Жумуш ордундагы аткаминер. Архив

"Барымтадагы" балалык кыял, бактысыз коом. Адам кесипти тандайбы же кесип адамдыбы

Элге, коомго кызмат кылуу үчүн мамлекеттик жогорку кызматтарга барууну эңсегендер көп. Чынында бул чоң вазыйпаны кызматы жок, ал тургай кылган туруктуу иши жок эле аткарганга болобу деген суроонун тегерегинде колумнист Шабдан Абылгазы уулу ой калчап көрдү.

Соңку учурлардагы саясий өнөктүктөр жана андан кийин болуп өткөн окуяларда бир жагынан таң калычтуу иштер болду. Тактап айтканда, кандай гана кесиптин ээси болсо дагы депутат, министр жана президент болууга умтулгандар жайнап кетти. Көптөгөн биз тааныган жана байкап жүргөн ага, ини, эже, карындаштарыбыз кайрымдуулук кылымыш, элдин камын көрүмүш болуп жүргөнү менен, алардын эң башкы максаты кандайдыр бир чоң кызматка жетүү аракети экендиги сезилип калды. Ушул жерден көптөн бери интернет айдыңында назарымды салып жүргөн бирөө тууралуу кеп кыла кетүүнү эп көрүп турам.

Соңку учурларда талаш-тартыш, чукушмайдын аренасы болуп калган соцтармактарда бул кишиге көңүлүмдүн бурулуп калышына себеп бар. Ал дайыма жасаган тамактарынын сүрөтүн жарыялап, ресторан ачууну кыялданып жүргөнүн жар салып турат. Кыялына бир кадам жылса да ал кубанычын өзүнүн катталуучулары менен бөлүшөт. Дал ошол саясий өнөктүктөрдө "биз муну шайлайбыз", "биз өлкөнү өзгөртөбүз", "силердин кандидат татыксыз", "биздин лидер укмуш" деген тариздеги ураандардын арасында жогоруда мен кеп кылган адамдын лагман чойгонду үйрөнүп жаткан видеосу чыкты. Анда болгон ыкыласын коюп алып лагманын чоюп, жыйынтыгына маашырланып жатканын көрүп, негедир бизде ошол киши сыңары кыялына умтулуп, кесипкөй болуу, бир тармакта ийгилик жаратууга умтулгандар аздай сезилип кетти.

Албетте, ийгиликке, бакытка умтулгандар толтура, дээрлик баары бийликке барып гана адамдардын жашоосун жакшы жагына өзгөртүүгө таасир эте аларына ишенет өңдүү. Эмнеге андай? Тереңирээк көз жүгүртүп көрөлү.

Көрсө, биздин балдарда кыял, умтулуу жок экен. Арийне, алар ушундай төрөлбөйт. Баарыбызда эле кыял, тилек, максаттар бар. Бирок анын баары убакыттын өтүшү, ар кандай факторлордун таасири менен жокко чыгып кетип жаткандай. Балким, баары эместир, бирок айрымдар балдарынын эмнеге шыктуу, өзүнүн каалоосу кандай экени менен эсептешпей, өзү эңсеген, качандыр бир кезде жетпей калган кыялына баласы аркылуу жеткиси келип, таңуулап, ошого ылайыктуу кружокторго, секцияларга берет. Бул мүмкүнчүлүгү барлардын жасаганы.

Ал эми мүмкүнчүлүгү, аймактарда тийиштүү шарты жоктордуку — трагедия. Аларга ата-энеси келечек кесибин таңуулабайт, мажбурлабайт. Бирок шарт, инфраструктура, каражат жок. Маселен, алыскы бир тоолуу айылда музда бийлөөгө шыктуу, ошол спорт боюнча дүйнөнү багындырууну кыялданган кызда шарт, мүмкүнчүлүк жок болуп калуусу мүмкүн. Андан бери келгенде эле университетке тапшыруу өзүнчө мүшкүл. Себеби мектепте мыкты окуп, мисалы, IT тармагында мыкты адис болууну эңсеген, ошого шыктуу абитуриент гуманитардык бир кесипке тапшырып калышы мүмкүн. Гуманитардык жакта бюджеттик орун бар болуп же контракт арзаныраак болуп калат. Ошентип ал дагы өзү кыялданган, эңсеген кесипке ээ болбойт. "Жашоодо бактылуу болуш үчүн аялыңды, кесибиңди, анан максатыңды туура тандаш керек" деп коюшат го. Бул логика менен алганда учурда Кыргызстанда кесиби ырахат тартуулабагандар кыйла көп окшойт деп калдым. Кайсы бир тармакта ийгилик жаратууга максат койбой, жок дегенде акча көбүрөөк табууга мүмкүн болгон (мамлекеттик чоң кызматтар негизинен жакшы киреше табуу булагы) жумушка кирүүнү максат кылышат өңдүү.

Максат демекчи, учурда аны туура койгонду да дурусураак билбейбиз. Улуу муундагылар тилек, максат, каалоо жакшы нерсеге гана багытталышы керектигин көп айтышат. Психологдор деле ойдон негативди чыгарып, кыялыңда эңсеген нерсени күндө элестетип тургула деген сунушун берип жатпайбы. Ушул жерден мындан 10 жыл мурун болгон окуя эске түшөт. Мектепти аяктап, айылдан түйүнчөгүмдү түйүп, борбор калаага аттандым. Мен сыңары шаарга бараткан автобустагы жигиттин баарлашуусу азырга чейин эсимде калыптыр:

— Эмне болду? Кайда тапшыра турган болдуң?

— Билбейм, иши кылып бир окууга тапшырам. Болбосо, окууну бүткөн кыз алам да, — деп күлүп калды.

Анда анчейин маани берген эмесмин. Кийин коюлган максаттын туура эместиги аз келгенсип, тамаша катары айтылса да тиги жигиттин ниети, көз карашы учурдагы бир топ адамдын кыжырын келтире турган жагдай экенин аңдадым.

Эптеп жан багышты, өлбөстүн күнүн көрүштү максат кылуу менен чектелип калганыбыз кызык. Ал деле ошол кезде окууну жаңы бүткөн бала болчу. Демек, бул сөздү кайсы бир чоңдон укса керек. Балким, үйүнөн чоңдордун бири тамаша кылган чыгаар. Ким билсин...

Бүгүнкү күндө жаштар билимдин, максаттын артынан Жер шарынын бардык бурчуна жетип, космосту багынтууну кыялданууда. Анткени аздыр-көптүр мүмкүнчүлүк, жолун табууга шарт бар. Интернет аркылуу тил үйрөнүп, билим алышууда. Бир учурларда мындай мүмкүнчүлүк жок, адам кесипти эмес, кесип адамды тандап калган кез болду. "Эптеп окууга өтсөм, аны бүтүп жолун таап иштесем, оокатым өтөт" деген ой менен окуусун бүткөн бир топ мекендешибиз учурда же ишин таштады, же ишин кыйраткан жок окшойт деген тыянакка келесиң. Анткени кызмат көрсөтүүчү жайларга барсаң, кызматкердин маанайынын жоктугун бүткүл жан дүйнөң менен сезесиң. Кесибин сүйгөн адам ошондон ырахат алат деп айтылат эмеспи. Айрымдардын иштеп жатканын көрүп, ырахат эмей эле жумушуна мойнунан байланган иттей болуп аргасыз келип, ошол жерде отуруп иштеп жатканы үчүн бүт дүйнөгө нааразы болгон сыяктуу туюлат.

Атам заманда эле айтылуу Сократ "кесип адамды эмес, адам кесипти тандайт" деп айткан. Анын сыңарындай, баланын көңүлү, анын шык-жөндөмү, максат, кыялдарына жараша тарбия берип билим алуусуна шарт түзө билбесек, маанайы жок, кылган ишин милдет кылган, шалаакы кызматкерлерге али көпкө чыдашыбыз керек болуп калат өңдүү.

Бул көйгөйдүн дагы бир кыры тандоону сыйлай билбегенибизде окшойт. Азыр "ал эркектин иши эмес", "бул жумуш кызга жарашпайт" деген түшүнүк эскирди. Анан да "ырчылыкты, актёрлукту не кыласың? Андан көрө дарыгер, мугалим, медайым (экономист, юрист, саясатчы) бол" деген сыяктуу ата-эненин, туугандардын басымы менен жакпаган кесипти тандап алгандар бала кезинде кыялданганына жетпей калат. Ким бирөөнүн көз карашына байланып, ал кесип жаман же бул кесип жакшы деп иргөө баланын эмес, чөйрөнүн тандоосунда калат.

Баланын көз карашы ушундай жагдайларда калыптанып, ал өзү каалаган, кыялданган ишин кылбастан, жанды багуу, татыктуу маяна табуу, материалдык мүмкүнчүлүктү кеңейтүү максатын коюп эптеп иштеп кетет. Бирок натыйжада уурдалган кыял, барымтада калган балалык максат жана бактысыз коомдо жашоого туура келет.

Белгилер:
тарбия, ата-эне, билим, көйгөй, кыял, максат, кесип
Тема боюнча
Баланын шагы сынып, көңүлү түшпөсүн! Кыргыздын ат коюу маданияты
Малдын териси иттердин эрмегине айланды. Айылдыктарга ким көмөктөшөт?
Эркиндик айкелинин дубалга тартылган сүрөтү. Архивдик сүрөт

АКШ санкциялары менен дүйнөгө болгон үстөмдүгүн кыйратууда

(жаңыланган 19:03 11.04.2021)
Батышта Россияга каршы санкциялар иши өз нугунда жүрүүдө: бири аларды иштеп чыгып киргизип жатса, башкалары жаңы санкциялардын кесепетин болушунча азыраак тартуунун жолун издөөдө.

Айрым учурда ролдору бири-бирине дал келбейт, башкача айтканда, адегенде чектөөлөр киргизилет. Кийин демилгечилер өздөрү ошол "саздан" чыга албай чабалактайт. Ал эми Россия элитасын улутташтыруудан технологиялык автономдуулукка дейре өзү пландагандай жаңы, бирок өз пайдасы үчүн бир өңчөй чараларды пайдаланат. Дал ушул жагдайга баам салган Ирина Алкснистин макаласы РИА Новости агенттигине жарыяланды.

Ушул тапта Вашингтон "Түндүк агым – 2" долбоорунун тагдыры боюнча сүйлөшүүлөрдү жетектей турган атайын өкүлдүн талапкерлиги аныкталат. Politico басылмасы америкалык Юстиция министрлиги курулуп жаткан газ түтүгүнө каршы кезектеги дагы эки санкцияны жактырганын жазып чыкты. Анын алкагындагы кара тизмеде газ түтүгүнүн курулушу жана кийинки пайдаланылышына жооп бере турган швейцариялык Nord Stream 2 AG компаниясы, анын жетекчиси Матиас Варниг да бар.

Чектөөлөрдүн долбоору келерки айда конгресстин кароосуна коюлуп, бекитилиши күтүлөт. Ачыгы бул так эмес, анткени газ түтүгүнө каршы жаңы чаралар боюнча акыркы чечим азырынча кабыл алына элек. Ал түздөн-түз сүйлөшүүлөргө жараша экени ачык. Бирок ал Россия менен эмес, Европа менен жүргүзүлмөкчү. Байдендин администрациясы үчүн башкы көйгөй дал ушунда. Конгрессте эки партиянын өкүлдөрү тең "Түндүк агым – 2" долбоорун эмне болсо да токтотууну талап кылып, ал эми Берлин айтканынан кайтпай газ түтүгүн коргоп көшөрүүдө. Сүйлөшүүлөрдүн натыйжасында Вашингтон стратегиялык объектисин коргогон Батыш Европанын бул маселеде жумшарышына үмүттөнөт. Анткен менен журналисттер улам эскертип тургандай, газ түтүгүнүн курулушу 96 пайызга аяктап калды.

Дээрлик бул менен катар эле Politico Bloomberg шайлоого кийлигишүү жана хакердик чабуулдар үчүн Россияны жазалоонун жаңы чараларынан баян салды. Кезектеги кара тизменин "Россиянын президенти Владимир Путинге жакын адамдар" менен толтуруудан тышкары, администрация "АКШда дипломатиялык вазийпаны жамынып иштеп жүргөн россиялык чалгынчыларды" өлкөдөн чыгаруу мүмкүнчүлүгүн кароодо. Ошентсе да Вашингтон үчүн анын "кыйыр таасирлери" да жок эмес. Жакында эле Россиянын АКШдагы элчиси Анатолий Антонов айткандай, Кошмо Штаттар РФ дипломаттарына каршы визалык согушту баштап, анын айынан эки миссия тең кызматкерлердин, анын ичинде техникалык адистердин тартыштыгына кабылууда. Анткен менен россиялык элчиликтин кызматкерлери бардык кыйынчылыктарга туруштук берүүдө.

Пандемия маалында видеоконференция кызматын көрсөтүп, иши өргө чыккан Zoom компаниясы Россия жана КМШ өлкөлөрүнүн мамлекеттик мекемелери жана компанияларын тейлөөгө тыюу салган. Бирок бир нече саат өткөн соң Zoom компаниясынын өкүлү "мамлекеттик, ошону менен бирге эле жаңы жана азыркы пайдалануучулар таратуучулар аркылуу эмес, сайт аркылуу түз кайрылып аккаунт сурай алышарын" тактаган. Компаниянын мындай кетенчиктегенин да түшүнүүгө болот, себеби былтыр россиялык мамлекеттик мекемелер, атап айтканда, жогорку окуу жайларына байланышкан кардарлары кыйла көп киреше алып келип турган. Эми алар жапырт жана шашылыш түрдө альтернативдик аянтчаларга кетүүдө.

Акыркы жылдары санкция темасы Россиянын ичиндеги процесстер да, эл аралык алакалар үчүн да кадыресе көрүнүшкө айланган. Глобалдык бир полярдуу дүйнөдө санкциялар – чындап эле азыркы тутумду бекемдөө инструменти.

Эң катаал чектөөлөр менен да жашоого болот, муну Иран да, Корея элдик-демократиялык республикасы тастыктап келет. Тек гана мунун куну чоң, калктын турмуш сапаты начарлайт, улуттук экономиканын жоготуулары көбөйөт, технологиялык жактан артта калат.

Санкциялар ал убакта өлкөнү заманбап өнүккөн цивилизациядан чийип салууну түшүндүргөн. Мейли бул жогорку технологиялык долбоорду ишке ашыруудагы кыйынчылык болсун, ал түгүл жөнөкөй эле жагдай, мисалы, SWIFT тутуму өчүрүлгөндүктөн жарандар дүкөндө да карта менен төлөй алышпайт. Жети жыл мурунку РФке каршы санкциялар да өлкөнү ушундай эле залалга батырган. Бирок бара-бара санкциялар батыш биримдигин да, АКШ үстөмдүк кылган жалпы дүйнөлүк тутумга да таасир этпей койбоду. Ал убакта өгөйлөнгөн өлкөлөрдү технологиялык жактан солгундатуу механизми болсо, азыр санкциялар, тескерисинче, алардын өнүгүшүнө өбөлгө болчу инструментке айланып отурат. Муну түшүнүп турса да, дүйнөдө Кошмо Штаттардын үстөмдүгүн кыйратып бүтүрсө да Вашингтондогулар бул кадамдан артка кайта албай турушат.

Белгилер:
экономика, КМШ, чектөө, санкциялар, Европа, АКШ, Россия
Тема боюнча
Батыш жаңы санкциялар менен темир көшөгөнү тартууда. Сереп
Климатты бетке кармап... АКШ кантип жашаш керектигин үйрөтүүгө өтчүдөй
Россиялык Белгород эксперименталдык субмаринасы. Архив

Россиялык "Посейдон" Тынч океанга карай камынууда

(жаңыланган 13:13 11.04.2021)
Тынч океандагы базалардын бири "Посейдондорду" ташуучунун дайымкы жайгашкан жайына айланмакчы. Ошону менен бирге эле суу түбүндөгү эксперименталдык кайык Дүйнөлүк океандын каалаган жеринде белгиленген милдеттерин аткара алат.

НАТОго мүчө-өлкөлөрдүн күчкө таянып Россия менен диалог куруу аракеттери мыйзам ченемдүү түрдө катуу каршылыктарга кабылат. Россиянын батыш чек араларына жакын жердеги АКШ армиясынын чагымчылдыктарынын күч алышы батыш, Кошмо Штаттардын тынч океандык чек араларына да чагылбай койбосу анык. Бул тууралуу РФтин "өнөктөштөрүнө" россиялык "Белгород" эксперименталдык субмаринасы жана "Посейдон" термоөзөктүк тутуму эскертип турарын белгилейт аскерий серепчи Александр Хроленко.

Жума ортосунда аскердик-өнөр жай комплексиндеги булактар деңиз учкучсуздарын ташуучу "Посейдон" – 09852 долбоорунун эксперименталдык "Белгород" суу түбүндөгү атомдук кайык сүзүүгө бет алганы турат (реактору кое берилген). Субмарина сентябрга чейин сыналып, океанда күзөт өтөйт. Шварттык сыноолору жүрүп, башкача айтканда кеменин курулуш сапаты, тетиктеринин топтоштурулушу жана жөнгө салынышы, жүк алдында энергетикалык орнотмосун, бышыктыгы жана коопсуздугу текшерилүүдө.

Тынч океандагы базалардын бири "Посейдондорду" ташуучунун дайымкы жайгашкан жайына айланмакчы. Ошону менен бирге эле суу түбүндөгү эксперименталдык кайык Дүйнөлүк океандын каалаган жеринде белгиленген милдеттерин аткара алат. 2027-жылга чейинки куралдануу боюнча мамлекеттик программасынын алкагында Россия ушундай үч субмарина курмакчы.

"Посейдон" тутумун иштеп чыгуу тууралуу РФ президенти Владимир Путин алгач ирет 2018-жылы айткан ("Белгород" сууга 2019-жылдын 23-апрелинде кое берилген). Буталарынын кеңири спектрин – болжолдуу душмандын абада ташуучу топтору, жээкти бекемдөө жана инфраструктурасы экенин белгилеген.

Мындай инструменттер менен Путин "тек полярдуу оюндун" эрежелерин өзгөртүүгө убада берген. АКШнын ошол туштагы расмий өкүлдөрү "техникалык жактан жасалма жана укмуш" деп россиялык жаңы куралды ачык эле жактырышкан эмес. Бүгүн Кошмо Штаттардын Мамлекеттик департаменти континенттер аралык 2М39 "Посейдон" өзөктүк торпедасынын пайда болгонуна өзгөчө тынчсызданып туру.

Жалпысынан РФтин "өнөктөштөрүн" аталган мамлекеттин улам өнүгүп жана бекемдеп бараткан Аскердик-деңиз флоту чочулатат. Business Insider басылмасынын маалыматына таянсак, анын курамында 360 чакты кеме, анын ичинде 59 субмарина (баллистикалык ракеталуу суу түбүндөгү 12 крейсер) иштейт.

Өзгөчө мүнөздөмөлөрү

09852 долбоорундагы суу түбүндөгү "Белгород" көп буталуу атомдук кайыгы – үчүнчү муундагы 949А долбоорунун "Антейдин" эксперименталдык кайра жаралышы. Эске салсак, бул "Посейдон" тутуму үчүн атайын ыңгайлаштырылган. Ал эми эң башта "Антейлер" ракетага каршы коргонуучу "Гранит" ракеталарын ташуучусу эле.

"Посейдон" – ооздуктоонун абдан олуттуу инструменти. Өзөктүк энергетикалык орнотмосу бар стратегиялык континенттер аралык терең суудагы аппарат 10 миң чакырымга чейинки аралыкка 1000 метрлик тереңдикте сүзө алат. Сыноолор аталган системанын "укмуштай" мүнөздөмөлөрүн жана ыраак аралыкты багындыра аларын чындап эле тастыктады. Автономдуу "Посейдон" болжолдуу душмандын колундагы азыркы жана келечектеги субмарина, торпеда жана ракеталары жете алгыс тереңдик жана ылдамдыкта жүрөт. Океанда ушундай "торпеданын" изин табыш оңой эмес, жай ылдамдыкта дээрлик дабышсыз сүзөт. Автономдук башкаруу системасы кайыктарга каршы чектерди, коргонуунун бөлөк тутумдарын таап, басып өтүп, таамайлыгын кепилдөөгө мүмкүндүк берет.

Узундугу 24 метр, диаметри 1,6 метрлик өзөктүк кыймылдаткычтуу аппарат кадимки жана мегатонналык ок бөлүгү менен жабдылган. Мындай куралга Россия гана ээлик кылат, дүйнөдө эч бир өлкөнүн "Посейдондон" коргонуу каражаты жок.

Мурдараак АКШ башында турган жамааттык Батыш Чыгыш Европада ракетага каршы коргонуунун глобалдык тутумун түзүп НАТОну чыгышка карай кеңейтүү менен РФтин стратегиялык өзөктүк күчтөрүнүн дараметин жок кылууга тырышкан. Россиянын чек араларына жакын аймактарга сокку уруучу "Томагавк" жана орточо ыраактыктагы башка ракеталарды жайгаштыруу ниетин көздөгөн. "Посейдон" континенттер аралык тутуму РФтин "өнөктөштөрүнө" агрессор сөзсүз жазасын ала турган көп полярдуу дүйнөнүн катаал чындыгына кайтууга түртөт.

"Кыямат күндүн торпедасы" Америкалык стратегиялык командачылыкты (STRATCOM) 2019-жылдын февралындагы сыноолордун башында эле тынчсыздандыра баштаганы тегин жерден эместир. Конгресстеги угууларда STRATCOM жетекчиси Жон Хайтен "Посейдон" жаңы курал тутуму катары СНВ-3 келишиминдеги чектөөлөргө кирбестигин, ошондой эле Кошмо Штаттарда аналогу иштелип чыга электигин билдирген. Континенттер аралык учкучсуздардын штаттык ташуучусунун топтомун 098531 долбоорундагы "Хабаровск" суу түбүндөгү атомдук кайыгы ачат.

Субмаринанын негизги мүнөздөмөлөрү купуя сыр. Ачык булактардагы маалыматтарга караганда, кеме жапжаңы өзөктүк энергетикалык түзүлүш менен жабдылып, "Кыямат күндүн учкучсуз торпедаларынан" алты бирдикти бортунда ташый алат.

Сыйымдуулугу – 10 миң тоннанын тегерегинде, суу түбүндөгү ылдамдыгы – 32 узелге дейре, чөмүлүү тереңдиги – 500 метр, автономдуулугу – 120 сутка, экипажы 100 кишиден кем эмес. Субмаринанын корпусу жаңы "Борей" стратегиялык ракета ташуучуну эске салат.

Мында учкучсуз Түндүк жарым шардын каалаган бурчунан АКШнын жээктеги чийиндерине жете аларын эске алуу зарыл, бирок ал РФке каршы агрессия жанданган күндө гана колдонулат. Эске салсак, Кошмо Штаттар орто жана кыска аралыкка багытталган ракеталарды жок кылуу боюнча келишимден жок шылтоо менен чыгып, былтыр аскердик бюджетин 750 миллиард долларга чейин (бул сумма дүйнөнүн калган бүт өлкөлөрүнүн жалпы коргонуу чыгымдарына барабар) өстүргөн.

Россиянын көп буталуу океандык тутуму – көзү түз эмес "өнөктөштөрүнө" кулак кагыш, Чыгыш Европада Пентагондун жана НАТОнун сокку уруучу дараметинин кооптуу топтоштурулушуна ассиметриялык жообу болмокчу.

Белгилер:
экипаж, суу, Дүйнө, АКШ, Россия, ракета, курал-жарак
Тема боюнча
"Циркон" Россиянын жээктеринен батыш кемелерин "кубалады"
F-35 өзүн-өзү кыйратып... Келтирген зыяны — 2,5 млн. доллар
Тибеттик буддисттердин лидери Далай-лама. Архив

Далай-лама дүйнөнү аялдар башкарышы керектигин айтып, себебин түшүндүрдү

(жаңыланган 10:24 14.04.2021)
Тибеттин руханий лидери жетекчилик кызматты эркектер аркалап, аялдар алардын көлөкөсүндө калган түшүнүк эскиргенин, мындай ойду өзгөртүү керектигин айткан.

БИШКЕК, 14-апр. — Sputnik. Тибеттик буддисттердин лидери Далай-лама өлкө башчылардын арасына аялдар көбүрөөк кошулса дүйнө жүзү коопсуз болот деп эсептейт. Бул тууралуу РИА Новости жазды.

"Окумуштуулардын айтымында, аялдар табиятынан мээримдүү келет. Ааламда тынчтык болушу үчүн аялдар коомдо активдүү ролду ойноп, боорукерликти жайылтуу иши боюнча милдеттерди алышы керек. Дүйнөдө аял-жетекчилер бар. Алардын саны мындан да көп болсо дүйнө жүзү коопсуз болмок", — деген Далай-лама.

Ал жетекчилик кызматты эркектер аркалап, аялдар алардын көлөкөсүндө калган түшүнүк эскиргенин, мындай ойду өзгөртүү керектигин айткан. Бул үчүн аялдарга билимин тереңдетүүгө кеңеш берген.

"Аялдар менен эркектердин интеллектуалдык жөндөмүндө эч кандай айырмачылык жок жана бардык адамдар бирдей укуктарга ээ. Бизге жалпы адамзаттын биримдиги жана мээримдүүлүк, боорукерлик жөнүндө түшүнүк керек. Эркектер аялдарга, ал эми аялдар эркектерге муктаж, демек, биз тең болушубуз керек", — деген тибеттик буддисттердин лидери.

Мындан тышкары, ал бир нече жыл мурун "эгерде Далай-лама институту улана берсе, келечекте Далай-лама аял болуп төрөлүшү мүмкүн" деп айткандыгын эске салды.

Белгилер:
боорукерлик, башкаруу, Дүйнө, эркек, аял, Далай-лама
Тема боюнча
Далай-лама ачууну кантип жеңсе болорун айтып берди