Буревестник ракетасы. Архив

Технологиялык революция. Россияга "Буревестник" ракетасы эмне үчүн зарыл?

Ыраактыгы чектелбеген, өзөктүү кыймылдаткычтуу "Буревестник" канаттуу ракетасы кезектеги сыноолорго даярдалууда. Дүйнөдө ага тең келе алчу курал жок. Россия революциялык жогорку технологиялык курал жаатында алдыңкы сапта.

"Буревестник" ракеталык комплекси Жаңы Жерде (Түндүк муз океанындагы архипелаг) сыноолорго камдалып, 2021-жылдын биринчи жарымында кое берилиши мүмкүн.

Географиялык чекит узун аралыктагы ракетаны текшерүүгө мүмкүндүк берет, 9М730 жабдыгы эбак "аракетте". Аскерий баяндамачы Александр Хроленко аталган комплекстин алдыдагы сыноолорун утурлай анын артыкчылыктарына кеңири токтолгон.

Россиядагы ракета куруучу тармактагы булактарга таянсак, өзөктүк энергоорнотмолорду полигондо сыноолор 2019-жылдын январында аяктаган. Чексиз аралыкка учууну камсыз кылчу реактордун иш мүнөздөмөлөрү тастыкталган. "Буревестникти" сыноо аянты болгон Жаңы Жер архипелагындагы жогорку активдүүлүктү 2020-жылдын август айынан тарта CNN спутниктик сүрөттөрү да каттап келет.

Ал эми япониялык The Diplomat басылмасы АКШ өкмөтүндөгү булактарына таянуу менен "Буревестникти" 2016-жылдын июнь айында Астрахань облусунда "Капустин Яр" полигонунда сынашканын маалымдаган. Ондон ашуун атылган, бул технологиялык революция болуп саналат (НАТОнун классификациясы боюнча бул – SSC-X-9 Skyfall).

Радарларга байкалбас "Буревестникти" спутниктен жана старт учурунда гана байкоого болот. Канаттуу ракетаны 50-100 метрлик бийиктиктеги учушуна көз салып же ага бөгөт болуу дээрлик мүмкүн эмес. Чектелбеген аралык жана өтө жапыз бийиктикте уча алган "Буревестник" өнүккөн өлкөлөрдүн абадан коргонуу жана ракетага каршы коргонуучу тутумдарынын эч бирине "көрүнбөйт".

Адистердин баамында, жаңы "Буревестник" канаттуу ракетасы куралданууга кабыл алынышы 2027-жылга барат. Анын аскердик дарамети 2026-жылдын 5-февралына чейин узартылган россиялык-америкалык Стратегиялык чабуул коюучу куралдарды чектөө жана азайтуу келишиминде (СНВ-3) камтылган эмес.

Өзгөчө конструкция

Кадимки канаттуу ракетанын реактивдүү кыймылдаткычы бар жана аракет радиусу чектелүү. Мисалга, "Томагавк" канаттуу ракетасынын бортундагы күйүүчү майдын көлөмү 2500 чакырымга чейин учууга мүмкүндүк берет.

Өзөктүк кыймылдаткычтуу ракета из калтырбастан он миңдеген чакырым аралыкка атмосферанын тыгыз катмарларында планетаны бир канча ирет айланып өтө алат.

"Буревестниктин" мүнөздөмөлөрү аны стратегиялык багыттагы курал деңгээлине жеткирет. Жер жүзүн айлангыдай аралыкта кадимки ракеталарды пайдалануу мүмкүн болсо да, максатсыз болуп саналат. Стратегиялык канаттуу ракеталар так координаттар менен душмандын маанилүү объектилерин жок кылууга багытталган.

Татаал траекторияда өтө узун аралыкка учуп келген "Буревестниктин" бутасын таамай талкалай алышы үчүн башкаруунун жана спутниктик менен инерциялык навигациянын негизинде өзү мээлөөчү, ошондой эле багыт алган жердин рельефине жараша учушту коррекциялоочу аралаш тутум зарыл.

Өзөктүк кыймылдаткычы бар канаттуу ракета кандай гана болбосун, планетанын масштабында чектөөсүз траекториядагы бутасына карай багыт алып, кооптуу убакта бир канча сутка же бир нече ай абада кармала алат.

Ачык булактардагы маалыматтарга таянсак, "Буревестник" – жерде жайгаштырылган канаттуу ракета, мүнөздүү формадагы фюзеляж планери жана бортторундагы кыймылдаткычтын түз учтарына, жогору жайгаштырылган канатка ээ.

"Буревестник" Х-101 жабдыгына окшош, аба жана деңиздеги бардык канаттуу ракеталардан кыйла көлөмдүү (узундугу 10 метрдин тегерегинде). "Буревестниктин" сынамык атылышы жердеги транспорттук-ок атуучу контейнерлерде жүргүзүлгөн (https://www.youtube.com/watch?v=okS76WHh6FI&feature=emb_logo). Конструкциясы тууралуу жана энергетикалык орнотмолорунун мүнөздөмөлөрү боюнча так маалыматтар жок, бирок аракет этүү принциби учуш убактысын (саатына 800-1000 чакырым ылдамдыкта) суткага, айларга, жылдарга узартууга мүмкүндүк берет. Аба-реактивдүү кыймылдаткычы кыйла чоң кубаттуулуктагы өтө ыкчам өзөктүк реактордун негизинде жасалган.

Кое берилген соң ылдамданышы жана тартылышы капталдарындагы учтары аркылуу кирген атмосфералык аба менен кармалат. Аба реактордун жылуулук алмашкычында бир нече миң градуска чейин ысыйт жана учтары аркылуу чоң басым менен чыгат. Түзүлүшү ынанымдуу, экологияга же планетадагы РФтин ак ниет коңшуларга коркунучу жок. "Буревестник" – ооздуктоо инструменти, өч алуу куралы. Мындайды Россия гана демилгелеп жана металлда жасап чыгып, учура алды. Эске салсак, АКШда өткөн кылымдын ортосунан бери мындай долбоорлор майнапсыз болуп келет. Атап айтсак, Nuclear Energy for the Propulsion of Aircraft, Atomic Energy Commission, Aircraft Nuclear Propulsion долбоорлору.

Коопсуздук тутуму

Кармалбас "Буревестникти" пайдалануу боюнча душман онлайн-режимде – ири аскердик объект же мегаполистердин бири жок болгон учурда гана биле алат. Болжолдуу агрессор кадамын таштаганча жети өлчөөгө аргасыз, жаңы канаттуу ракета дүйнөнү дагы бекемдейт.

Вашингтон стратегиялык аралыктагы россиялык келечектүү курал тутумдарынан улам тынчсызданат. Тегин жерден президент Жо Байдендин жаңы администрациясы СНВ-3 келишимин аткарылбай турган эч кандай шарт койбостон мындай тездикте узартууга макул болду.

Өзүңө кабары дайын душман менен элдешкен оң, ал эми бул тараптардын ар бири үчүн келишим менен чектелген: 700 континенттер аралык баллистикалык ракета, суу түбүндөгү кайыктардагы баллистикалык ракета жана оор бомбалоочу, ошондой эле 1550 ракета, 800 орнотулган жана орнотулбаган ракета кое берүүчү түзүлүш.

Бүгүнкү мезгилде көзөмөл механизми бузулган жок жана бул жакшы жагдай. Коопсуздук тутумун өнүктүрүүнүн ар кыл варианты каралат. Стратегиялык туруктуулук жөнүндөгү РФ менен АКШнын келечектеги келишимдеринде ракетага каршы коргонуу тутумдары, өзөктүк эмес жабдуудагы таамай тийчү, кибер жана космостогу куралдар да камтылышы ыктымал.

27-январда РФ Мамлекеттик Думасынын Коргоо комитетинин жетекчиси Владимир Шаманов сүйлөшүүлөрдүн мындан аркы жүрүшүндө стратегиялык өзөктүк куралдардын жаңы түрлөрү Стратегиялык чабуул коюучу куралдарды чектөө жана азайтуу чаралары жөнүндөгү келишимге киргизилиши мүмкүн экенин билдирди.

Экинчи жагынан, аскердик эксперттер Россия гипер үндүү "Авангард" тутумун "курмандыкка чалышы" ыктымал, бирок келишимге жаңы, гипер үндүү жана тактикалык өзөктүк куралдарынын баарын киргизүүгө эч качан жол бербей турганын белгилешет. Кандай болгон учурда да "компромисстердин" тизмегинде качандыр бир "Буревестник" пайда болуп калары арсар. СНВ-3 келишиминин узартылышын ашыкча көкөлөтө берүүнүн кажети жок, Москва менен Вашингтондун өз ара мамилесинин келечегин болжоп болбойт. Келишимди узартуу менен америкалыктар эч нерсе жоготпойт, кийин деле көз карашын өзгөртүп, документтин ХIV беренесинин 3-пунктуна таянып СНВ-3 келишиминен заматта чыгып кетиши мүмкүн.

Вашингтон ар кандай доклад жана программаларда расмий түрдө Россияны Кошмо Штаттардын аскердик каршылашы жана душманы катары атап келет. НАТОго мүчө-өлкөлөр "Россиянын кайсы бир агрессивдүү аракеттерине" сокку берүүгө даярданып, "эрежесиз оюнду" улантууда.

РФ президенти Владимир Путиндин пикиринде, "аскердик күчтү бир тараптуу колдонуу тобокелдигин кескин көбөйтүп" жана "планетабызда кан күйгөн жаңы жерлердин пайда болуу ыктымалдыгын арттырууда". Мындай шарттарда мылтыгыңды октолуу тутуп, ал эми "Буревестниктер" жана "Посейдондорду" стартка даяр кармоо керек.

Белгилер:
сыноо, Мамлекеттик Дума, келишим, АКШ, Россия, ракета, курал-жарак
Тема боюнча
6-муундагы кубаттуулук. МиГ-41 качан көккө кое берилет?
Эркиндик айкелинин дубалга тартылган сүрөтү. Архивдик сүрөт

АКШ санкциялары менен дүйнөгө болгон үстөмдүгүн кыйратууда

(жаңыланган 19:03 11.04.2021)
Батышта Россияга каршы санкциялар иши өз нугунда жүрүүдө: бири аларды иштеп чыгып киргизип жатса, башкалары жаңы санкциялардын кесепетин болушунча азыраак тартуунун жолун издөөдө.

Айрым учурда ролдору бири-бирине дал келбейт, башкача айтканда, адегенде чектөөлөр киргизилет. Кийин демилгечилер өздөрү ошол "саздан" чыга албай чабалактайт. Ал эми Россия элитасын улутташтыруудан технологиялык автономдуулукка дейре өзү пландагандай жаңы, бирок өз пайдасы үчүн бир өңчөй чараларды пайдаланат. Дал ушул жагдайга баам салган Ирина Алкснистин макаласы РИА Новости агенттигине жарыяланды.

Ушул тапта Вашингтон "Түндүк агым – 2" долбоорунун тагдыры боюнча сүйлөшүүлөрдү жетектей турган атайын өкүлдүн талапкерлиги аныкталат. Politico басылмасы америкалык Юстиция министрлиги курулуп жаткан газ түтүгүнө каршы кезектеги дагы эки санкцияны жактырганын жазып чыкты. Анын алкагындагы кара тизмеде газ түтүгүнүн курулушу жана кийинки пайдаланылышына жооп бере турган швейцариялык Nord Stream 2 AG компаниясы, анын жетекчиси Матиас Варниг да бар.

Чектөөлөрдүн долбоору келерки айда конгресстин кароосуна коюлуп, бекитилиши күтүлөт. Ачыгы бул так эмес, анткени газ түтүгүнө каршы жаңы чаралар боюнча акыркы чечим азырынча кабыл алына элек. Ал түздөн-түз сүйлөшүүлөргө жараша экени ачык. Бирок ал Россия менен эмес, Европа менен жүргүзүлмөкчү. Байдендин администрациясы үчүн башкы көйгөй дал ушунда. Конгрессте эки партиянын өкүлдөрү тең "Түндүк агым – 2" долбоорун эмне болсо да токтотууну талап кылып, ал эми Берлин айтканынан кайтпай газ түтүгүн коргоп көшөрүүдө. Сүйлөшүүлөрдүн натыйжасында Вашингтон стратегиялык объектисин коргогон Батыш Европанын бул маселеде жумшарышына үмүттөнөт. Анткен менен журналисттер улам эскертип тургандай, газ түтүгүнүн курулушу 96 пайызга аяктап калды.

Дээрлик бул менен катар эле Politico Bloomberg шайлоого кийлигишүү жана хакердик чабуулдар үчүн Россияны жазалоонун жаңы чараларынан баян салды. Кезектеги кара тизменин "Россиянын президенти Владимир Путинге жакын адамдар" менен толтуруудан тышкары, администрация "АКШда дипломатиялык вазийпаны жамынып иштеп жүргөн россиялык чалгынчыларды" өлкөдөн чыгаруу мүмкүнчүлүгүн кароодо. Ошентсе да Вашингтон үчүн анын "кыйыр таасирлери" да жок эмес. Жакында эле Россиянын АКШдагы элчиси Анатолий Антонов айткандай, Кошмо Штаттар РФ дипломаттарына каршы визалык согушту баштап, анын айынан эки миссия тең кызматкерлердин, анын ичинде техникалык адистердин тартыштыгына кабылууда. Анткен менен россиялык элчиликтин кызматкерлери бардык кыйынчылыктарга туруштук берүүдө.

Пандемия маалында видеоконференция кызматын көрсөтүп, иши өргө чыккан Zoom компаниясы Россия жана КМШ өлкөлөрүнүн мамлекеттик мекемелери жана компанияларын тейлөөгө тыюу салган. Бирок бир нече саат өткөн соң Zoom компаниясынын өкүлү "мамлекеттик, ошону менен бирге эле жаңы жана азыркы пайдалануучулар таратуучулар аркылуу эмес, сайт аркылуу түз кайрылып аккаунт сурай алышарын" тактаган. Компаниянын мындай кетенчиктегенин да түшүнүүгө болот, себеби былтыр россиялык мамлекеттик мекемелер, атап айтканда, жогорку окуу жайларына байланышкан кардарлары кыйла көп киреше алып келип турган. Эми алар жапырт жана шашылыш түрдө альтернативдик аянтчаларга кетүүдө.

Акыркы жылдары санкция темасы Россиянын ичиндеги процесстер да, эл аралык алакалар үчүн да кадыресе көрүнүшкө айланган. Глобалдык бир полярдуу дүйнөдө санкциялар – чындап эле азыркы тутумду бекемдөө инструменти.

Эң катаал чектөөлөр менен да жашоого болот, муну Иран да, Корея элдик-демократиялык республикасы тастыктап келет. Тек гана мунун куну чоң, калктын турмуш сапаты начарлайт, улуттук экономиканын жоготуулары көбөйөт, технологиялык жактан артта калат.

Санкциялар ал убакта өлкөнү заманбап өнүккөн цивилизациядан чийип салууну түшүндүргөн. Мейли бул жогорку технологиялык долбоорду ишке ашыруудагы кыйынчылык болсун, ал түгүл жөнөкөй эле жагдай, мисалы, SWIFT тутуму өчүрүлгөндүктөн жарандар дүкөндө да карта менен төлөй алышпайт. Жети жыл мурунку РФке каршы санкциялар да өлкөнү ушундай эле залалга батырган. Бирок бара-бара санкциялар батыш биримдигин да, АКШ үстөмдүк кылган жалпы дүйнөлүк тутумга да таасир этпей койбоду. Ал убакта өгөйлөнгөн өлкөлөрдү технологиялык жактан солгундатуу механизми болсо, азыр санкциялар, тескерисинче, алардын өнүгүшүнө өбөлгө болчу инструментке айланып отурат. Муну түшүнүп турса да, дүйнөдө Кошмо Штаттардын үстөмдүгүн кыйратып бүтүрсө да Вашингтондогулар бул кадамдан артка кайта албай турушат.

Белгилер:
экономика, КМШ, чектөө, санкциялар, Европа, АКШ, Россия
Тема боюнча
Батыш жаңы санкциялар менен темир көшөгөнү тартууда. Сереп
Климатты бетке кармап... АКШ кантип жашаш керектигин үйрөтүүгө өтчүдөй
Россиялык Белгород эксперименталдык субмаринасы. Архив

Россиялык "Посейдон" Тынч океанга карай камынууда

(жаңыланган 13:13 11.04.2021)
Тынч океандагы базалардын бири "Посейдондорду" ташуучунун дайымкы жайгашкан жайына айланмакчы. Ошону менен бирге эле суу түбүндөгү эксперименталдык кайык Дүйнөлүк океандын каалаган жеринде белгиленген милдеттерин аткара алат.

НАТОго мүчө-өлкөлөрдүн күчкө таянып Россия менен диалог куруу аракеттери мыйзам ченемдүү түрдө катуу каршылыктарга кабылат. Россиянын батыш чек араларына жакын жердеги АКШ армиясынын чагымчылдыктарынын күч алышы батыш, Кошмо Штаттардын тынч океандык чек араларына да чагылбай койбосу анык. Бул тууралуу РФтин "өнөктөштөрүнө" россиялык "Белгород" эксперименталдык субмаринасы жана "Посейдон" термоөзөктүк тутуму эскертип турарын белгилейт аскерий серепчи Александр Хроленко.

Жума ортосунда аскердик-өнөр жай комплексиндеги булактар деңиз учкучсуздарын ташуучу "Посейдон" – 09852 долбоорунун эксперименталдык "Белгород" суу түбүндөгү атомдук кайык сүзүүгө бет алганы турат (реактору кое берилген). Субмарина сентябрга чейин сыналып, океанда күзөт өтөйт. Шварттык сыноолору жүрүп, башкача айтканда кеменин курулуш сапаты, тетиктеринин топтоштурулушу жана жөнгө салынышы, жүк алдында энергетикалык орнотмосун, бышыктыгы жана коопсуздугу текшерилүүдө.

Тынч океандагы базалардын бири "Посейдондорду" ташуучунун дайымкы жайгашкан жайына айланмакчы. Ошону менен бирге эле суу түбүндөгү эксперименталдык кайык Дүйнөлүк океандын каалаган жеринде белгиленген милдеттерин аткара алат. 2027-жылга чейинки куралдануу боюнча мамлекеттик программасынын алкагында Россия ушундай үч субмарина курмакчы.

"Посейдон" тутумун иштеп чыгуу тууралуу РФ президенти Владимир Путин алгач ирет 2018-жылы айткан ("Белгород" сууга 2019-жылдын 23-апрелинде кое берилген). Буталарынын кеңири спектрин – болжолдуу душмандын абада ташуучу топтору, жээкти бекемдөө жана инфраструктурасы экенин белгилеген.

Мындай инструменттер менен Путин "тек полярдуу оюндун" эрежелерин өзгөртүүгө убада берген. АКШнын ошол туштагы расмий өкүлдөрү "техникалык жактан жасалма жана укмуш" деп россиялык жаңы куралды ачык эле жактырышкан эмес. Бүгүн Кошмо Штаттардын Мамлекеттик департаменти континенттер аралык 2М39 "Посейдон" өзөктүк торпедасынын пайда болгонуна өзгөчө тынчсызданып туру.

Жалпысынан РФтин "өнөктөштөрүн" аталган мамлекеттин улам өнүгүп жана бекемдеп бараткан Аскердик-деңиз флоту чочулатат. Business Insider басылмасынын маалыматына таянсак, анын курамында 360 чакты кеме, анын ичинде 59 субмарина (баллистикалык ракеталуу суу түбүндөгү 12 крейсер) иштейт.

Өзгөчө мүнөздөмөлөрү

09852 долбоорундагы суу түбүндөгү "Белгород" көп буталуу атомдук кайыгы – үчүнчү муундагы 949А долбоорунун "Антейдин" эксперименталдык кайра жаралышы. Эске салсак, бул "Посейдон" тутуму үчүн атайын ыңгайлаштырылган. Ал эми эң башта "Антейлер" ракетага каршы коргонуучу "Гранит" ракеталарын ташуучусу эле.

"Посейдон" – ооздуктоонун абдан олуттуу инструменти. Өзөктүк энергетикалык орнотмосу бар стратегиялык континенттер аралык терең суудагы аппарат 10 миң чакырымга чейинки аралыкка 1000 метрлик тереңдикте сүзө алат. Сыноолор аталган системанын "укмуштай" мүнөздөмөлөрүн жана ыраак аралыкты багындыра аларын чындап эле тастыктады. Автономдуу "Посейдон" болжолдуу душмандын колундагы азыркы жана келечектеги субмарина, торпеда жана ракеталары жете алгыс тереңдик жана ылдамдыкта жүрөт. Океанда ушундай "торпеданын" изин табыш оңой эмес, жай ылдамдыкта дээрлик дабышсыз сүзөт. Автономдук башкаруу системасы кайыктарга каршы чектерди, коргонуунун бөлөк тутумдарын таап, басып өтүп, таамайлыгын кепилдөөгө мүмкүндүк берет.

Узундугу 24 метр, диаметри 1,6 метрлик өзөктүк кыймылдаткычтуу аппарат кадимки жана мегатонналык ок бөлүгү менен жабдылган. Мындай куралга Россия гана ээлик кылат, дүйнөдө эч бир өлкөнүн "Посейдондон" коргонуу каражаты жок.

Мурдараак АКШ башында турган жамааттык Батыш Чыгыш Европада ракетага каршы коргонуунун глобалдык тутумун түзүп НАТОну чыгышка карай кеңейтүү менен РФтин стратегиялык өзөктүк күчтөрүнүн дараметин жок кылууга тырышкан. Россиянын чек араларына жакын аймактарга сокку уруучу "Томагавк" жана орточо ыраактыктагы башка ракеталарды жайгаштыруу ниетин көздөгөн. "Посейдон" континенттер аралык тутуму РФтин "өнөктөштөрүнө" агрессор сөзсүз жазасын ала турган көп полярдуу дүйнөнүн катаал чындыгына кайтууга түртөт.

"Кыямат күндүн торпедасы" Америкалык стратегиялык командачылыкты (STRATCOM) 2019-жылдын февралындагы сыноолордун башында эле тынчсыздандыра баштаганы тегин жерден эместир. Конгресстеги угууларда STRATCOM жетекчиси Жон Хайтен "Посейдон" жаңы курал тутуму катары СНВ-3 келишиминдеги чектөөлөргө кирбестигин, ошондой эле Кошмо Штаттарда аналогу иштелип чыга электигин билдирген. Континенттер аралык учкучсуздардын штаттык ташуучусунун топтомун 098531 долбоорундагы "Хабаровск" суу түбүндөгү атомдук кайыгы ачат.

Субмаринанын негизги мүнөздөмөлөрү купуя сыр. Ачык булактардагы маалыматтарга караганда, кеме жапжаңы өзөктүк энергетикалык түзүлүш менен жабдылып, "Кыямат күндүн учкучсуз торпедаларынан" алты бирдикти бортунда ташый алат.

Сыйымдуулугу – 10 миң тоннанын тегерегинде, суу түбүндөгү ылдамдыгы – 32 узелге дейре, чөмүлүү тереңдиги – 500 метр, автономдуулугу – 120 сутка, экипажы 100 кишиден кем эмес. Субмаринанын корпусу жаңы "Борей" стратегиялык ракета ташуучуну эске салат.

Мында учкучсуз Түндүк жарым шардын каалаган бурчунан АКШнын жээктеги чийиндерине жете аларын эске алуу зарыл, бирок ал РФке каршы агрессия жанданган күндө гана колдонулат. Эске салсак, Кошмо Штаттар орто жана кыска аралыкка багытталган ракеталарды жок кылуу боюнча келишимден жок шылтоо менен чыгып, былтыр аскердик бюджетин 750 миллиард долларга чейин (бул сумма дүйнөнүн калган бүт өлкөлөрүнүн жалпы коргонуу чыгымдарына барабар) өстүргөн.

Россиянын көп буталуу океандык тутуму – көзү түз эмес "өнөктөштөрүнө" кулак кагыш, Чыгыш Европада Пентагондун жана НАТОнун сокку уруучу дараметинин кооптуу топтоштурулушуна ассиметриялык жообу болмокчу.

Белгилер:
экипаж, суу, Дүйнө, АКШ, Россия, ракета, курал-жарак
Тема боюнча
"Циркон" Россиянын жээктеринен батыш кемелерин "кубалады"
F-35 өзүн-өзү кыйратып... Келтирген зыяны — 2,5 млн. доллар

Үчүнкү өлкөдө жолугалы. Байден Путин менен телефондон сүйлөшүп, сунушун айтты

Эки тарап тең Россия менен АКШнын гана кызыкчылыгы эмес, бүткүл дүйнө коомчулугуна пайда алып келүү үчүн мындан ары дагы диалогду улантууга даяр экенин билдирди.

БИШКЕК, 14-апр. — Sputnik. АКШ президенти Жо Байден Россия лидери Владимир Путин менен телефон аркылуу сүйлөшүп жатып, кесиптешин жакынкы айларда үчүнчү өлкөдө жолугушууга чакырды. Бул тууралуу Кремлдин маалымат кызматына шилтеме берип РИА Новости жазды.

Билдирүүгө караганда, сүйлөшүү АКШнын демилгеси менен уюштурулду.

Президент Байден Россия менен мамилесин турукташтырып, жакшыртууну максат кылганын айтты. Ал жакынкы айларда жолугуп, Россия менен Американын ортосундагы көйгөйлүү маселелерди талкуулоого чакырган.

"Байден Крым жана Украина менен чектешкен аймакта орус аскерлери күчтөндүрүлгөнүнө тынчсызданып жатканын айтып, бул өлкөнүн эгемендүүлүгү менен аймактык бүтүндүгүнө АКШ кызыкдар экенин кошумчалады. Мындан тышкары, "эгер Россия киберчабуул жана шайлоолорго аралаша турган болсо", Вашингтон өз кызыкчылыгын коргой турганын билдирди", — деп айтылат кабарда.

Россия президентинин маалымат катчысы Дмитрий Песковдун айтымында, Россия буга чейин деле АКШдагы шайлоолорго аралашпагандыгын айтып, айыптоолорду курулай жалаа жабуу деп баалап келгенин билдирди.

Эки тарап тең Россия менен АКШнын гана кызыкчылыгы эмес, бүткүл дүйнө коомчулугуна пайда алып келүү үчүн мындан ары дагы диалогду улантууга даяр экенин билдиришти.

Лидерлер алдыда Афганистандагы кырдаал, Ирандын өзөктүк программасы, климаттын өзгөрүшү сыяктуу көйгөйлүү маселелер боюнча сүйлөшүүлөрдү жүргүзөрү белгилүү болду.

Белгилер:
Россия, талкуу, сүйлөшүүлөр, Владимир Путин, Жо Байден, АКШ