Кыргыз журтчулугуна аттын кашкасындай таанымал театр артисти, улуттук кинонун чебери, белгилүү обончу, кайгы-муң ырларынын рыцары, КР Эл артисти Асылбек Өзүбеков

Асылбек Өзүбеков: эл кол чаап койсо эле кыйратыпмын деп жүрө бериптирмин

3987
(жаңыланган 14:28 21.11.2016)
Кыргыз журтчулугуна аттын кашкасындай таанымал театр артисти, улуттук кинонун чебери, белгилүү обончу, кайгы-муң ырларынын рыцары, КР Эл артисти Асылбек Өзүбеков менен журналист Гүлдана Талантбекова маектешти.
Асылбек Өзүбеков: "Таппай жүрөмдү" уккандар залдан ыйлап чыгышчу

Өнөр ээси эмне себептен "Таппай жүрөмдү" укканда режиссер өксүп ыйлаганын, эмне үчүн "Гүлдөй жан байке" атка конгондугу жана элден жашырбай турчу сырлары менен бөлүштү.

— Агай, алтымышка жакындап калсаңыз да жүрөгүңүз жаш. Дайыма шайыр жүрөсүз, мүнөзүңүз жайдары, жөнөкөйсүз…

— Турмушта жөнөкөй жүргөнгө эмне жетсин. Көчөдө тааныбагандар болсо деле каткырышып жүрө берем. Машинеде кетип баратып жол чырактан токтосоң оң жагыман дагы, сол жагыман дагы терезелерин ачып алышып "Асылбек байкеее" деп кыйкырышат. Зерикпей эле "Оо кандайсыңар" деп сүйлөшө берем. Алар жакшы көрүп, сыйлап, урматтап учурашып жатышат да. Аккула ат майданына көк бөрүгө барганда он миңдей кишинин алдында туруп алып көп жылдан бери жалгыз баяндайм. Алар менен деле эски тааныштай бакырышып-кыйкырышып, анекдот айтышып, ырдап берип жүрө берем. Жашоодо эл менен болсоң сени бир туугандай көрүшөт. 

— Сизди бир эле учурда обончу, ырчы, кино жана театрда артист, журналист, улуттук оюндардагы көк бөрүнүн баяндамачасы катары да билебиз. Бул өнөрлөрдүн кайсынысы сизге жакын сезилет?

— Негизги кесибим боюнча актермун. Ташкенттеги театралдык институттун театр жана кино актеру бөлүмүн бүтүргөндөн кийин академиялык кыргыз драма театрында он жылдан ашык иштедим. Өтө бир сүйүнүп эстегеним мыкты режиссерлор менен иштешип, мен-мен деген драматургдардын чыгармасында ойноп калдым. Залкар адамдардын таланты чыгармачылык жолумдун калыптанышына өтө чоң таасир калтырды. 

Артист театра и кино, Народный артист Кыргызстана Асылбек Озубеков во время радио во время интервью Sputnik Кыргызстан
© Sputnik / Табылды Кадырбеков
КР Эл артисти Асылбек Өзүбеков: студенттик күндөрү Ташкентте гитара көтөрүп алып эле группанын арасында күнү-түнү ырдап жүрчүбүз

— Ырчы, обончу катары басып өткөн жолуңуз да бизди кызыктырат?

— Азыркы Мукаш Абдраев атындагы окуу жайда беш жыл билим алгам. Ошол жактан нотаны таанып, инструмент эмне экенин билип ырчылык көрөңгө пайда болду. Ыраматылык апам "ушул үйрөнсүн, келечегине бир пайдасы тийсин" деп тагдыр жолумду буруптур. Бул менин бактым болду. Ошондуктан түпкүрүмдө музыкага болгон жакындык ырчылыкка жетеледи окшойт. Студенттик күндөрү Ташкентте гитара көтөрүп алып эле группанын арасында күнү-түнү ырдап жүрчүбүз. Чыныгы чыгармачылык театрда иштеп жүргөндө калыптанды. Бир чындыкты айта кетейин. Биздин режиссерлор ырдаганга уруксат бербей "концерттерге катышпагыла, силер деген профессионалдуу актерсуңар, оюңар бир гана сахнада болсун" деп турушчу.

— Бирок сиз ошого карабай ырчылыкка бет алдыңыз. Кандайча?

— Рыспай Абдыкадыров, Түгөлбай Казаков, Асанкалый Керимбаевдин ырларын угуп алып, мен дагы ушундай обон чыгарсам деп жүргөндө кайрыктар пайда боло баштады. 1984-жылдары акырын радиого барып аккордеон менен "Өмүр" деген алгачкы ырымды, Сооронбай Жусуевдин сөзүнө жазылган "Кош жылдызды" жаздырып салдым. Анан эфирден ырларым абдан катуу кетти. Жетекчилик дагы "ой, сен жакшы ырдайт турбайсыңбы, обон да чыгарат экенсиң, мейли ырда" деп уруксат беришкен. Ошентип актерлук кесибимен сырткары ыр дүйнөсүнө аралаша баштадым.

— Сизди кайгы-муң ырларынын рыцары деп айтып коюшат эмеспи. Жеке оюнуз кандай? Эмне себептен сизден шаңдуу ырлар жаралган эмес?

— Арзуу, арман, сүйүүнүн, кайгы-муң ырларынын рыцары деп жүрүшөт. Кээде чыгармачыл адамдарды мындай сөздөр дал келгенсип ээрчип калат экен. Мен эфирге чыкканда ошол убактагы режиссерлор Искен Рыскулов, Мелис Шаршембаевдердин спектаклиндеги башкы каармандардын ролун ойноп калдым. "Тема" деп коебуз, анда бир спектаклдин өзөгүн түзгөн каармандын ички дүйнөсүн коштой турган обондун кайрыктары керек болуп калышы мүмкүн. Маселен "Кош жылдыз" эмнеден жаралды дешиңиз мүмкүн. Режиссер Мелис Шаршембаев Мырза Гапаровдун "Биздин үйдүн Карлсону" спектаклинде алоолонгон сүйүүнүн жолу менен келип, айрылыш жолго түшкөн эки адамдын тагдыры бар болчу. Ошого обон жазып көрчү деди. Сөздөрүн издеп отуруп Сооронбай Жусуевдин сөзү төп келди. Ырдап берсем аябай жактырды. Анан оркестрге салып спектаклге колдонуп, Жамал Сейдакматова, Имаш Эшимбеков деген эки актер ойноп чыкты. Бул ырдын тарыхы жакшы болду. Андан кийин "Шантель" тобу, Эрмек Мойдунов, мен Жылдыз Тутуева менен ырдап чыктым. Төлөмүш Океевдин "Сүйүү закымы" фильминде ушул ырдын мотиви кетип турат. Бул жерде сагыныч, арман, айрылышуу, кусалык, өкүнүү — деги койчу бардыгы бар. 

— Агай сөзгө улай эле жүрөк сыздаткан "Таппай жүрөм" ырынын тарыхын айта кетсеңиз?

— Режиссер Искен Рыскулов Чыңгыз Айтматовдун "Кылым карытар бир күн" чыгармасы боюнча спектаклин коюп калды. Ал жерде Абуталипти репрессияга алып кетип Зарипа балдары менен жалгыз калат. Режиссер ушул айымдын ички дүйнөсүн ачыш керек болуп жатат дегенинен китептин баарын казып отуруп Өмүркул Кулумбаевдин "Таппай жүрөм" ырынын сөзүн таап алып режиссерго ырдап берсем "өлдү, укмуш, ушул гана ыр жарайт" деди. Анан Зарипа бул ыр менен балдарын поезд жолунда жалгыз жетелеп алып өткөндө залда отургандардын баары ыйлашчу. Эң кызыгы Искен Рыскулов мага ички дүйнөсүн айткан жок. Бирок кайсы жерде болбосун, аккордеонду алдырып алып ырдата берчү. Бир жолу Ноокатта командировкада жүргөндө алма бактын ичине чакырып алып "ырдачы" дегенинен ырдап жатып бир маалда карасам көзүнөн жаш агып атыптыр, токтоп калсам "кайра баштачы" дейт. Кайра башынан түшсөм жымжырт жерде дагы ыйлап көзүн аарчып "рахмат…бара бер" деди. Ичинде эмне болгонун билбейм, дагы эле ал киши көз алдымдан кетпейт. Андан кийин бул ырды Роза Шакировага какшап жүрүп "сенин үнүңөн угуп жатам, ыр спектаклде калып калды, ырдап чыксаң боло" деп аркасынан бир-эки жыл жүрүп ырдаттым. Бир күнү келиптир ырды жаздырдым деп. Угуп көрүп радиого бер, эми карап тур, көрөсүң дегем. Анан баягы "Таппай жүрөм" менен Роза жарк этип эле чыга калды. Анан "ии айтсам укпайсың" десем, "эми түшүндүм, сиздин ырлардын баарын ырдайм" деп анан ырларымды чекесинен ырдап жүрбөйбү.

Асылбек Өзүбеков "Карындашым" ырын жандуу аткарып берди

— Сиз анда атайын ыр жаздырбай эле аткарыла турчу ролдорго карап ырдайсыз десем жаңылышпаймбы?

— Ооба. Анткени жан дүйнөм менен лирикага жакынмын. Обон жазаарда сөздөрдү таап, алар аркылуу образдарды издейм. Мисалы сизди көрүп тагдырыңызды өз фантазияма салып ыр дүйнөсүнө кирем. Ошону менен анан кайгылуу кайрыктар жаралып кетет. Көбүнчө ички сезимдерди кытыгылагым келет. Шаттуу ырларды жазганга аракет кылдым, бирок болгон жок.

— Жашооңузда сүйүү, кайгы-муң көбүрөөк болгон десек жаңылышпайбызбы? Анткени ырчынын ырлары деле тагдырына үндөш болот экен?

— Сурооңузду түшүндүм. Албетте, ар бир адамдын ички сезими болот. Алгач эле бир нерсени ачык айтып алайын. Тогузунчу класстан баштап сүйлөшкөн классташым менен кырк жылдан бери жашап келе жатам. Турмушта өйдө-төмөн нерселер, тартыш, ызы-чуулар болду. Акыры бири-бирибизди кечириштик. Көбүнчө ал мени кечирип, көтөрмөлөп, аяды. Мүдүрүлсөм тиземди сүртүп келинчегим Сүйүн ушул кезге чейин келе жатат. Мага көп жерден чыдады, көтөрдү, бул — чындык. Ал эми ортодо жылт эткен эркектик сезимдер менен оңго-солго адашып кеткен учурлар болду. Аны мен жашырбайм. Эл мени билет. Жалындаган отуз жаш, күйүп турган кырк жаш, элүү жаштагы убактың болот экен. Кээде назарың түшкөн убакта ыр чыгарып жиберген учурлар кездешет. Токсонунчу жылдары Мурат Мамбетовдун сценарийи боюнча "Аян" деген көркөм фильм тартканбыз. Ошондо башкы ролго Маржан аттуу казак кыз келип, мен жактырып калгам. Бирок ал кыз тартуу иштери аяктаганда кетти. Мен ошол боюнча аны көргөн жокмун. Анан кыйналып кеткенде "01-02-03 алло мен, мен өрттөнүп барам, мен күйүп барам" деген ыр жаралган. 

Артист театра и кино, Народный артист Кыргызстана Асылбек Озубеков во время радио во время интервью Sputnik Кыргызстан
© Sputnik / Табылды Кадырбеков
Асылбек Өзүбеков: тогузунчу класстан баштап сүйлөшкөн классташым менен кырк жылдан бери жашап келе жатам. Турмушта өйдө-төмөн нерселер, тартыш, ызы-чуулар болду. Акыры бири-бирибизди кечириштик

— Сиздин аткарууңуздагы "Гүлдөй жандын" тарыхы тууралуу да кеп кылсак?

— Бул ыр Жумамүдүн Шералиевдин обону, Эгемберди Эрматовдун "Кулмырза менен Аксаткын" спектаклиндеги ыр. 1989-жылдары Нарын театрына тойго карата репетицияда экиге бөлүнүп алып эле ырдап калышты. Анан кайрыктары жагып калып обонун эске тутуп калайын деп режиссерго дагы бир жолу репетиция кылуусун сурандым. Борборго келгенде сөздөрүн башка актрисага жаздырып аккордеон, гитара, шалдырактардын коштоосунда шарак эте чыктык. Оо андан кийин менин атым "Гүлдөй жан" болду. Ал кезде "Туңгуч" театры жаңы уюшулган эле. Айылдарга концерт коюп барганда кичинекей балдар "Гүлдөй жан байке келатат" дешчү. 

— Туңгуч театрында 2008-жылдарга чейин эмгектендиңиз. Ордуңуздарды жаштарга бошотуп берели деген ой менен көп чыкпай калдыңыздарбы?

— Кудайга шүгүр, убагында көп иштерди жасадык. Убакыт деген күчтү чарчатып, командировкаларга чыга албай, чогулуп күүлдөп иштей албай каласың дегендей. Сөздүн ачыгы биз пастап калдык. Чоң иштер болгондо чогула калабыз. Бүгүнкү күндө кесиптешим Мурат Мамбетов окуу жайда режиссерлук жактан сабак берип балдарды тарбиялап жатат. Эгемберди Чалабаев болсо Мамлекеттик жаштар театрынын жетекчиси. Мен Көлдөгү алма бак, биякта кенен-кесир чыгармачылык менен чуркап жүрөм. 

— Көлдө алма багым бар деп айтып каласыз. Ал эмне бизнеспи?

— Мындай экен да Гүлдана. Мен тамаша-чыны менен айтканда эл кол чаап койсо эле кыйратып жатам деп жүрө бериптирмин. Бир убакта аркамды карасам эч нерсе жок экен. Ырдаган убак дагы, тамада болгон убакыт дагы бүтөт, алып баруучулук мезгилде үнүң дагы карыйт. Бул мыйзам ченемдүү көрүнүш. Мындан он жыл мурун келинчегим өзүбүздүн жерден он гектар жер алып койдум дегенден "жерди эмне кыласың?" деп урушкам. Кийин кайра "ай сен жакшы аял турбайсыңбы, мен ойлондум, баягы жерге алма тикпейлиби" дедим. Барып айланасын курчатып алма, өрүк, алмурут, шабдаалы, Аксыдагы досторум кайнаалы, баткен өрүктөрүн тигип, ичине помидор, бадыраң, кызылча, дарбыздан бери өстүрбөдүкпү. Топуракты тытып келинчегим экөөбүз болгон күчтүн баарын жумшадык. Элдин баары суктанды. Буюрса жетинчи жылга кетти. Кичүү балам Аргенге бүт баарын өткөрүп бердим. Ортодо алма бак менен жүрүп беш жыл чыгармачылыгым токтоп калды, кайрадан киришейин деп ушул жылдын январынан баштап жаңы обондорду жазып, чоң ырларды иштеп эфирге бергем. 

3987
Белгилер:
чыгармачылык, ыр кесе, Асылбек Өзүбеков
Тема боюнча
Жолдошбек Жанжигит уулу: Султан Сулайман ооруганда мен да бейтапканага жатып калдым
Сулуулук сынагын жеңген таене: аялдын ажарын күйөө ачат
Гүлжигит Калыков: атамдан тартынып сахнада ачылып бийлей албай жүрөм
Рэпер кыз Тамга

Кыргызстандагы алгачкы рэпер кыз Тамга: бир клип тартып кыйраттык деп жүрүппүз

300
(жаңыланган 18:28 07.03.2021)
Тамга Кыргызстанда алгачкы рэпер кыз катары таанылган. Аны башкалардан аты да, үнү да айырмалап турат. Каарманыбыз бирде назик, бирде сүрдүү болуп эки образды алып жүрөт. Жакында эле дал ушул өзгөчөлүгү үчүн "Ак салкын" тасмасында башкы ролдордун бирин аткарды.

Sputnik Кыргызстан агенттигинин кабарчысы Тамганын рэп жанрына таштаган кадамы жана режиссер Эрнест Абдыжапаровдун сынынан өткөн алгачкы киносу тууралуу маек курду.

— Алгач атыңыздан баштайлы. Чоң энеңиз түш көрүп ысымыңыз ошондон улам коюлуп калганын айтып жүрөсүз. Тамга деген кадимки ариптен башка эмнени түшүндүрөт?

— Бекеринен чоң энемин түшүнө кирип, атым Тамга деп коюлуп калбаса керек. Тамга деген кыргыздардын тарыхында "белги" деген маани менен көп айтылат экен. Мен да жакшы нерсенин белгиси катары өз атыма татыктуу болууга аракеттенем.

Рэп-исполнительница Тамга. Архивное фото
© Фото / Давлет Казыбеков
Рэпер кыз Тамга

— Рэп жанрында кантип ырдап калдыңыз? Бирөөлөр сунуштадыбы же өзүңүз кызыктыңызбы?

— Менин алгачкы дебютум вокалдык эле ыр, бирок арасында бат ырдалган жери да бар болчу. Эл рэп сыяктуу ырдалган жерин жакшы кабыл алып жатты. Анан продюсерим менен кеңешип, "Ой, бой-бой" аттуу рэпти чыгардык. Көпчүлүккө жагып, ошондон улам рэпер катары таанып калышты окшойт. Бирок мен рэп менен эле чектелбейм, ар түрдүү ырларды аткара берем.

— Кыздардын рэп аткарышын биздин коомчулук кандай кабыл алат экен? Бир сыйра сындан өтсөңүз керек...

— Албетте, ар кандай сындар айтылды, көбүнчө "үнүң өзгөчө, ар кандай жанрга туура келе берет" деген жакшы пикирлерди угам. Эгер мага туура сын айтылса маани берип, кемчилдигимди оңдогонго аракет жасайм. "Кыздарга жарашпайт" деген сыяктуу майда-чүйдө сындарга көңүл деле бурбайм. Кызбы же балабы, каалоосу күч болсо ага эч ким тоскоолдук жарата албайт. Эгерде адам бир нерсени жасагысы келсе, башкаларга эмес, өзүнө "каалайсыңбы, жасай аласыңбы?" деп суроо берип, ошого ишенсе жасай бериши керек.

— Элдин сыны тууралуу айтып калдык, эң башкысы үй-бүлөңүз чыгармачылыгыңызга, дегеле рэп ырдаганыңызга кандай карайт?

— Мен жөнөкөй үй-бүлөнүн кызымын, түбүм Алайдан. Бирок атамдын көзү өткөндөн кийин Сокулукта окуп, чоңойгом. Чыгармачылыкка атам үчүн келгем десем да жаңылышпайм. Ал мага каалоо жаратып, шык берип кетти. Атам дүйнө салгандан кийин апам жакшы тарбия берип өстүрдү. Эң башкы колдоочуларым — жакындарым. Алар дем-күч берип турса гана башка ийгиликтерди жарата алам.

Рэп-исполнительница Тамга. Архивное фото
© Фото / Мирлан Саткымбаев
Рэпер кыз Тамга

— Кыргызстанда рэп аткарууга кызыккан кыздар көп эле бекен, өзүңүз ырдап чыккандан кийин байкаган чыгарсыз?

— Учурда Кыргызстанда рэп аябай эле өнүгүп, элдин талабы да жогорулап баратат. Башка ырларга да рэп кошуп жүрүшөт. Мурда кыздардын кызыгуусу жогору экенин байкабаптырмын. Өзүм аралашып калгандан кийин жаш кыздар рэп ырларын аябай эмоция менен аткарганын көрүп калдым. Instagram баракчама жазган кыздар да көбөйдү. Демек, бизден мотивация алып жатышса керек. Бул мен үчүн чоң жоопкерчилик экенин сезем.

— Ырчылар көбүнчө тойлордо ырдап киреше табат эмеспи, сиздин киреше булагыңыз кайсы жактан?

— Биз деле тойлорго барабыз, анткени азыр дээрлик жаштардын баары тойдун шаңдуу болушун каалашат. Негизи каражат табуунун жолу көп. Бир эле той менен чектелбеш керек, жаштар түрдүү иш-чараларга чакырышат. Ар кандай кинонун саундтректерине буюртма алабыз, башка да нерселер көп. Ал эми гонарарыбыз боюнча айтпай эле коеюн. Аны продюсерим менен сүйлөшкөн оң.

— Рэп бат кабыл алуу, так сүйлөө, тил үйрөнүү жаатында чоң жардам берет деген сөздүн канчалык деңгээлде чындыгы бар?

— Бул жанрда бир эле ритмде бир канча ой бат-баттан айтылгандыктан, аларды бат кабыл алып, бат айтууга туура келет. Ошондой эле башка рэпти угуп жатканда да бат түшүнүүгө аракет жасайбыз. Андыктан чын эле тез кабыл алууну үйрөтөт. Дикция дагы башкы ролдо, андыктан ар бир тыбышты туура айтуу керек. Менин ырыма чет өлкөлүктөр да кызыгып, ырдап көргөндөрүн угуп калдым. Алар да кыргызчаны ырдын жардамы менен туура айтууга аракет жасашат экен. Бул биз үчүн сыймык. Демек, тилди бат үйрөнүүгө да жардамчы боло алат деп айтсак болот окшойт. Анан, албетте, эмоция менен ырдалып, шаңдуу болгондуктан маанайды көтөрөт.

Рэп-исполнительница Тамга в офисе Sputnik Кыргызстан
© Sputnik / Шабдан Абылгазы уулу
Рэпер кыз Тамга

— Ырчылыктан башка эмнеге кызыгасыз?

— Бийге басым жасап жатам. Анткени менин чыгармачылыгыма аябай керек экен. Комуз чертүү боюнча окугам, аны менен бирге профессионалдуу болбосо да гитарада, фортепианодо бир аз ойнойм. Өзүмдү мажбурлап эч нерсе жасабайм. Мындан сыртары, вокалдан курс ачып сабак бере баштадым.

— Эми кеп "Ак салкын" тасмасы тууралуу болсун, анда кимдин ролун жараттыңыз?

— Жакында эле биринчи жолу "Боз салкындын" экинчи бөлүгү "Ак салкын" тасмасына тартылдым. Анда көп тажрыйба топтодум окшойт. Биз бир клип тартып алып эле кыйраттык деп жүрүптүрбүз, тасма тарткан андан бир топ эле кыйын турбайбы. Көп адамдын эмгеги сарпталат экен. Эрнест Абдыжапаров менин маектеримди көргөн экен. "Бул кыз эки башка образ берип жатат, башкы каармандын мүнөзүнө окшош экен" деп анан сунуштаптыр. Кинодо Асыл деген мекенин сүйгөн кыздын образын аткарам. Ушундан кийин мен да мекенимди көбүрөөк сүйүп калдым. Кино Ысык-Көлдө тартылып, кооздугуна көзүм тойбой ал жерге жашап калгым келди. Азыр да сагынып турам.

  • Рэп-исполнительница Тамга с рэппером Бегишем во время съемок фильма Ак Салкын
    Рэпер кыз Тамга
    © Фото / Иманбек Асылбеков
  • Рэп-исполнительница Тамга с режиссером Эрнестом Абдыжапаровым во время съемок фильма Ак Салкын
    Рэпер кыз Тамга
    © Фото / Иманбек Асылбеков
  • Рэп-исполнительница Тамга во время съемок фильма Ак Салкын
    Рэпер кыз Тамга
    © Фото / Иманбек Асылбеков
1 / 3
© Фото / Иманбек Асылбеков
Рэпер кыз Тамга

— Ал кинонун саундтрегин да сиз ырдап чыксаңыз керек?

— Ооба, Бегиш экөөбүз ырдайбыз. Кино 25-марттан баштап кинотеатрлардан көрсөтүлө баштайт. Өзүм да күтүп жатам.

— Жаш, татынакай кыздын жеке жашоосуна кызыкпай коюу мүмкүн эмес да. Табитиңиздеги мырза кандай, мүмкүн аны жолуктурган чыгарсыз?

— Табит деп ар нерсени айта беребиз. Негизгиси сезим керек да. Бардык берген маегимде бул тууралуу айтпайм. Ушу тапта менин жигитим — чыгармачыл жашоом, эмгектерим деп гана айта алам. Бүт сезимимди, күчүмдү, энергиямды чыгармачылыкка жумшоодомун.

300
Белгилер:
Тамга, чыгармачылык, кино, маек, ырчы, рэпер
Тема боюнча
Ырлары миллион көрүүчү топтогон Алтынай: мамлекеттик кызматта экениме сүйүндүм
Интернет жылдызына айланган Байзак ырчы: аябай толкунданып жатам...
Укук коргоочулардын үйүндө чоңойгом. Ырчы НурЧолпондун маеги
Аскат Мусабеков, Миргүл Асаналиева: бир ырдын арты менен сезимибиз бекемделди
Маданияттын мыкты кызматкери, Алыкул Осмонов атындагы адабий сыйлыктын ээси, акын Акбар Кубанычбеков

Кубанычбеков: адабиятчылар аймактарды аралап элге көп чыгышы керек

48
(жаңыланган 14:36 05.03.2021)
Маданияттын мыкты кызматкери, Алыкул Осмонов атындагы адабий сыйлыктын ээси, акын Акбар Кубанычбеков учурда поэзия тармагы өнүгүүгө багыт алып жатканын белгиледи.
Кубанычбеков: адабиятчылар аймактарды аралап элге көп чыгышы керек

Адабиятчылар маданий ротацияга муктаж болуп турат. Өзгөчө, акындар аймактарды кыдырып, чыгармаларын элге жеткирсе жакшы болмок. Мындай пикирин Акбар Кубанычбеков Sputnik Кыргызстан радиосуна маек куруп жатып билдирди.

Анын айтымында, чыгармалардын сынга кабылуусу анын окулуп жатканынан кабар берет.

"Поэзия тармагы элдик фольклордон чыныгы жазмага өткөнү жакшы эле өсүш болгон. Андан бери көптөгөн залкар акындар чыгып адабий айдыңда өз ордун ээлеп калды. Ал эми эгемендүүлүккө келе турган болсок, ортодо поэзия каралбай калган. Башкача айтканда, чыгарманын окурманы болуусу шарт. Алар жазуучунун өсүүсүнө түрткү болот. Көз карандысыздыктын алгачкы жылдары китеп окулбай калган. Азыр эми акырындап китепти кубалап окугандар пайда болуп келе жатат. Эгемендүүлүк алгандан бери 30 жыл болду. Бул аралыкта жакшы чыгармалар жазылды. Ошолорду иргеп, тандалмаларды топтоо зарыл. Анан адабий тармак маданий ротацияга муктаж болуп турат. Өз кезегинде Байдылда Сарногоевдин барбаган айылы калбаптыр. Азыр деле Маданият, маалымат, спорт жана жаштар саясаты министрлиги тарабынан акындарга аймактарды кыдыруу боюнча демилгеленсе, чыгармалар элге жетет эле", — деди Кубанычбеков.

Акын учурда жазылып жаткан чыгармалардын сапаты көбүнесе орто заар болуп жатканын кошумчалады.

48
Белгилер:
маданият, ротация, адабият, Акбар Кубанычбеков
Тема боюнча
Эгембердиева: аялзатынын адабиятка келишин жигиттер өздөрү шарттаган
Жеңил атлетчилер марафон учурунда. Архив

Кыргызстандык жеңил атлетчилер Беларуста бир нече медаль алышты

0
(жаңыланган 00:16 08.03.2021)
Аталган спорттук иш-чарада кыргызстандык спортчулар баш-аягы эки алтын, бир күмүш жана үч коло медаль алышты.

БИШКЕК, 8-мар. — Sputnik. Кыргызстандык жөө күлүктөр Беларустагы эл аралык турнирде эки алтын, бир күмүш, үч коло медаль тагынды. Бул тууралуу КРдин Жеңил атлетика федерациясынан билдиришти.

Кыргызстанские легкоатлеты во время соревнований в Беларуси
© Фото / пресс-служба федерации легкая атлетика КР
Кыргызстандык жөө күлүктөр Беларустагы эл аралык турнирде эки алтын, бир күмүш, үч коло медаль тагынды

Маалыматка ылайык, Минск шаарындагы мелдеште узундукка секирүү боюнча Светлана Майер биринчи орунга жетип алтын медалга татыган. Анастасия Бондаренко 200 жана 60 метрге чуркап коло менен күмүш медаль алса, ал эми Артем Слесаренко 60 метрге чуркап коло медалга ээ болгон.

Дагы бир жөө күлүк Калыс Таштанов 1500 метр аралыкта марага биринчи жетип алтын, 800 метр аралыкта үчүнчү келип коло медалды байге куржунуна салган.

Аталган спорттук иш-чарада кыргызстандык спортчулар жалпы эки алтын, бир күмүш жана үч коло медаль алышты. 

0
Белгилер:
медаль, мелдеш, жеңил атлетика, Беларусь
Тема боюнча
Надыров: Ысык-Көл марафонунун байге фонду 1 млн. 44 миң сомду түзөт
ШКУнун эл аралык марафону 15-майда Чолпон-Ата шаарында старт алат