БИШКЕК, 30-янв. — Sputnik. Ден соолугу жактан мүмкүнчүлүгү чектелген жигиттер менен бир кыздан турган "Тумар" бий тобу America's Got Talent аттуу Нью-Йоркто өткөн сынакта өнөрлөрүн тартуулаганын Sputnik Кыргызстан агенттигинин кабарчысына коомдук ишкер Ассоль Молдокматова билдирди.
"Тумар тобу өздөрүн татыктуу көрсөтө алышты. Эми кастингдин жыйынтыктары февраль айында белгилүү болот. Бийчилер дүйшөмбү күнү мекенге кайтышат", — деди Молдокматова.
Молдокматова бий топтун мүчөлөрү Адина менен Эрдик Кыргызстанга келгенден кийин спорттук чемпионаттарга катышууну пландап жатышканын билдирди. Бирок ал үчүн атайын жасалган 4500 долларлык коляска керек экенин кошумчалап, каражат чогултуу кампаниясы өткөрүлөрүн айтты.
"Тумар" тобу эл аралык сынактарга биринчи ирет катышып жаткан жок. Өткөн жылдын ноябрь айында Česko Slovensko má talent (Чехия жана Словакия) сынагында үчүнчү орунду ээлеген. 2015-жылы Түркияда өткөн таланттар сынагына катышып бирок жарым финалга чыкпай калган.
