Су-57 истребители. Архив

Алтынчы муунга карай. Су-57 дүйнөнү багындырууда

438
(жаңыланган 21:48 24.12.2020)
Бешинчи муундагы Су-57 истребители уникалдуу тактикалык-техникалык мүнөздөмөлөрү, алтынчы муунга таандык технологиялар спектри, эл аралык баага татышы, дагы өркүндөтүү мүмкүндүгү жана жогорку экспорттук дарамети менен таңгалдырып келет.

Россиянын Аба-космостук күчтөрү биринчи сериялык Су-57ни жыл жаңырганча алмакчы. Экинчи баскычтагы кыймылдаткычтуу бешинчи муундагы тун истребитель 2022-жылы куралмакчы. 2024-жылдын аягына дейре Россиянын Аба-космостук күчтөрүндө 22 Су-57 истребители, 2028-жылга чейин – 76 бирдик болмокчу. Палубалык версиясы келерки жылдын аягына чейин жасалат. Аскерий баяндамачы Александр Хроленко аталган истребителдин өзгөчөлүктөрүн санап, келечегине көз чаптырган.

Су-57ни сатып алууну каалаган өлкөлөрдүн саны эмитен эле сегизге чамалады. Россиянын Аскердик-өндүрүштүк комплексинин башкаруу тобунун төрагасынын биринчи орун басары Андрей Ельчанинов: "Жабдуунун ар кандай варианттары: өзүнчө учак же сатыктан кийинки тейлөө системасы бар толук курал топтому менен учак каралууда", - деп маалымдады.

Алгачкылардан болуп Алжир Су-57Эден 14 истребителге буюртма калтырган. Даяр бирдиктерди алууга жана өз аймагында лицензиялык өндүрүштү (мурдагы МиГ-21, МиГ-27 жана Су-30 истребителдери сымал) өнүктүрүүгө ниеттенген Индия Су-57нин потенциалдуу ири буюртмачысы болуп эсептелет. Бирок индиялык Аскердик-аба күчтөрү эки орундуу истребителдерге басым жасайт, андыктан Россия маанилүү өнөктөшүнүн шагын сындырбаганга даяр.

Индия менен Алжирден тышкары, Су-57 истребителине Кытай, Мьянма, Вьетнам, Малайзия, Иран жана Түркия кызыгып келет. Чет өлкөлүк буюртмачыларынын саны улам өсө берери күтүлөт. Себеби төртүнчү муундагы истребителдер эскирип, акырындап артка чегинүүдө. Ал эми дүйнөлүк рынокто чагыбызда Су-57ге татыктуу атаандаш жок, жакын арада чыкпайт да өңдөнөт. Балким абадагы үстөмдүк үчүн россиялык эле МиГ-41 кармоочу истребитель менен теңтайлашып калар. Ал кыйла чоң жана кымбат болот, эске салсак, ал 2018-жылдан бери иштелип чыгууда.

Ойго келгис (болжоп болгус) кең келечеги

Америкалык Military Watch Magazine басылмасы Россия машинанын конструктивдик мүмкүнчүлүктөрүн гипер үндүү ракеталардын жана жаңы Saturn-30 кыймылдаткычы менен интеграцияланган алтынчы муундун деңгээлине жеткирсе, Су-57нин кадыры дагы артарын боолголойт.

Бирок азыртан эле Су-57 кармоочу истребитель менен сокку уруучу штурмовик учагынын функцияларынын уникалдуу айкалышына ээ. Төртүнчү муундагы истребителдерге караганда учактын массасына карата курал жүгүнүн катышы кыйла жогору. Ал эми жасалма интеллекти Су-57ге оор сокку уруучу С-70 "Охотник" учкучсуз (өз "мээси" бар, алты тонналык бомба жана ракеталар арсеналына барабар, аскердик радиусу 5000 чакырымга чейинки) аппараты менен эриш-аркак ийгиликтүү иштешин өбөлгөлөйт.

Бешинчи муундагы Су-57 истребители кыйла бир деңгээлде алтынчы муундун технологияларынан "токулганы" менен да кызыктуу жана уникалдуу. Эффективдүү аскердик бирдик, ошол эле убакта изилдөөчү полигону бар илимий лаборатория, келечекке жасалган кадам болуп саналат.

Учкуч тескей турган Су-57 жүктөлгөн милдеттеринин 90 пайызын автоматтык режимде аткарып, ал түгүл алдын ала даярдалган программа боюнча толугу менен автоматтык түрдө иштей алат. Су-57 истребителинин сокку уруучу "Охотник" менен интеграцияланышы жаңы тактикага жана алтынчы муундагы учактардын оор учкучсуз эскадрильяларын пайдаланууга жетелейт. Бул фантастика эмес.

РФ вице-премьери Юрий Борисов 21-декабрда алтынчы муундагы истребитель учкучсуз болорун, анан да жөн гана "канаттуу аскердик бирдик" эле эмес, натыйжалуу авиациялык комплекс жасалып жатканын жар салды. Андай учакты жерден же жанындагы учуучу аппараттан башкарууга болот.

РФ Коргоо министрлигинин буюртмасы менен илим-изилдөө иштери аткарылып, ар кыл варианттардын майнаптуулугу каралууда жана инженердик жазуулар деңгээлинде баалоо иштери жүрүүдө. Адатта мындай долбоорлор менен иштөө сыноо-конструктордук иштерден тарта беш-жети жылга чейин созулат.

Алтынчы муундагы истребителди чыгаруу жаатындагы иштер 2016-жылдын жазында башталган. Ошол тушта эле РФтеги Бириккен авиакурулуш корпорациясындагы аскердик авиация программасына жооптуу Владимир Михайлов жаңы табылга 2025-жылга чейин учуруларын айткан.

РФте азырынча учкуч тескеген, экспорттук дарамети жогору Су-57 бар. Ошентсе да баары бир бешинчи муундагы истребителди биринчилерден болуп Россиянын Аба-космостук күчтөрү алмакчы. Юрий Борисов: "Өзүбүздүн күчтөрдүн бардык керектөөлөрү толукталмайынча чет өлкөгө эч нерсе сатпайбыз. Коргоо министрлиги менен 76 машина алуу үчүн келишимге кол коюлган", - деп баса белгилейт.

Артыкчылыгынын сырлары

Расмий мүнөздөмөлөрү завод-өндүрүүчү тарабынан купуя сакталат. Бүгүнкү күндө ачык булактардан бизге белгилүү болгону: Су-57 аскердик комплекси "аба – аба", "аба – жер бети" тибиндеги кыйратуучу 15 авиациялык каражатты, анын ичинде 250 чакырымга чейинки аралыктан кемеге каршы гипер үндүү "Кинжалды" камтыйт. Куралдардын башка жаңы түрлөрү 2021-жылы сыналып бүтөрү пландалган.

Батыштагы аскердик көз караштан алып караганда россиялык Су-57 истребители – бешинчи муундагы аскердик авиатехниканын татыктуу өкүлү (технологиялар дүйнөдөгү эки-үч мамлекетке гана жеткиликтүү), алтынчы муунга да караандайт.

Сүйрөгүчтүн үч өлчөмдүү вектору Су-57ге абада бешинчи муундагы башка эч бир истребителдин колунан келбеген маневрларды аткарууга мүмкүндүк берет. "Каптал радиолокациялык станциялар" буталарды издөөдө жогорку автономдуулукту камсыз кылып, душмандын радарларына байкалтпайт. Ошону менен бирге эле бортундагы өз ракеталары үчүн буталарды аныктоонун натыйжалуулугун жоготпойт.

Интеграцияланган радиоэлектрондук күрөш системасы бардык ракурстан жана проекциядан тоскоолдуктарга карай мээлеп, өзү мээлөөчү учтары бар ракеталардан учакты коргойт. "Гималаи" радиоэлектрондук күрөш комплекси бир топ аралыктан, мисалы, F-22 жана F-35 истребителдерин таап, "зыянсыздандыра" алат.

Россиялык Су-57 истребители абадагы үстөмдүктү алуу үчүн жасалган, куралданышы, учуу аралыгы, ылдамдыгы жана маневрдүүлүгү боюнча технологиялык жактан F-22 жана F-35ти өзүнө дегеле караандатпайт. Популярдуу салыштыруулар дайым эле туура болбос. Ошентсе да америкалыктар F-22ни "аба – аба" ракеталарын жайгаштыруу үчүн гана долбоорлошкон. Андан соң курал койчу бөлүгүнө "аба – жер бети" ракеталарын батырууга аракет кылышты, андан майнап чыкпады.

Ошондо аларга кыйла арзан (бирдиги 100 млн. доллар турган) "көзгө чалдыкпас бомба ташуучу" F-35ти чыгарууга туура келди. Белгилей кетсек, көп буталуу бомбалоочу F-35 истребители – душмандын абадан коргонуу аракеттеринин аймагына "көрүнбөс-үнгө чейинки" нукта кирүүгө, жердеги буталарга сокку уруу жана башка учактардын аракеттерин кординациялоого жасалган басым.

Су-57, F-22 жана F-35ке алардын конструкцияларынын өзгөчөлүктөрү ар кандай аралыкта ар башка артыкчылыкты камсыздайт, бирок россиялык истребителдин технологиялык жана аскердик артыкчылыгын жокко чыгара албайт.

Көп функциялуу Су-57 алыскы жана жакынкы согуштарда аба буталарынын бардык түрүн жок кылууга, душмандын абадан коргонуу тутумун жеңүү менен жердеги жана суудагы буталарын кыйратууга, жайгашкан жеринен ыраак аралыктан аба мейкиндигине мониторинг жүргүзүүгө, касташкан тараптын авиациясынын аракеттерин тескөөчү системаны бузууга багытталган.

Машина технологиялык жактан жогорку даражада жакшыртылган, согуш шартында Сириянын асманында сыналган. РФ Коргоо министрлиги ири партияга, тагыраак, үч авиациялык полкту жабдуу үчүн бешинчи муундагы истребителден 76 бирдикке буюртма берип жатканы тегин жерден эмес.

Россиялык Су-57 истребители башкарууну автоматташтыруунун жана экипажды интеллектуалдук колдоонун жогорку деңгээли менен терең интеграцияланган авиониканын жаңы комплекси менен жабдылган. Башкача айтканда, учкучтар "автопилотко" толугу менен ишенип, тактикалык тапшырмаларды аткарууга бүт ыкласын кое алышат. Борттук жабдуусу реалдуу убакыт режиминде жердеги тескөөчү тутумдар жана авиациялык топтун ичинде маалымат алмашып, тапшырмаларды автономдуу аткарууга мүмкүндүк берет.

Су-57нин артыкчылыгы жана куралдануусу ыраак аралыктан да буталарды таап, коркунучтарды жок кыла алат. Америкалык F-22 менен F-35 бул жагынан артта калат. Мында биз согуштук аракеттерди жүргүзүү концепциялары жана технологиялардын комплекстик күрөшүнө күбөбүз.

438
Белгилер:
истребитель, күч, Россия
Тема боюнча
Сириядан Кавказга карай: россиялык Ми-28НМ жана Ми-26Т2В тик учактары сыналууда
Стволдуу замбирек орнотулган өзү жүрүүчү Спрут-СД. Архив

"Мындай нерсе жок эле": РФ кандай танк чыгарууга белсенди?

195
(жаңыланган 19:14 25.02.2021)
Кубаттуу, ыкчам жана кынтыксыз корголгон... Бир түрдүү зооттолгон "Бумеранг" платформасынын негизинде россиялык дөңгөлөктүү жаңы танк жаратууга камынды.

Шассинин өзгөчөлүктөрү анын ичинде ушундай эле жылмакай стволдуу замбирек орнотулган өзү жүрүүчү "Спрут-СД" өңдүү курал комплексин жыйноого мүмкүндүк берерин айтат РФтеги "Аскердик-өнөр жай компаниясынын" башкы директору Александр Красовицкий. Дөңгөлөктүү танкты Андрей Коц мүнөздөп чыккан.

Сирияда кереги тиет

Александр Красовицкийдин айтымында, зооттолгон "Бумеранг" платформасынын негизиндеги дөңгөлөктүү жаңы танкты иштеп чыгуу аяктап барат. К-16 зооттолгон транспортерун жылдын аягына чейин сыноо пландалган.

Инженерлер белгилегендей, бул аппаратты жасоодо илим жана техниканын эң акыркы жетишкендиктери пайдаланылды. Кийинки пландарда өзгөчө багыттагы жана бөлөк үлгүлөрдөгү техника – БМП К-17ни сыноо да бар. "Аскердик-өнөр жай компаниясынын" башкы директору "Бумеранг" платформасынын базасындагы дөңгөлөктүү танкын тез арада бүтүрүү өнөр жай үчүн маселе эместигин баса белгилейт.

Ушул сымал техникалар Советтер Союзунда да чыгарылган, россиялык армияда толук бурулчу мунарасында кубаттуу курал орнотулган дөңгөлөктүү танктар болгон эмес. Зооттолгон автомобилдердин тобун бейрасмий түрдө ушинтип атап коюшат.

Корголушу боюнча бул машиналар чынжырлуу танктарга жетпесе да, ыкчамдыгы, маневр жана жүрүш запасы боюнча алардан артык.

"Дөңгөлөктүү танктар аларга ылайык топурактуу өлкөлөрдө кеңири таралган, — дейт аскерий эксперт Алексей Леонков. — Мисалга Африкада. Атап айтканда, Түштүк Африка Республикасында дал ушундай дөңгөлөктүү танктарга басым жасашат. Алардын негизги артыкчылыгы — ылдамдык жана бир ремонттон кийинкисине чейинки жүрүш аралыгы. Эгер негизги танк он миң чакырымдан кийин бузулуп калса, анда замбиректүү зооттолгон автомобиль жүз миң чакырым жүрө алат".

Эксперттин айтымында, мындай техника ошол эле Сирияда күзөт өтөөгө көмөкчү болмок. Азыр ал жакта аскердик полиция "Тигр" жана БТР-82А зооттолгон автомобилдерин айдап жүрүшөт. Леонков зооттолгон транспортер өңдүү эле танк суу бөгөттөрүнөн да өтүп, жүрүп да, сүзүп баратып да ок атууга жөндөмдүү. Күчтүү куралдан улам аны рейддерде, ошондой эле жалпы операцияларда, атап айтсак, аскердик катарда, чалгында, чалгындоочу отрядда жана кайтарууда колдонууга болот.

Ири калибр

Болоттон жасалган танктар абдан бышык асфальт жолду да талкалап кетери жашыруун эмес. Жол катмарына дөңгөлөктүү техника зыян келтирбегендей болушу маанилүү. Дал ушул себептен зооттолгон оор техниканы атайын тартып келүүчү транспортерлор менен жеткирүүнү ылайык көрүшөт. Жүктөө жана түшүрүүгө бир топ убакыт кетет. Ал эми дөңгөлөктүү танк согуш талаасына дароо, эч кандай машакатсыз жана даярдыгы жок эле кирип кетет.

Келечектүү танктын негизги куралы катары атайын аба-десанттык күчтөр үчүн иштелип чыккан 125 мм замбиректүү курал бөлүгү каралган. Мындай жабдык өзү жүрүүчү "Спрут-СД" танкка каршы замбирегинде да орнотулат. Октоо автоматы жана 40 дүрмөттөн турган ок-дарысы менен турукташтырылган тутумдагы жылмакай стволдуу 2А75 Т-72 жана Т-90 танктарындагы 2А46М куралына окшош.

Өзү жүрүүчү аппарат тийиштүү калибрдеги ок-дарынын бардык түрү менен октолуп, анын ичинде танкка каршы коргонуу тутумундагы тескелүүчү ракеталарды да кое бере алат.

Ок бөлүгүнүн кошумча жабдылышы — 7,62 миллиметрлик калибрдеги танктык Калашников пулемету менен жупташтырылган курал. Мындай жабдууда замбиректик "Бумеранг" дүйнөдөгү эң күчтүү дөңгөлөктүү танкка айлана алат.

Батыш жана Чыгыштагы бул типтеги аскердик техниканын басымдуу бөлүгү 105 миллиметрге чейинки калибрге ээ.

Дөңгөлөктүү танктар менен НАТО жана Азия чөлкөмүндөгү бир нече өлкөлөр камсыздалган. Атап айтсак, Stryker платформасындагы америкалык M1128 MGS, ошондой эле франциялык AMX-10RC, япониялык MCV, италиялык Centauro танктары аталган мамлекеттердин куралдуу күчтөрүндө бар.

РФтин коргоо министри мурунку он жылдыктын башында Рим менен

Centauro партиясын сатып алуу боюнча макулдашкан. Ал түгүл бир нече машина Россияга сыноо үчүн алып келинген, бирок иш ошол менен тык токтогон. Италиялык дөңгөлөктүү танктар аскердик техниканын ишенимдүүлүгү боюнча Россиянын талаптарына төп келген эмес.

Танк жана дрондордун мизин кайтарат

"Бумеранг" дөңгөлөктүү платформасы алгач ирет 2015-жылдагы Жеңиш күнүндөгү парадда элге көрсөтүлгөн. Бул негиздеги техника БТР тибиндеги советтик жана россиялык транспортёрлордон кыйла көлөмдүү жана күчтүү келет.

Шосседе 750 ат күчүндөй кубаттуулуктагы ЯМЗ-780 кыймылдаткыч саатына 100 чакырымга чейин күүлөнө алат. Мотордук бөлүгү алдында, бул десантты арт жагынан салып жана түшүрүүгө мүмкүндүк берет.

"Бумеранг" тобундагы машиналар керамика камтылып, кат-кат сооттолгон, ал эми бул гомогендик коргоого караганда алда канча ынанымдуу. Азырынча дөңгөлөктүү БМП К-17 бул топтогу эң күчтүү машина деп саналат, бул универсалдуу "Бумеранг-БМ" аскердик модулу менен аралыктан башкарылат. Машина тандалма ок-дарылар жана кошумча 500гө чейинки дүрмөт менен камсыздалган 30 миллиметрлик автоматтык замбирек, ошондой эле эки эселенген "Корнет" танкка каршы коргонуучу эки ракета менен камсыздалган.

Мындан олуттуу варианты да бар: К-17 үчүн болжолдуу аскердик модулдардын бири — мүнөтүнө120 ирет ок атуучу 57 миллиметрлик замбиректүү АУ-220М "Байкал". Анын дүрмөттөрүнүн күчү батыштагы акыркы үлгүдөгү бардык пехоталык машиналар менен күрөшкө жетишерлик деп айтылат. Мындан тышкары, 57 миллиметрлик калибри учкучсуз учуучу аппараттарды, анын ичинде чакан көлөмдүүлөрүн да 12 чакырымга чейинки аралыктан таамай жок кылууга мүмкүндүк берет.

195
Белгилер:
армия, Россия, техника, илим, Сирия, танк
Тема боюнча
Россия менен Евробиримдик мамилеси: Лавровдун билдирүүсү көңүл чордонунда
Абу-Дабидеги көргөзмөгө коюлган россиялык коргонуу комплексинин саамалыгы
Көп багыттуу F-35 Lightning II бомбалоочу истребители. Архив

F-35тин солгундашы. Истребителди кайрадан "кара булут чулгоодо"

204
(жаңыланган 20:33 23.02.2021)
Көп багыттуу F-35 Lightning II бомбалоочу истребители америкалык артыкчылыкты жана аскердик күчтүн жогорку технологиялык символу болууга тийиш эле, бирок бул аппарат жаатында АКШнын Аскердик өнөр жай комплексинин мүмкүнчүлүгү чектелүүдө.

Себеби "бешинчи муундагы" көзгө чалдыкпас учактын солгундашына күбө болуп келебиз. F-35тин америкалык паркынын үчтөн экиси кыймылдаткычтагы көйгөйүнөн улам уча албайт. Аскерий баяндамачы Александр Хроленко бул аппараттын кемчилиги, келечегине сереп салган.

Учактын оголе көп орчундуу конструктивдик мүчүлүштүктөрү бар. Пентагон тарабынан белгиленген сыноодон өткөн жок, алигүнчө жалпы өндүрүшкө уруксат чыга элек. Ушул тапта АКШнын Аскердик аба күчтөрү F-35тен баш тартып, 4+ муундагы жөнөкөй  F-16 истребителин тандоого даяр.

Пентагондогулар F-35A учагына буюртманын көлөмүн адегенде 40 пайыздан ашуун, тагыраагы, 1 763төн 1050 учакка чейин кыскартууну сунуштаган. Аны менен катар эле АКШ Аскердик аба күчтөрү эски, бирок ынанымдуу F-16 Fighting Falcon учагына буюртма алуу жолун караштырууда.

F-35 бомбалоочу истребителин АКШ Аскердик аба күчтөрү беш жылдан ашуун убакыттан бери пайдаланып келет, бирок даярдыгынын төмөндүгү, майнапсыздыгы өнөкөткө айланган. АКШ коргоо министринин орун басары мурдараак F-35 Lightning истребителдеринин 36 пайызы гана учууга жарактуу экенин, калган машиналар "жарым-жартылай гана иштээрин" маалымдаган.

Бул аппараттардын даярдык даражасы азыраак деңгээлде Аскердик аба күчтөрү менен, ал эми көбүнесе стелс-каптагычы, кыймылдаткычы, навигация жана учкучтун өмүрүн тобокелдикке сала турган "оңдолгус" конструктивдүү кемчиликтерине жараша аныкталат.

F-35тин бирдигин 100 млн. долларга сатып алган АКШнын союздаштары жана өнөктөштөрүнүн (Улуу Британия, Норвегия, Израиль, Италия, Сингапур, Түштүк Корея, Япония) үмүтү акталган жок. Учак 5-муундагы көрсөткүчтөргө төп келбейт, аскердик даярдыкка дегеле караандабайт, башкача айтканда, багыты боюнча милдеттерин аткара албайт. Кызыгы, АКШнын Аскердик өнөр жай комплексинин "чийки" түзүлүшүн алууга кезек бүтпөйт.

Бириккен Араб Эмирлиги F-35тен 50 даана алууга келишим түзгөн. Израиль "чагылган" паркын үч эскадрилияга (40 машинага чейин) көбөйтүү ниетин билдирген. Мындай жагдайды АКШ менен "достукка" жамынган акы менен гана түшүндүрүүгө болот.

F135 – майнапсыз кыймылдаткыч

Мурда "чагылгандардын" үндөн ыкчам ылдамдыкта стелс-каптагычы жана корпусу талкаланып кетери, кычкылтектин берилишиндеги үзгүлтүктөр (учкучтарга) жана F-35тин программалык камсыздоосундагы мүчүлүштүктөр туурасында кабарланган.

Инженерлер пайдалануунун жүрүшүндө анын кемчиликтерин жоюуга аракет кылышат, бирок алар улам арбып барат. АКШнын Аскердик аба күчтөрүнүн F-35A истребители F135 менен жабдылган, аны америкалыктар "дүйнөдөгү каалаган истребителге пайдаланылчу эң кубаттуу" кыймылдаткыч деп санашат. Бирок дал ошол жабдыгы F-35тин начар иштешинин негизги себеби болуп эсептелет. Машакаттуу F135тин бир саат учушуна 31 миң, ал эми "карыя" F-16 – 8 миң долларга чукул каражат сарпталат. Айтмакчы, Pratt&Whitney компаниясынын F135 кошумча кыймылдаткычтары жетишсиз, ал тургай жай убакта да тартыштык бар. Кокус согуш тутанып кетсе, абага F-35 учактарынын үчтөн бири көтөрүлөт, кийин душмандын абадан коргонуу каражаттарынан да эмес, металлдын ысып кетишинен эле күндөн-күнгө азаят.

F-16ны алмаштырууга да мезгил жетти

АКШнын Аскердик аба күчтөрүнүн согушка жарамдуулугун сактоо үчүн F-35тин үлүшүн кыскартууга аргасыз. Алар заманбапташтырылган F-16 Fighting Falcon (бул менен 1979-жылы куралданышкан, бүгүн мындай типтеги 790 истребитель бар) менен алмаштырылат. Төртүнчү муундагы F-16 көп функциялуу жеңил истребителинин учуш массасы – 21,8 тонна, илмегинин 9 бурчунда 7,7 тонна авиабомба жана ракета ташый алат. Радиусу – 1700 чакырым, максималдуу ылдамдыгы – саатына 2200 чакырым. Аймактык жаңжалдар үчүн дурус машина, бирок "бешинчи муундан" бир кадам артка чегинүү (технологиялык деградация) жакшы эмес. Пентагондо бул жаатта компромисс издөөдө.

Аскердик аба күчтөрүнүн штаб жетекчиси генерал кенже Чарльз К. Браун "антиквариатты" (F-16) сатып алууга каршы чыгып, F-35ке салыштырмалуу арзан-жөнөкөй, бирок F-16га караганда заманга төп бир моторлуу жеңил истребителдин жапжаңы классын иштеп чыгууга чакырды. Кенже Браун буларды "төрт жарым же бештен кем муундагы" машиналар деп сыпаттады.

Америкалык Аскердик аба күчтөрү F-16 Fighting Falcon истребителдерин аскердик учактарга алмаштыруунун жөндүүлүгүн баалоо үчүн изилдөө программасын баштады. Изилдөө каржылык 2023-жылдын башталышына чейин аягына чыгат. F-35 батыш дүйнөсүндө өндүрүлгөн "бешинчи муундагы" жалгыз истребитель болгондуктан ушундай машакат жаратууда. Ал менен шарттуу түрдө атаандашкан кансыз согуш доорундагы төртүнчү муундагы конструкциялар, тагыраагы, Boeing өндүрүшүндөгү F-15 жана F-18 истребителдеринин эскилиги жетти.

АКШнын европалык союздаштары бешинчи муундагы өз истребителин чыгарууга батына элек, ал эми үмүтү үзүлгөн Улуу Британия, Польша, Бельгия, Италия америкалык F-35ти сатып алууга инвестициялап келет.

"Чагылганды" иштеп чыгууга жалпы чыгымдар 400 млрд. доллардан ашып кетти, бирок бул улуттук бюджеттик каражаттарды туура эмес пайдалануунун башаты гана болду.

АКШнын Куралдуу күчтөр боюнча сенаттык комитетте F-35ти "коргоо жаатындагы сатып алуулардын бузулган тутумунун хрестоматиялык үлгүсү" деп атап, ал эми кезегинде белгилүү саясатчы, эски учкуч Жон Маккейн: "F-35 программасынын рекорддук көрсөткүчтөрү нарк, график жана өндүрүмдүүлүк жаатында жаңжал жана апаат болгон", — деп мүнөздөгөн. Анткен менен "Чагылган" АКШ жана анын союздаштарынын Аскердик аба күчтөрүнүн бышыктыгын дагы далай сынай турганы анык.

"Көзгө чалдыкпас" F-35 долбоорунун мындай "өнөкөт" ийгиликсиздеринен улам россиялык Су-57 истребителинин технологиялык жетишкендиктери өзгөчө айырмаланат. Бул – гипер үндүү ракеталарды өздөштүрүп жаткан дүйнөдө чыныгы бешинчи муундагы истребителдеринин карлыгачы. Америкалыктар россиялык куралдын артыкчылыгын аргасыз моюнга алууда.

204
Белгилер:
истребитель, долбоор, АКШ
Тема боюнча
"Баарын ойрон кылат": Пентагон Россияны "ооздуктоого" камынды
"Кайырмак да беришет бекен?". Украинага тартууланган үйлөмө кайыктар
Беларусь президенти Александр Лукашенконун улуу баласы Виктор Лукашенко. Архив

Лукашенконун уулуна генерал наамы берилди

0
Виктор Лукашенко 26-февралда Беларустун Улуттук олимпиада комитетинин (УОК) президенттигине шайланган.

БИШКЕК, 1-мар. — Sputnik. Беларусь президенти Александр Лукашенконун улуу баласы Виктор Лукашенкого запастагы генерал-майор наамы берилди. Бул тууралуу РИА Новости аталган президенттин маалымат кызматынын сайтына таянып кабарлады.

"Полковниктер Владимир Куприянюк, Роман Подлинев, Николай Карпенков, Дмитрий Шахраев, Андрей Павлюченкого кезектеги генерал-майор наамы, ал эми Виктор Лукашенкого запастагы генерал-майор наамы ыйгарылды", — деп айтылат маалыматта.

Виктор Лукашенко 26-февралда Беларустун Улуттук олимпиада комитетинин (УОК) президенттигине шайланган.

"Анда Беларусь башчысы бийликти өзүнүн балдарына берүү боюнча маалыматты четке каккан. Тагыраагы, кеп бул жерде улуу баласы туурасында жүргөн. Мамлекет башчысы Виктор Лукашенко УОК жетекчилигине шайлангандан кийин мамлекеттик кызматкер болбой тургандыгын, аны президенттин улуттук коопсуздук боюнча жардамчылыгынан бошотушарын айткан", —  деп жазды РИА Новости.

Беларусь президенти Лукашенко буга чейин жаңы Конституция кабыл алынгандан кийин мамлекет башчысы болбой турганын жар салды.

0
Белгилер:
Виктор Лукашенко, генерал, УОК, Александр Лукашенко, Беларусь
Тема боюнча
Владимир Путин Садыр Жапаровго кунда жок кылыч белек кылды. Сүрөт
Пашиняндын "Искандерлер" боюнча айтканы элди экиге бөлгөндө. Россия эмне деди