Болливуд актерлору Кыргызстанда клип тартууда

© Sputnik / Эмиль СадыровИздиялык Chald Film Banaye компаниясы Кыргызстанда клип тартуу учурунда
Издиялык Chald Film Banaye компаниясы Кыргызстанда клип тартуу учурунда - Sputnik Кыргызстан
Жазылуу
Болливуд киноиндустриясынын өкүлдөрү Индиянын белгилүү ырчысы Дипак Кумардын ырларына биринчи жолу Кыргызстанда клип тартууда.

БИШКЕК, 19-ноя. — Sputnik. Болливуддан келген чыгармачыл топ Кыргызстанда биринчи жолу клип тартып жатат. Бул тууралуу Lark International Group ЖЧКсынын логистика бөлүмүнүн жетекчиси Айбек Козукеев билдирди.

Анын айтымында, клип тартуу үчүн Индиядагы Болливуд киноиндустриясында иш алып барган Chald Film Banaye компаниясынан 16 адамдан турган чыгармачыл топ келген. 

"Биздин компания Кыргызстан менен Индиянын мамилесин чыңдоо жана туристтик алакаларды өнүктүрүү максатында аталган топту чакырган. Алардын көпчүлүгү Кыргызстанга биринчи жолу келгендиктен өлкөнүн кооздугуна кызыгып, жааган карга суктанып жаш баладай ойногонго жетишти", — дейт Козукеев.

Chald Film Banaye компаниясынын башкы продюсери Пушпанк Гаваде клиптер ырчы Дипак Кумардын "Few moments" жана "Whats happened to me, I don't no" ырларына тартылып жатканын белгиледи.

"Мен Кыргызстанга биринчи жолу ушул жылдын октябрь айында келгем. Кооздугун көрүп, Ысык-Көлдөгү жана Бишкек шаарындагы айрым жерлерди тартууну пландап кеткем. Азыр дал ошол жерлерде эки клип тартып жатабыз. Бишкекте Курманжан датканын эстелиги, сейил бак, өчпөс от жана Орто-Сай базарынын аймагы тартылат", — деди Гаваде.

Выживший (Тирүү калган) кинотасмасынан кадр. Архив - Sputnik Кыргызстан
Голливуддун кайсы тасмасы үчүн Кыргызстан ылайыктуу болмок
Чыгармачыл топ 15-ноябрда келип, алгач ишти Ысык-Көлдөн баштаган.

Тартуу учурунда жука кийинген клиптин башкы каармандары аппак карга суктанып, Кыргызстандын учурдагы аба ырайына чыдап, жагымдуу образдарды жаратып жатышты. 

Башкы актер Шрман Джейн Индияда белгилүү актер. Ал Болливудда 10 жылдан бери иштеп келет. Ал эми клипте анын сүйүктүүсүнүн ролун жараткан Халина Кей Индияда белгилүү модель жана актриса. Болливудда эки жылдан бери эмгектенет.

Аталган чыгармачыл топ Кыргызстанга келүү үчүн белгилүү режиссер Эрнест Абдыжапаровдун "Sea" аттуу студиясы менен жарым жылдан бери байланышып, Кыргызстан менен кызматташууга алака куруп келген.

Абдыжапаров алардын кайсы жерден, кандай компаниядан келгендерин айтып берди.

"Бул компаниянын Болливуддан келгени чындык. Алар мага алгач чалып, жарым жылдан бери сүйлөшүп келгенбиз. Болливудду ала турган болсок, ал жакта абдан көп студия бар. Ошондуктан клипке тартылып жаткан актер, актрисалардын канчалык деңгээлде өз өлкөсүндө белгилүү экендигин айта албайм. Бирок Болливуддан бери келип Кыргызстандын жаратылышына суктанып, биз менен кызматташууга келгенин ишенимдүү айта алам", — деди режиссер.

Ошондой эле режиссер учурда Болливуддун өкүлдөрү Абдыжапаровдун студиясы менен иштешип, керектүү техникаларды ижарага алып кызматташып жаткандыгын белгилеп, ири тасмаларды тартууга пландары бар экендигин айтышканын кошумчалады.

Жаңылыктар түрмөгү
0