Улуттук кийим кийген кыздар. Архивдик сүрөт

"Маданий дааватты" баштоо зарылдыгы тууралуу. 5 сунуш

761
(жаңыланган 15:48 21.05.2019)
Колумнист Нуржигит Кадырбеков кыргыз театрларында коюлуп жаткан спектаклдерге, музейлердеги көргөзмөлөргө же китепканалардагы окурмандардын агымына үстүртөн гана саресеп салып, элдин профессионалдык искусствого карата мамилеси өтө эле солгун, кош көңүл экенин айтып, абалдан чыгуунун жолун сунуштады.

Ээн талаа, эрме чөлдө же белгисиз аралда Робинзон Крузо сыяктуу жападан жалгыз калган аялзаты бетине эндик, кашына осмо коюп, оозун боейбу? Менимче, жок. Анткени аялды тотудай жасанткан жагдай — анын сулуулугуна суктанчу, чырай-жамалына арбалчу адамдардын бардыгы. Адам табиятынан өзү үчүн эмес, чоочун көздөр үчүн баш-аягына каранып, сыланып-сыйпанып, сулууланат тура. Искусство жана маданият тармагы да дал ошондой: көрөрманы, күйөрманы көбөйгөн сайын өнүгөт, чырайына чыгат, жаңы бийиктиктерге умтулат. Эгер азайса же жок болсо, кедери кетип соолуган бактын, жүдөгөн козунун кейпин киет.

Эмне үчүн?

Азыр кыргыз театрларында коюлуп жаткан спектаклдерге, музейлердеги көргөзмөлөргө же китепканалардагы окурмандардын агымына үстүртөн гана саресеп салган киши калкыбыздын профессионалдык искусствого карата мамилеси өтө эле солгун, кош көңүл экенин байкайт. Буга себептер толтура.

СССР ураган соң эгемендүүлүктүн алгачкы жылдарында калктын турмушу оорлошуп, ыр-күү, театр, китеп дүйнөсү унутулуп, биринчи орунга кара курсакты кампайтуу жан алакети чыккан учурдун эпкини күч. Андан бери базарлар байып, дүкөндөр дүркүрөдү. Алардын жанында театрлар, музейлер жана китепканалар зуулдап өтүп кеткен машинанын чаңында бараткан картаң атка чегилген арабадай өнүгүүдөн оголе артта калды. Голивуддун көбүнесе уятты уулап, абийирди алсызданткан ар кыл мазмундагы фильмдерин, баланын адебин талкалап, мээримин муздатып, мүнөзүн татаалдатчу мультфильмдерин, "жатканды теппейт" деген жигиттиктин улуу мыйзамын бузуп, жыгылганды жыртылган көрпөдөй андан бетер аеосуз тебелегенге үйрөткөн эрежесиз эр урушту жантыгынан жата калып көрүп, бирок көркөм өнөрдү кыртышы сүйө бербегендер басымдуулук кылган муундар өсүп чыкты. Акыбетинде минтип искусство, маданият тармагындагы жылдап тургузган ийгилик мунараларыбыз таланган чарбадай таз кейипке түшүп, аны кайра тикелөөгө чейрек кылым да жетишпей туру.

Бирок биздин максатыбыз так: кайрадан маданият жана искусство державасына айланышыбыз зарыл. Башкача болуусу мүмкүн эмес. Анткени биз "Манастай" эпосту, "Тогуз кайрык", "Сынган бугудай" күүлөрдү, "Түшүмдө", "Жолугарым билгемин" сыяктуу обондорду, Айтматовдой алпты, Алыкулдай асылды, Бурана, Таш-Рабат сыяктуу архитектуралык шедеврлерди, Саймалуу-Таш графикаларын ааламга тартуулап, сөз жана өнөр дүйнөсүнүн кереметин курган элбиз. Узак тарыхыбызда кимге жолубуз кошулуп, калаабыз канатташ, тагдырыбыз танапташ болбосун, алар менен биротоло кан-жаныбызды аралаштырып жибербей, жаман жагынан түңүлүп, жакшы жактарын сиңирип, өздүгүбүздү сактап, улуттук маданиятыбызды укумдан-тукумга асыл аманат эстафетасындай табыштап келе жаткан сырдуу калкпыз. Бизден, балким, атом бомбасын чыгарып ааламдын үшүн алган, же көп завод куруп экологиянын тарпын чыгарган, Марска жандооч учуруп атаандаштарына сес көрсөткөн улут чыкпайттыр, анткени ааламда жок гумандуулук, кең пейилдик жана баеолук кан-жаныбызга сиңип бүткөн. Демек, адамзатка асыл нарк сунган маданий кубаттуу дөөлөт куруу колубуздан келет жана бул биздин милдет.

Кантип?

1. Маданият айдыңынын каармандары "окоптон чыгуусу" зарыл. Майдан стратегиясында окоп болгону коргонуу үчүн керек. Ал эми сага караштуу айдыңды кеңейтүү үчүн андан чыгып, чабуулга өтүү маанилүү. Дегеним, актер менен живописчи көрөрмандарын театрдын сахнасында жана музейдин фоесинде, ал эми китепканачы окурманын китепканасында эле күтпөстөн мектептерге, университеттерге, аскер бөлүмдөрүнө, бирикме-уюмдарга өздөрү чыгышы керек. Дил маектер, суроо-жооптор, шыктандырчу окуялар, кыскача өнөр көргөзүү, мастер-класс сыяктуу программалар аркылуу демейде профессионалдуу искусстводон оолак чөйрөлөрдүн ичине сүңгүп кирип, жүрөктөрүнөн жана акылдарынан орун ээлегенде гана маданият ишмерлеринин жана тармагынын аброю артат. Адам бир нерсени сүйүш үчүн адегенде таанышы керек... Эмне үчүн СССР убагында маданият кызматкерлеринин сөзү өтүмдүү болгон? Акча жана көңүл көп бөлүнгөндөн улам дегени турасызбы? Балким. Бирок андан да мурда алар элге жакын болушкан: башкасын айтпаганда да, кыштын суугунда алыскы тоолордогу малчыларга чейин барып өнөрүн тартуулап келишчү экен...

2. "Маданий дааватты" баштоо жана күчөтүү зарыл. Молдокелер ар бир эшикти каккылап элди ыйманга, ал эми саясатчылар добуш берүүгө чакырып жүрүшөт. Маданияттын күйөрмандары да театр, музей, китепканаларга адамдарды ошентип топтоп келсе неге болбосун? Гүлбактарда, скверлерде, короолордо, төрт көчөдө эргип, сергип же ушак айтып отургандарга, оргумалардын жанында, көчөлөрдө, аянттарда сейилдеп жүргөндөргө барып маданиятка, адепке, спектаклдерге чакыруу жөрөлгөсүн баштаган демилгечил инсандар чыгып, аракетин такай улантса сөзсүз жемиши, кайтарымы болот, буюрса.

3. Саясий журналистика, экономикалык журналистика деген терминдерди байма-бай угабыз, бирок маданий журналистика дегенди дээрлик кулагым чалбаптыр. Демек, маданиятты жазган профессионал журналисттерди тарбиялап чыгуу маданиятты даңазалоодо аба менен суудай зарыл иш. "Түкүн жылдыздын концерти болду" же "балан жазуучуну эскерүү кечеси бүттү" деп тамга тааныгандын баары эле жаза алат. Маданиятты жазган журналист искусствону, сахнаны, кинону, адабиятты, актерлук чеберчиликти, архитектураны, айтор, чыгармачылык дүйнөнү мыкты түшүнүп, өздөштүрүп, искусство продукцияларын ар тараптан профессионалдуу талдай алгандай дараметке ээ болушу шарт. Алар жазганды эл окуйт, үйрөнөт. Атуулдар өз актерлорун, акын-жазуучуларын, драматургдарын, дизайнерлерин, архитекторлорун, креативдүү режиссерлорун тааный баштайт. Ушул багыттагы калемгерлерди кантип тандап, кантип даярдайбыз деген маселе, албетте, ойду жана убарагерчиликти талап кылат...

4. Сыңар өтүгү майрык болгону менен сынчы анча-мынча адам элес албаган кемчиликтерди көзгө сая көрсөтүп берет. Ооруну дарылоо үчүн адегенде диагноз коюу керек го, дал ошондой эле сынчынын да искусство продуктуларын торко электен өткөрүп, кебекти маңыздан бөлүп, мандемдин себебин аныктап берүүдөгү орду эбегейсиз. Ошондуктан ар кандай тармактын өнүгүүсү адистик талдоого жана адилеттүү сынга муктаж. Чыгармаларды жер-жеберине жеткире чукуп сындаган Белинский болбосо ошол доордогу орус адабияты, адабий билими деңиздей терең Кеңешбек Асаналиев, Салижан Жигитов, Абдыганы Эркебаев сыяктуу кара сөздүн, поэзиянын толубайлары болбосо азыркы кыргыз адабияты ушул деңгээлге жетет беле же жокпу, бир Жараткан билет.

5. Демөөрчүлөрдүн, инвесторлордун каражатын өндүрүштөн маданиятка буруу аракетин күчөтүү лаазым. Карасаңыз, аз эле аралыкта жергебизде мечиттер канчалык көбөйдү. СССР учурунда республика боюнча отуздун тегерегиндеги мечиттердин саны отуз жылга жетип жетпеген аралыкта дээрлик жүз эсеге өстү. Бирок алар бир эле түндө курулуп, орноп калган жок да. Канча адам иштеди, аракет кылды, демөөрчү издеди, аларды ибадаткана куруу зарылдыгына ынандырды. Ошондуктан мектептен мечит көп деп кейип отурбастан, мектеп, театр, китепкана курууга демөөрчүлөрдү максаттуу издөө зарыл. Инвесторлорду, демөөрчүлөрдү мындай мекемелерди курууга шыктандырчу себептерди, сөздөрдү тактап алуу керек...

Демек...

Айтор, маданиятты тикелөө ашарын уюштуруу учуру келди. Көпчүлүк "ойчул ойлонгуча тобокелчил тоо ашыптыр" деген дем менен эч кимден эчтеме сурабай, ар кимдин алдында алакан жайып аброюн кетирбей эле кереге кеңеш куруп, акылы бары акылын, күчү бары күчүн, малы бары малын, убактысы бары убактысын ортого салып, жапа тырмак иштеп, алеки заматта керек жумушту бүтүрүп, муктаждыктарды чечип таштайт. Ошентип далай бактар тигилип, арыктар казылып, имараттар курулуп, айылдар тургузулган. Адамда ынтымактан өткөн күч да, ырыс да жок.

Демек маданият актер менен акындыкы, жазуучу менен манасчыныкы деген таризде күнүмдүк ууру турмушка алтын өмүрдү алдатпастан, ар бирибиз жок дегенде тарых-тамырыбызды тааныйлы, китеп окуйлу. Асыл идеялар болсо социалдык тармактардан бөлүшөлү, сахна жана өнөр чеберлеринин эмгектерин баалайлы, канча каражат, убарагерчилик менен даярдалган маданий продукцияларды кара далы кыздай кароосуз калтырбай көрөлү, көтөрөлү, аларга карата адилеттүү пикирлерди айталы.

Ата балага, эне кызга наркты, салтты үйрөтсүн, адепти айтсын, Калыгул, Арстанбек, Токтогул, Аалы, Түгөлбай, Бакен, Муратбек, Таттыбүбү, Даркүл, Сабира, Сүймөнкул менен жок эле дегенде тааныштырып койсун. Театрлар, музейлер, китепканалар ээнсиреп, жетимсиреп турбасын... Ошентип, улуттун улут, улустун улус катары сакталып, аброй даража күтүшүн каалаган ар бир адам маданият кызматкерине айлансын. Кыскасы, миң сөз менен маданият тармагын шыбагыча, бир иш менен анын оожалуусуна салымын кошсун.

761
Белгилер:
музей, китепкана, ырчы, манасчы, жазуучу, ашар, Нуржигит Кадырбеков, маданият
Тема боюнча
Көз, ой жана мээнин мегабайты. Өргө жетелечү өнөргө орун калбай калбасын...
Баарың болсоң бир ооздуу, душманың кантип былк этер. Ынтымактын 14 эрежеси
Мекениң кайда, бир боорум?.. Улутчул менен мекенчил тууралуу
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

819
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

819
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Кишилер шайлоо участкасында. Архив

Шайлоодон кийин депутаттар кантип "жыргашат". Келечек үчүн элде эки тандоо бар

475
(жаңыланган 16:15 15.09.2020)
Саясий жарышка аттанган 16 партиядан 1 952 талапкер депутаттыкты арзып турган чагы. Эмне үчүн мандатты мелжегендер көп? Кыргызстанда парламенттин укуругу канчалык узун да, депутаттын таасири кандай? Учурда эл эки тандоонун ортосунда калды.

Журналист Эламан Карымшаков шайлоонун шарапаты кызып турган маалда эл эске алчу эки нерсени айткысы келген.

Аз күндөн кийин парламенттик шайлоо өтөт. Бул күнү биз жөн гана добуш бербейбиз, келечегибизди тандайбыз, колубуздагы бийликти бирөөгө ишенип тапшырабыз. Буга өзүбүзгө жар тандап жаткандай эле мамиле кылуу зарыл деп эсептейм. Себеби шайлоодон кийин депутаттарга беш жыл, алар түзгөн системага бери жагы 10 жыл чыдашыбыз керек. Бизди эр кылган да, кара жер кылган да ушулар болот.

Парламент кандай укукка ээ?

Жогорку Кеңештин депутаттары мыйзам чыгарып эле отурат деп ойлогон жоксузбу? Эгер андай десеңиз мандат мынчалык талаш болмок эмес. Мандаттын жыргалчылыгы башкада...

Шайлоодон уткан депутаттар жаңы өкмөттү бекитет. Ал үчүн ар бир партияга квота берилет, мисалы, менин партиям сунуштаган адам айыл чарба министри кызматына, сиздин партияңыздыкы Бажынын башчылыгына дайындалат. Ошентип өкмөттүн курамын түзүп, премьер-министрди дайындашат. Ошол өкмөт анан өлкөнүн тагдырын чечет. Ниети түз болсо өргө тартат, болбосо "өгүз өлбө, араба сынба" принциби менен эптеп иштейт.

Карыз жөнүндө көп кеп кылабыз. Өкмөт чет өлкөдөн насыя алып жатканда бир тыйынына чейин парламент менен макулдашат. Депутаттар карыз кандай максатта алынып, качан төлөнөрүн билген соң ратификациялайт.

Мындан сырткары, партиялар Борбордук шайлоо комиссиясы, Жогорку сот, Конституциялык палата сыяктуу органдарга өзүнүн адамдарын коё алат.

Байыркы бабам кандай эле?.. Эл энчисиндеги эгемендик тууралуу эки ооз сөз

Парламенттин күчүн ушундан байкасаңыз болот, жада калса бир дагы министр депутаттардын макулдугусуз кызматка отура албайт. Жыл сайын өкмөт аткарган иши тууралуу отчёт берет. Эгер аны парламент жактырбай койсо отставкага кетет. Сапар Исаковду дал ушундай жол менен ээрден алып түшүшкөн. Эсеп палатасы менен Улуттук банк дагы парламентке баш иет.

Кыргызстандын мамлекеттик түзүлүшү — парламенттик-президенттик башкаруу. Демек, сиз шайлаган депутаттардын ичинен бирөөсү төрагалыкка шайланат да, президенттен кийинки эле өлкөнүн экинчи адамы болуп калат.

Кыскасын айтканда, бизде парламенттин ролу абдан чоң, кыбыр эткендин баары депутаттар аркылуу чечилет. Азыр сиздин колуңузда опол тоодой бийлик турганын түшүнүп жатасызбы? Ал каалайсызбы-каалабайсызбы 4-октябрдан кийин күчүн жоготот. Мен сизди максаттуу пайдаланууга чакырам.

Сизде эки тандоо бар

Биринчи тандоо:

VI чакырылыштын 100дөн ашуун депутаты кайра мандат алууга ашыгып жатат. Арасында буга чейин эки-үч жолу депутат болгондору бар. Кээ бирлери канча жыл иштесе да жыйынтык көрсөтүүгө жарабаган, галстугу бар, бирок калыстыгы жок оомо депутат катары эсте калды. "Башкасына баш оорутпайм, бизнесимди гүлдөтсөм болду" деп келе жаткандар да бар. Болбосо бир мандат үчүн 500 миң долларды (39,4 миллион сом) ким эле садага чапсын.

Талапкерлердин ооз көптүрүп айткан убадаларын угуп жатканда баскан жолуна да көз чаптырып коюңуз. Баарына көз жумуп, кайра эле ушулар бийликке келишин каалап турсаңыз, биринчи тандоо сиздики болот.

Ошол учурда сизге бир нерсени эскерте кетейин...

Кайсы партияда жогорку билимдүү талапкерлер көбүрөөк? Рейтинг

Парламент өлкө тагдырын ишенип тапшырган өкмөттүн дараметин пандемия башталганда көрдүк. Бюджетте кошумча акча жок, карыз менен жан баккан мамлекет экенибизди түшүндүк.

Июлдагы апаатта саламаттык сактоо системасынын таш-талканы чыкканын жоон терибиз менен сездик. Чекеден кырылып калабызбы деген коркунуч жаралбады беле. Миңден ашуун үй-бүлө жер кучактап отуруп калганын унуткан жоксузбу? Адистер өз убагында медицина тармагына көңүл бурулбаганын айтышууда. Мунун кесепетинен учурда замандаштарыбыз мээрим төккөн энесинен, таянар тоо болчу атасынан, боор тарткан бир тууганынан, чырактай уул-кызынан жана бир жаздыкка башын жөлөгөн жубайынан ажырап, кан жутуп отурушат.

Экинчи тандоо:

Өлкөгө азыр тайманбас, курч, реформатор, сабаттуу жана саясий эрки бар адамдар керек. Агымга каршы сүзө алгандарды тандоо да сиздин эркиңиз. Жаңыланууга карай кадам таштасак, жаркын жашоону кура алабыз.

Мени күйдүргөнү, элдин жашоосун жакшыртууга жарабагандар, калктын жакырчылыгынан пайдаланып колундагы бийлигин 2000 сом менен сатып алууга аракет кылууда. Муну элди шылдыңдоо катары сыпаттайт элем.

Кээ бирлери карантин маалында тараткан жардамын бетине кармап, үгүт ишин аткарууда. Анысына рахмат, бирок билип коюңуздар, биз кайрымдуулук фондунун директорун эмес, мамлекеттин тагдырын чече турган адамдарды шайлап жатабыз.

"Өзүбүздүн бала" деген түшүнүктөн арылып, айылга эки машина шагыл төгүп бергендерге алданбай, "тууганым суранды эле" дегенди жыйыштырып, өз эркибиз менен тандоо жасайлы.

Кайсы партия жаштарды көбүрөөк чогултту? Жаш курак боюнча инфографика

Эч качан кайдыгер болбоңуз, шайлоого барып, колуңуздагы бийликти ишенимдүү адамга тапшырып бериңиз. Ошондо андан талап кыла аласыз. Азыр эч кимге добуш бербей койсоңуз, кийин бийликке нааразы болууга моралдык укугуңуз жок.

Адам сатып алган буюмун каалагандай колдонорун билесиз. Ошол сыңары эле добушуңузду сатып алгандан кийин өз билгениндей бийлик жүргүзөт. Андыктан ойгонуп, активдүүлүктү көрсөтүүгө убакыт келди.

"Элине жараша бийлиги" дейт, мен сиздерге аябай ишенип, үмүт артып турам. Бир күндүк оокат менен эмес, келечек үчүн күйөлүчү!

P.S: Мен эч бир партиянын курамында жокмун. Жөнөкөй жаран жана журналист катары пикиримди жазууну чечтим.

Автордун пикири редакциянын көз карашы менен дал келбей калышы мүмкүн.

475
Белгилер:
келечек, укук, парламент, депутат, тандоо, үгүт, шайлоо
Тема:
Шайлоо-2020
Тема боюнча
Бир эле телеканалга 3 млн. сом берип... Партиялар акчасын кайда чачып жатат
Катарында жумушу жок талапкерлер басымдуулук кылган партиялар. Инфографика
Кайсы учурда депутат мандат ала албай калат. Маалымдама
Бир рубль монетасы жана долларлык монета жана купюрасы. Архив

Россияда доллардын баасы кескин кымбаттап кетти

0
(жаңыланган 00:14 24.09.2020)
Доллардын сомго карата баасы сезилерлик өзгөргөн жок. Анткен менен Россия акчасынын наркы түшүп кетиши, доллардын Кыргызстандагы баасына таасир этип койгон учурлар көп.

БИШКЕК, 23-сен. — Sputnik. Россияда апрель айынан бери биринчи жолу доллар 77 рублге чыгып, кескин кымбаттады. Бул тууралуу РИА Новости жазды.

Москва биржасынын маалыматына караганда, бир доллар Бишкек убактысы боюнча саат 20:24тө 77,07 рублди түздү (96 тыйынга кымбаттады). Ал эми евро 80 тыйынга кымбаттап, 89,93 рубль болду.

Белгилей кетсек, доллардын сомго карата баасы сезилерлик өзгөргөн жок. Анткен менен Россия акчасынын наркы түшүп кетиши, доллардын Кыргызстандагы баасына таасир этип койгон учурлар көп.

0
Белгилер:
баа, доллар, Россия
Тема боюнча
Россияда евронун баасы рекорддук көрсөткүчкө жетти. Кыргызстанда абал кандай?