БИШКЕК, 30-май — Sputnik. Бишкекте Кыргыз эл жазуучусу Түгөлбай Сыдыкбековдун 105 жылдыгына карата эскерүү күнү өтөт. Бул тууралуу шаардык мэриянын маалымат кызматы кабарлады.
Билдирмеге ылайык, аталган иш-чара 31-май күнү Токтогул Сатылганов атындагы адабият музейинде саат 10.00дө башталат.
Түгөлбай Сыдыкбеков — ХХ кылымдагы кыргыз адабиятындагы реалисттик прозаны калыптандырууга жана өнүктүрүүгө чоң салым кошкон Кыргыз эл жазуучусу, академик, КР Баатыры. Сыдыкбеков 1912-жылы Ысык-Көл облусуна караштуу Түп районундагы Кең-Суу айылында туулган.
Сыдыкбеков Кыргыз адабиятына жана маданиятына 70 жылга жакын кызмат кылган, элдик тилдин жана нарк-насилдин нускалуу билерманы 1997-жылы 19-июлда Бишкек шаарында каза болгон. Анын сөөгүн эл зор урмат, ызаат менен жерге берген.
