Ноутбукта иштеп жаткан кыз. Архив

Кыргыздын кыздары эмнеге турмушка кеч чыгып калышты? 7 себеп

6597
(жаңыланган 11:38 02.09.2019)
Колумнист Гүлдана Талантбекова кыздар бир гана карьерасына карап турмушка кеч чыгат деген пикирге анча кошулбайт. Ал күйөөгө шашпай чыгып жаткандардын бир нече себебин тизмектегенге аракет кылды.

Материалда өзүнүн гана пикирин жазбастан, турмушта тажрыйбасы барлардын пикирин сураштырды. Андыктан автор макалага пикир калтырууда жеке жашоосуна өтпөөнү суранат.

Кыздарды шаштырбасак...

Кыз киши бой жеткенден баштап "турмушка качан чыгасың?" деген суроо берип чарчатышат. Бул нормалдуу эле көрүнүш деп ойлойм. Ата-эне кызынын теңин таап, жаш кезинде балалуу болушун каалайт. Бирок башка адамдар эмне мынча күйөөгө тийишиңе кызыкдар экендигине таң калып кетесиң. Бул канчалык бир деңгээлде адамды чыңалтышы мүмкүн. Андай сөздөргө теригип, эптеп бирөөгө тийип алгандар да бар. Аялдык бактысын 18, 25, 30, 40 жашында тапкандар болот... Буга нике кайып, буйрук жана айрым шарттар себеп деп ойлойм.

1. Эркекке таянбай калгандар

Мурда кыздар маяналуу жумуш издеп, үй-жай алууну максат кылышчу эмес. Себеби үй-бүлөдө эркекке ишеним артып келишкен. "Күйөөм багат" деген нерсе бар болчу. Менимче, азыр бул түшүнүк күчүнөн кеткендей. Анүстүнө эркектерге деле ишеним төмөндөдү. Кечирип коюңуздар, бирок азыркы эркектерде жоопкерчилик азайып баратат. Аялдар менен эсептешип оокат кылгандай. Эсептешип жашаса дагы жакшы эмеспи, турмуштун ачуу-таттуусуна чыдабай аялын балдары менен таштап кеткендерди көрүп эле жүрөбүз. Мындан улам аял киши кор болбоюн деп тытынып иш кылат. Жада калса бойдок кыздардын үй алып коюшум керек дегенин угуп жүрөм. Жашоосун эптей албаган эркек менен жашагыча жалгыз болууну жактырат.

2. Тың кыздар

Кыздардын турмушка чыкпай жүрүшүн көбү анын жумушуна байланыштырат. Ооба, андай дагы учурлар бар. Мындай адамдар мектепти бүткөн күндөн тарта бийик максаттарды коёт. Бир нече окууну окуп, билимин тереңдетип, иштешет. Жумушка киргенде белгилүү бир деңгээлде карьералык өсүшкө жетип алууну каалашат. Билимдүү, ийгиликтүү кыздар өзүнө окшогон адамдар менен турмуш кургусу келет. Талаптагыдай жигит болбосо иш менен алаксып жүрө берет. Ушундан уламбы, балдар "кыздар теңине албай жатат" деп айтып калышат. Ошону менен курагы 30-35 жаштан өтүп кетет. Бул жашта гинекологдордун айтымында, төрөгөндөн эле кыйналбаса, бала тарбиялаганга тажрыйбасы ашып-ташып калат. Эгер андан дагы кеч калса турмушта кыйналбай жашай турчу нерселери болот деп ойлойм. Мисалы, туруктуу жумушу, үйү, унаасы жана башкалар. Эң негизгиси коомдон ордун табат.

3. Туугандардын кастинги

Жигиттин же кыздын оң-терс жактарын, келечегин билүүдө тууган-туушкандардын деле салымы чоң. Айрымдар чындыгында эле туура жол көрсөтөт. Ал эми кээде болочок күйөө баланы же кызды көрбөй туруп эле ашкере сындап, ойду бурмалап жибергендер да бар. Бир заматта баштан-аяк анализден өткөрө салышат. Мындан улам эки жаштын ою бузулушу ыктымал. Ал гана эмес айрымдар үй-бүлө куруп жашап жүргөндө деле тууган уруктун кийлигишүүсүнөн улам мамилелери бузулганын айтып калышат.

4. Өзүн туугандарына арнап койгондор

Айрым кыздар канчалык иштесе дагы өзүнө салым кылбайт. Табиятынан күйүмдүү келишет. Ата-энесинин, бир туугандарынын жоопкерчилигин өтө жакын кабыл алат. Кандай гана маселе болбосун "Супермэндей" даяр турат. Каржы маселеси анын моюнунда. Адатта кыз баладан мындай нерсени туугандары, үй-бүлөсү талап кылбайт. Алар кызы, эжеси же карындашы бактысын тапса дейт.

5. Талабы күчтүүлөр...

Беш кол тең эмес. Эркектердин келечегинен мурда алардын тапкан акчасына кызыккандар бар. Андай кыздар кымбат ресторандан тамактанып, баалуу белек-бечкек алганды жакшы көрүшөт. Кыскасы, көзүнүн агы менен тең айланып туруу керек. Орточо маяна алгандарды, унаасы жокторду карашпайт. Таанышкан балдардын дээринде бир нерсе барбы, жашап кете алабызбы, көз караштары кандай деген суроолор кызыктырбайт. Мындай талаптан көп эле эркектин кан басымы көтөрүлсө керек.

6. Сезимталдар

Кыздардын көңүлү гүл да. Балдар жылуу сөз сүйлөп, камкордугун көрсөтүп койсо эле сүйүп калышат. Кокус жакын адамы менен эки ача жолго түшсө көпкө чейин унута албайт. Бир топ убакыт кыйналат. Кийинки таанышкан балдардан мурдагы сүйгөн адамына окшош сапаттарды издей берет. Бир эркектен көңүлү калган адам башкаларды дагы ошондой ойлоп калат. Психологиясын бузуп алат. Анан жан дүйнөсүндөгү музду эрите албай жүрө беришет.

7. Чыныгы сүйүү издегендер

Ар бир кыз сүйүктүү жар, камкор эне болууну тилейт. Нике кайып, буйрук дегенди ушул категорияга кошот элем. Айрымдар чындыгында эле жакын адамын кезиктирбегени үчүн күйөөгө тийбей жүрө беришет экен. Буга биз санап өткөн карьера дагы, эркектерге ишениминин жоктугу дагы себеп эмес. Ошондуктан көп кыз "Мага жаккан же мени сүйүп-кадырлаган адамды жолуктура элек болсом, кантип турмушка чыгам" дешет.

P.S. Бирок кандай болгон күндө да "көздүү мончок жерде калбайт" деген сөз бар. Ар бир кыздын сүйүктүү жар, бактылуу эне, кайын журтуна сүйкүмдүү келин болушун тилейт элем.

Автордун пикири редакциянын көз карашына дал келбеши мүмкүн.

6597
Белгилер:
үй-бүлө, турмуш, кыз, Кыргызстан
Тема боюнча
Топу кийбегендерди чокуга эле чабыш керек... Күйгөндөн айтам бир сабак
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

640
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

640
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Кишилер шайлоо участкасында. Архив

Шайлоодон кийин депутаттар кантип "жыргашат". Келечек үчүн элде эки тандоо бар

399
(жаңыланган 16:15 15.09.2020)
Саясий жарышка аттанган 16 партиядан 1 952 талапкер депутаттыкты арзып турган чагы. Эмне үчүн мандатты мелжегендер көп? Кыргызстанда парламенттин укуругу канчалык узун да, депутаттын таасири кандай? Учурда эл эки тандоонун ортосунда калды.

Журналист Эламан Карымшаков шайлоонун шарапаты кызып турган маалда эл эске алчу эки нерсени айткысы келген.

Аз күндөн кийин парламенттик шайлоо өтөт. Бул күнү биз жөн гана добуш бербейбиз, келечегибизди тандайбыз, колубуздагы бийликти бирөөгө ишенип тапшырабыз. Буга өзүбүзгө жар тандап жаткандай эле мамиле кылуу зарыл деп эсептейм. Себеби шайлоодон кийин депутаттарга беш жыл, алар түзгөн системага бери жагы 10 жыл чыдашыбыз керек. Бизди эр кылган да, кара жер кылган да ушулар болот.

Парламент кандай укукка ээ?

Жогорку Кеңештин депутаттары мыйзам чыгарып эле отурат деп ойлогон жоксузбу? Эгер андай десеңиз мандат мынчалык талаш болмок эмес. Мандаттын жыргалчылыгы башкада...

Шайлоодон уткан депутаттар жаңы өкмөттү бекитет. Ал үчүн ар бир партияга квота берилет, мисалы, менин партиям сунуштаган адам айыл чарба министри кызматына, сиздин партияңыздыкы Бажынын башчылыгына дайындалат. Ошентип өкмөттүн курамын түзүп, премьер-министрди дайындашат. Ошол өкмөт анан өлкөнүн тагдырын чечет. Ниети түз болсо өргө тартат, болбосо "өгүз өлбө, араба сынба" принциби менен эптеп иштейт.

Карыз жөнүндө көп кеп кылабыз. Өкмөт чет өлкөдөн насыя алып жатканда бир тыйынына чейин парламент менен макулдашат. Депутаттар карыз кандай максатта алынып, качан төлөнөрүн билген соң ратификациялайт.

Мындан сырткары, партиялар Борбордук шайлоо комиссиясы, Жогорку сот, Конституциялык палата сыяктуу органдарга өзүнүн адамдарын коё алат.

Байыркы бабам кандай эле?.. Эл энчисиндеги эгемендик тууралуу эки ооз сөз

Парламенттин күчүн ушундан байкасаңыз болот, жада калса бир дагы министр депутаттардын макулдугусуз кызматка отура албайт. Жыл сайын өкмөт аткарган иши тууралуу отчёт берет. Эгер аны парламент жактырбай койсо отставкага кетет. Сапар Исаковду дал ушундай жол менен ээрден алып түшүшкөн. Эсеп палатасы менен Улуттук банк дагы парламентке баш иет.

Кыргызстандын мамлекеттик түзүлүшү — парламенттик-президенттик башкаруу. Демек, сиз шайлаган депутаттардын ичинен бирөөсү төрагалыкка шайланат да, президенттен кийинки эле өлкөнүн экинчи адамы болуп калат.

Кыскасын айтканда, бизде парламенттин ролу абдан чоң, кыбыр эткендин баары депутаттар аркылуу чечилет. Азыр сиздин колуңузда опол тоодой бийлик турганын түшүнүп жатасызбы? Ал каалайсызбы-каалабайсызбы 4-октябрдан кийин күчүн жоготот. Мен сизди максаттуу пайдаланууга чакырам.

Сизде эки тандоо бар

Биринчи тандоо:

VI чакырылыштын 100дөн ашуун депутаты кайра мандат алууга ашыгып жатат. Арасында буга чейин эки-үч жолу депутат болгондору бар. Кээ бирлери канча жыл иштесе да жыйынтык көрсөтүүгө жарабаган, галстугу бар, бирок калыстыгы жок оомо депутат катары эсте калды. "Башкасына баш оорутпайм, бизнесимди гүлдөтсөм болду" деп келе жаткандар да бар. Болбосо бир мандат үчүн 500 миң долларды (39,4 миллион сом) ким эле садага чапсын.

Талапкерлердин ооз көптүрүп айткан убадаларын угуп жатканда баскан жолуна да көз чаптырып коюңуз. Баарына көз жумуп, кайра эле ушулар бийликке келишин каалап турсаңыз, биринчи тандоо сиздики болот.

Ошол учурда сизге бир нерсени эскерте кетейин...

Кайсы партияда жогорку билимдүү талапкерлер көбүрөөк? Рейтинг

Парламент өлкө тагдырын ишенип тапшырган өкмөттүн дараметин пандемия башталганда көрдүк. Бюджетте кошумча акча жок, карыз менен жан баккан мамлекет экенибизди түшүндүк.

Июлдагы апаатта саламаттык сактоо системасынын таш-талканы чыкканын жоон терибиз менен сездик. Чекеден кырылып калабызбы деген коркунуч жаралбады беле. Миңден ашуун үй-бүлө жер кучактап отуруп калганын унуткан жоксузбу? Адистер өз убагында медицина тармагына көңүл бурулбаганын айтышууда. Мунун кесепетинен учурда замандаштарыбыз мээрим төккөн энесинен, таянар тоо болчу атасынан, боор тарткан бир тууганынан, чырактай уул-кызынан жана бир жаздыкка башын жөлөгөн жубайынан ажырап, кан жутуп отурушат.

Экинчи тандоо:

Өлкөгө азыр тайманбас, курч, реформатор, сабаттуу жана саясий эрки бар адамдар керек. Агымга каршы сүзө алгандарды тандоо да сиздин эркиңиз. Жаңыланууга карай кадам таштасак, жаркын жашоону кура алабыз.

Мени күйдүргөнү, элдин жашоосун жакшыртууга жарабагандар, калктын жакырчылыгынан пайдаланып колундагы бийлигин 2000 сом менен сатып алууга аракет кылууда. Муну элди шылдыңдоо катары сыпаттайт элем.

Кээ бирлери карантин маалында тараткан жардамын бетине кармап, үгүт ишин аткарууда. Анысына рахмат, бирок билип коюңуздар, биз кайрымдуулук фондунун директорун эмес, мамлекеттин тагдырын чече турган адамдарды шайлап жатабыз.

"Өзүбүздүн бала" деген түшүнүктөн арылып, айылга эки машина шагыл төгүп бергендерге алданбай, "тууганым суранды эле" дегенди жыйыштырып, өз эркибиз менен тандоо жасайлы.

Кайсы партия жаштарды көбүрөөк чогултту? Жаш курак боюнча инфографика

Эч качан кайдыгер болбоңуз, шайлоого барып, колуңуздагы бийликти ишенимдүү адамга тапшырып бериңиз. Ошондо андан талап кыла аласыз. Азыр эч кимге добуш бербей койсоңуз, кийин бийликке нааразы болууга моралдык укугуңуз жок.

Адам сатып алган буюмун каалагандай колдонорун билесиз. Ошол сыңары эле добушуңузду сатып алгандан кийин өз билгениндей бийлик жүргүзөт. Андыктан ойгонуп, активдүүлүктү көрсөтүүгө убакыт келди.

"Элине жараша бийлиги" дейт, мен сиздерге аябай ишенип, үмүт артып турам. Бир күндүк оокат менен эмес, келечек үчүн күйөлүчү!

P.S: Мен эч бир партиянын курамында жокмун. Жөнөкөй жаран жана журналист катары пикиримди жазууну чечтим.

Автордун пикири редакциянын көз карашы менен дал келбей калышы мүмкүн.

399
Белгилер:
келечек, укук, парламент, депутат, тандоо, үгүт, шайлоо
Тема:
Шайлоо-2020
Тема боюнча
Бир эле телеканалга 3 млн. сом берип... Партиялар акчасын кайда чачып жатат
Катарында жумушу жок талапкерлер басымдуулук кылган партиялар. Инфографика
Кайсы учурда депутат мандат ала албай калат. Маалымдама
Аэропорттогу Боинг учагы

Кыргызстандан чет өлкөлөргө ачылган каттамдардын тизмеси

56
(жаңыланган 14:41 21.09.2020)
Жүргүнчүлөрдүн бардыгы бет кап режимин сактоого милдеттүү. Саламаттык сактоо министрлигинин алгоритмине ылайык, жарандардын дене табы текшерилет.

БИШКЕК, 21-сен. — Sputnik. Кыргызстандын "Манас" жана "Ош" аэропорттору аркылуу учактар чет мамлекеттерге каттай баштады. Республикалык ыкчам штаб каттамдардын тизмесин жарыялады.

"Манас" аэропорту аркылуу аткарыла турган авиарейстер:

  • Бишкек — Стамбул — Бишкек;
  • Бишкек — Анталья — Бишкек;
  • Дубай — Бишкек — Дубай;
  • Шарджа — Бишкек — Шарджа;
  • Ташкент — Бишкек — Ташкент;
  • Алматы — Бишкек — Алматы;
  • Бишкек — Москва — Бишкек.

Москва — Бишкек каттамы үчүн билеттер сатыла баштады. Рейстин датасы

"Ош" аэропортунан чартердик рейстер төмөнкү багыттарга каттайт:

  • Москва — Ош — Москва;
  • Ош — Санкт-Петербург — Ош;
  • Ош — Новосибирск — Ош;
  • Ош — Екатеринбург — Ош;
  • Ош — Сургут — Ош;
  • Ош — Красноярск — Ош.

Белгилей кетсек, Россия, Казакстан, Өзбекстан жана Бириккен Араб Эмирликтеринин талаптарына ылайык, Кыргызстандын жарандары бул өлкөлөргө барганда коронавируска тапшырган ПЦР тестинин жыйынтыгын көрсөтүшү керек. Тесттин мөөнөтү үч күндөн ашпоого тийиш. Ал эми Түркияда мындай талаптар жок.

"Бардык жүргүнчүлөрдү жолго чыгар алдында тийиштүү документтерди, ПЦР-тестти алган-албаганын текшерип алууга чакырабыз", — деп айтылат маалыматта.

Мындан сырткары, ички каттамдар дагы жанданды. Алар:

  • Бишкек — Ош — Бишкек (күн сайын);
  • Бишкек — Жалал-Абад — Бишкек (жумасына бир ирет, жума күнү);
  • Бишкек — Баткен — Бишкек (жумасына бир ирет, шейшемби күнү).

Аэропорттун терминалына авиабилети барлар гана кире алат. Жүргүнчүлөрдүн бардыгы бет кап режимин сактоого милдеттүү. Саламаттык сактоо министрлигинин алгоритмине ылайык, жарандардын дене табы текшерилет.

56
Белгилер:
каттам, аэропорт, Кыргызстан
Тема:
Коронавируска байланыштуу Кыргызстандагы кырдаал
Тема боюнча
Россияга барыш үчүн кыргызстандыктар ПЦР-тесттин жыйынтыгын көрсөтүшү керек