БИШКЕК, 14-фев. — Sputnik. "Ата керээзи" тасмасы Индиянын дагы бир ири кинофестивалына чакыруу алды. Бул тууралуу фильмдин режиссерлорунун бири Дастан Жапар уулу билдирди.
Эскерте кетсек, 2-9-февраль күндөрү Индиянын Бангалор шаарында өткөн эл аралык кинофестивалга катышкан кыргызстандык тасма баш байгеге ээ болуп, олжолуу кайткан.
"Ата керээзи" Bodhisattva International Film Festival деп аталган маданий иш-чаранын "Эл аралык толук метраждуу тасмалар" сынагында ат салышат. Патна шаарында өтүүчү фестиваль 16-февралда башталып 23-февралда жыйынтыкталат", — деди режиссер.
Сценарийге ылайык, Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата Журттун топурагы кымбат экенин сезип, Америкага кетер-кетпесин билбей арсар ойго батат.
