Манасчы сахнада манас айтып жатат. Архив

Жыл жыйынтыгы: маданиятыбыз уучубузду кур койгон жок

1858
(жаңыланган 15:12 28.12.2015)
Ары-бери караганча минтип жыл аяктап баратат. Жыл сайын жааган карды карап, кымтыланып коюп убакыт учкан куш экенине дагы бир ирет таң калып, кейип-кепчиген боюнча кала беребиз. Адатта дал ушул маалда бир жыл бою жасаган-эткениңди электен өткөрүп, бир сыйра карап чыгат эмеспизби.

Жалпысынан алганда Кыргызстан үчүн коштотуп бараткан жыл жаман болгон жок. Жергебизде тынчтык өкүм сүрүп, бакубатчылыкта жашаган кыйырлуу кыргыз элинин башы көбөйүп, алты миллионго жеткени эле чоң олжо эмеспи.

Быйылкы жыл Кыргызстандын маданияты үчүн да бир топ үзүрлүү мезгил болду. "Чү" дегенде эле Токтогул Сатылганов атындагы кыргыз улуттук филармониянын эмгек жамааты чыгынып, 32 жылдан бери биринчи жолу Ош шаарына беш күн бою концерт коюп келди. Жалпы филармония эмес, анда эмгектенгендердин ар бири беш күндөн концерт берүүгө татыктуу таланттар — СССРдин Эл артисти Самара Токтакунова баш болуп, Кыргыз Эл артисттери Нуржамал Табалдиева, Саламат Садыкова өңдүү залкарлардын өнөрү түштүк калаанын тургундарын кайдыгер калтырган жок. Руханий азык алган эл көпкө чейин ыр-күүнүн деми менен шайдоот жүрдү. 

Жайдын толук кезинде касиеттүү Ысык-Көл кылаасында эстрада аткаруучуларынын эл аралык "Мейкин Азия" фестивалы өттү. Ага катышуу үчүн 40тан ашык мамлекеттен арыз келип, анын ичинен 20 мамлекеттин өкүлдөрү тандалып алынган. Үч күнгө созулган фестивалдын баш байгесин Бахрейндин ырчы кызы алып кетти. Фестивалдын жогорку деңгээлин белгилеп, "Кыргызстандан мындайды күткөн эмеспиз" деген коноктордун пикири оор тийсе да, мамлекетибиз алдыны көздөй бир чоң арыш жасап алганына кубанып эле калдык. Демек, "Мейкин Азия" менен Кыргызстандын кадыр-баркы арта түштү деп ооз толтура эле айтсак болот. 

© Sputnik / Таалай Ороскулов
Крым менен Армениядан келген өнөрпоздор "Кыргызстан, алга!" чыгармасын

Берекелүү күздүн башталышы менен борбор калаада Үчүнчү дүйнөлүк эпос фестивалы өтүп, ал 15 мамлекеттен айтуучулар, илимпоздор, кол өнөрчүлөрдүн башын бириктирди. Борбордук аянттагы Манастын айкелин тегерете тигилген боз үйлөрдөн этношаарча курулуп, бабалар басып өткөн улуу жолго дагы бир ирет саресеп салдык. Манасчы менен дастанчылардын, боз үйлөрдүн сынагы өтүп, дүйнөнүн булуң-бурчунан келген илимпоздор дагы бир ирет Манас айтуучулуктун касиет-сырын даңазалап, ушундай зор дөөлөтүбүз бар экенине суктанып кетишти. Бул дагы там-туң басып телчигип келе жаткан Кыргызстан үчүн ийгилик. 

Октябрдын ортосунда Эл аралык "Арт-Ордо" театр фестивалы өтүп, ага Казакстан, Тажикстан, Өзбекстан жана Татарстан менен Кыргызстандын бардык дубанынан келген театрлар өз дараметин көрсөттү. Түркүн тилдеги спектаклдер коюлуп, кайсы бир убакта дээрлик унутта калган театрлардын сахнасы менен кайрадан таанышкандай болдук. Мында баш байгени казактар артынып кетти. Эл келсе келип, келбесе сахнага чыкпай калган актерлор да бир силкинип алышты. Анын үстүнө жаз алды менен кыргыз актерлорунун аракети үзүрүн берип, Театр ишмерлер академиясынын "Эргүү" сыйлыгынын ыйгарылышы да буга түрткү болду окшойт. 

Улуу жазуучу Чыңгыз Айтматовдун туулган күнүн утурлай Бишкекте быйыл бешинчи жолу "Кыргызстан — кыска метраждуу тасмалардын өлкөсү" эл аралык кинофестиваль өттү. Ага биягы КМШ, тиягы Балтика менен Грузиядан келген тасмалар ат салышканына күбө болдук. Фестивалга катышып өнөрүмдү көрсөтөт элем дегендердин саны 300дөн ашканын айтсак, анда бул иш-чаранын да барган сайын абройу көтөрүлүп келе жатканы көрүнүп турат. 

Сөздү улай кеп салсак, негизи Кыргызстанда акыркы маалда кино тармагы бир топ эле өйдөлөгөнү байкалат. Болгондо да бир-эки киши жалгыз камера менен тарта калып, элге салып ийген тасмалар эмес, чет элдик фильмдер менен "тартышып-түртүшүүгө" кадыресе жарамдуу чыгармалар жаралды. "Курманжан даткабыз" акжолтой болуп, Мирлан Абдыкалыковдун "Сүтак" тасмасы бир катар эл аралык кинофестивалдардын баш байгесин багындырып, "Оскарды" оодара жаздап барып токтоду. Мындан тышкары, Марат Сарулунун "Көч", Далмира Тилепбергенованын "Асман алдында", Тынай Ибрагимовдун "Он үчүнчү", Элнура Осмоналиеванын "Сейде", Таалайбек Кулмендеевдин "Мунабия" тасмалары эл аралык аренада ат салышып келишти. Кыргыз киносунун багынта турган ийгилиги дагы алдыда дей туралы. 

Быйыл улуу акын Алыкул Осмонов, улуу композитор Жумамүдүн Шералиев менен кезинде Сталинди тургузуп кол чаптырган Мыскал Өмүрканованын 100 жылдыктары бүтүндөй түрк мамлекеттеринде белгиленди. Бир катар иш-чаралар өттү. Мунун шылтоосу менен Алыкулдун айылындагы музейи оңдолуп, Чолпон-Атага эстелиги тургузулду. 

Пресс-служба правительства КР
Премьер Сариев Алыкул акындын ырын көркөм окуп, Sputnik демилгесин ула

Кечээ жакында эле ЮНЕСКОнун материалдык эмес байлыгынын катарын кыргыз менен казак элинин атынан ак таңдай акындардын "Айтыш" өнөрү катталды. Босогобуздан кылайып баш багып, төрүбүзгө бутун чечпей өтүп бара жаткан ааламдашуунун заманында кыргызга окшогон аз сандуу эл ири державалардын капшабына улуттук баалуулугу менен гана туруштук бере алат окшобойбу. Демек, бул дагы биз үчүн чоң эле жеңиш.

Жыл соңунда, болгондо да бир апта ичинде эле Москвада ырчы балабыз Кайрат Примбердиев башкы сахнада орус жылдыздарынын оозун ачырса, Түркияда Жийдеш Идирисова "Turkvizyon" эл аралык ыр сынагында атаандаштырдан ат чабым озуп биринчиликти багындырды. Баса, элден калбай сулуулар сынактарына катышып, Таттыбүбү Самидин кызы, Таңсулуу Өмүрзакова деген жалжал көз кыздарыбыз кандай болгон күндө да Кыргызстандын атын жок дегенде тааныштырып келишти. Буга да шүгүрчүлүк. 

© Sputnik / Таалай Ороскулов
Бассейн, тренажер жана гантеля — кыргызстандык супермодель спортзалда

Биз Кыргызстанда болуп өткөн орчундуу маданий окуяларды гана санап өттүк. Жыл бою филармониянын "оозу" бошобой, мааракелер, оюн-зооктор, концерттер оголе көп болду. Демек, талап бар. Биринен бири өтүп, барган сайын санга эмес, сапатка көңүл бура баштаган өнөрпоздордун элдин көңүлүн алууга аракети күч. Демек, изденүү бар. Изденүү бар жерде сөзсүз ийгилик жаралат. 

Биринчи дүйнөлүк көчмөндөр оюндары. Архив
© Пресс-служба президента КР / Султан Досалиев Пресс-служба ПКР
"Кыбыраган кыр ашат" дейт. Илгери бирөө "мындан жаманымда тойго баргам" дептир. Анын сыңары, алда канча жупуну жашоодо деле жашап келбедик беле. Эмдиги жыл Кыргызстандын демилгеси менен бүтүндөй түрк дүйнөсүндө улуу ойчул Жусуп Баласагындын жылы деп жарыяланды. Кудай деп эгемендигибиздин 25 жылдыгын, Үркүндүн 100 жылдыгын белгилегени турабыз. Айтор, жакшылыктын үмүт отун тартуулап, ага карай умтулткан нерселер арбын экенине топук кылып, маданият үчүн майлуу-сүттүү болгон жылды жакшы маанай менен узатып коелу. 

Эмнеси болсо башыбыз эсен, боорубуз бүтүн болуп, башыбыздан бөркүбүз, көзүбүздөн көркүбүз түшпөй, жаңырып келе жаткан жылды жаркырап тосуп, сагынышып көздөшөлү!!!

Өтүп бара жаткан 2015-жылдын башкы окуяларын Sputnik инфографикасында көрө аласыздар>>

1858
Белгилер:
жеңиш, маданият, фестиваль, конкурс, кино, Кыргызстан
Тема боюнча
Аалам сулуусу Таңсулуу Өмүрзакова сахнага ырдап чыгууну кыялданат
"Манас" эпосу жөнүндө кызыктуу 15 факты
Кыргыстандык модель Саадат Асылбекова

Модель Саадат Асылбекова Таиланддагы эл аралык сулуулук сынагына катышат. Сүрөт

184
(жаңыланган 17:31 26.01.2021)
Саадат кесипкөй модель, боюнун узундугу 179 сантиметр. Эл аралык таймашка биринчи ирет чыгып жатат.

БИШКЕК, 26-янв. — Sputnik. 20 жаштагы модель Саадат Асылбекова Кыргызстандын атынан Таиландда өтө турчу Supermodel International — 2021 эл аралык сулуулук сынагына катышат. Бул тууралуу бьюти компаниянын Кыргызстандагы расмий өкүлчүлүгү билдирди.

Двадцатилетняя модель Саадат Асылбекова
© Фото / дирекция "Мисс Кыргызстан"
Модель Саадат Асылбекова

"Кыргызстан сулуусу" улуттук сынагы дирекциясы Supermodel International эл аралык сынагынын расмий өкүлү. Салтка айлангандай эле эл аралык конкурска "Кыргызстан сулуусу" аталган бийкеч катышат. Бирок дирекциянын чечими менен улуттук сынак быйылкыга жылдырылган. Ал арада дирекция эл аралык жарышка катышууга кастинг өткөрүп, натыйжада Саадат Асылбекова жеңип чыкты.

Саадат — кесипкөй модель, боюнун узундугу 179 сантиметр. Борбор калаадагы моделдик агенттиктердин биринде иштейт. Ал алгачкы жолу 2016-жылы "Кыргызстан бикини сулуусу" сынагына катышып, жеңип алган.

Посмотреть эту публикацию в Instagram

Публикация от Ssssaadat Asylbekova (@ssssaadat21)

Ал эми эл аралык сынактарда өзүн биринчи ирет сынап жатат.

Өткөн жылы аталган сынакка өлкө атынан Сайкал Токтогулова катышкан.

Посмотреть эту публикацию в Instagram

Публикация от Ssssaadat Asylbekova (@ssssaadat21)

Supermodel Internatiоnal — он жылдан бери өтүп келген моделдер арасындагы кесипкөй сулуулук сынагы. Ага дүйнөнүн 50гө чукул өлкөсүнөн катышат.

Белгилей кетсек, ушундай эле сынакты Рыскүл Намазбекова дагы өткөрүп келет. Декабрда "Мисс Кыргызстан — 2020" финалы болуп, 20 жаштагы Лаззат Нуркожоева баш байгени алган.

184
Белгилер:
модель, Кыргызстан, сынак, Саадат Асылбекова
Тема боюнча
"Кыргызстан сулуусу" болгон кыз Садыр Жапаровдун тууганыбы? Уюштуруучунун жообу
Кыргыз сулуусу Untact Face of Asia сынагынын жарым финалына өттү. Видео
Кыргыз кызы Россиядагы эң сулуу мигранттардын катарына кирди. Сүрөт
Кинокартинанын режиссерлору Дастан Жапар уулу

"Акыркы көч" Дакка эл аралык кинофестивалында эң мыкты тасма деп аталды

134
(жаңыланган 18:56 25.01.2021)
Фестиваль 16-24-январь күндөрү Бангладеште өтүп, анда 73 мамлекеттен 226 тасма көрсөтүлгөнү айтылат.

БИШКЕК, 25-янв. — Sputnik. Бангладеште өткөрүлгөн Дакка XIX эл аралык кинофестивалында (Dhaka lnternational Film Festival (DlFF) "Акыркы көч" киносу "Эң мыкты тасма" деп аталды. Бул туурасында Маданият, маалымат жана туризм министрлигинин маалымат кызматы билдирди.

Аталган фестиваль 16-24-январь күндөрү өтүп, анда 73 мамлекеттен 226 кино көрсөтүлгөнү айтылат.

Кинокартинанын режиссерлору - Бакыт Мукул менен Дастан Жапар уулу. Төлөмүш Океев атындагы "Кыргызфильм" улуттук киностудиясынан "Билимкана" фондунун колдоосу менен тартылган.

Фильмде Марат Алышпаев, Шайыр Касымалиева, Бусурман Одуракаев, Анара Ажыканова, Калипа Усенова, Өмүрзак Токтомуратов сыяктуу көрүнүктүү актёрлор роль жараткан.

"Акыркы көч" кинокартинасы 2020-жылы Таллинде өткөн "Темные ночи" кинофестивалына да катышып, тасманын дүйнөлүк премьерасы Эстонияда болгон.

134
Белгилер:
мыкты, кинофестиваль, Кыргызстан
Тема боюнча
Сүйүндүковдун "Шамбала" тасмасы Россияда эки сыйлыкка татыды
Рейхстагдын байкоо жеринде кишилер. Архив

Германия Кыргызстандын карызын кечет, бирок бир шарты бар 

0
(жаңыланган 00:11 27.01.2021)
Өткөн жылы министрлик тышкы карызды жоюп салуу өтүнүчү менен бир нече мамлекетке кайрылган. Бир гана Германия макулдугун берди.

БИШКЕК, 26-янв. — Sputnik. Германия Кыргызстанга 14,9 миллион евро өлчөмүндөгү карызын кечүүгө даяр. Болгону Кыргызстан ал каражатты ипотекалык кредитке жумшашы керек. Бул тууралуу журналисттерге Финансы министрлигинин Мамлекеттик карыздар башкармалыгынын жетекчиси Руслан Татиков билдирди.

Анын айтымында, өткөн жылы министрлик тышкы карызды жоюп салуу өтүнүчү менен бир нече мамлекетке кайрылган. Бир гана Германия буга макул болду.

Руководитель Управления государственным долгом при Министерстве финансов Руслан Татиков во время беседы на радио
© Sputnik / Асель Сыдыкова
Финансы министрлигинин Мамлекеттик карыздар башкармалыгынын жетекчиси Руслан Татиков
"Жалгыз Германия карызды жоюу боюнча макулдугун берди. Документке кол коюла элек, бирок сүйлөшүүлөр болду”, — деди Татиков.

Ал кошумчалагандай, бул каражат эми Мамлекеттик ипотекалык компанияга жумшалат деп күтүлүп жатат.

0
Белгилер:
Руслан Татиков, Тышкы карыз, Германия, Кыргызстан
Тема боюнча
Кыргызстан карыз төлөөнүн эң жогорку чегине качан жетет? Расмий жооп