Айдоочу такси айдап бара жатып тамеки тартып жатат. Архив

Кыргызстандан кеткен жакшыбы же калган оңбу. Ойго салган баарлашуу

848
(жаңыланган 14:01 20.02.2021)
Мындай учкай кеп дүйнөнүн каалаган өлкөсүнүн каалаган калаасында кай убак болбосун уланып кетмектир. Ал баарлашуу бул ирет Бишкектин көчөлөрүн аралаган таксинин айдоочусу менен болду.

— Бул жактан кетиш керек! Акыркы окуялар элдин баарынын бетине түкүргөндөй эле көрүнүш болду. Акыйкаттыкты өлтүрдүк биз...

— Кеткенге камындыңызбы?

— Ооба. Балдарымдын жашоосу айланабыздагы нерселерге байланып калышын каалабайт элем. Адилеттүүлүк деген калбады.

Таксист менен бул баарлашуубуз соңку убакта ар кыл адамдардан, анын ичинде жакындарымдан угуп жүргөн кептин кезектеги эле төгүлүшү болду. Ошондон улам ага да, башкалардын баарына да өз пикиримди билдирүүгө чыгындым.

— Жакында эле "Коконун сыры" деген бир мультфильм көрдүм. Анда наркы дүйнөдө рухубуз бул жалгандагы адамдардын бизди эстеп-эстебегенинен көз каранды болору тууралуу ой камтылыптыр.

Менимче, мунун кандайдыр чындыгы бар. Биринчиден, өлүмгө жетелеп, же тескерисинче, тирилтип койчу энергетиканын күчүнө ишенем. Тегин жерден аксакалдардан бата алуу деген салтыбыз кылымдарды карытып келе жатпагандыр. Кадыр-барктуу адамдардын бири алакан жайып сага жакшылык тилейт, калгандары бир ооздон "Оомийин" деп чын ниеттен коштойт. Башкача айтканда, бир топ адам бир эле сигналды жолдойт. Мындай оң энергиянын уюткусу бата алган адамды коргойт.

Эгер бирөөлөрдү алдап кеткен болсоң, кыянаттык кылсаң, элдин эсинде жаман жактарың айтылат. Катуу каргышка калат. Биз өткөндөн кийин жаман жагыбыздан эскеришсе, элге жакпаган из калтырган болсок, тиги дүйнөдө түйшөлөрүбүздү бөркүмдөй көрөм. Ал түгүл жашап туруп деле андай жагдайдан адам азап тартышы ыктымал. Анан да бул жакындарыбызга аларга болгон сүйүүбүз аркылуу чагылышы мүмкүн. Себеби бул – күчтүү, космостук, руханий байланыш.

Буларды эмнеге саймедиреп турам? Баары бир адилеттүүлүк, теңсиздикти ордуна койгон нерсе бар, аны "карма" деп коюшат. Тирүүлүктө жазасын алып үлгүрбөсө да, акыреттеги сот баарын орду-ордуна коёт.

Элестетип көрүңүз... Миллион адамды алдап, ошончо кишинин каргышына калдыңыз дейли. Мындай ойдун өзүнөн эле адамдын үрөйү учат. Же, тескерисинче, ошол миллиондор сизди алкап, ыраазычылыгын айтып бүтө албай турат дейли. Канчалаган жылуу, күч берчү энергиянын уюткусу сизге багытталат! Андан кандай дем-кубат аласыз, күчүңүзгө күч кошулат...

Далай адам тарыхта атын калтыргысы келет. Бул жалгандан узаганда эл аларды кандай эскерери, маселен, "аа, бул баягы элдин ырыскысын уурдаген немеби?" же "татыктуу жан эле" дешерин түк ойлонуп коюшпайт. Болбосо, түшүнгөн кишиге бул өтө маанилүү эмеспи.

Клетка өлбөс болууга умтулат дешет, бирок анда аң-сезим жок. Тек гана чексиз санга бөлүнүп, көбөйөт. Ошентип ал башка клеткаларда жашап, өз генин сактайт, андан ары уланат.

Ушундай эле бир клеткалуу сымал ашкере тайыз кишилер да бар. Мисалы, далай аялдардын боюна болтуруп, бирок ошол өз канынан жаралган балдардын кийинки тагдырын ойлоп да койбойт.

Бир клеткалуу адамдар. Акыл калчашпайт, тек гана биологиялык жашоосун сүрөт, дайым инстинкттеринин айдактоосунда күн кечирет.

Өлбөс болуунун бөлөк түрү бар. Кинодогудай, Ахиллес "Жоокерлердин баарына эмне керек, ал эми мага көбүрөөк эмне зарыл?" деп суроо салгандай эле нерсе. Албетте, ДАҢК эмеспи. Адамдар атагы кылымдан-кылымга даңазалансын деп өз өмүрүн курмандыкка чалууга даяр болушкан. Баса, бул "Коконун сырындагы" ойго шайкеш, ошол идея менен үн алышып турат. Маркумдар үчүн аларды тирүүлөрдүн эстеп турганы маанилүү.

Көп эле ойлонуп, сары санаага бата бербеңиз, адилеттүүлүк деген баары бир жашайт. Мыйзам иштейт, алдап, көз жазгырып кетүүгө мүмкүн эмес. Мен буга ишенем. Кыргыздарда муну "бир жеринен болбосо, бир жеринен чыгат" деп коюшат.

Бул жактан эмнеге кеткиңиз келгенин балким түшүнөт да чыгармын. Тегерегиңде башаламандык өкүм сүрүп турганда оюң кайдан бир жерде болуп, кайдан көңүл тынчысын. Шаарды аралап кайсы жакты гана карабайлы, башаламандык. Бардык жерде мыйзамсыздык (болгондо да ошол мыйзамдын сакталышына көбүрөөк көз салат дегендердин өздөрү да бузуп жаткан учурлар бар).

Баары майдадан башталат: адамдар көчөдө түкүрүнөт, таштандыны туш келди ыргытат, ал эми бул кичинеден болсо да эрежелерди сактабагандык. "Майда" дейбиз, жол чырак кызыл жанып турганда да өтүп кетели дейбиз. Улам арылап кете баштайбыз... Светофордон жанагыдай кылсак, демек, кийинки дагы бир мыйзамсыздыкка барасың, маселен, адамды чаап жибергенден кайра тартпайсың. Ал эми буга да жол берилсе, акыры киши өлтүрүп коюу деле кадыресе нерседей көрүнүп калышы мүмкүн.

Айланабызда тартип орномоюнча, туруктуулук болмоюнча ойлорубузду иретке салуу өтө кыйын. Мыйзамдын аткарылышын жана ой да иреттүү болушун самагандар тегерегиндеги болуп жаткан кемчиликтерге макул эмес, аны түздөп, жаман нерселерди өзгөртүүгө тырышат. ...Ошондуктан алардын өлкөдөн эмне үчүн кетүүнү каалаганы мага түшүнүктүү.

Бирок мен үчүн дагы бир маанилүү нерсе – өз үйүмдүн касиети, анын деми, өз экендиги. Узак сапардан кайтканымда ошол байланышты туям. Албетте, башка жерлерди көрүү, таануу деген нерсе жакшы. Бирок өз жеримде өзүмдү ээн-эркин, кожоюн сезип, көкүрөк кере дем алам. Бул эмне деген касиет экенин деле түшүнбөйм. Дүйнөнүн ар бурчундагы жерлердин тартып турган өзүнүн күчү бар сымал, мага да мекенимдин деми сезилип турат. Үйүнөн, киндик каны тамган жеринен куулган адамдар кандай бактысыз экенин элестете да албайм.

Мен кайда барсам да бучкактап турган, көөдөнгө жылуулук жараткан туулган жердин кадырын сезген касиеттен айрылгым келбейт. Окуу, иш же жөн гана саякаттоо мүмкүнчүлүгү болсо, албетте, баш тартпайм. Бирок бул жерден түбөлүккө, болгондо да өз ыктыярым менен кетейин деген оюм жок. Анан да көңүлдүн тынчтыгы башкаларга байланыштуу болушун каалабас элем. Кайда барба, кесирлүү, оозар адамдар кездешпей койбойт... "Кой аксагы менен миң" деген сөз бар эмеспи.

Сыртта жүрүп жүрөк тынчыбай беймаза болгондон көрө, өз жериңде көңүлүң тынч жашагандан өтөрү жок. Балким мен жаңылып жаткандырмын. Улуулар айтмакчы, "ар кимдин өзүнүн маңдайына жазылган шыбагасы" бар, ал эми менин оюмча, ар адамдын өз жолу, өз ырыскысы бар.

...Дагы бир топ унчукпай барып, анан болжогон жериме жетип алдым. Маектешим ким болуп иштээримди сурады, журналистмин дедим. Мага жакшы тилегин айтып, бул сүйлөшүүбүздү окурмандарга жеткирип коюумду өтүндү. Ал эми жогорудагы сиз окуган ой калчоо ошол таксист замандашымдын өтүнүчүн аткарып жазгандагым.

848
Белгилер:
таксист, ыңкылап, мыйзамсыз, келечек, Эркин Алымбеков, Кыргызстан
Тема боюнча
Сөгүнүүнү тыйган мыйзамды кайтаралыбы? Оозуна ээ боло албагандар кандай жазаланмак
Стволдуу замбирек орнотулган өзү жүрүүчү Спрут-СД. Архив

"Мындай нерсе жок эле": РФ кандай танк чыгарууга белсенди?

177
(жаңыланган 19:14 25.02.2021)
Кубаттуу, ыкчам жана кынтыксыз корголгон... Бир түрдүү зооттолгон "Бумеранг" платформасынын негизинде россиялык дөңгөлөктүү жаңы танк жаратууга камынды.

Шассинин өзгөчөлүктөрү анын ичинде ушундай эле жылмакай стволдуу замбирек орнотулган өзү жүрүүчү "Спрут-СД" өңдүү курал комплексин жыйноого мүмкүндүк берерин айтат РФтеги "Аскердик-өнөр жай компаниясынын" башкы директору Александр Красовицкий. Дөңгөлөктүү танкты Андрей Коц мүнөздөп чыккан.

Сирияда кереги тиет

Александр Красовицкийдин айтымында, зооттолгон "Бумеранг" платформасынын негизиндеги дөңгөлөктүү жаңы танкты иштеп чыгуу аяктап барат. К-16 зооттолгон транспортерун жылдын аягына чейин сыноо пландалган.

Инженерлер белгилегендей, бул аппаратты жасоодо илим жана техниканын эң акыркы жетишкендиктери пайдаланылды. Кийинки пландарда өзгөчө багыттагы жана бөлөк үлгүлөрдөгү техника – БМП К-17ни сыноо да бар. "Аскердик-өнөр жай компаниясынын" башкы директору "Бумеранг" платформасынын базасындагы дөңгөлөктүү танкын тез арада бүтүрүү өнөр жай үчүн маселе эместигин баса белгилейт.

Ушул сымал техникалар Советтер Союзунда да чыгарылган, россиялык армияда толук бурулчу мунарасында кубаттуу курал орнотулган дөңгөлөктүү танктар болгон эмес. Зооттолгон автомобилдердин тобун бейрасмий түрдө ушинтип атап коюшат.

Корголушу боюнча бул машиналар чынжырлуу танктарга жетпесе да, ыкчамдыгы, маневр жана жүрүш запасы боюнча алардан артык.

"Дөңгөлөктүү танктар аларга ылайык топурактуу өлкөлөрдө кеңири таралган, — дейт аскерий эксперт Алексей Леонков. — Мисалга Африкада. Атап айтканда, Түштүк Африка Республикасында дал ушундай дөңгөлөктүү танктарга басым жасашат. Алардын негизги артыкчылыгы — ылдамдык жана бир ремонттон кийинкисине чейинки жүрүш аралыгы. Эгер негизги танк он миң чакырымдан кийин бузулуп калса, анда замбиректүү зооттолгон автомобиль жүз миң чакырым жүрө алат".

Эксперттин айтымында, мындай техника ошол эле Сирияда күзөт өтөөгө көмөкчү болмок. Азыр ал жакта аскердик полиция "Тигр" жана БТР-82А зооттолгон автомобилдерин айдап жүрүшөт. Леонков зооттолгон транспортер өңдүү эле танк суу бөгөттөрүнөн да өтүп, жүрүп да, сүзүп баратып да ок атууга жөндөмдүү. Күчтүү куралдан улам аны рейддерде, ошондой эле жалпы операцияларда, атап айтсак, аскердик катарда, чалгында, чалгындоочу отрядда жана кайтарууда колдонууга болот.

Ири калибр

Болоттон жасалган танктар абдан бышык асфальт жолду да талкалап кетери жашыруун эмес. Жол катмарына дөңгөлөктүү техника зыян келтирбегендей болушу маанилүү. Дал ушул себептен зооттолгон оор техниканы атайын тартып келүүчү транспортерлор менен жеткирүүнү ылайык көрүшөт. Жүктөө жана түшүрүүгө бир топ убакыт кетет. Ал эми дөңгөлөктүү танк согуш талаасына дароо, эч кандай машакатсыз жана даярдыгы жок эле кирип кетет.

Келечектүү танктын негизги куралы катары атайын аба-десанттык күчтөр үчүн иштелип чыккан 125 мм замбиректүү курал бөлүгү каралган. Мындай жабдык өзү жүрүүчү "Спрут-СД" танкка каршы замбирегинде да орнотулат. Октоо автоматы жана 40 дүрмөттөн турган ок-дарысы менен турукташтырылган тутумдагы жылмакай стволдуу 2А75 Т-72 жана Т-90 танктарындагы 2А46М куралына окшош.

Өзү жүрүүчү аппарат тийиштүү калибрдеги ок-дарынын бардык түрү менен октолуп, анын ичинде танкка каршы коргонуу тутумундагы тескелүүчү ракеталарды да кое бере алат.

Ок бөлүгүнүн кошумча жабдылышы — 7,62 миллиметрлик калибрдеги танктык Калашников пулемету менен жупташтырылган курал. Мындай жабдууда замбиректик "Бумеранг" дүйнөдөгү эң күчтүү дөңгөлөктүү танкка айлана алат.

Батыш жана Чыгыштагы бул типтеги аскердик техниканын басымдуу бөлүгү 105 миллиметрге чейинки калибрге ээ.

Дөңгөлөктүү танктар менен НАТО жана Азия чөлкөмүндөгү бир нече өлкөлөр камсыздалган. Атап айтсак, Stryker платформасындагы америкалык M1128 MGS, ошондой эле франциялык AMX-10RC, япониялык MCV, италиялык Centauro танктары аталган мамлекеттердин куралдуу күчтөрүндө бар.

РФтин коргоо министри мурунку он жылдыктын башында Рим менен

Centauro партиясын сатып алуу боюнча макулдашкан. Ал түгүл бир нече машина Россияга сыноо үчүн алып келинген, бирок иш ошол менен тык токтогон. Италиялык дөңгөлөктүү танктар аскердик техниканын ишенимдүүлүгү боюнча Россиянын талаптарына төп келген эмес.

Танк жана дрондордун мизин кайтарат

"Бумеранг" дөңгөлөктүү платформасы алгач ирет 2015-жылдагы Жеңиш күнүндөгү парадда элге көрсөтүлгөн. Бул негиздеги техника БТР тибиндеги советтик жана россиялык транспортёрлордон кыйла көлөмдүү жана күчтүү келет.

Шосседе 750 ат күчүндөй кубаттуулуктагы ЯМЗ-780 кыймылдаткыч саатына 100 чакырымга чейин күүлөнө алат. Мотордук бөлүгү алдында, бул десантты арт жагынан салып жана түшүрүүгө мүмкүндүк берет.

"Бумеранг" тобундагы машиналар керамика камтылып, кат-кат сооттолгон, ал эми бул гомогендик коргоого караганда алда канча ынанымдуу. Азырынча дөңгөлөктүү БМП К-17 бул топтогу эң күчтүү машина деп саналат, бул универсалдуу "Бумеранг-БМ" аскердик модулу менен аралыктан башкарылат. Машина тандалма ок-дарылар жана кошумча 500гө чейинки дүрмөт менен камсыздалган 30 миллиметрлик автоматтык замбирек, ошондой эле эки эселенген "Корнет" танкка каршы коргонуучу эки ракета менен камсыздалган.

Мындан олуттуу варианты да бар: К-17 үчүн болжолдуу аскердик модулдардын бири — мүнөтүнө120 ирет ок атуучу 57 миллиметрлик замбиректүү АУ-220М "Байкал". Анын дүрмөттөрүнүн күчү батыштагы акыркы үлгүдөгү бардык пехоталык машиналар менен күрөшкө жетишерлик деп айтылат. Мындан тышкары, 57 миллиметрлик калибри учкучсуз учуучу аппараттарды, анын ичинде чакан көлөмдүүлөрүн да 12 чакырымга чейинки аралыктан таамай жок кылууга мүмкүндүк берет.

177
Белгилер:
армия, Россия, техника, илим, Сирия, танк
Тема боюнча
Россия менен Евробиримдик мамилеси: Лавровдун билдирүүсү көңүл чордонунда
Абу-Дабидеги көргөзмөгө коюлган россиялык коргонуу комплексинин саамалыгы
Көп багыттуу F-35 Lightning II бомбалоочу истребители. Архив

F-35тин солгундашы. Истребителди кайрадан "кара булут чулгоодо"

169
(жаңыланган 20:33 23.02.2021)
Көп багыттуу F-35 Lightning II бомбалоочу истребители америкалык артыкчылыкты жана аскердик күчтүн жогорку технологиялык символу болууга тийиш эле, бирок бул аппарат жаатында АКШнын Аскердик өнөр жай комплексинин мүмкүнчүлүгү чектелүүдө.

Себеби "бешинчи муундагы" көзгө чалдыкпас учактын солгундашына күбө болуп келебиз. F-35тин америкалык паркынын үчтөн экиси кыймылдаткычтагы көйгөйүнөн улам уча албайт. Аскерий баяндамачы Александр Хроленко бул аппараттын кемчилиги, келечегине сереп салган.

Учактын оголе көп орчундуу конструктивдик мүчүлүштүктөрү бар. Пентагон тарабынан белгиленген сыноодон өткөн жок, алигүнчө жалпы өндүрүшкө уруксат чыга элек. Ушул тапта АКШнын Аскердик аба күчтөрү F-35тен баш тартып, 4+ муундагы жөнөкөй  F-16 истребителин тандоого даяр.

Пентагондогулар F-35A учагына буюртманын көлөмүн адегенде 40 пайыздан ашуун, тагыраагы, 1 763төн 1050 учакка чейин кыскартууну сунуштаган. Аны менен катар эле АКШ Аскердик аба күчтөрү эски, бирок ынанымдуу F-16 Fighting Falcon учагына буюртма алуу жолун караштырууда.

F-35 бомбалоочу истребителин АКШ Аскердик аба күчтөрү беш жылдан ашуун убакыттан бери пайдаланып келет, бирок даярдыгынын төмөндүгү, майнапсыздыгы өнөкөткө айланган. АКШ коргоо министринин орун басары мурдараак F-35 Lightning истребителдеринин 36 пайызы гана учууга жарактуу экенин, калган машиналар "жарым-жартылай гана иштээрин" маалымдаган.

Бул аппараттардын даярдык даражасы азыраак деңгээлде Аскердик аба күчтөрү менен, ал эми көбүнесе стелс-каптагычы, кыймылдаткычы, навигация жана учкучтун өмүрүн тобокелдикке сала турган "оңдолгус" конструктивдүү кемчиликтерине жараша аныкталат.

F-35тин бирдигин 100 млн. долларга сатып алган АКШнын союздаштары жана өнөктөштөрүнүн (Улуу Британия, Норвегия, Израиль, Италия, Сингапур, Түштүк Корея, Япония) үмүтү акталган жок. Учак 5-муундагы көрсөткүчтөргө төп келбейт, аскердик даярдыкка дегеле караандабайт, башкача айтканда, багыты боюнча милдеттерин аткара албайт. Кызыгы, АКШнын Аскердик өнөр жай комплексинин "чийки" түзүлүшүн алууга кезек бүтпөйт.

Бириккен Араб Эмирлиги F-35тен 50 даана алууга келишим түзгөн. Израиль "чагылган" паркын үч эскадрилияга (40 машинага чейин) көбөйтүү ниетин билдирген. Мындай жагдайды АКШ менен "достукка" жамынган акы менен гана түшүндүрүүгө болот.

F135 – майнапсыз кыймылдаткыч

Мурда "чагылгандардын" үндөн ыкчам ылдамдыкта стелс-каптагычы жана корпусу талкаланып кетери, кычкылтектин берилишиндеги үзгүлтүктөр (учкучтарга) жана F-35тин программалык камсыздоосундагы мүчүлүштүктөр туурасында кабарланган.

Инженерлер пайдалануунун жүрүшүндө анын кемчиликтерин жоюуга аракет кылышат, бирок алар улам арбып барат. АКШнын Аскердик аба күчтөрүнүн F-35A истребители F135 менен жабдылган, аны америкалыктар "дүйнөдөгү каалаган истребителге пайдаланылчу эң кубаттуу" кыймылдаткыч деп санашат. Бирок дал ошол жабдыгы F-35тин начар иштешинин негизги себеби болуп эсептелет. Машакаттуу F135тин бир саат учушуна 31 миң, ал эми "карыя" F-16 – 8 миң долларга чукул каражат сарпталат. Айтмакчы, Pratt&Whitney компаниясынын F135 кошумча кыймылдаткычтары жетишсиз, ал тургай жай убакта да тартыштык бар. Кокус согуш тутанып кетсе, абага F-35 учактарынын үчтөн бири көтөрүлөт, кийин душмандын абадан коргонуу каражаттарынан да эмес, металлдын ысып кетишинен эле күндөн-күнгө азаят.

F-16ны алмаштырууга да мезгил жетти

АКШнын Аскердик аба күчтөрүнүн согушка жарамдуулугун сактоо үчүн F-35тин үлүшүн кыскартууга аргасыз. Алар заманбапташтырылган F-16 Fighting Falcon (бул менен 1979-жылы куралданышкан, бүгүн мындай типтеги 790 истребитель бар) менен алмаштырылат. Төртүнчү муундагы F-16 көп функциялуу жеңил истребителинин учуш массасы – 21,8 тонна, илмегинин 9 бурчунда 7,7 тонна авиабомба жана ракета ташый алат. Радиусу – 1700 чакырым, максималдуу ылдамдыгы – саатына 2200 чакырым. Аймактык жаңжалдар үчүн дурус машина, бирок "бешинчи муундан" бир кадам артка чегинүү (технологиялык деградация) жакшы эмес. Пентагондо бул жаатта компромисс издөөдө.

Аскердик аба күчтөрүнүн штаб жетекчиси генерал кенже Чарльз К. Браун "антиквариатты" (F-16) сатып алууга каршы чыгып, F-35ке салыштырмалуу арзан-жөнөкөй, бирок F-16га караганда заманга төп бир моторлуу жеңил истребителдин жапжаңы классын иштеп чыгууга чакырды. Кенже Браун буларды "төрт жарым же бештен кем муундагы" машиналар деп сыпаттады.

Америкалык Аскердик аба күчтөрү F-16 Fighting Falcon истребителдерин аскердик учактарга алмаштыруунун жөндүүлүгүн баалоо үчүн изилдөө программасын баштады. Изилдөө каржылык 2023-жылдын башталышына чейин аягына чыгат. F-35 батыш дүйнөсүндө өндүрүлгөн "бешинчи муундагы" жалгыз истребитель болгондуктан ушундай машакат жаратууда. Ал менен шарттуу түрдө атаандашкан кансыз согуш доорундагы төртүнчү муундагы конструкциялар, тагыраагы, Boeing өндүрүшүндөгү F-15 жана F-18 истребителдеринин эскилиги жетти.

АКШнын европалык союздаштары бешинчи муундагы өз истребителин чыгарууга батына элек, ал эми үмүтү үзүлгөн Улуу Британия, Польша, Бельгия, Италия америкалык F-35ти сатып алууга инвестициялап келет.

"Чагылганды" иштеп чыгууга жалпы чыгымдар 400 млрд. доллардан ашып кетти, бирок бул улуттук бюджеттик каражаттарды туура эмес пайдалануунун башаты гана болду.

АКШнын Куралдуу күчтөр боюнча сенаттык комитетте F-35ти "коргоо жаатындагы сатып алуулардын бузулган тутумунун хрестоматиялык үлгүсү" деп атап, ал эми кезегинде белгилүү саясатчы, эски учкуч Жон Маккейн: "F-35 программасынын рекорддук көрсөткүчтөрү нарк, график жана өндүрүмдүүлүк жаатында жаңжал жана апаат болгон", — деп мүнөздөгөн. Анткен менен "Чагылган" АКШ жана анын союздаштарынын Аскердик аба күчтөрүнүн бышыктыгын дагы далай сынай турганы анык.

"Көзгө чалдыкпас" F-35 долбоорунун мындай "өнөкөт" ийгиликсиздеринен улам россиялык Су-57 истребителинин технологиялык жетишкендиктери өзгөчө айырмаланат. Бул – гипер үндүү ракеталарды өздөштүрүп жаткан дүйнөдө чыныгы бешинчи муундагы истребителдеринин карлыгачы. Америкалыктар россиялык куралдын артыкчылыгын аргасыз моюнга алууда.

169
Белгилер:
истребитель, долбоор, АКШ
Тема боюнча
"Баарын ойрон кылат": Пентагон Россияны "ооздуктоого" камынды
"Кайырмак да беришет бекен?". Украинага тартууланган үйлөмө кайыктар
Башкы прокуратуранын имараты. Архив

Башкы прокуратура ишкерлер үчүн күнү-түнү жооп берген ишеним номерлерин жарыялады

0
(жаңыланган 22:35 26.02.2021)
Ишеним телефону жеке ишкердик субъектилеринин ишине укук коргоо, фискалдык жана контролдоочу органдардын негизсиз кийлигишүүсү, ошондой эле менчик ээлеринин укуктарынын бузулуусу боюнча кайрылууларды кабыл алары маалым болду.

БИШКЕК, 26-фев. — Sputnik. Башкы прокуратура ишкерлер үчүн күнү-түнү жооп бере турган ишеним телефон номерлерин жарыялады. Бул тууралуу аталган мекеменин маалымат кызматы кабарлады.

"Мамлекет башчы Садыр Жапаровдун "Менчикти коргоо жана ишкерлер менен инвесторлорду колдоо жөнүндөгү" жарлыгын аткаруу максатында ишеним телефону иштеп баштады", — деп айтылат маалыматта.

Эми ишкерлер күнү-түнү (0312) 88-90-33 номерине чала алышат.

Ишеним телефону жеке ишкердик субъектилеринин, чакан бизнестин ишине укук коргоо, фискалдык жана контролдоочу органдардын негизсиз кийлигишүүсү, ошондой эле менчик ээлеринин укуктарынын бузулуусу боюнча кайрылууларды кабыл алары маалым болду. 

0
Белгилер:
текшерүү, ишкердик, ишеним телефону, Башкы прокуратура, Кыргызстан
Тема боюнча
Дарыканаларды текшерүүгө мораторий жоюлат. Мыйзам долбоору даярдалууда