Россиянын Сармат континенттер аралык жаңы баллистикалык ракетасын сыноо

Планетанын эки уюлунан тең учат. Россиялык "Сарматтардын" өзгөчөлүктөрү

(жаңыланган 17:23 02.04.2021)
18 000 чакырым аралыкка чейин учуучу жаңы "Сармат" континенттер аралык баллистикалык ракетасы сыноо алдында.

Андан соң сериялык өндүрүшү башталып, Россия жана анын союздаштарынын коопсуздугун бекемдөө үчүн РФтин Стратегиялык багыттагы ракеталык күчтөрүнө берилет. Баллистикалык ракетанын өзгөчөлүктөрүнө аскерий баяндамачы Александр Хроленко сереп салды.

30-мартта РФтеги "Роскосмос" мамлекеттик корпорациясынын башчысы Дмитрий Рогозин РС-28 "Сармат" континенттер аралык жаңы баллистикалык ракетасынын сыноолору жакын арада башталат. Ушул тапта ага даярдык көрүлүүдө. Учуш-конструктордук сыноолордун аякташы жана шахтага негизделген "Сармат" комплексинин сериялык өндүрүшү быйылкыга пландалган.

Келерки жылы "Авангард" блоктору бар гипер үндүү жаңы ракеталар РФтин Стратегиялык багыттагы ракеталык күчтөрүндө күзөтө баштайт. Күчтүү "Сармат" 32 жылдан бери Россиянын коопсуздугун өзөктүк ооздуктоо ыкмасы менен ишенимдүү камсыздап келе жаткан даңазалуу "Воеводалардын" (НАТОдо бул – SS-18 "Сатана" деп классификацияланат) ордун басат.

"Сарматтын" ыргытуу сыноолору 2018-жылдын март айында Плесецк космодромунда аяктаган. Ал эми 2019-жылдын декабрында РФтин Стратегиялык багыттагы ракеталык күчтөрүнүн командачысы генерал-полковник Сергей Каракаев башкы ракеталык полктун жаңы комплекстер менен кайра куралданууга камылгасы жөнүндө жарыялаган.

Ошону менен бирге эле "Сарматтын" конструкциясы жана тактикалык-техникалык мүнөздөмөсүн Россиянын алдыңкы аскердик окуу жайларында бир нече жылдан бери изилдеп келет.

Старттык салмагы 208 тонна, пайдалуу жүгү – 10 тоннанын тегерегиндеги (178 тонна – күйүүчү майы) 18 миң чакырымга чейинки аралыктан душмандардын объектилерине сокку урууга мүмкүндүк берет.

"Сармат" курал блокторунун бүтүндөй топтомун, анын ичинде гипер үндүү жаңы муундагы куралга да ээ болот. Негизинен "Сармат" үчүн жасалган гипер үндүү "Авангард" РФтин Стратегиялык багыттагы ракеталык күчтөрүнүн Домбар ракеталык дивизиясында аскердик нөөмөт өтөп келет.

Континенттер аралык баллистикалык ракеталардын шахталары позициялык райондорго топтоштурулган өзөктүк сокку урууга эсептелип жасалган, башкача айтканда, дээрлик кыйрагыс.

Салыштырмалуу талдоо

"Сарматтын" чет өлкөлүк теңдеши жок. Мисалга, андан кыйла жеңилирээк, катуу күйүүчү май менен учуучу америкалык Minuteman III континенттер аралык баллистикалык ракетанын учуш аралыгы 10 миң чакырымды түзөт. Бир нече жолу заманга бапташтырылса да россиялык "Воеводаларга" жетпей келет. GBSD (Ground Based Strategic Deterrent) жаңы долбоору азырынча иштелип чыгууда, бирок "Сарматка" атаандаш боло албайт. Андан көрө россиялык "Сармат" комплексин ушул эле өндүрүштөгү "Воевода" менен салыштырган оңдур.

РФтин Стратегиялык багыттагы ракеталык күчтөрүнүн ардагери 11 миң чакырым аралыктан "оор" класстагы аскердик блокторду жеткирип, ал эми "Воеводанын" бир блоктуу ок бөлүгү душмандын объектилерин 16 миң чакырым аралыктан кыйратат.

"Сарматтын" пайдалуу жүгү эки тоннага көбүрөөк, ылдамдыгы тезирээк, учуш аралыгы эки миң чакырымга узагыраак. "Воевода" жана "Сарматтын" ок күчүн салыштырууга болот. Континенттер аралык баллистикалык ракета Aegis, THAAD жана башка системалар багындыра алчу ылдамдык тилкесин салыштыруу татаал.

Ачык булактарда так маалыматтар жок, бирок оор класстагы ракеталар абадан коргонуунун бардык тутумдарын тез жеңүүгө бутасына таамай тийүүгө "милдеттүү". "Сармат" коргонуу жана жашырынуучу жапжаңы каражаттарга ээ. Эң башкысы, жаңы баллистикалык ракета салыштырмалуу өз алдынча гипер үндүү блокторду ташыйт. "Сарматтын" "Воеводадан" принципиалдуу айырмасы – өзөктүк эмес таамай сокку уруу мүмкүнчүлүгү.

Курал блогунун атмосферадагы 15 Maxтын тегерегиндеги кинетикалык кубаты жерди радиоактивдүү жабыркатуусуз эле кыйрата алат. Континенттер аралык жаңы баллистикалык ракеталардын саны болжолдуу.

РФтин Коргоо министрлигинин маалыматы боюнча, 1998-жылы 58 Р-36М2 "Воевода" континенттер аралык баллистикалык ракетасы болгон. Бүгүнкү күндө да дүйнөдөгү кырдаал РС-28 ракеталарын ушундай эле санда сериялык өндүрүүнү болжолдоого мүмкүндүк берет. Мурда америкалык CNBC каналы АКШнын чалгын коомчулугунун маалыматына таянып 60 "Сармата" тууралуу баяндаган.

Кандай болгон күндө да СНВ-3 келишими боюнча баллистикалык ракеталар жана курал блокторунун саны РФтин Стратегиялык өзөктүк күчтөрү үчүн чектелүү, атап айтканда, ракета коё берүүчү 700 орнотмо жана 1550 ок блогу (РФтин Стратегиялык багыттагы ракеталык күчтөрүндө – 60%). Алардын санына карабастан күзөттө "Сарматтардын" күчү кол жеткис болору шексиз.

Жаңы россиялык комплекстин болуп көрбөгөндөй мүнөздөмөлөрүнө басым жасоо менен

Military Watch басылмасы: "Сармат" болжол менен 10 Мах ылдамдыкта жылат, ал эми "Авангард" 20 Махтан ашуун ылдамдыкта куралды белгиленген жерге жеткирет. "Сармат" бир нече өзөктүк куралды ташыйт. Бир сокку менен Европанын өнүккөн бир өлкөсүндөй бар аймакты бошотуп коё алат.

"Авангард" "Сарматтыкына" караганда болжол менен 3-4 эсе кубаттуу эки тонналык ракетаны ташыйт. "Сармат" алда канча кең аянттагы буталарды кыйратса, "Авангард" тезирээк кыйратып, топтоштурулган сокку урат. Эки платформанын ортосундагы айырмачылык бири-бирин толуктоочу ролду аткарууга мүмкүндүк берет" деп жазган.

Ири агрессорго эсептелген

The National Interest басылмасы "Сарматты" өзөктүк согушту жүргүзүү каражаттарын жок кылуу үчүн жасалган россиялык стратегиялык куралдардын баарынан күчтүү деп мүнөздөгөн.

Пентагондо олуттуу жаңжал шартында Россия АКШнын аймагына – ракета коё берүүчү орнотмо жана Minuteman III 450сүн тең таш-талканын чыгаруу үчүн "Сарматтар" менен сокку урарын түшүнүшөт. Америкалык эксперттердин баамында бир РС-28 "Сармат" континенттер аралык баллистикалык ракетасы 7,5 өзөктүк мегатоннаны жеткирип, 35-37 млн. кишини жабырката алат, ал эми он ракета бүт өлкөнү жок кыла алат. Эске салсак, РФтин Стратегиялык өзөктүк күчтөрү бөлөк типтеги стратегиялык баллистикалык ракеталарды эсептебегенде да бир нече Р-36М "Воевода" ракетасын коё берүү дайым даяр.

Кыймылга келтирилген 60 секунда жана старттан соң "Сармат" болжоп болгус траекториялар боюнча ракетага каршы коргонуу аймактарынан, ал түгүл Түндүк уюл аркылуу да айланып уча алат. Жекече мээлөөчү, 15 Мах ылдамдыктагы гипер үндүү блокторду шарттуу душмандын технологиялык базасынын артта калганынан улам кармоо мүмкүн эмес.

Россия Стратегиялык өзөктүк күчтөрүн өнүктүрүүдө Кошмо Штаттардын ракеталык-өзөктүк дараметинин жаңыртылышы жана тышкы саясатынын иретсиз мүнөзүн, Вашингтондун СНВ-3 келишиминен чыгышы жана Европага орточо аралыктагы америкалык ракеталарды жайгаштырышын эске алууга туура келет.

Белгилер:
комплекс, ракета, техника, курал, Россия
Тема боюнча
"Руслан" Ан-124. Россия эмне себептен авиагигантын кайра чыгарууга ниеттенди?
Тоолуу Карабах: Пашинян "Искандерден" неге шектенди?
Военнослужащий войск НАТО во время учений в Латвии

"НАТОнун иши": россиялык чек араларда эмне башталмакчы? Сереп

(жаңыланган 20:11 17.04.2021)
Крымдын чектерин абадан чалгындоо, Кара деңиздеги НАТО кемелери, масштабдык окуулар жана АКШдан Украинага жеткирилген сырдуу жүктөр...

Соңку күндөрү түндүк атлантикалык альянс Чыгыш Европада кескин түрдө активдешти. Бул Киев тарабынан Донбасска чектешкен жерге аскердик бөлүк жана техниканы алпарууга, ошондой эле өлкө ичиндеги россиялык күчтөрдү жайгаштырууга болгон реакция экенин эч ким жашырбайт. Аталган чек араларда эмне болуп жатканын Андрей Коц талдап көргөн.

Фронттун үстүнөн көз салган учкучсуздар

Донбасста кырдаал дагы курчугандан бери НАТО өлкөлөрүнүн авиациясы бул жакта көп пайда боло баштады. Чектешкен жерде дайым асмандан RQ-4 Global Hawk дрон-чалгынчылары айланып, Донбасс эл республикасы, Луганск эл республикасынын армияларынын даярдыгына көз салууда. Анан, албетте, учкучсуздар менен тартылган сүрөттөр заматта киевдик жетекчилердин столуна жетери бышык. Украина куралдуу күчтөрүнүн өзү да абадан чалгындоону активдештирген. Элдик кошуунчулар Түркиядан сатып алынган Bayraktar TB2 сокку уруучу дрондорун дароо байкашкан. Жердеги буталарга чабуул коюшкан эмес, учкучсуз аппараттардын операторлору азырынча согуштук аракеттердин потенциалдуу театрын гана изилдөөдө.

Украинанын куралдуу күчтөрүнүн ушул типтеги алты дрону бар. Дагы кошумча аппараттарды сатып алууга келишимге президент Владимир Зеленскийдин Түркияга болгон жакындагы эле иш сапарында кол коюлган. Мындан сырткары, батыш авиациясы дээрлик күн сайын Крымдын жээктерине байкоо салат.

Кара деңиздин бейтарап сууларын британиялык жана америкалык Boeing RC135W жана Lockheed P-3Corion радиоэлектрондук чалгындоо учактары, ошондой эле P-8Aposeidon айланат. Алардын негизги милдети – Кара деңиз флотунун кемелеринин багытына баам салып, жарым аралда уюштурулган аскердик топтордун абадан коргонуу позицияларын ачыктоо.

Сырдуу жүктөр

НАТО чөлкөмдө аскердик-деңиз күчтөрүн да бекемдөөдө. Апрелдин аягына дейре Кара деңизге АКШнын аскердик-деңиз күчтөрүнүн эки ракеталык эсминеци келүүгө тийиш. Пентагондун расмий версиясы боюнча кемелердин келиши "кадыресе мүнөздө". Бирок Кремль ага карата кескин көз карашта. Бул эсминецтер элүүдөн ашуун "Томагавк" канаттуу ракеталарын ташып жүрсө да таң калып болбойт.

"Кошмо Штаттардын Кара деңизде аскердик активдешүүсү, анын ичинде кемелери байма-бай өтүүдө, — деп белгилейт Россиянын ТИМ башчысы Сергей Лавров. — Азыр бул абдан өзгөчө өжөрлүк, агрессивдүүлүк менен коштолууда. Россия Федерациясы Украинага чектешкен жерде эмне кылууда деп суроо салышууда. Жооп жөпжөнөкөй, биз ал жакта жашайбыз, бул биздин өлкө. Украинада НАТОнун алкагында ар кандай иш-чараларды уюштурган аскер кызматкерлери кемелери менен Кошмо Штаттар бул аймактарда – өз территориясынан миңдеген чакырым аралыкта эмне кылып жүрөт? Бул соболубуз жоопсуз калууда".

Ушундай эле дагы бир бүйүр кызыткан суроого жооп боло элек: Киевге АКШнын аскердик-аба күчтөрүнүн аскердик-транспорттук учактары ташып жаткан жүк эмне? Адистер FlightRadar интернет-сервисинин көрсөткүчтөрүнө көңүл бурушат, анда "АКШ, Германия жана Прибалтикадан учуп чыккан америкалык C-17 жана C-130 Борисполь аэропортуна конуп, жүгүн түшүрүп, кайра учуп кетип жатышканы" боюнча маалымат камтылат. Аскердик эксперт Алексей Леонковдун пикиринде, Украинага Вашингтон радиоэлектрондук күрөш комплекстерин жеткирүүдө, бул Украинанын Куралдуу күчтөрүнүн тез арадагы чабуулунан кабар бериши мүмкүн. Ал АКШнын Куралдуу күчтөрүнүн "Чөлдөгү бороон" операциясындагы тактикасын мисалга келтирди. Ошондо жаңжалдын алгачкы күндөрү америкалыктар Саддам Хусейндин армиясына көз ачырган эмес.

Ушундай эле версия Донбасс эл республикасынын жетекчилигинин жакындагы эле билдирүүсүндө да кездешет. Анда аймакка аскердик техникалардын жапырт алып келинип жатканын жашыруу үчүн украиналык күчтөр ЕККУ (Европа коопсуздук-кызматташтык уюмунун) миссиясынын учкучсуздарынын башкаруу каналдарын жана GPS датчиктеринин сигналдарын басаңдатып жатканы айтылат. Анткен менен Россия да буга кол куушуруп отуруп калбайт.

"Эгер кырдаал курчуп кете турган болсо, албетте, биз өзүбүздүн жана жарандарыбыз кайда жүрүшпөсүн, коопсуздугун камсыздай турганыбыз шексиз, — деп белгилейт Россия ТИМ орун басары Сергей Рябков. — Мындай болжолдуу тирештин кесепетине жоопкерчилик толугу менен Киевде жана анын Батыштагы кураторлорунда болот. АКШга да биз Крымдан, Кара деңиздеги биздин жээктерден алыс турууну эскертебиз. Бул алардын өзүнө эле жакшы".

Машыгууларга даярдык

Россиялык чек араларга жакын батыш өлкөлөрүнүн күчтөрүнүн активдешүүсүнүн дагы бир себеби — НАТОнун Defender Europe 2021 машыгууларына даярдыгы. Ал келерки айдын ортосунда башталат. Окуулардын уламышына ылайык, НАТОнун күчтөрү Калининград областын алып, Россиянын батыш областтарын бөгөттөп, ошондой эле "орустардын жапырт чабуулунун" мизин кайтарышмакчы.

Мурдагы жылдардагыдан айырмаланып быйыл Чыгыш эмес, Түштүк Европага өзгөчө көңүл бурулат. Машыгуулар Черногория, Косово жана Албанияда өткөрүлмөкчү. Болгария жана Румынияда абадан коргонуу жана "жер – жер" классындагы ракеталар менен атуу боюнча машыгышат. Ал эми Венгрия бекем тыл болмокчу. Бул жылкы аскердик окууларга украиналык аскер кызматкерлери да катышат.

Америкалыктар Европага бир топ күчтү, анын ичинде 1-кавалериялык жана 82-аба-десанттык дивизиянын бөлүктөрүн алып бармакчы. Атлантика аркылуу ар кыл багыттагы аскердик техниканын жүздөгөн бирдигин жеткирет. Булардан сырткары Флорида штатынан 53-пехоталык бригадасын да катыштырат. Мурдагы машыгууларда адат болуп калгандай эле бул ирет да куралдардын бир бөлүгүн америкалыктар Европада "унутуп калары" ажеп эмес. Адистердин көз карашында, Пентагон ушундай амал менен жыл сайын чөлкөмдө чабуул коюу мүмкүнчүлүктөрүн көбөйтүүдө.

АКШнын Европадагы Кургактагы күчтөрүнүн расмий сайтында жарыяланган пресс-релизде быйылкы окуулар АКШнын НАТОдогу союздаштары жана өнөктөштөрүнүн ортосундагы стратегиялык жана ыкчам даярдыкты жана өз ара аракетти жогорулатууга багытталганы айтылат. Машыгуулар үчүнчү өлкөлөргө коркунуч туудурбай турганы баса белгиленет. Бирок Defender Europe 2021 окууларынын Россияга каршы күн тартиби айдан ачык.

Үч тараптуу байланыш тобундагы Украинанын спикери Алексей Арестович бул туурасында "окуунун маңызы Балтиядан Кара деңизге чейинки аймакта Россия менен согушка машыгууда" экенин ачык эле билдирген. Буга жооп катары Россия менен Беларусь сентябрда "Батыш – 2021" окууларын өткөрөрү турулуу иш. Мурда Беларусь коргоо министри Виктор Хренин билдиргендей, "чогуу машыгуулар жогорку урбанизацияланган жерлерде бирдиктүү штурмдук бөлүктөрдүн биргелешкен аракеттеринин жаңы ыкмаларын сыноого", ошондой эле "курал жана техниканын жаңы жана заманбап үлгүлөрүнүн майнаптуулугун баалоого" мүмкүндүк берет.

РФ коргоо министри Сергей Шойгунун айтымында, азырынча аталган өлкөнүн батыш чек араларына аскердик даярдыгын текшерүү алкагында эки армия жана аба-десанттык күчтөрдөн үч бирикме жеткирилген.

Белгилер:
Аскер, курал, Донбасс, Украина, машыгуу, Пентагон, чек ара, Россия, АКШ, НАТО
Тема боюнча
"Циркон" Россиянын жээктеринен батыш кемелерин "кубалады"
"Чогуу жооп беребиз". НАТО Россиядан сырткары кимден кооптонот?
Көчөдө бараткан кыз. Архив

Кабар алып туралычы! Эже-карындашына кайдыгер ага-инилерге кайрылуу

Аялдарга карата зордук-зомбулук коомдогу эң көйгөйлүү маселелердин бири бойдон калууда. Колумнист Мирбек Сакенов кыздарды зомбулуктан сактоодо ага-инилердин ролу тууралуу ой толгоду.

Ала качуунун курмандыгы болгон Айзада Канатбекованын өлүмүнөн кийин оюмдан бир нерсе такыр кетпей койду. Кыздын жакындары "ала качкан киши Айзаданы меники болбосоң, апаңды өлтүрүп кетем, апаң экөөң жалгыз экенсиң" деп коркутуп жүрүптүр деп айтышты. Кыязы, зөөкүр "мунун сурап алары жок" дегендей мамиле кылган окшойт.

Бирок азыркы күндө атасы, ага-инилери бар кыздар деле башына кыйынчылык түшкөндө таянарга тоо таппай калган учурлар болуп жатат.

Бала кезден чогуу ойноп, чогуу чоңойгон көчөлөш баланын карындашы Жибектин (аты өзгөртүлдү — ред.) окуясын айтып берейин. Биз жогорку класстарда окуп жүргөндө Жибек мектеп босогосун жаңы аттаган, чачына ак бантик тагынган секелек болчу. Агасы экөөбүз малга барсак дагы, көлгө түшсөк дагы артыбыздан калбай жүрүп, мага өз карындашымдай болуп калган. Алысыраак жерге барсак, кичинекей неме чарчаганын көрүп, алмак-салмак аркабызга көтөрүп келчүбүз. Алма-өрүк жесек, ага эң кызылын, эң даамдуусун алып берчүбүз...

Кийин жашоо ар кимибизди ар кайсы жакка таратты. Эки жыл мурда үйдөгүлөр кошунанын кызы Жибек турмушка чыкты деп калышты. Көрсө баягы кичинекей кыз бойго жетип, Бишкектеги окуу жайлардын биринде 2-курста окуп жүрүптүр. Апам "ал зээндүү, токтоо кыз болуп чоңойгон. Анысына кызыккандар куда түшүп келе берип, ата-энеси бир таанышынын уулуна күйөөгө берип коюшту" деди.

Ошол бойдон аны деле унутуп калыптырмын. Бир күнү Бишкектен Жибектин агасы, баягы айылдык досумду жолуктурдум. Шаарда турат экен, үй-бүлөлүү, иштеген иши бар, айтор, жашоосу дурус экенин айтып отурду. Балалыкты эстеп, аркы-беркини сүйлөшүп отуруп Жибек эсиме түштү.

"Турмушка чыкты деп уктум эле, көнүп кеттиби, балалуу болдубу?"деп сурадым. Ал "жакшы, жакшы" деп башын ийкеп койду да, сөздү башкага бурду. Чынын айтсам, мен Жибек тууралуу сүйлөшкүм келген. Анткени ал биздин бала кездеги достугубуздун ажыратып алгыс бир бөлүгү болчу.

Мен анын ой-боюна койбой эле карындашы тууралуу сурап туруп алдым, күйөө бала эмне иш кыларына кызыктым. Аягында өзү ыңгайсыз болуп кетти окшойт, "мен аны менен көп деле сүйлөшпөйм, жеңеси сүйлөшөт" деп айтты.

Арадан дагы бир нече ай өтүп кеткен. Бир күнү апам шаарга келди. Айыл-апа, кошуна-колоңдор тууралуу сүйлөшүп отуруп, "коңшубуз небересин багып жатат, кызы Жибек жолдошу менен ажырашып кеткен. Бир жашка чыга элек уулун таштап, Россияга иштегени кетти" деп кейиди.

Көрсө Жибектин күйөөсү чоң муштум чыгып, кош бойлуу кезинде кол көтөрчү экен. Атасынын таанышына келин болгон байкуш кыйналганын айта албай жүрүп, бир ирет өз жанын кыюуга аракет кылыптыр. Атургай окуяга милиция аралашып калгандыктан, ал тууралуу жаңылыктарга дагы чыккан экен.

Бул жерде эмнени айткым келет? Жаш кыздын ушундай тагдырга туш болушуна, албетте, көп кишинин күнөөсү бар. Бирок эмне үчүн агасы жаңы турмушка аттанып, жашоосунун өтө маанилүү, жоопкерчиликтүү, морт учурунда ал-жайын сурап, колдоо көрсөтүп койбойт деген ой мээмен кетпей койду.

Жеңеси сүйлөшүп жатат дейт. Жеңенин орду башка да. Менимче, кыз кишиге агасынын "Коркпо, мен бармын!" деген сөзү бир топ дем-күч берет.

Жигиттер, аялзаты табиятынан назик, коргоого, колдоого муктаж аяр жан. Кыз-келиндер жашоодо канчалык күчтүү, ийгиликтүү болбосун, кээде өзүн алсыз сезип ага-инисине таянгысы келет. Аларга эркелеп майда-барат маселелерин айтып, жок дегенде колдоо, мактоо сөздөрүн уккусу келет. Ошондой учурда агалар өзүбүздүн эч нерсеге арзыбаган сөзүбүздү, убактыбызды бөлүүгө жарабай жатабыз.

Окуганы же иштегени кеткен карындаштарыбыздан кабарыбыз жок. Алардын каякта окуп, ким менен жатаканада жашап, кандай адамдар менен мамиле куруп жатканына кызыгып да койбойбуз. Ата-энесинин камкордугунан бир нече чакырымга алыстаган секелек кыздарыбызды турмуштун тегирменине жалгыз таштап коюудабыз.

Турмушта жолу болбой ажырашып, бала-бакырасы менен ара жолдо калган жакындарыбыздан качып калдык. Адамдын көңүлүн ооруткан, кейиткен ушундай окуяларга көпчүлүгүбүз күбө болуп жүрөбүз. Ошол учурда аялзаты ээн талаадагы сормо сазга түшүп калган чаарчыктай тыбырчылап жатып күчтүүлөрү чыгып кетип жатат. Алы жогучу?..

Кээде эркектердин алсыздыгына, кайдыгерлигине көзү жеткенде өз арабасын өзү согуп, эч кимден жардам күтпөй, турмушун улантууда.

Жигиттер, бизди Жараткан күчтүү кылып, аялзатын коргосун деп жараткан. Апабызбы, эже-карындашыбызды, жубайыбызды, кыздарыбызды калкалашыбыз керек.

Белгилер:
көйгөй, жардам, кыз, Кыргызстан
Тема боюнча
Мамашова: Айзада чиновниктин эмес, жөнөкөй адамдын кызы болгону үчүн өлдү
Уурдалып, киши колдуу болгон Айзаданын окуясы боюнча жаңы жагдайлар айтылды
Жамгырдуу аба ырайы. Архивдик сүрөт

Жекшембиге карата аба ырайы

Жекшембиге караган түнү Ош, Жалал-Абад жана Баткен облустарынын кээ бир райондорунда жамгыр, тоолуу жерлеринде кар жаайт.

БИШКЕК, 17-апр. — Sputnik. 18-апрель күнү күндүз өлкөнүн көпчүлүк аймактарында мезгил-мезгили менен жаан, тоолуу райондордо кар жаашы күтүлөт. Бул тууралуу Кыргызгидромет билдирди.

Батыштан соккон шамалдын ылдамдыгы секундасына 4-9 метрден айрым жерлерде 15-20 метрге жетет.

Абанын температурасы Чүй менен Таласта +16...+21, Ош, Жалал-Абад жана Баткен облустарында +17..+22, ал эми Ысык-Көл, Нарын жергесинде +11...+16 градус болору айтылды.

Бул күнү Бишкек, Ош шаарларында жамгыр жаашы мүмкүн. Күндүн табы Бишкекте +19...+21, Ошто +20...+22 градуска көтөрүлөт.

Белгилер:
Кыргызстан, апрель, аба ырайы
Тема боюнча
Жайдагыдай ысыйт! Май айына карата аба ырайы