Кыргызстандык эки кыз эл аралык бий сынагына катышып жатат

БИШКЕК, 1-авг. — Sputnik. Сентябрь айында НТВ телеканалында "Ты супер! Танцы" эл аралык долбоору башталат.

Телеканалга катышууну каалагандардан миңге жакын кат келген. Масштабдуу кастингге балдар үйүндө, мектеп-интернаттарда, башка үй-бүлөлөр багып алган жана бирөөнүн камкордугундагы балдар-кыздар катышты.

Тандоо турларында өз күчүн Россия, Азербайжан, Армения, Белорусия, Казакстан, Кыргызстан, Латвия, Молдова, Тажикстан, Түркмөнстан, Өзбекстан, Украина жана Абхазиядан барган өспүрүмдөр сынашты. Албетте, бийчилердин бардыгы таланттуу, бирок чоң сахнага чыгууга азырынча тажрыйбасы жетишсиз.

Шоуга катышчу 145 баланын арасынын экөө кыргызстандык. Алар: Айдана Шатемирова менен Нуриза Көчкөмбай кызы аттуу мектеп окуучулары.

НТВ телеканалы өткөрүп жаткан "Ты супер! Танцы" сынагын Sputnik маалымат агенттиги жана радиосу уюштурган. Россиянын, КМШ өлкөлөрүнүн жана Балтика мамлекеттеринин таланттарынын башын бириктирген бул иш-чаранын максаты балдарга тилегин ишке ашырууга мүмкүнчүлүк берүү.