Ур-токмокко алуу. Архивдик сүрөт

Күйөөгө тийбей жатып күйөөдөн качып калдык. Акыркы окуялар үрөй учурганда

5895
(жаңыланган 19:39 10.01.2020)
Баткен, Кочкор, Каракол... Акыркы учурда бул жерлерде аялдар күйөөсү тарабынан таякталып өлтүрүлүп, өрттөлүп аман калганы тууралуу кеп болуп, дагы деле уккан кишинин төбө чачы тик туруп жаткан чагы.

Соңку окуялардан улам колумнист Гүлдана Талантбекова өз пикирин жазды.

Күлгүндөй куракта көз жумуп...

Алгач жыл жаңырары менен Баткенде күйөөсү аялын уруп өлтүрүптүр деген маалымат чыкты. Ал келиндин көк ала болгон буттарынын сүрөтүн көрүп зээним кейиди. Короодогу малыңды да мынчалык кордобойсуң го. Маркум болгону 27 жашта экен. Ишке, жашоого, балдарынын күлкүсүнө тойбой турган убак эмеспи. Аркасында үч баласы калды. Кийин атасы аларга эмне деп жооп берет? Энеңерди өлтүрүп алгам деп айта алар бекен? Мындай эркектер абактан чыккандан кийин аял аттуунун сүйүүсүн татууга моралдык акысы барбы?

Оозду жыя электе Кочкор районунда жолдошунун ур-токмогунан 37 жаштагы келин каза болду. Жубайлар акчанын айынан уруша кетип, күйөөсү аялын жаакка чаап, жыгылып калгандан кийин каракушка тепкени айтылды. Анан каза болгондон кийин дарыгерлерди чакырыптыр. Жыйынтыгында күйөөсү кармалып, эки бала томсоруп жетим калды. Ачуунун аягы ажал менен аякташы керек беле?

Эки келинди талкуулап бүткүчө Караколдогу эркек киши чогуу жашаган аялын бензин чачып өрттөп жиберип, бактыга жараша аял аман калды. Катуу тийсе кечиргиле, эркектер эки буттуу айбан болуп баратканбы?

Айылда зомбулук эмнеге көп? 

Жаңылыктардагы маалыматтардан мындай үрөй учурган окуялар борборго салыштырмалуу элетте көп болорун байкоого болот. Менимче, буга жумушсуздук, ичкилик себеп болушу мүмкүн. Иш жоктун айынан акча тартыштыгы жаралып, жубайлар ортосунда уруш чыгат. Арактан күчүн чыгарган күйөө аялына кол көтөрөт. Бир жагынан эмгектенген кишинин чыр-чатакка деле убактысы жок болот. Чарчап келип жатып алат, аялына, балдарына баалуу-барктуу болот эмеспи. Жалпысынан билимдүү эркектер көбүнчө жаман адаттардан алыс дегеним ашыкча болбос.

Аялдар тилин тартпай жатабы?

Акыркы окуялардан улам социалдык тармактарда пикирин билдиргендер көбөйдү. Алардын бири "Айланайын аялзаты, эркек мас кезде, ачуулуу убагында, анан досторунун жанында, ата-эне, туугандарынын көзүнчө каяша айтпагыла. Ошентсеңер силер жеңесиңер. Ушул кырдаалда каяша айтсаңар аны баары бир чыгарат" деп жазыптыр. Аял дубал эмес, тирүү жан, анүстүнө эмоционалдуу. Муштумун көтөргөн эркекке муштуму менен жооп бере албайт, анын күчү тилинде. Бирок бул аялдар айтышса боло берет, эркектер ага жооп катары кол көтөрсө болот дегенди билдирбейт. Эки нерсени тең акыл менен көзөмөлдөө керек деп ойлойм.

Себепсиз кызганыч

Ошондой эле үй-бүлөдөгү чыр-чатак, зомбулук айтышуудан гана эмес, кызганычтан да келип чыгарын айтышууда. Эч эле себепсиз кызганып, турган жерден сабап жибергендер бар экен. Эгер жөнү жок кызганып, төпөштөп жатса бул психологиялык оору болсо керек. 

Бетке чапкан күйөө эртең башка урат

Аялдарга кол көтөрө турчу эркек башында эле билинсе керек. Бир жолу жаакка чапкан күйөө кийин бетке муштайт, анан тебет, жадакалса колу-бутуңду сындырып, акырында өлтүрүп тынат. Кызыл камчы күйөөдөн качып гана кутулуу керек. Тилекке каршы, кээде аялдар буга чыдап, өмүрүнүн акырына чейин көзүнөн көк кетпей жүрүп өтүп кетип жатат.

Кете алышпайт...

Зордукчул күйөөдөн "кокуй чыдаш керек, жашайын, балдарым атасыз өсүп калбасын" деген түшүнүктөр бошотпойт. Бирок кызыл камчы атасынын кылганын көргөн бала кийин кандай болот? Эркек балдарда аялды урса болот деген түшүнүк, ал эми кыздарында бардык эркек кол көтөрөт экен деген ой калыптанып калбайбы? Апасын сабап, чүрпөлөрүнүн жүрөгүн өлтүрүүнүн кереги барбы? Менимче, балдарга мындай атадан көрө тынчтык, бейпил жашоо артык.

Ошондой эле аялзаты төркүнүнө барса бала-чакасы менен батпай турганынан, күйөөдөн чыкты деп басмырланарынан да коркот. Тилекке каршы, турмушу бузулган аялга колдоо көрсөтүп, баласын багышып, иш таап, жада калса кайрадан окуткан төркүн да чанда экен. Кайын-журттан да, төркүндөн да айтпай, өз күчү менен балдарын чоңойтуп, бутуна турган аялдарга таазим!

Эркектерге психологдун жардамы керекпи?

Соо адам кантип кол көтөрөт деп ойлойсуң. Бир аз ныкып же түртүп койсо бир жөн, күйөөлөр эркек киши менен мушташкандай эле жубайларын сабап, өлтүргөндөн кайра тартпай жатканда бир ой келет. Балким, алар ичтеги кайгы-капаны, материалдык көйгөйлөрдү ушинтип чыгарып жаткандыр. Биз аялдар менен сырдашып, психологго жиберип, алар үчүн кризистик борборлорду ачабыз. Ал эми эркектерчи? Балким, аларга дагы моралдык-психологиялык жардам керектир. Бул жалпы мамлекеттин маселеси деп эсептейм.

Кол көтөрүү — адамды сындырат

Эркектер жубайларына кол көтөргөндүн дагы бир себеби —  аял алсыз, назик жан, каршылык көрсөтө албайт. Жаныбар деле өзүнөн алсыздарга кол салат эмеспи. Зордукчул эркектер жубайлары менен айтышып отурбай бир чапканды эп көрүшөт окшойт. Эгер аялзаты күчтүү болгондо эркектин колу тиймек эмес. 

Али күйөөгө тие электерди ойлонтту

Жеке өзүм соңку окуялардан кийин көзүмө жаш алганымды жашыргым келбейт. Сестенүү пайда болду. Мен эле го десем, интернетте бул боюнча ар түрдүү пикирин жазган кыздарды да көрдүм. Эми балдар менен таанышканда "кол көтөрбөйт бекен" деген жагын дагы карашыбыз керекпи? Албетте, бардык эркек зордукчул эмес, бирок дагы деле эркектер эмнеге жубайларына мындай мамиле кыларын так түшүнө албай койдум. Менин үй-бүлөмдө аялга кол көтөрүү деген түшүнүк болгон эмес. Бизде деле материалдык, моралдык көйгөйлөр жаралчу. Кээде ата-энем айтышып кеткени болбосо, маселени биргелешип чечишчү. Анткен менен ар бир бүлө чытырман токой, ичинде эмне болуп жатканын билбейбиз деңизчи.

Мен эле ушинтип терең ойлонуп жатам, ал эми кордук көрүп күйөөдөн качкан кыздардын психологиясы калыбына келеби? Кайрадан эркек аттууга жан дүйнөсү ачылабы? Ар бир аялзаты жаркын жашоого татыктуу. Ошондуктан турмушу бузулган кыздарга колдоо көрсөтүп койсок, бөтөнчө төркүндөрү басмырлабаса. Кыргыздар психологго көрүнбөйбүз, бул нерсени адатка айлантуу керек. Жан дүйнөсү талкаланган аялга жашоону жаңы барактан баштоосуна адистер мыкты жардам берет деп ойлойм.

5895
Белгилер:
укук, ур-токмокко алуу, күйөө, аял, Кыргызстан
Тема боюнча
Абылгазиев ур-токмоктон каза тапкан келиндер боюнча үн катты
Тойго жакын жакшы кыз таппайсың! Үйлөнчү жигит эмнеге даяр болушу керек
Тойго бараткан колукту. Архивдик сүрөт

Жашырынып тойлогон "генийлер" жана акылга сыйгыс ушактар. Пандемиядан алган сабак

634
(жаңыланган 18:31 20.09.2020)
Ааламды алаамат каптап алапайыбызды таппай жатканда да коомдо адамдын кыжырын келтирген окуялар болуп турду. Колумнистибиз Шабдан Абылгазы уулу кайсы жагдайга жини келгенин санап чыкты.

Дүйнөнү коронавирус каптап, ал илдет көп өтпөй биздин өлкөгө дагы кирип келди. Мындай апаатка өлкөбүздөгү дээрлик бардык тармак даяр эмес болуп чыкты. Экономика, медицина, билим берүү, туризм жана башка тармактын баары вирустун айынан келген кыйын күндөргө туруштук бере албай калды. Өзгөчө Кыргызстанда "казанда эмне болсо, чөмүчкө ошол чыгат" дегендей эле болду. Бардык жааттагы кемчиликтерди коронавирус көзгө сайып көрсөтүп жатты. Акыркы убактарда оору жуктургандардын саны азайып үмүттүн шооласын жандырганы менен адистер бул вирустун экинчи толкуну боло турганын боолголошууда. Мындан улам биринчи толкунда кандай сабактарды алдык, кайсы кемчиликтерибизди моюндап, аны жок кылууга аракет кылышыбыз керек деген мыйзам ченемдүү суроо келип чыгууда.

Пандемияда оорудан мурда ойдон чыгарылган кептер кууратты

"Дүйнөдө коронавирус аныкталууда" деген күндөн баштап, ар кандай ушактардын, божомолдордун арты тыйылбай келүүдө. Алар "бул атайын уюштурулган өнөктүк" дегенден башталып "биологиялык согушка" келип такалат. Албетте, мындай ой жүгүртүүгө кандайдыр бир себептер болгон чыгар. Ал эми такыр эле абсурд делген коомдогу аңыз кептерге саресеп сала турган болсок, таң калып эле отуруп каласың. Алардын айрымдары логикага дагы сыйбайт. Адегенде эле социалдык тармактар аркылуу "5G түйүнү коронавирусту күчөтөт экен", "дезинфекциялоо өпкөнүн кагынуусуна алып келет экен", "вертолет менен дары чачат экен, ал оорунун көбөйүшүнө алып келет" деген сыяктуу ушактар тарап, адистер, расмий органдар жалганга чыгарууга жетишпей жатты. Булардын ичинен "оору жок, бул жөн гана бийликтин оюну" деген таризде айтылган кепке ишенгендердин көбү санитардык талаптарды аткарбай, натыйжада илдет тез жайылып, канчалаган адам бул дүйнө менен кош айтышты.

Азыркы азалуу Ата Журт, эртеңки айт... Бул күндөрдүн артында улуу жакшылыктар бар

Буларды абсурд деп четке кагуунун деле себеби бар. Маселен "5G түйүнү коронавирусту күчөтөт" деген кеп логикага деле сыйбайт. Анткени коронавирус илдети бай, кедей, мусулман, мусулман эмес дебестен бардык өлкөнү каптады. Мындай жагдайда адамдын ден соолугуна зыян келтире турган түйүндүн ишке берилиши мүмкүн эмес. Мындан тышкары, өлкөнүн масштабында алсак, аталган түйүн Кытайдын айрым аймактарында гана иштеп баштаганы маалымат булактарында жазылууда. Ал эми Кыргызстандын технологиялык, экономикалык өнүгүүсүн эске алсак, дүйнөгө тарай элек түйүн алгач бизде орнотулуп калса кызык эле болмок.

"Вертолет менен дары чачат экен" деген аңыз кепке коментарий деле бербей койсок болот эле. Көптөрдү ынандырууга аракет кылгандар башка планетадан келгенби деп кетесиң. Себеби мындан бир канча убакыт мурда чет жактан келген туристтер тоо башында калып кетип, аны куткарууга вертолет таба албай карайлаганбыз. Анан кайдагы өлкөнү кыдырып дары чача турган тик учак табыла калат? "Өзү өлкөдө канча вертолет бар" деген суроо салып көрсөк эле бул кептин калпы чыгып калып жатпайбы.

Аза күтүү "аралыктан" жасалып, тойлордо топурагандар...

Карантин бүтүп, оору азайып медиктердин көзөмөлүнө алына баштаган учурда Нарын облусунун райондорунун бирине барып калдым. Бардык жердегидей эле вирустун таасири жана кесепеттери тууралуу кеп салып отурдук. Биз барган айылда жана аларга коңшу айылда коронавирустан үч-төрт адам каза болуптур.

Караңгы түндүн артында жаркырап тийчү күн бар... Өмүр-өлүм ортосу

"Башында кичине барып, кол-кабыш кылып, көз көрсөтүп жатканбыз. Анан оору күчөп жатканда ылдыйкы айылдан бирөө каза болуп калды. Баралы десек, медиктер телевизордон барбагыла деп үгүттөшөт. Жуктургандардын саны күн санап өсүп жатат. Аз эле адам барган. Ошондо каза болгон адамдын жакын тууганы "кошуналары келе беришпейби, эмне оорудан коркуп жатышабы" деп нааразы болуп ыйлап жаткан. Кийин ошол киши өзү вирус жугузуп алып кайтыш болуп калды. Анын жаназасына эч ким деле барган жок. Доктурлар эле жерге берди. Башында айылдагылар кантип ошондой болсун деп жатышкан. Кийин баары эле түшүнүп калды", – деди бир айылдашы.

Негизи маркумду жерге берүүнүн өз зыйнаты болот. Жакындары, туугандары чогулуп жоктоп, аза күтүлөт. Бирок "өлгөндүн артынан өлмөй жок" деп тегин жерден айтылбаса керек. Андыктан айылдарда абалды түшүнүү менен кабыл алып, аза күтүүнү да "аралыктан" жүргүзүп калышыптыр. Бул күндөр дагы өтөр.

Сөзүбүздү куру какшык менен улайлы. Антпесек, "акыл айтып жатат" деген токонаалатка калабыз. Жашырганда эмне, арабызда "генийлер" толтура жашап жүрүптүр. Мамлекеттик органдар жарандарга жөнү жок үйдөн чыкпоосун улам-улам эскертип, медиктер топтолууга тыюу салып, коомдук жайлар иштебей турганда да жолун таап, топуратып той бергендер болду. Кантип ыңгайын тапты? Ким билсин...

Бизге позитив керек! Жашоону оң нукка бура турган 8 кадам

Тойго жарашыктуу кийинип алып, жаркылдаган унаа менен барып, ал жерден 200-500 адам топтолуп, айрымдары мас болуп алып шоктонуп, кубалашып тилдешип, кучакташып бийлешип... Анан ушунун баарын коомго да, тийиштүү органдарга байкатпай "жашыруун" жасаган адамдарды "гений" дебегенде ким дейбиз? Социалдык тармактарда анча-мынча адамдардын тойдогу сүрөттөрү карантин убакта да чыга калып турду...

Негизи пандемия бир топ эле жүрөктүн үшүн алып койду. Оорунун күчү бир аз басаңдап баратты эле, жаңы статистика вирус илештирип алгандардын саны көбөйүп жатканын көрсөтүүдө. Экинчи толкун болот деп боолголоп, күн суук тартып сасык тумоо менен кошулуп айлабызды алты кетирет деп жатышат. Жакшы эле сабак алгыдай болдук, дүрбөлөңгө түшпөйлүчү. Сактаналы, дарыгерлердин айткан-дегенин аткарып, жардам берели. Өзүбүздү өзүбүз аяйлычы...

634
Белгилер:
ушак, айыл, той, карантин, коронавирус
Тема боюнча
Түндүн миссиясын билесизби? Өзгөчө абалдын пайдасы
Адамдан эс алган табият. Карантин кыялды чындыкка айландырганда
Кишилер шайлоо участкасында. Архив

Шайлоодон кийин депутаттар кантип "жыргашат". Келечек үчүн элде эки тандоо бар

399
(жаңыланган 16:15 15.09.2020)
Саясий жарышка аттанган 16 партиядан 1 952 талапкер депутаттыкты арзып турган чагы. Эмне үчүн мандатты мелжегендер көп? Кыргызстанда парламенттин укуругу канчалык узун да, депутаттын таасири кандай? Учурда эл эки тандоонун ортосунда калды.

Журналист Эламан Карымшаков шайлоонун шарапаты кызып турган маалда эл эске алчу эки нерсени айткысы келген.

Аз күндөн кийин парламенттик шайлоо өтөт. Бул күнү биз жөн гана добуш бербейбиз, келечегибизди тандайбыз, колубуздагы бийликти бирөөгө ишенип тапшырабыз. Буга өзүбүзгө жар тандап жаткандай эле мамиле кылуу зарыл деп эсептейм. Себеби шайлоодон кийин депутаттарга беш жыл, алар түзгөн системага бери жагы 10 жыл чыдашыбыз керек. Бизди эр кылган да, кара жер кылган да ушулар болот.

Парламент кандай укукка ээ?

Жогорку Кеңештин депутаттары мыйзам чыгарып эле отурат деп ойлогон жоксузбу? Эгер андай десеңиз мандат мынчалык талаш болмок эмес. Мандаттын жыргалчылыгы башкада...

Шайлоодон уткан депутаттар жаңы өкмөттү бекитет. Ал үчүн ар бир партияга квота берилет, мисалы, менин партиям сунуштаган адам айыл чарба министри кызматына, сиздин партияңыздыкы Бажынын башчылыгына дайындалат. Ошентип өкмөттүн курамын түзүп, премьер-министрди дайындашат. Ошол өкмөт анан өлкөнүн тагдырын чечет. Ниети түз болсо өргө тартат, болбосо "өгүз өлбө, араба сынба" принциби менен эптеп иштейт.

Карыз жөнүндө көп кеп кылабыз. Өкмөт чет өлкөдөн насыя алып жатканда бир тыйынына чейин парламент менен макулдашат. Депутаттар карыз кандай максатта алынып, качан төлөнөрүн билген соң ратификациялайт.

Мындан сырткары, партиялар Борбордук шайлоо комиссиясы, Жогорку сот, Конституциялык палата сыяктуу органдарга өзүнүн адамдарын коё алат.

Байыркы бабам кандай эле?.. Эл энчисиндеги эгемендик тууралуу эки ооз сөз

Парламенттин күчүн ушундан байкасаңыз болот, жада калса бир дагы министр депутаттардын макулдугусуз кызматка отура албайт. Жыл сайын өкмөт аткарган иши тууралуу отчёт берет. Эгер аны парламент жактырбай койсо отставкага кетет. Сапар Исаковду дал ушундай жол менен ээрден алып түшүшкөн. Эсеп палатасы менен Улуттук банк дагы парламентке баш иет.

Кыргызстандын мамлекеттик түзүлүшү — парламенттик-президенттик башкаруу. Демек, сиз шайлаган депутаттардын ичинен бирөөсү төрагалыкка шайланат да, президенттен кийинки эле өлкөнүн экинчи адамы болуп калат.

Кыскасын айтканда, бизде парламенттин ролу абдан чоң, кыбыр эткендин баары депутаттар аркылуу чечилет. Азыр сиздин колуңузда опол тоодой бийлик турганын түшүнүп жатасызбы? Ал каалайсызбы-каалабайсызбы 4-октябрдан кийин күчүн жоготот. Мен сизди максаттуу пайдаланууга чакырам.

Сизде эки тандоо бар

Биринчи тандоо:

VI чакырылыштын 100дөн ашуун депутаты кайра мандат алууга ашыгып жатат. Арасында буга чейин эки-үч жолу депутат болгондору бар. Кээ бирлери канча жыл иштесе да жыйынтык көрсөтүүгө жарабаган, галстугу бар, бирок калыстыгы жок оомо депутат катары эсте калды. "Башкасына баш оорутпайм, бизнесимди гүлдөтсөм болду" деп келе жаткандар да бар. Болбосо бир мандат үчүн 500 миң долларды (39,4 миллион сом) ким эле садага чапсын.

Талапкерлердин ооз көптүрүп айткан убадаларын угуп жатканда баскан жолуна да көз чаптырып коюңуз. Баарына көз жумуп, кайра эле ушулар бийликке келишин каалап турсаңыз, биринчи тандоо сиздики болот.

Ошол учурда сизге бир нерсени эскерте кетейин...

Кайсы партияда жогорку билимдүү талапкерлер көбүрөөк? Рейтинг

Парламент өлкө тагдырын ишенип тапшырган өкмөттүн дараметин пандемия башталганда көрдүк. Бюджетте кошумча акча жок, карыз менен жан баккан мамлекет экенибизди түшүндүк.

Июлдагы апаатта саламаттык сактоо системасынын таш-талканы чыкканын жоон терибиз менен сездик. Чекеден кырылып калабызбы деген коркунуч жаралбады беле. Миңден ашуун үй-бүлө жер кучактап отуруп калганын унуткан жоксузбу? Адистер өз убагында медицина тармагына көңүл бурулбаганын айтышууда. Мунун кесепетинен учурда замандаштарыбыз мээрим төккөн энесинен, таянар тоо болчу атасынан, боор тарткан бир тууганынан, чырактай уул-кызынан жана бир жаздыкка башын жөлөгөн жубайынан ажырап, кан жутуп отурушат.

Экинчи тандоо:

Өлкөгө азыр тайманбас, курч, реформатор, сабаттуу жана саясий эрки бар адамдар керек. Агымга каршы сүзө алгандарды тандоо да сиздин эркиңиз. Жаңыланууга карай кадам таштасак, жаркын жашоону кура алабыз.

Мени күйдүргөнү, элдин жашоосун жакшыртууга жарабагандар, калктын жакырчылыгынан пайдаланып колундагы бийлигин 2000 сом менен сатып алууга аракет кылууда. Муну элди шылдыңдоо катары сыпаттайт элем.

Кээ бирлери карантин маалында тараткан жардамын бетине кармап, үгүт ишин аткарууда. Анысына рахмат, бирок билип коюңуздар, биз кайрымдуулук фондунун директорун эмес, мамлекеттин тагдырын чече турган адамдарды шайлап жатабыз.

"Өзүбүздүн бала" деген түшүнүктөн арылып, айылга эки машина шагыл төгүп бергендерге алданбай, "тууганым суранды эле" дегенди жыйыштырып, өз эркибиз менен тандоо жасайлы.

Кайсы партия жаштарды көбүрөөк чогултту? Жаш курак боюнча инфографика

Эч качан кайдыгер болбоңуз, шайлоого барып, колуңуздагы бийликти ишенимдүү адамга тапшырып бериңиз. Ошондо андан талап кыла аласыз. Азыр эч кимге добуш бербей койсоңуз, кийин бийликке нааразы болууга моралдык укугуңуз жок.

Адам сатып алган буюмун каалагандай колдонорун билесиз. Ошол сыңары эле добушуңузду сатып алгандан кийин өз билгениндей бийлик жүргүзөт. Андыктан ойгонуп, активдүүлүктү көрсөтүүгө убакыт келди.

"Элине жараша бийлиги" дейт, мен сиздерге аябай ишенип, үмүт артып турам. Бир күндүк оокат менен эмес, келечек үчүн күйөлүчү!

P.S: Мен эч бир партиянын курамында жокмун. Жөнөкөй жаран жана журналист катары пикиримди жазууну чечтим.

Автордун пикири редакциянын көз карашы менен дал келбей калышы мүмкүн.

399
Белгилер:
келечек, укук, парламент, депутат, тандоо, үгүт, шайлоо
Тема:
Шайлоо-2020
Тема боюнча
Бир эле телеканалга 3 млн. сом берип... Партиялар акчасын кайда чачып жатат
Катарында жумушу жок талапкерлер басымдуулук кылган партиялар. Инфографика
Кайсы учурда депутат мандат ала албай калат. Маалымдама
Президент Сооронбай Жээнбеков. Архив

Жээнбеков Эгемендүүлүктүн 30 жылдыгын белгилөө жарлыгына кол койду

19
(жаңыланган 14:20 21.09.2020)
КРдин Жогорку Совети 1991-жылдын 31-августунда Кыргызстандын мамлекеттик көз карандысыздыгы жөнүндө декларацияны кабыл алган.

БИШКЕК, 21-сен. — Sputnik. Президент Сооронбай Жээнбеков "Кыргыз Республикасынын көз карандысыздыгынын 30 жылдыгын белгилөөгө даярдык көрүү жөнүндө" жарлыкка кол койду. Бул туурасында мамлекет башчынын маалымат кызматы билдирди.

КРдин Жогорку Совети 1991-жылдын 31-августунда Кыргызстандын мамлекеттик көз карандысыздыгы жөнүндө декларацияны кабыл алган. Ага ылайык, өлкө көз карандысыз, эгемендүү, демократиялык мамлекет деп жарыяланган.

Жарлыктын негизинде токтом кабыл алынды.

Байыркы бабам кандай эле?.. Эл энчисиндеги эгемендик тууралуу эки ооз сөз

Өкмөткө төмөнкүлөр сунушталды:

  • Кыргыз Республикасынын көз карандысыздыгынын 30 жылдыгын белгилөө менен байланышкан иш-чараларды даярдоо жана өткөрүү боюнча уюштуруу комитетин түзүү;
  • Даярдоо жана өткөрүү боюнча иш-чаралардын планын 2020-жылдын 1-декабрына чейин бекитүү;
  • Аталган иш-чараларды даярдоо жана өткөрүү үчүн зарыл болгон финансылык каражаттарды республикалык бюджеттен бөлүүнү кароо;
  • Жарлыктын аткарылышын көзөмөлдөө президенттин аппаратынын жетекчисине жүктөлсүн.
19
Белгилер:
жарлык, майрам, белгилөө, көз карандысыздык, Кыргызстан
Тема боюнча
Си, Трамп жана Испания королу. Кыргызстандыктарды 32 өлкөнүн башчысы куттуктады