БИШКЕК, 1-фев. — Sputnik. Балдардын аң-сезимин өнүктүрүү максатында ичинде бардык керектүү буюмдары менен кошо жасалган жаңы оюнчук боз үй чыкты. Бул тууралуу кол өнөрчү Атыргүл Жумашева Sputnik Кыргызстан маалымат агенттигине билдирди.
Анын айтымында, этно композиция түрүндө жасалган боз үйлөр бала бакчаларга таратылып, дүкөндөргө сатыкка коюлду.
"Үй-бүлөбүз менен ушундай улуттук атрибуттарды кийизден жасап алектенебиз. Негизи оюнчук боз үйлөр көп эле. Бирок биздики алардан өзгөчөлөнүп, үстү сыдырылып ачылат. Ичинде болсо сандыктан тарта бешиктеги бала, аял, эркек оюнчуктарга чейин бар. Алардын колу-бутун кыймылдатып ойносо болот. Боз үйлөрдүн ар бирин кыздарым менен жасап чыкканга бир жумадай убакыт кетти. Ошондуктан баалары 100 доллардын тегерегинде", — деди Жумашева.
Анын айтымында, мындай жасалга оюнчуктар менен кошо 50дөн ашык боз үй тигилген. Аларды көбүнчө туристтер сатып алат.
"Боз үйдү таза кийизден жасаганбыз. Ичиндеги жууркан төшөктөр да нукура кездемеден тигилген. Балдар фантазияларына жараша өздөрү жасаган буюмдарды боз үй ичине койсун деп, кээ бир жерлерин бош калтырып койгонбуз", — деди Жумашева.
Ал белгилегендей, мындай улуттук колориттеги оюнчуктар бир гана туристтер тарабынан эмес, Кыргызстандын ичинде да бир топ суроо-талапка ээ.
Боз үй — кыргыздардын уникалдуу турак-жайы жөнүндө Sputnik инфографикасынан көрө аласыздар>>
