Москва, 7-сен. — Sputnik, Мария Шелудякова. Sputnik Кыргызстан агенттигинин фото кабарчысы Табылды Кадырбеков Андрей Стенин атындагы фото сынактын жеңүүчүлөрүнүн бири болду. Кыргыз сүрөтчүсүнө сыйлыкты Sputnik маалымат агенттиги жана радиосунун жетекчиси Андрей Благодыренко тапшырды.
"Мен мындай ири сынакта биринчи жолу сыйлыкка ээ болуп жатам. Мындан ары дагы кызыктуу эмгектерди жаратып, сынактарга катыша бермекчимин", — деп Кадырбеков сөз берди.
Фото сынак ушуну менен үчүнчү ирет өтүп жатат. Быйыл ага катышкандардын саны рекорд койду. Калыстар тобунун сынына 76 мамлекеттен 5000ден ашык эмгек келип түшкөн. Көргөзмөгө эң мыкты деп табылган 200 сүрөт коюлган. Анда карапайым элдин жашоосу, мамлекеттерде, ири шаарларда болгон окуялар чагылдырылган.
"Россия сегодня" маалымат агенттигинин башкы директору Дмитрий Киселев эмгектердин көпчүлүгү портрет экенин белгилеген.
"Көргөзмөгө 200дөй сүрөт коюлган. Алардын көпчүлүгүндө адамдын жүзү жакындан берилген. Андан дүйнөдө болуп жаткан окуяларды көрүүгө болот. Тартылган фотолор телекадрлардан дагы күчтүү, себеби аны карап отуруп эмоцияны байкоого болот", — деп сыйлык тапшыруу аземинде Киселев билдирди.
Ал ошондой эле бул маанилүү күн журналисттер үчүн бир чети кубанычтуу болсо, экинчи жагынан Андрей Стениндин бул дүйнөдө жоктугу аларды өкүндүрүп жатканын белгиледи.
Ал эми Россиянын ТИМинин расмий өкүлү Мария Захарова үч жылдан бери бул сынакты колдоп, сыйлык тапшыруу аземине катышып келет. Коноктор алдында сүйлөп жатып сүрөттөр дүйнө элин жакындатарын билдирген.
"Сүрөт бул планетада болуп жаткан окуялардын иллюстрациясы. Ал аркылуу баргандан корккон жерлерди көрүүгө болот. Бул сүрөттөр жүрөктү түйшөлткөн окуялардын чеги, улуту, дини жок экенин көрсөтүп турат", — деп Захарова белгиледи.
Баш байгени жана "Башкы жаңылыктар. Серия" номинациясында биринчи орунду испаниялык Алехандро Мартинес Велес (Alejandro Martinez Velez) жеңип алды. Алехандро "Белгарддагы качкындар" деп аталган эмгегин бардык качкын мигранттарга арнаган.
Люмьер атындагы сүрөт борборундагы көргөзмө 17-сентябрга чейин уланат. Кирүү акысы бекер. Жеңүүчүлөр сынактан кийин Россияны жана дүйнөнү кыдырып чыгышат.
