев жетектеген мамлекеттик делегациянын курамында Түштүк Йеменге бардым. Анда Кыргызстандын чет өлкөлөр менен достук жана маданий байланыштар коомунда иштечүмүн. Достук коому ар жылы чет өлкөлөрдө Кыргызстандын маданият күндөрүн өткөрүп турчу. Бул делегациянын курамында Алтынбек Сапаралиев, Хусейн Мухтаров, Даниэль Назарматов, Самара Токтакунова өңдүү элибиздин көрүнүктүү маданий ишмерлери бар эле. Ошол учурда Йемен эки бөлөк мамлекет болуп, экөөнүн ортосунда карама-каршылык абдан күчтүү болчу. Түндүк Йемен АКШ менен Сауд Аравиянын таасиринин алдында. Ал эми Түштүк Йемен СССРдин Түштүк Батыш Азиядагы эң маанилүү өнөктөшү эле. Бул мамлекетте миңдей советтик адис эмгектенчү.

Ачык асман астында концерт койдук. Хусейн агабыз советтик кыргыз жана орус романстарын, өзгөчө даңазалуу орус ырчысы Федор Шаляпиндин белгилүү “Вдоль по Питерской” ырын аткарганда советтик адистердин шолоктоп ыйлаганына күбө болдум. Ал кезде чет жерде Ата Мекениңди, маданиятыңды сагынып куса болуп буркурап ыйлаарыңды анча түшүнбөптүрмүн. Алтынбек агабыз “Кантың бар”, “Смуглянка” ырларын созгондо мекендештерибиз дүркүрөтө кол чаап, кайра-кайра суранып, ырдатып жатышты. Назарматов жетектеген чакан музыкалык топтун коштоосунда Самара эжебиз кыргыздын “Көкөй кести” “Маш ботой”, “Ак тамак, көк тамак” күүлөрүн чертип йемендиктерге комуздун ушунча чебер аспап экенин далилдеди. Белгилүү кинорежиссер Нуртай Борбиев Йеменге барган иш-чарабыз тууралуу даректүү тасма тарткан.

1985-жылы Бангладешке СССРдин элчилигине иштегени барганда Түштүк Йемендеги советтик адистердин абалын даана түшүндүм. Кыргызстанга куса болгон учурда жубайым Чолпон экөөбүз батирде “Ала-Тоо таңшыйт” ырлар жыйнагын ачып алып баштан-аяк ырдаар элек, ала барган комузумду чертчүмүн. Кыргыз ырлары менен күүлөрү жазылган аудиокассеталарын ала баргам. Аларды үйдө жана автоунаанын магнитофонунан угар элек. Бир айда СССРден бир эле жолу почта келчү. Аны чыдамсыздык менен күтөсүң. Элчиликтеги ар бир үй-бүлө жакындарынан 10-20дан кат алар эле. Ушул каттарды окуганда кээси сагынычтан ыйлаганын, айрымдары кубанганын көрдүм. Ошентип Бангладеште төрт жыл сегиз ай иштедим. Интернетке рахмат, бүгүнкү дүйнө жүзүндөгү дипломаттарда маалымат жагынан мындай көйгөй жок.

ТИМдин III катчысы жана мамлекеттик кызматтын III класстагы кеңешчиси Акылбек Жумабаев

Советник посольства КР в Узбекистане Акылбек Жумабаев. Ташкент. 1994 год
© Фото / из личного архива Акылбека Жумабаева
ТИМдин III катчысы жана мамлекеттик кызматтын III класстагы кеңешчиси Акылбек Жумабаев

Ташкентте кыргыз дипломаттарга батир берилген

— 1994-жылы ноябрь айында КРдин Өзбекстандагы элчилигине кеңешчи болуп дайындалдым. Бул кызматка мени Кыргызстандын бул өлкөдөгү биринчи элчиси, белгилүү жазуучу Салижан Жигитов чакырган. Агай аябай көрөгөч эле. Кыргызстан улуттук валютасын кабыл алгандан пайдаланып, Ташкенттин борборунан элчилик үчүн эки батир алдык. Белгилей кетчү жагдай, аларды ТИМден бир тыйын сурабастан элчиликтин үнөмдөлгөн каражатына алганбыз. Анын үстүнө Өзбекстандын жетекчилиги бизге колдон келген жардамын аяган жок. Буга чейин Салижан агай элчиликтин кеңсеси менен батирлери үчүн арзан баада эмерек сатып алган. 1995-жылы агайдын ордуна белгилүү мамлекеттик ишмер Батыралы Сыдыков дайындалды. Анын демилгеси менен Ташкенттин чок ортосунан элчилик үчүн имарат жана батирлер сатып алынды. Азыркы күндө Өзбекстандын борборунда иштеген кыргыз дипломаттарынын баары батир менен камсыздалган жана элчиликтин кеңсеси үчүн ижара акысы төлөнбөйт. Тилекке каршы, батир маселеси Кыргызстандын башка элчиликтеринде толугу менен чечиле элек. Бүгүнкү күндө бул максатта мамлекеттик казынадан ири сумма сарпталат.

КРдин атайын жана ыйгарым укуктуу элчиси Эрик Асаналиев (1959-2020)

В посольстве КР в Таджикистане в ( центре) Эрик Асаналиев. Душанбе. 1998 год
© Фото / из личного архива Эрика Асаналиева
КР Атайын жана Ыйгарым укуктуу элчиси Эрик Асаналиев (ортодо)

Душанбеде жансакчысы жок иштедим

— 1992-жылы Тажикстанда жарандык согуш башталды. 1994-жылы бул өлкөдөгү абалды ичинен тыкыр иликтөө үчүн КР ТИМинин жетекчиси Роза Отунбаева мени өзгөчө тапшырма менен элчи кызматына дайындады. Үч жыл бою Тажикстанга барып-келип иштедим. 1997-2001-жылдары бул коңшу өлкөдө КРдин атайын жана ыйгарым укуктуу элчиси болуп дайындалдым. Ошол учурда кээ бир элчилерге кол салган учурлар болду. Ошондуктан Душанбе шаарындагы башка кесиптештеримдин көпчүлүгүн жансакчылар кайтарышты. Индиянын элчиси экөөбүз гана жансакчысы жок иштедик. Тажикстандын курамындагы Тоолуу Бадахшан автономдуу облусунун Ишкашим районунда кыргыз тынчтык орнотуучу батальону жайгашкан эле. Бул батальондун аскерлеринин ичинен бир нечесин жансакчы кылып алсам болмок. Бирок баш тарттым. Себеби КРдин мыйзамында эгерде алардын бирөөсү чагымчылдыктан же кол салуудан курман болуп, жараат алса, жоопкерчиликти ким тартаары жазылган эмес. Кыргызстан жарандык согушка карабастан Тажикстанга блокада кылган жок. “Жарандарыңар ээн-эркин кыргыз-тажик чек арасынан өтүүдө. Эки тарапка тең бирдей мамиле кылып расмий Бишкек бейтарап саясатты карманып жатат. Дал ушул себептен эки жактан эч кандай чагымчылдык жана кол салуу болбошу керек” деп расмий Душанбе жана бириккен тажик оппозициясынын өкүлдөрү менен жолуккан учурда сүйлөшкөм. Эки жак тең сөзүнө турду. Азыркы күндө эгерде кыргызстандык дипломаттар жогоруда айтылган абалга дуушар болсо, коопсуздугу кандайча камсыздалат деген маселе курч турат.

478
Белгилер:
дипломатиялык ишмер, элчи, Кыргызстан
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

1784
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

1784
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Сейсмаограф маалыматтары. Архив

Түркияда экинчи ирет күчү 5 баллдан ашкан жер титиреди

0
(жаңыланган 00:00 31.10.2020)
Жер титирөөнүн очогу өлкөнүн түштүк-батышындагы Айдын аймагынын Кушадасы районунан 20 чакырым алыс жайгашкан.

БИШКЕК, 30-окт. — Sputnik. Түркиянын Эгей деңизинин жээгинде күчү 5,1 баллга жеткен дагы бир жер силкинүү катталды. Бул тууралуу Anadolu агенттигинин маалыматына таянып РИА Новости билдирди.

Ага ылайык, жер титирөөнүн очогу өлкөнүн түштүк-батышындагы Айдын аймагынын Кушадасы районунан 20 чакырым алыс жайгашкан. Анын кесепети боюнча азырынча маалымат жок.

Бул бүгүнкү күндүн эсебинен Түркиядагы экинчи жер титирөө. Биринчисинин күчү 6,6 баллга жетип, зилзаланын очогу Измирдеги Сеферлихисар шаарындагы райондо жайгашкан. Жер титирөөнүн очогунун тереңдиги 16,5 чакырымды түзгөн.

Ураган имарат, кафеден чыга качкан эл. Түркиядагы зилзаланын видеосу

Акыркы маалыматтар боюнча, Измирдеги жер титирөөдөн көп кабаттуу үйлөр урап, 400дөн ашык киши жабыркап, 12 киши көз жумган.

0
Белгилер:
жаратылыш кырсыгы, жер титирөө, Түркия