Ырчылар Урмат менен Неля. Архивдик сүрөт

Урмат менен Неля: биздин чөйрөдө бирөөнүн курмандыгы болуп калышың толук мүмкүн

6081
(жаңыланган 18:18 03.12.2016)
Журналист Гүлдана Талантбекова ата мекендик ырчылардын ортосунда куралган үй-бүлөнүн артыкчылыктары жана айырмачылыктары кандай болорун билип көрдү.
Неля мене Урматтын аткаруусундагы "Максат" аттуу чыгарма

Ырчы түгөйлөр чыгармачылыктагы ийгиликтеринен мурда бирин-бири тапкандыгы үчүн кубанышат. Нелянын кубулжуган үнү менен назиктиги, Урматтын сөзгө чечендиги менен таамай ою көптөрдү суктандырса керек.

— Неля, бүгүнкү туулган күнүңүз куттуу болсун. Айтсаңыздар, деги эле үй-бүлөдө даталуу күндөргө канчалык деңгээлде маани бересиздер?

— Неля: Рахмат!

— Урмат: Негизи даталуу күндөр биздин үйдө өзгөчө маанай менен белгиленет. Бул биринчиден Нелянын демилгеси менен болот. Мен буга чейин туулган күнгө маани берчү эмесин. Айрым кездерде унутулуп калган учурлар болгон. Үй-бүлө кургандан кийин балдарыбыздын туулган күнүн белгилеп, аларга камданып, оюндагы нерселерин жасап отуруп өздүк майрамдарга көңүл бура баштадык. Биздики болсо чыгармачылык менен алпурушуп отуруп ар кайсыл жерде өтүп калган учурлар болгон. Алты-жети жылдан бери үй-бүлөбүз менен жакшы мамиледе жүргөн санаалаштар менен декабрь айынын шеринесин биз алып алганбыз. Ушунун баары Нелянын туулган күнүнүн урматына болот.

— Неля: Биздин үйгө конок көп келет. Меймандарды дасторконубузду жайып жылуу маанай менен тосуп алганга аракет кылабыз. 

Певец кыргызской эстрады Урмат Усенов во время интервью на радио Sputnik Кыргызстан
© Sputnik / Азамат Тотубаев
Урмат: Негизи даталуу күндөр биздин үйдө өзгөчө маанай менен белгиленет. Бул биринчиден Нелянын демилгеси менен болот

— Убакыт өткөн сайын жубайлар ортосунда жаңы ачылыштар болуп турат эмеспи. Урмат мырза, Нелянын талаптарын жакшы эле түшүнсөңүз керек?

— Мага тийиштүүсүн билем деп айта алам. Бирок дагы аялдын өзүнө гана тийиштүү нерселер бар. Кыз-жигиттеги мамиле менен үй-бүлө кургандагы мамиле таптакыр башка болот экен. Азыр экөөбүз бир бүтүн кишибиз. Ошондуктан бул билген нерсени мен билгенге, ал билгенди мен билгенге аракет жасайбыз. 

— Кечээ чалганда убактыңыздардын тар экенин байкадым. Бардык иштерге график түзүп аласыздарбы? 

— Урмат: Чыгармачылык менен түшкө чейин алектенүү мүмкүн эмес. Күн тартиби эртең менен жети жарымда балабызды мектепке алып баргандан башталат. 11-12 чейинки убакта өзүмө тийиштүү болгон иштерди бүтүрүп алганга аракет жасайм. Түштөн кийин кызымдын бийи башталат. Экиден кечке чейин ыр жаздырып убакытты чыгармачылыкка арнайбыз. Кечки 17:00дөн баштап он экиге чейин иш убактыбыз башталат. Той-топурларда, кечелерде кызмат кылабыз дегендей. Экөөбүз дайыма чогуу жүрөбүз. Көбүнчө үлпөт тойлоруна кеминде силердей болсо экен деген тилек менен ырым кылып чакырышат. 

— Чечимдин көбүрөөк бөлүгүн Урмат мырза чыгарат окшойт. Кечээ маекке чакырсам Неля Урматтан сурап көрүңүзчү деди эле?

— Неля: Мен чындыгында иш графигин билбейм. Урмат мага каякта, кайсыл убакта, каерде болорун билип туруп кабар берет. 

Эстрадная певица кыргызской эстрады Неля во время интервью на радио Sputnik Кыргызстан
© Sputnik / Азамат Тотубаев
Неля: мен чындыгында иш графигин билбейм. Урмат мага каякта, кайсыл убакта, каерде болорун билип туруп кабар берет

— Урмат: Бул жазылбаган эрежелердин бири. Аял кишинин мындан башка түйшүгү жетиштүү. Үй-бүлө, бала-чака, алардын кийими, тамагы, тарбиясы, үйдөгү атмосфера аял кишинин көчөдөгү жумуштар менен алектенүүсүнөн бир аз алагды кылат. Ошондуктан чыгармачылыкка тийиштүү суроолордун баары менин милдетиме жүктөлүп калат. 

Нелянын аткаруусундагы "Кыз бурак" ыры

— 2005-жылы шоу-бизнестин жаңы агымы пайда болгондон тарта биз сиздерди популярдуу ырларыңыздан улам таанып баштадык. Ал эми сиздер таанышып калган күн эсиңиздердеби?

— Неля: Албетте. Алгач КТРдин алдында жолугуп, таанышканбыз. Андан кийин чыгармачылыкта тыгыз байланышта болуп жүрдүк. Себиби Урмат менин көптөгөн ырларымдын автору, обонун чыгарган. Ошентип чыгармачылыкка байланыштуу көбүрөөк иштешип калдык. Жакшы мамиледен достукка, андан кийин сүйүүгө, анан үй-бүлөгө айланды. Кудай буюрса, үйлөнгөнүбүзгө сегиз жыл болуптур. 

— Ал убакта ийгилик экөөңүздөргө тең жылмайды окшойт?

— Урмат: Негизи ошол убак шоу-бизнестеги жаңы агымдын агылып кириши болду окшойт. Ал учурда чыккан ырчылардын ырларынын көбү ар бир адамдын жүрөгүндө жана кулагында калды. Менимче, ошол убактагы угармандын, көрөрмандын, коомдун талабына туш келип калгандайбыз. Бизге чейинки ырчылар өзүндө болгон продукцияларын баарын угарманга берип боштук пайда болгондо биз чыктык. Азыр салыштырып көрсөк, бизди эл башкача кабыл алыптыр. Концерттер дагы башкача маанайда өтчү эле. Азыр "мен" деген мега жылдыз концерт койбосун, көрөрмандан ашыкча эмоцияны көрүүгө болбойт. Токтоолук бар. Бул нерсени коомдун өзгөрүшү, өсүшү катары да караса болот. 

— Ошол мезгилден бери атыңыздарды жоготпой, бирок жай темпте иштеп келесиздер? Бул убакыттынын жоктугубу же каалоонун басаңдашыбы?

— Урмат: Бул биздин — максатыбыз. Себеби ашынып, алдыга озуп чыгып, башкалардан өзгөчөлөнүп лидерликке талпынбайбыз. Ошол эле мезгилде такыр эле көңүл бурбай кайдыгер мамиле жасагандан дагы алыспыз. Чыгармачылык бул жашоодогу бир маанилүү миссияларыбыздын бири экендигин түшүндүк. Кудай таалаам бизге ушуну насип кылган экен. Чыгармачылыктагы зыяндуу нерселерден алысыраак болуп колдон келишинче пайдалуурак жагын көздөгөнгө аракет жасап иштеп келебиз. Ушул бир калыптагы темп жагат. Анан мага жаккан нерсе Неляга да жагат. 

Урматтын аткаруусундагы "Тумар кыз" аттуу чыгарма

— Урмат мырза, сизди сөзгө чечен жана принципиалдуу теле алып баруучу катары да билебиз. Өзүңүзгө ырчылык жакынбы же алып баруучулукпу? 

— Чыгармачылыктын башаты менде алып баруучулуктан башталган. Бул мен үчүн бир тепкич болуп берген. Мүмкүнчүлүк боло калган учурда, ылайыгы келген долбоорго жок дебейм. Азыр деле анча-мынча жыйындарды, чыгармачылык кечелерди алып барып жүрөм. Алып баруучулук өзүнчө бир эргүү. Себеби кесибим ушуну талап кылган. Кесибим боюнча кыргыз жана түрк тил адабияты боюнча тилчимин. Ал кесип беш жыл бою адабиятка үңүлгөнгө, көркөм адабиятка сүңгүгөнгө мажбур кылган. Кааласаң, каалабасаң дагы ошол базаны колдонгонго туура келет. Сүйлөө, алып баруу окуу жайдан алган табылгам, ал эми ырдаган, ыр жазуу көкүрөгүмдөгү нерсе. 

— Бирок үйдөгү маселени жалпак тил менен чечсеңиз керек?

— Неля: Конфликт дегенге жол бербегенге аракет жасайбыз. Биздин уруштар балдар сыркоолоп калганда болушу мүмкүн. Жыл өткөн сайын аял-күйөөсү эмес, бир туугандай болуп баратабыз. Мындайча айтканда ортодо жашыра турчу деле эч нерсе болбой калат экен.

— Урмат: Сегиз жыл бирге жашоо аз эле убакыт болсо керек. Кудай буюрса, аманчылыкта отуз-кырк жыл чогуу жашап, ошондогу сезимдерди, татаалдыктарды, ырахатты эл менен бөлүшсөкпү дейм. Бул жөнүндө жаштарга үлгү катары китеп жазгым келет. Азыр деле социалдык тармактарга өз оюмду жазайын десем сөздөр узун болуп кетет. Андай узун ойду эл кабыл ала бербейт. Ошондуктан көп жылдык жашоодон кийин психологиялык өңүттө эмгек жазсамбы дейм. 

Певцы Урмат Усенов и Неля на площади Ала-Тоо в честь 25-летия независимости Кыргызстана
© Sputnik / Табылды Кадырбеков
Кыргызстандын эгемендүүлүгүнүн 25 жылдыгына арналган майрамдык концерт

— Балдарды кандай ыкма менен тарбиялайсыздар? Силер деле еврейлердин айрым принциптерин колдоносуңарбы? Эл катары балдарды анда-санда эмдеп-домдоп койгон учурлар болобу?

— Неля: Еврейлердин балдарга мотивация бере турчу айрым гана ыкмаларын колдонсок керек. Балдар менен көбүнчө мен жүргөндүктөн болушунча жакшы тарбия бергенге аракет жасайм. Баланын өзүнөн да болот окшойт. Эркек балабыз абдан боорукер, мээримдүү. Сүрөттү да атасындай жакшы тартып, жеке көз карашын чагылдыра алат. Кызыбыз, тескерисинче, шамдагай, эптүү. Атасынын кызы (күлүп). Балдар азыр кандай гана маалымат болбосун тез сиңирип, көргөн нерсесин кылышат. Ошондуктан коомдогу негативдүү окуялардан коргогонго аракет жасайбыз. 

— Урмат: Баары эле билсе керек, балдарыбызды гезит-журналдарга, телеге, социалдык тармактарга чыгарбаганга аракет кылабыз. Бул нерсени ар ким ар кандай түшүнүшү мүмкүн. Биз балдарыбыз кадимки бала катары, элдин баласы катары эркиндикте өсүшүн каалайм. Себеби биз өзүбүз жүргөн чөйрөнүн канчалык деңгээлде терс жагы бар экенин жакшы билебиз. Ачыгын айтканда, биздин чөйрөдө өзүңдү коргоп калбасаң, бирөөнүн курмандыгы болуп калышың мүмкүн. Ар бир кадамыңды абайлап таштабасаң, аркаңдагы изиңди сүртө жүрбөсөң бул өтө терс чөйрө. Мындай учурларда балдарыңа зыяны тийип калбасын деп ойлойт экенсиң. 

— Алдыда кандай пландарыңыздар бар. 10-15 жылдан кийин өзүңөрдү үй-бүлөлүк, чыгармачылык планда кандай элестетесиңер? 

— Неля: Кудай буюрса, көп балалуу болгубуз келет. Тилек кылса кудай берет десек, уулум чуркап келет "мен тиледим, эми качан бала болот" деп. Кызым дагы куурчагын көтөрүп алып тамагын берип жүрөт. Төрөсөм өздөрү эле багып коет экен деп калам. Көп бир тууган болгондун жакшы жактары көп экен. Небере-чөбөрө жытын жыттап, очор-бачар болгон күндөрдү көп кыялданам. 

Чыгармачылыкта иштеп жүргөнүбүздө он жыл болуптур. Буюрса, келе жаткан жылы өзүбүздүн жеке концертибизди берип чыгармачылык отчет катары күйөрмандарыбызга жакшы маанай тартуулайбыз деп жүрөбүз. Азыр жаңы ырлар жазылып, клипке даярдыктар көрүлүп жатат. 

— Урмат: 10-15 жылдан кийин кудай буюруп аманчылык берсе азыркы күндөгүдөй эле болсо дейм. Үй-бүлөнүн аманчылыгын, алдыдагы жакшы иштерди жатып-туруп тиленебиз. Балким мындан беш жыл мурун чыгармачылыкка убактылуу кызыгуу, башка жактан өзүңдү алаңдап изденген учурлар болгон. Бүгүнкү күндө жеткен ийгиликтер чыгармачылыктын аркасынан болуп келе жатат. Керек болсо чыгармачылыктын аркасынан бири-бирибизди таптык. Болгону чыгарма жаратаарда башкалардын ою, сезими, дарты тууралуу эсептешкенди биле жүрүш керек экен. Анын ичинен пропаганданы азайтып, арманды чектеп, негативди көзөмөлдөш керек экен. Себеби биздин ырдаган ырларыбыз кээ бирлерге зыян алып келип коюшу мүмкүн. Кээ бирлерин бактылуу кылып коюшу ыктымал. "Силердин ырыңар менен бири-бирибизди табышканбыз, силердин ырыңар биздин бактыбызга орток" деген учурлар болгон. Бул албетте, бизди талпынтат, шыктандырат. 

6081
Белгилер:
бир тууган, концерт, бала, ырчы, Урмат Усенов
Тема боюнча
Мерген Турган: жакында кайната болом деп толкунданып жүрөм
Кайрат Примбердиев: жубайым кыргыз эстрадасын багындырам деп турат
Туулган күнүң менен, Каныкей! Ырчы тууралуу кызыктуу 7 факты
Рэпер кыз Тамга

Кыргызстандагы алгачкы рэпер кыз Тамга: бир клип тартып кыйраттык деп жүрүппүз

49
(жаңыланган 17:49 07.03.2021)
Тамга Кыргызстанда алгачкы рэпер кыз катары таанылган. Аны башкалардан аты да, үнү да айырмалап турат. Каарманыбыз бирде назик, бирде сүрдүү болуп эки образды алып жүрөт. Жакында эле дал ушул өзгөчөлүгү үчүн "Ак салкын" тасмасында башкы ролдордун бирин аткарды.

Sputnik Кыргызстан агенттигинин кабарчысы Тамганын рэп жанрына таштаган кадамы жана режиссер Эрнест Абдыжапаровдун сынынан өткөн алгачкы киносу тууралуу маек курду.

— Алгач атыңыздан баштайлы. Чоң энеңиз түш көрүп ысымыңыз ошондон улам коюлуп калганын айтып жүрөсүз. Тамга деген кадимки ариптен башка эмнени түшүндүрөт?

— Бекеринен чоң энемин түшүнө кирип, атым Тамга деп коюлуп калбаса керек. Тамга деген кыргыздардын тарыхында "белги" деген маани менен көп айтылат экен. Мен да жакшы нерсенин белгиси катары өз атыма татыктуу болууга аракеттенем.

© Фото / Давлет Казыбеков
Рэпер кыз Тамга

— Рэп жанрында кантип ырдап калдыңыз? Бирөөлөр сунуштадыбы же өзүңүз кызыктыңызбы?

— Менин алгачкы дебютум вокалдык эле ыр, бирок арасында бат ырдалган жери да бар болчу. Эл рэп сыяктуу ырдалган жерин жакшы кабыл алып жатты. Анан продюсерим менен кеңешип, "Ой, бой-бой" аттуу рэпти чыгардык. Көпчүлүккө жагып, ошондон улам рэпер катары таанып калышты окшойт. Бирок мен рэп менен эле чектелбейм, ар түрдүү ырларды аткара берем.

— Кыздардын рэп аткарышын биздин коомчулук кандай кабыл алат экен? Бир сыйра сындан өтсөңүз керек...

— Албетте, ар кандай сындар айтылды, көбүнчө "үнүң өзгөчө, ар кандай жанрга туура келе берет" деген жакшы пикирлерди угам. Эгер мага туура сын айтылса маани берип, кемчилдигимди оңдогонго аракет жасайм. "Кыздарга жарашпайт" деген сыяктуу майда-чүйдө сындарга көңүл деле бурбайм. Кызбы же балабы, каалоосу күч болсо ага эч ким тоскоолдук жарата албайт. Эгерде адам бир нерсени жасагысы келсе, башкаларга эмес, өзүнө "каалайсыңбы, жасай аласыңбы?" деп суроо берип, ошого ишенсе жасай бериши керек.

— Элдин сыны тууралуу айтып калдык, эң башкысы үй-бүлөңүз чыгармачылыгыңызга, дегеле рэп ырдаганыңызга кандай карайт?

— Мен жөнөкөй үй-бүлөнүн кызымын, түбүм Алайдан. Бирок атамдын көзү өткөндөн кийин Сокулукта окуп, чоңойгом. Чыгармачылыкка атам үчүн келгем десем да жаңылышпайм. Ал мага каалоо жаратып, шык берип кетти. Атам дүйнө салгандан кийин апам жакшы тарбия берип өстүрдү. Эң башкы колдоочуларым — жакындарым. Алар дем-күч берип турса гана башка ийгиликтерди жарата алам.

© Фото / Мирлан Саткымбаев
Рэпер кыз Тамга

— Кыргызстанда рэп аткарууга кызыккан кыздар көп эле бекен, өзүңүз ырдап чыккандан кийин байкаган чыгарсыз?

— Учурда Кыргызстанда рэп аябай эле өнүгүп, элдин талабы да жогорулап баратат. Башка ырларга да рэп кошуп жүрүшөт. Мурда кыздардын кызыгуусу жогору экенин байкабаптырмын. Өзүм аралашып калгандан кийин жаш кыздар рэп ырларын аябай эмоция менен аткарганын көрүп калдым. Instagram баракчама жазган кыздар да көбөйдү. Демек, бизден мотивация алып жатышса керек. Бул мен үчүн чоң жоопкерчилик экенин сезем.

— Ырчылар көбүнчө тойлордо ырдап киреше табат эмеспи, сиздин киреше булагыңыз кайсы жактан?

— Биз деле тойлорго барабыз, анткени азыр дээрлик жаштардын баары тойдун шаңдуу болушун каалашат. Негизи каражат табуунун жолу көп. Бир эле той менен чектелбеш керек, жаштар түрдүү иш-чараларга чакырышат. Ар кандай кинонун саундтректерине буюртма алабыз, башка да нерселер көп. Ал эми гонарарыбыз боюнча айтпай эле коеюн. Аны продюсерим менен сүйлөшкөн оң.

— Рэп бат кабыл алуу, так сүйлөө, тил үйрөнүү жаатында чоң жардам берет деген сөздүн канчалык деңгээлде чындыгы бар?

— Бул жанрда бир эле ритмде бир канча ой бат-баттан айтылгандыктан, аларды бат кабыл алып, бат айтууга туура келет. Ошондой эле башка рэпти угуп жатканда да бат түшүнүүгө аракет жасайбыз. Андыктан чын эле тез кабыл алууну үйрөтөт. Дикция дагы башкы ролдо, андыктан ар бир тыбышты туура айтуу керек. Менин ырыма чет өлкөлүктөр да кызыгып, ырдап көргөндөрүн угуп калдым. Алар да кыргызчаны ырдын жардамы менен туура айтууга аракет жасашат экен. Бул биз үчүн сыймык. Демек, тилди бат үйрөнүүгө да жардамчы боло алат деп айтсак болот окшойт. Анан, албетте, эмоция менен ырдалып, шаңдуу болгондуктан маанайды көтөрөт.

— Ырчылыктан башка эмнеге кызыгасыз?

— Бийге басым жасап жатам. Анткени менин чыгармачылыгыма аябай керек экен. Комуз чертүү боюнча окугам, аны менен бирге профессионалдуу болбосо да гитарада, фортепианодо бир аз ойнойм. Өзүмдү мажбурлап эч нерсе жасабайм. Мындан сыртары, вокалдан курс ачып сабак бере баштадым.

— Эми кеп "Ак салкын" тасмасы тууралуу болсун, анда кимдин ролун жараттыңыз?

— Жакында эле биринчи жолу "Боз салкындын" экинчи бөлүгү "Ак салкын" тасмасына тартылдым. Анда көп тажрыйба топтодум окшойт. Биз бир клип тартып алып эле кыйраттык деп жүрүптүрбүз, тасма тарткан андан бир топ эле кыйын турбайбы. Көп адамдын эмгеги сарпталат экен. Эрнест Абдыжапаров менин маектеримди көргөн экен. "Бул кыз эки башка образ берип жатат, башкы каармандын мүнөзүнө окшош экен" деп анан сунуштаптыр. Кинодо Асыл деген мекенин сүйгөн кыздын образын аткарам. Ушундан кийин мен да мекенимди көбүрөөк сүйүп калдым. Кино Ысык-Көлдө тартылып, кооздугуна көзүм тойбой ал жерге жашап калгым келди. Азыр да сагынып турам.

  • Рэпер кыз Тамга
    © Фото / Иманбек Асылбеков
  • Рэпер кыз Тамга
    © Фото / Иманбек Асылбеков
1 / 2
© Фото / Иманбек Асылбеков
Рэпер кыз Тамга

— Ал кинонун саундтрегин да сиз ырдап чыксаңыз керек?

— Ооба, Бегиш экөөбүз ырдайбыз. Кино 25-марттан баштап кинотеатрлардан көрсөтүлө баштайт. Өзүм да күтүп жатам.

— Жаш, татынакай кыздын жеке жашоосуна кызыкпай коюу мүмкүн эмес да. Табитиңиздеги мырза кандай, мүмкүн аны жолуктурган чыгарсыз?

— Табит деп ар нерсени айта беребиз. Негизгиси сезим керек да. Бардык берген маегимде бул тууралуу айтпайм. Ушу тапта менин жигитим — чыгармачыл жашоом, эмгектерим деп гана айта алам. Бүт сезимимди, күчүмдү, энергиямды чыгармачылыкка жумшоодомун.

49
Белгилер:
Тамга, чыгармачылык, кино, маек, ырчы, рэпер
Тема боюнча
Ырлары миллион көрүүчү топтогон Алтынай: мамлекеттик кызматта экениме сүйүндүм
Интернет жылдызына айланган Байзак ырчы: аябай толкунданып жатам...
Укук коргоочулардын үйүндө чоңойгом. Ырчы НурЧолпондун маеги
Аскат Мусабеков, Миргүл Асаналиева: бир ырдын арты менен сезимибиз бекемделди
Маданияттын мыкты кызматкери, Алыкул Осмонов атындагы адабий сыйлыктын ээси, акын Акбар Кубанычбеков

Кубанычбеков: адабиятчылар аймактарды аралап элге көп чыгышы керек

47
(жаңыланган 14:36 05.03.2021)
Маданияттын мыкты кызматкери, Алыкул Осмонов атындагы адабий сыйлыктын ээси, акын Акбар Кубанычбеков учурда поэзия тармагы өнүгүүгө багыт алып жатканын белгиледи.
Кубанычбеков: адабиятчылар аймактарды аралап элге көп чыгышы керек

Адабиятчылар маданий ротацияга муктаж болуп турат. Өзгөчө, акындар аймактарды кыдырып, чыгармаларын элге жеткирсе жакшы болмок. Мындай пикирин Акбар Кубанычбеков Sputnik Кыргызстан радиосуна маек куруп жатып билдирди.

Анын айтымында, чыгармалардын сынга кабылуусу анын окулуп жатканынан кабар берет.

"Поэзия тармагы элдик фольклордон чыныгы жазмага өткөнү жакшы эле өсүш болгон. Андан бери көптөгөн залкар акындар чыгып адабий айдыңда өз ордун ээлеп калды. Ал эми эгемендүүлүккө келе турган болсок, ортодо поэзия каралбай калган. Башкача айтканда, чыгарманын окурманы болуусу шарт. Алар жазуучунун өсүүсүнө түрткү болот. Көз карандысыздыктын алгачкы жылдары китеп окулбай калган. Азыр эми акырындап китепти кубалап окугандар пайда болуп келе жатат. Эгемендүүлүк алгандан бери 30 жыл болду. Бул аралыкта жакшы чыгармалар жазылды. Ошолорду иргеп, тандалмаларды топтоо зарыл. Анан адабий тармак маданий ротацияга муктаж болуп турат. Өз кезегинде Байдылда Сарногоевдин барбаган айылы калбаптыр. Азыр деле Маданият, маалымат, спорт жана жаштар саясаты министрлиги тарабынан акындарга аймактарды кыдыруу боюнча демилгеленсе, чыгармалар элге жетет эле", — деди Кубанычбеков.

Акын учурда жазылып жаткан чыгармалардын сапаты көбүнесе орто заар болуп жатканын кошумчалады.

47
Белгилер:
маданият, ротация, адабият, Акбар Кубанычбеков
Тема боюнча
Эгембердиева: аялзатынын адабиятка келишин жигиттер өздөрү шарттаган