Молодоц актер Канат Дилдедосов

Эл оозуна алынган кичинекейлер. КВНчиден тарта ди-джейге чейин

971
(жаңыланган 09:52 30.12.2016)
Кичинесинен эмгекти сүйүп, талантты кадырлаган уул-кыздардан кыргыздын уучу куру эмес. Төмөндө биз сөз кыла турган балдардын ар биринин өзгөчө таланты бар. Ошол өнөрлөрү менен айрымдары өзүн-өзү камсыз кылса, кээси мектеп курагында мамлекеттин мыкты кызматкери наамын алууга жетишкен.

Sputnik Кыргызстан кичинесинен атактуулукка жетишип, алдыдагы максаттарын чекесинен ишке ашырып келе жаткан уул-кыздардын айрымдарын тизмектеп, алар менен кызыктуу маек курду. 

© Sputnik / Актан Темирканов
Манасчы Үмөт Тайторуну чаптырып, жети хандын чатагын айтты

Үмөт Дөөлөтов, 11 жашта: колумду кармап сүрөткө түшкөндөр көп

Үмөт Дөөлөтов 10 жашында "Маданияттын мыкты кызматкери" деген наамга ээ болгон эң жаш манасчы. Ал Кыргызстандын тарыхында бул төш белгиге ээ болгон биринчи мектеп окуучусу. Жаш манасчы учурда Ысык-Көл районунун Бактуу-Долоноту айылында 5-класста окуйт.

— "Манас" айтып көп мамлекеттерге бардың окшойт?

— Ооба, көп эле өлкөгө бардым. Россия, Түркия, Азербайжан, Казакстан мамлекеттерин кыдырып, ар түрдүү маданий иш-чараларга катыштым. Келе жаткан 2017-жылы Кытайга чакырып жатышат, буюрса атам экөөбүз барабыз го.

— Чет өлкөлүктөр сенин өнөрүңдү көрүп кандай мамиле жасашат?

— Чекемен өөп, колумду кармап, сүрөткө түшүшөт.

— Манас айтпай көпкө чыдабасаң керек?

— Ооба, мектепте, үйдө отуруп алып айтам. Кээде аябай "Манас" айткым келет, ошондо атамды отургузуп алып айтып-айтып алам.

— Чоң таланттын алдыга койгон максаттары да чоң го?

— Келечекте Саякбай атамдай чоң манасчы болом.

Үмөттүн атасы Болот Дөөлөтов аны той-ашка чакыргандар абдан көп экенин билдирди. Анын айтымында, кээ бирлер аябай көп сумма сунуш кылышат. Бирок андай иш-чараларга азырынча Үмөт бара албай турганын кошумчалады. 

© Sputnik / Эмиль Садыров
Жаш актер мачо-Азамат Америкага барып тасмага тартылып келди

Мачо-Азамат Уланов, 16 жашта: азыркы тамадалардын көбү жакпайт 

Чыгармачылыгын "Тамашоу" лигасынан баштаган кичинекей актер Азамат Уланов азыр 10-класста. "Дерзкий", "мачо", "Шректин мышыгы" деген атка конгон өнөрпоз жаш болсо да токтолуп калган адамдай олуттуу сүйлөп, тартынбай баарын тамашага салып коет.

— Атактуулукка кантип жеттиң?

— Мектептин КВН лигасында ойноп жүрсөм "Тамашоу" лигасына катышууга бир командадан сунуш түшүп калды. Ошентип баш-отум менен "Тамашоу" лигасына кирип ойноп калдым. Анан тасмаларга, клиптерге тартылууга сунуштар түшө баштады.

— Тартылган тасмаларыңан гонорар аласыңбы?

— "Сен эмне кылмаксың", "Ишен", "Девушка моей мечты", "Бир тууганчики" тасмаларынын кыскача эпизоддоруна тартылсам, жакында “В поисках моей мамы” тасмасында башкы ролду жараттым. Ал тасма Америкада тартылды. Алгач киного 7-классымда тартылгам, ал жактан эпизодго гана катышып, 500 сом алып абдан сүйүнгөм. Аны дароо үйгө алып барып апама берсем, толкунданып ыйлап жиберген.

— Эми чоң ролдорду да жаратып баштапсың, көбөйсө керек?

— Ооба, иштеген акыңды капа кылбай эле төлөшөт. Бул жолку башкы каармандын образын жаратканым үчүн 1000 доллар гонорар алдым. Эң көп тапкан акчам ушул болду.

— Алдыдагы пландарың жөнүндө айта кетсең, келечекте ким болгуң келет? 

— Келечекте банкир болгум келет, бирок ага чейин окуумду аяктаганда тамадалык кызматты да аркаласамбы деп турам. Анткени азыркы тамадалардын саны көп болгону менен сапаттуулары аз. Мен абдан мыкты тамада болгум келет. 

© Sputnik / Эмиль Садыров
Жаш ырчы Айдин Нурдинов Дима Биландын Believe me ырын аткарды

Айдин Нурдинов, 13 жашта: өзүмдүн стилист, дизайнерим бар

Эл аралык Bala Turkvizyon-2015 сынагына катышып "Алтын үн" номинациясынын ээси аталган 13 жаштагы Айдин Нурдинов келечекте Кыргызстандын мега жылдызы аталгысы келет. Анын жакшы көргөн ырчысы Мирбек Атабеков, Гүлжигит Калыков жана казак ырчысы Кайрат Нуртас.

— Turkvizyon сынагынан Кыргызстандын желегин желбиретип жатканда кандай сезимдер болду?

— Көп деле толкунданган жокмун. Бирок жеңиш үчүн болгон күчүмдү жумшадым.

— Чач жасалгаң өзгөчө экен. Стилисттер менен иштешесиңби?

— Ооба, өзүмдүн стилист, дизайнерлерим бар. Кийимди алар чогуу кеңешип тигишет. Ал эми продюсерим — апам. Ал бардык жактан мени колдоп турат. Мен ырдап жатканда өзү ырдап жаткандай толкунданып, чач тарачым бошобой же жок болуп калса өзү жасай калып, айтор, ар дайым мени менен жүрөт.

— Тойлорго барып ырдайсыңбы?

— Аябай суранган учурларда гана барып ырдап калам. Негизи тойлорго көп барбайм.

— Гонорарың канча?

— Атайын коюлган гонорарым деле жок. Ырдап жатканда ар ким өз каалоосу менен берет. Бир тойго барып ырдап 5000 сом таап, ошол эң көп тапкан кирешем болгон. 

© Sputnik / Эмиль Садыров
Жаш актер Канат Дилдедосов "Ак кеме" тасмасындагы Нургазынын образын жаратты

Канат Дилдедосов, 8 жашта: Кыргызстанды Дубай, Түркиядай кылам 

Дагы бир таланттуу, өнөрлүү жигиттердин бири кичинекей Канатты көргөн адам дароо эле Айтматовдун чыгармасынын негизинде тартылган "Ак кеме" тасмасындагы Нургазыны элестетет. Бал тилдүү Канат балдар берүүсүн алып барат. Мындан тышкары, бир катар клиптерге жана тасмаларга тартылган.

— Алып баруучулукка кантип келип калдың?

— Менин эжем алып баруучу болом деп кастингдерге бара берчү. Мен да ээрчип алчумун. Анан ошол жактан эжелер мени жактырып калып, байкап көрүштү. Башында "Р" тамгасына тилим келбей койгон. Кийин ага деле карашкан жок. 

— Көптөгөн ролик, клиптерге да тартылып жүрөсүң, акча төлөнөбү?

— Ооба, ар бир клипке 1000 сомдон төлөшөт.

— Канча берүү алып барасың?

— Азыр "Баластан" каналындагы "Баарын билгим келет" берүүсүн алып барам. Андан сырткары, Балдар FM радиосуна да ди-джей болуп иштеп калам.

— Ал жактан да айлык аласыңбы?

— Ооба, телеберүүлөргө тартылган учурда айына 1500 сом алам. Акчаны апама берем. Апам кайра эфирге чыкканга кийим сатып берет, эжелериме да берем.

— Келечекте буюрса, такшалган алып баруучуну же актерду көрүп калат турбайбызбы?

— Жок, мен президент болгум келет. Кыргызстанды Дубай, Түркия өлкөлөрү сыяктуу кооз кылам. 

  • Балдардын сүйүктүү алып баруучуларынын бири Калзат Камчыбек кызы таланттуу балдардын катарын толуктайт.
    Балдардын сүйүктүү алып баруучуларынын бири Калзат Камчыбек кызы таланттуу балдардын катарын толуктайт.
    © Sputnik / Табылды Кадырбеков
  • Учурда Баарын билгим келет телеберүүсүн алып барат. Ошондой эле Балдар FM радиосунун ди-джейи. Келечекте диктор болууну самайт.
    Учурда "Баарын билгим келет" телеберүүсүн алып барат. Ошондой эле Балдар FM радиосунун ди-джейи. Келечекте диктор болууну самайт.
    © Sputnik / Табылды Кадырбеков
1 / 2
© Sputnik / Табылды Кадырбеков
Балдардын сүйүктүү алып баруучуларынын бири Калзат Камчыбек кызы таланттуу балдардын катарын толуктайт.

Калзат Камчыбек кызы, 12 жашта: эки барак сценарийди жарым саатта жаттап алам

Балдардын сүйүктүү алып баруучуларынын бири Калзат Камчыбек кызы таланттуу балдардын катарын толуктайт. Учурда "Баарын билгим келет" телеберүүсүн алып барат. Ошондой эле Балдар FM радиосунун ди-джейи. Келечекте диктор болууну самайт.

— Үй тапшырма аткарып жетишесиңби?

— Ооба, ал эмес сценарийлерди да жаттаганга жетишем. Эки барак сценарийди жарым саатта жаттап коем.

— Алып баруучу, ди-джей болуп жүргөнүңө канча жыл болду?

— Беш жашымда ди-джей болуп баштагам. Анан жети жашыман баштап алып баруучу болдум. Ошондон бери алып баруучу милдетти аткарып келем. 

— Анан иштеген акыңды аласыңбы?

— Ооба, ар бир алып барган берүүбүзгө төлөп берет. Бирок мен үчүн башкысы өзүмө жаккан жумушту аткаруу.

— Келечекте алып баруучулукту улантсам деген ой барбы? Же бул азырынча хоббиби?

— Келечекте деле алып баруучу болгум келет. Жаңылыктарды алып барган Чынара Капаровадай диктор болууну самайм.

971
Белгилер:
окуучу, гонорар, өнөр, талант, бала, Кыргызстан
Тема боюнча
Оюнчуктардан робот жасаган мектеп окуучусу Тунук Омушев
Кыргызстандык ойлоп табуучулардын эмгектерине арналган көргөзмө
Гүл кармап турган адам. Архив

Улуттук сүрөт өнөрүн көтөргөн Кыргыз эл сүрөтчүсү Баатыр Жалиев дүйнө салды

68
Баатыр Жалиевдин чыгармалары Гапар Айтиев атындагы улуттук көркөм сүрөт искусство музейинде жана КМШ өлкөлөрүнүн музейлеринин алтын фондунда сакталып турат.

БИШКЕК, 31-май — Sputnik. 85 жаш курагында живописчи, график, КР эл сүрөтчүсү Баатыр Жалиев дүйнө салды. Бул тууралуу мамлекет башчынын маалымат кызматы билдирип, ага жазылган некрологду жарыялады.

Жалиевдин чыгармачылыгы өнөр жай жана айыл чарба темасына арналган. Ал өлкөдөгү эпкиндүү курулуштарды, элет жерлериндеги өзгөрүүлөрдү көркөм чагылдырып, мезгилдин кеңири полотносун жараткан. Сүрөтчүнүн "Өнөр жайлуу Ош" (1966), "Ош курулуп жатат" (1972), "Хайдаркан комбинаты", (1974) аттуу чыгармалары түштүк жергесиндеги кубаттуу ишканаларда иштеп жаткан жумушчуларды, алардын эмгегин, көркөм образын жаратып, кыргыз жумушчуларынын эсте каларлык галереясын түзгөн. Жанрлуу-портреттүү "Тогуз коргоол" (1974) чыгармасы Баатыр Жалиевдин чыгармачылык чоң жетишкендиги болуп эсептелет.

Баатыр Жалиевдин көркөм сүрөттөрү республикалык, бүткүл союздук жана эл аралык көргөзмөлөргө катышып, байгелүү орундарга арзыган. Сүрөтчүнүн чыгармалары Гапар Айтиев атындагы улуттук көркөм сүрөт искусство музейинде жана КМШ өлкөлөрүнүн музейлеринин алтын фондунда сакталып турат.

Сүрөтчү көркөм эстетикалык чабыты, терең философиясы анын кыл калеми аркылуу кеңири чагылдырылган. Ал кыргыз интеллигенциясынын эсте каларлык көркөм образдарын жаратып, улуттук сүрөт өнөрүн бийик деңгээлге көтөргөн.

Жалиев графика жаатында мыкты картиналардын циклин жаратты. Сүрөтчүнүн дүйнө таанымы, көркөм эстетикалык чабыты, терең философиясы анын кыл калеми аркылуу кеңири чагылдырылган. Ал кыргыз интеллигенциясынын эсте каларлык көркөм образдарын жаратып, улуттук сүрөт өнөрүн бийик деңгээлге көтөргөн.

Сүрөтчүнүн көп жылдык изденүүсү аркылуу улуттук сүрөт маданиятында "Сизизм" көркөм формасы жана агымы жаралган. Бул агымдын негиз салуучусу катары улуттук сүрөт өнөрүнө жаңы дем кошуп, өзүнүн сүрөтчүлүк "мектебин" жараткан. Сүрөтчүнүн эмгектери учурда өзүнүн үй-музейинен орун алган. Баатыр Жалиевдин өз демилгеси менен негиздеген үй-музейи 2012-жылдан бери иштеп келет.

Баатыр Жалиевдин сүрөтчүлүк таланты жогору бааланып, "Эмгектеги артыкчылык" медалы, Кыргыз ССР Жогорку Советинин Ардак грамоталары менен сыйланган. Ага КР эл сүрөтчүсү ардактуу наамы ыйгарылган.

Баатыр Жалиевдин тажиясы 2020-жылдын 31-майында Ош шаарында өтөт.

68
Белгилер:
Баатыр Жалиев, чыгармачылык, өмүр баян, өлүм, сүрөтчү
Тема боюнча
Таланттуу опера ырчысы Сагибжамал Ходжибекова көз жумду. Некролог
Видеоператор жумуш учурунда. Архив

Балдардын "Карек" кинофестивалына тасмалар кабыл алына баштады

58
Кинофестивалга 10-17 жаштагы окуучулар катыша алат. Алар каалаган жанрында "Мен жана коом", "Мен жана менин үй-бүлөм", "Бул менин дүйнөм" деген темаларда камерага же телефонго 10 мүнөткө чейин кыскаметраждуу кино тартышы керек.

БИШКЕК, 30-май — Sputnik. Республикада балдар жана өспүрүмдөр арасындагы "Карек" кинофестивалы тасмаларды кабыл ала баштады. Бул тууралуу "Карек" балдар кинофондунун жетекчиси Толкун Дайырбекова билдирди.

Анын айтымында, конкурска 10-17 жаштагы окуучулар катыша алат. Балдар каалаган жанрында "Мен жана коом", "Мен жана менин үй-бүлөм", "Бул менин дүйнөм" деген темаларда камерага же телефонго 10 мүнөткө чейин кыскаметраждуу кино тартышы керек.

"Катышуу акысыз. Эмгектер 2020-жылдын 5-октябрына чейин www.karek.kg сайты аркылуу кабыл алынат. Балдар тарткан кинолорду Кыргызстандын белгилүү киноишмерлери баалайт",— деди Дайырбекова.

Жеңүүчүлөр "Мыкты көркөм тасма", "Мыкты анимациялык тасма", "Мыкты документалдык тасма", "Мыкты режиссёр", "Мыкты оператор", "Мыкты сценарист", "Мыкты монтажер", "Мыкты жаш актёр", "Мыкты жаш актриса", "Калыстардын атайын сыйлыгы" номинациялары боюнча аныкталып, статуэтка, диплом жана баалуу белектер менен сыйланары кошумчаланды.

58
Белгилер:
кино, режиссер, кинофестиваль, балдар
Тема боюнча
Өмүрүн киного арнаган Геннадий Базаров 78 жашка толду. Сүрөттөгү ирмемдери
Кичинекей кыз. Иллюстративдик сүрөт

Министр: өлкөдө ата-энеси белгисиз 42 бала бар, алар жөлөк пул ала албайт

5
(жаңыланган 18:00 03.06.2020)
Министрдин айтымында, бул балдар ата-энеси төрөлөрү менен таштап кеткендер. Алардын туулгандыгы тууралуу күбөлүгүндө атасы жана энеси деген графасы бош.

БИШКЕК, 3-июн. — Sputnik. Кыргызстанда ата-энеси ким экени белгисиз 42 бала бар жана алар мамлекеттен жөлөк пул албайт. Бул тууралуу эмгек жана социалдык өнүгүү министри Улукбек Кочкоров парламентте билдирди.

Жогорку Кеңеште "Жөлөк пулдар жөнүндө Кыргыз Республикасынын мыйзамына өзгөртүүлөрдү киргизүү боюнча" мыйзам долбоору каралып жатат.

Министрдин айтымында, бул балдар ата-энеси төрөлөрү менен таштап кеткендер. Алардын туулгандыгы тууралуу күбөлүгүндө атасы жана энеси деген графасы бош.

"Азыр ушул 42 баланын укугу корголбой жатат. Эгер мыйзамга биз сунуштап жаткан өзгөрүүлөр киргизилсе, аларга ай сайын 2 миң сомдон берилип турат. Тагыраагы, балдардын атына банкта эсеп ачылып, акча ошол жакка чогулат. Кийин бала 18 жашка чыккан соң каражатты өз керегине жарата алат", — деди министр.

Кочкоров берген маалыматка караганда, учурда ата-энесинин биринен ажыраган бала 1 000, экөөнөн тең ажырагандар 2 000 сомдон алат.

5
Белгилер:
жөлөк пул, жетим, коргоо, Улукбек Кочкоров, Кыргызстан
Тема боюнча
Адылова: суицидге барган балдардын көбүнүн ата-энеси мигрант
Ош: тилемчилик кылып жүргөн балдардын ата-энеси аныкталды