БИШКЕК, 25-мар. — Sputnik. Москвада өтүп жаткан "Саякат жана туризм" Mitt көргөзмөсүнө катышып жаткан кыргызстандык туристтик компаниялардын саны үч эсеге көбөйдү. Бул тууралуу Туризм департаментинин өкүлү Кундуз Бейшеева билдирди.
Москва шаарында 23-26-март күндөрүнүн аралыгында "Экспоцентр" борборунда "Саякат жана туризм" Mitt аттуу эл аралык көргөзмө өтүүдө.
Бейшееванын айтымында, аталган көргөзмөгө Кыргызстандын Курорттор ассоциациясы жана туроператорлор ассоциациясынан 12 компания катышууда. Алар USAID уюмунун жардамы менен стенд уюштурушкан.
"Бул көргөзмөгө биз экинчи жыл катышып жатабыз. Былтыр төрт компания келген, быйыл активдүүлүк байкалууда. Учурда 12 компания көргөзмөгө катышып жатат. Россиялык туристтер көбөйүп жаткандыктан туроператорлор аларга ден соолукту чыңдоочу турларды, Жибек Жолуна саякаттоону, эс алуунун кышкы түрлөрү сунушташууда", — деди ал.
Анын айтымында, россиялык туристтердин ыңгайлуулугу үчүн учурда туроператорлор улуттук авиакомпаниялар менен турпакеттерди түзүү боюнча сүйлөшүүлөр жүрүп жатат.
Улуттук статистикалык комитеттин маалыматы боюнча былтыр Кыргызстанда 1,3 миллион адам эс алып, орточо эсеп менен ар бир турист өлкөнүн ИИПсын 14,6 миң сом менен толуктаган. Ал эми чет элдиктер 410 миллион доллар коротуп кетишкен.
