БИШКЕК, 4-авг. — Sputnik. Кыргызстандык "Ата керээзи", "Каратегинден кат" жана "Ата Бейит" тасмалары Казань шаарында өтүүчү XII эл аралык мусулмандар киносунун фестивалында ат салыша турганын Кинематография департаменти билдирди.
Маалыматка ылайык, үстүбүздөгү жылдын 5-11-сентябрь күндөрү өтүүчү фестивалга 700 арыз түшүп, анын ичинен 33 өлкөнүн 60 тасмасы тандалып алынган.
Бакыт Мукул менен Дастан Жапар уулунун "Ата керээзи" тасмасы толук метраждуу фильмдердин сынагында күч сынашса, даректүү тасмалардын катарына Жаңыл Жусупжандын "Каратегинден кат" фильми кирген. Ал эми Алижан Насыровдун "Ата Бейит" тасмасы фестивалдын кыска метраждуу даректүү фильм номинациясында ат салышат.
Эскерте кетсек, быйыл чыккан "Ата керээзи" толук метраждуу тасмасынын дүйнөлүк бет ачары 25-августтан 9-сентябрга чейин Монреалда өтүүчү эл аралык кинофестивалда болот.
