БИШКЕК, 24-июн. — Sputnik. "Ата керээзи" тасмасы Африка континетиндеги Дурбан шаарында өткөн эл аралык кинофестивалда үч байгеге ээ болду. Бул туурасында картинанын режиссеру Дастан Жапар уулу социалдык тармактагы баракчасына жазды.
Кинотасма Түштүк Африкадагы конкурстун баш байгесине татыган. Андан сырткары "Режиссердун мыкты иши", "Оператордун мыкты иши" наамдары боюнча да жеңип алган.
"Дүйнөнүн башка бурчунда жүрүп баш байгеге ээ болдук. Бул кыргыз инематографисттеринин бараандуу жеңиши", — деп жазган Дастан Жапар уулу социалдык тармактагы баракчасына.
Кинокартинанын режиссерлору Бакыт Мукул, Дастан Жапар уулу жана оператору Акжол Бекболотов.
Эки саатка чукул созулган толук метраждуу "Ата керээзи" тасмасы "Кыргызфильм" жана "Элфильм" студияларында тартылып, башкы ролдордо Иман Мукул, Марат Алышпаев, Тынара Абдразаева, Бакыт Мукул жана башкалар ойногон.
Сценарийге ылайык, Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата журттун топурагы кымбат экенин сезип, Америкага кетер-кетпесин билбей арсар ойго батат.
