БИШКЕК, 26-окт. —Sputnik. Бишкекте өтө турган "Үмүт" кинофорумуна катыша турган чет элдик коноктор келе баштаганын Кинематографты колдоо фондусу билдирди.
Эскерте кетсек, КМШ өлкөлөрдүн жаш режиссерлоруна арналган иш-чара эки күндөн кийин, 28-октябрда башталып 31 –октябрда жыйынтыкталат. Төртүнчү ирет өтө турган кинофорум быйыл биринчи жолу эл аралык деңгээлге чыгып, Гуманитардык кызматташуу боюнча мамлекеттер аралык фонддун колдоосу менен болгону турат. Ага КМШ өлкөлөрү, Грузия жана Балтика боюндагы мамлекеттер катышары күтүлүүдө.
Алгачкылардан болуп Кыргызстанга "Эркиндин кайтышы" тасмасынын авторлору Мария жана Денис Гуськовдор келишти. Ал эми кечээ, 25-октябрь күнү аталган фильм тасманы тартуу иштери жүргөн Ноокен районунун Масы айылынын тургундарына тартууланды.
Былтыр Канн эл аралык кинофестивалынын байгесине татыган "Эркиндин кайтышы" быйыл "Үмүт" форумунун программасына кирип, 28-октябрда "Октябрь" кинотеатрында көрсөтүлөт.
Ал эми кинофорумдун өзү "Оскар" сыйлыгынын узун тизмесине кирген "Ата керээзи" тасмасынын премьерасы менен башталмакчы.
