КРдин Эмгек сиңирген артисти, кыргыз эстрадасынын өркүндөшүнө салым кошкондордун бири Асель Турдалиева

Асел Турдалиева: бала кезимде жеке турмушумду көп тилек кылбаптырмын

3745
(жаңыланган 12:12 16.09.2017)
Бүгүн КРдин Эмгек сиңирген артисти, кыргыз эстрадасынын өркүндөшүнө салым кошкондордун бири Асел Турдалиева 48 жашка чыкты.

Ырчы журналист Гүлдана Талантбековага чыгармачылык чыйыр жолу, турмушу тууралуу айтып берди.

— Асел айым, өздүк майрам кут болсун! Туулган күн болгон сайын бир жашка өйдөлөп турат эмеспизби. Жашым өтүп баратат деп кейиген жоксузбу?

— Рахмат. Тескерисинче, кудайым ушул жашты, күндү маңдайыма жазганы үчүн ыраазымын. "Жаш кезде берсин мээнети, карганда берсин дөөлөттү" дейт. Мен карыганда дөөлөттүү аял болгум келет.

— Башкалар сыяктуу туулган күндө дайыма өткөн-кеткенге саресеп саласызбы?

— Кудайдын адамзатка арнаган майрамы бул — туулган күнү. Калган майрамдар пенде менен кошо жаралгандар. Мурун туулган күн дегенде конок чакырып же бир жактарга барып тосчумун. Азыр жакшы көргөн адамымдын, бир туугандарымдын курчоосунда чакан кылып тосконду жактырам. Эмнегедир саресепти жаңы жылда салам.

Капкара кыргыздын кыздары😂

Публикация от Асель Турдалиева (@aselturdalieva) Авг 15 2017 в 10:45 PDT

— Мурда берген маектерде кичинекей кезиңизде "ССРдин Эмгек сиңирген артисти болом" деген сөздү айтып кыялданчу экенсиз. Азыр чындыгында эмгеги сиңген артист болдуңуз. Жаштын тилегин берет дегендей, биротоло эле Эл артистин айтсам болмок экен деп ойлогон жоксузбу?

— Кээде Эл артисти болом деп деле айтчумун. Алтын баш аман болсо кудайым баарын берет дейт. Ички дүйнөң таза, бешенеңе буюрган болсо, кечиримдүү болсоң, жакшылыктын эрте-кечи жок.

Өткөндө бир куудул жигит тамашалап айтып калды. "Асел эже, кудай чекеге бир эле мөөр басат окшойт, ал сен бактылуусуң же бактысызсың деген. Кээ бир адамдар кичинекей кезинде кандай ыйлактап жүрсө, азыр деле ошондой, а биздей чыгармачыл адамдарга бактылуусуң деп койгон го" дейт. Бул дагы жакшы сөз. Кудай бир гана бактылуусуң дегенди ар бир адамга берсе экен дейм.

— Чыгармачылыгыңызда эмне кеп?

— Келерки жылы сахнада жүргөнүмдүн 25 жылдыгына арнап концерт берем, ошого азыр сценарий жаздыртып жатам. Ушу тапта "Айдоочу" деген ырыма клип тарттыруунун үстүндө иштеп, жаңы ырларым чекесинен жазылып жатат. Өзүңүздөр билгендей университетте көп жылдан бери окутуучу, декан болуп эмгектенип келем. Биздин окуу жайда куурчак бөлүмү жок эле, былтыркы жылдан тарта ал бөлүмдү ачып жетектеп келем. Аз да болсо кыргыз искуссвосуна салымымды кошуп жатам деп ойлойм. 

Заслуженные артистка Кыргызстана Асель Турдалиева во время интервью на радио Sputnik Кыргызстан
© Sputnik / Табылды Кадырбеков
КРдин Эмгек сиңирген артисти, кыргыз эстрадасынын өркүндөшүнө салым кошкондордун бири Асель Турдалиева: Чарчадым деген сөздү көп жактыра бербейм. адамга бир күндө 7 саат уктаган жетиштүү. Өзүм таңкы алтыда турам

— Чыгармачылыгыңызды алгач актрисалык менен баштап, анан ырчы болгонуңузду билебиз. Азыр кино тармагында эмгектенсем кандай болмок деп өкүнбөйсүзбү?

— Эми андай ойлор болот. Ырчы, актриса, окутуучулук бири-бири менен байланышта да. Мен ырчы болуш үчүн Күрөңкеев атындагы училищеден окуп, андан кийин театралдык окуу жайга тапшыргам. Жакшы ыр тартуулоо үчүн жакшы актриса болуш керек. Азыр деле киного сунуш түшүп, сценарийи көңүлүмө төп келсе тартылууга даярмын.

— Чыгармачылык, окутуучулук, анан да тойлордо кызмат кылуу… Бардык нерсеге кантип убакыт табасыз?

— Чарчадым деген сөздү көп жактыра бербейм. Адамга бир күндө 7 саат уктаган жетиштүү. Өзүм таңкы алтыда турам. Мурда уюлдук телефон көтөрбөй, машина эмес троллейбуста жүргөн учурда деле көп жумуш бүтүрчү экенбиз. Азыр кантип таң атып, кантип кеч киргенин деле билбей каласың. Жумуштар да толук бүтпөйт. Айтор таң калыштуу.

— Тойго кызмат кылганга кандай көз караштасыз?

— 90-жылдары тойго кызмат кылгандан тартынчубуз, ал кезде уят деп саналчу. Азыр артисттер кээде чалышып калганда "ай, той барбы" деп калабыз. Кыргызда той болуп турганы эле жакшы. 

Заслуженные артистки Айчурек Иманалиева, Алина Жетигенова и Асель Турдалиева исполняют хит Кыргызстан,алга,алга!
© Фото / предоставлено Айчурек Иманалиевой
КРдин эмгек сиңирген ырчылары Айчүрөк Иманалиева, Асел Турдалиева жана Алина Жетигенова

— Баса, Instagram баракчаңызда бутуңузга татуировка тартылган сүрөттү көрдүм. Ал чын эле чегилгенби?

— Бирөө комментарийге "эже, ушуну тим эле койбоптурсуз да" деп жазып коюптур. Ал чегилген эмес, жөн гана боелгон сүрөт болчу. Кызым менен Анталияда эс алууда жүргөндө эки жумалык кылып тарттырганбыз. Анан кызым сүрөткө тартып алгандан жүктөп койдум эле. Бул жакка келип тойго барганы камданып жатсам, кыскараак көйнөктөн бутумдагы сүрөт билинип калыптыр. Шым кийип бардым.

— Кызыңыз бой жетип калса керек. Качан турмушка жолуна узатайын деп жатасыз?

— Кызым Бегайым 19 жашта. Турмушка чыгып, мени эртерээк неберелүү кыл деп деле айтам. Бир-эки жыл окуп алайын дейт. Бардык эне сыяктуу жакшы күйөө балага туш болуп, көп неберелүү болсом экен деп кыялданам.

???😆🤗😍

Публикация от Асель Турдалиева (@aselturdalieva) Авг 13 2017 в 12:00 PDT

— Кыздын чырагы кырк жерден жанат деп коет эмеспи. Көп жыл мурун жолдошуңуз менен ажырашып кеткениңизди билебиз, кайрадан турмуш куруу тууралуу ойлондуңуз беле?

— Жаштын тилегин берет деп коет экен. Эч кимге айтчу эмес элем, бирок тагдырымды өзүм эле тандап алган окшойм. Кичинекей чагымда артист болсом, белгилүү адам болсом экен деп, үйдөгүлөр жеке турмушту тууралуу айтса "ой, эми…" деп экинчи-үчүнчү планга коюп койчумун. Ошондой эле болду. Турмуш экен.

— Интервьюларыңыздын биринде жакын адамым бар деп айтып каласыз. Бирок үй-бүлө үчүн эки баш биригиш керек го…

— Мен ал үчүн, ал мен үчүн бар. Экөөбүзгө бизди бириктирген ысык сезимдер жетиштүү. Турмушка чыксам, үйдө отуруп, тамак жасап, чыгармачылыкка көңүл бура албай калам го.

— Ошол үчүн элеби?

— Кудайга шүгүр, чогуу элебиз. Жеке жашоомду өтө тереңдетким келбей турат. Ал адам чет мамлекетте жашайт.

3745
Белгилер:
чыгармачылык, ырчы, Асел Турдалиева
Тема боюнча
Азамат Болгонбаев: орустардан чыккан төкмө акынмын деп тамашалап калам
Гүлнур Сатылганова: кыялымдагы мырзаны жолуктура алган жокмун
Улуттук кийим кийген жаштар. Архивдик сүрөт

Өтө ысык болуп сырыңды төгүп салба. Аяштар мамилесиндеги этикет

88
Sputnik Кыргызстан "Этикет" рубрикасынын алкагында коомдук жайларда жана ар кыл жагдайда өзүн татыктуу алып жүрүү эрежелери менен тааныштырат.

Эки адам баш кошкондо алардын жашоосунда өмүрлүк жар менен кайын журттан тышкары түгөйүнүн достору дагы пайда болот. Айрым учурда бул адамдар жеңил кабыл алынып, бат эле жуурулушуп кетсе, кээде оңой менен "өз ордун" таба албайт. Мунун айынан аял менен эркектин ортосунда пикир келишпестик жаралып, достордон кол үзгөн учурлар жок эмес.

Бул канчалык туура көрүнүш? Анткени адам дос күтөт, бирөө менен сырдашып, көңүл ачып, алыш-катышта болушу керек. Мунсуз жашоону элестетүү кыйын эмеспи.

Бүгүн этикет мугалими Нуржан Исмаилова жубайлар бири-биринин достору менен жакшы мамиледе болушу үчүн кандай эрежелерди карманышы керектигин айтып берди.

Күлүп тосуп ал

Алгач достордун үйгө келишинен баштайлы. Албетте, адамда маанайы жок учурлар болот. Кээде келе жаткан коноктордун арасынан кимдир бирөө менен жылдызыңыз келишпеши мүмкүн. Бирок мейман сиздин үйгө келип жаткандан кийин эч нерсеге карабай үй ээси жылуу-жумшак тосуп алганы туура. Бул көбүнесе аялдарга тиешелүү эрежедей сезилиши мүмкүн, бирок эркектерден дагы айланып өтпөшү керек. Үйдүн кожоюну жубайынын курбу-курдаштары келгенде чогуу отуруп, көңүл ачууга убактысы жетпесе (же кыз-келиндин сөзүнө аралашкысы келбесе) дагы дасторконго отургузганга кол кабыш кылганы жакшы. Бир чыны чай ууртап, ал-жай сурашкандан кийин шартын түшүндүрүп, туруп кетсе болот.

Ысык болуп кетпе

Аяштар ынтымакта болгону жакшы, бирок ого эле ынак болуп, болгон-бүткөн сырды ачык айтып койгон кооптуураак. Достор арасында бирде болбосо бирде сөз болуп, өзүңүздүн эле абийириңиз төгүлөт. Кийин бул нерсе үйдөгү атмосферага дагы таасир этип коюшу ыктымал. Баса, аяштарды бири-бирине жамандоо дагы туура эмес, айланып келип өз башыңызга тийип калбасын.

Куру кол барба

Жолугушуу үйдө, кафеде, жаратылышта, айтор кайсы жакта болбосун, шартка жараша баштыгыңыз же капчыгыңыз куру болбошу керек. Үйгө барганда дасторконго, жок дегенде балдарга таттуу алып алганыңыз туура. Ал эми башка жактарда бирөөнүн колун карап калбай чөнчөктө акча болгону жакшы. Өзгөчө эркек киши эки эле жолу акчасыз жүрүп калса, аяштарынын арасында тетири пикир жаратып коюшу мүмкүн.

Тамаша чеги менен

Албетте, достор, аяштар чогулган жерде түркүн-түрлүү тамаша айтылат. Өткөн-кеткенди эске салып, чер жазылат. Бирок айрым шакаба сөздөр кимдир бирөөлөргө зыянын тийгизип коюшу мүмкүн. Балким бирөөлөрдүн үй-бүлөсүндө бул же тигил тема жабык болушу ыктымал. Эмнеси болсо дагы мындайда достор сезимтал болуп, эмнени сүйлөсө болот, эмнени сүйлөбөй эле койгону туура экенин айырмалай билиши керек.

Душман кылба

Сага жаккан адамдын баары өмүрлүк жарыңа сөзсүз жагыш керек деген эреже жок. Кишилер ар кандай болот. Мисалы, жубайынын эң жакын курбусу жеңил ойлуу сезилиши мүмкүн. Адатта бул нерсе эркекти кооптондурат. Айрым учурда, тескерисинче, аялы жолдошунун бойдок досторун жек көрөт. Күйөөсүн бузуп, тетири жолго үндөп жаткандай сезилет. Бирок бойдок же өзүн шайыр, эркин алып жүргөн адамдын бардыгы жаман жолдо жүрөт же башка бирөөнү бузат деп ойлонуу туура эмес. Эгер сиздин жакын адамыңыз аны дос кылып жүрсө, демек жакшы жактары бар. Болбой эле кабыл алгыңыз келбесе, алардын өздөрүнө ачык айтып, душман кылуунун кереги жок. Анын үстүнө жубайыңыздын (жолдошуңуздун) кадырын кетиресиз. Андан көрө аялы менен күйөөсү маселени өз ара чечип алганы жакшы.

Катыш

Түгөйүңдүн жоро-жолдоштору менен катышууга келгенде жолугушууларды эки түргө бөлүп караса болот. Биринчиси — туулган күн, юбилейлер, үлпөт той, кызматтан көтөрүлүү, сөөк коюу сыяктуу жашоодогу өтө маанилүү учурлар. Мындай иш-чараларга колдон келишинче барып койгон жакшы. Милдет деп айтса дагы болот. Ал эми жөн гана көңүл ачуу үчүн аптанын аягында жолугуу, сыра ичүү сыяктуу жеңил-желпи иш-чараларга баруу же барбоону ар бир адам өзү чечет.

88
Белгилер:
достук, катышуучу, этикет, мамиле
Тема:
Өзүн алып жүрүүнүн эрежеси
Тема боюнча
Беймаал тынчын алба! Мугалимге кайрылуу этикети
Бири-бириңди сынап, кафеде орун талашпагыла. Кудалашуу маданияты
Алган буюмду артыңан чуркатпай кайтарып бер. Кошуна-колоң этикети
Кинорежиссёр, оператор Дастан Жапар уулу жана актерлор Марат Алышпаев жана Бакыт Мукул. Архив

"Акыркы көч" тасмасы Дакка эл аралык кинофестивалына катышууда

31
Сынак Бангладештин борбор калаасында 16-24-январь күндөрү өтөт. "Акыркы көч" тасмасы "Азия киносу" сынагынын алкагында көрсөтүлөрү айтылды.

БИШКЕК, 17-янв. – Sputnik. Кинорежиссёр, оператор Дастан Жапар уулу Бакыт Мукул менен биргеликте тарткан "Акыркы көч" кинокартинасы XIX Дакка эл аралык кинофестивалына катышат. Бул тууралуу Кинематографияны колдоо фондунан билдиришти.

Иш-чара Бангладештин борбор калаасында 16-24-январь күндөрү өтөт. "Акыркы көч" тасмасы "Азия киносу" сынагынын алкагында көрсөтүлмөкчү.

Фильмде Марат Алышпаев, Шайыр Касымалиева, Бусурман Одуракаев, Анара Ажыканова, Калипа Усенова, Өмүрзак Токтомуратов сыяктуу көрүнүктүү актёрлор роль жаратты. Фильм ак-кара түстө тартылган.

"Акыркы көч" кинокартинасы 2020-жылы Таллинде өткөн "Темные ночи" кинофестивалына катышып, кинонун дүйнөлүк премьерасы Эстонияда болгон.

31
Белгилер:
фестиваль, Бангладеш, Кыргызстан
Тема боюнча
Коюлбай калган пьеса, тартылбай калган тасмалар. Болот Шамшиевдин мурастары
"Ак кемеде" жашаган Бала. Тасмадагы таберик сүрөт
Шприц чыгарган ишкана. Архивдик сүрөт

Министр Кара-Суудагы шприц чыгарган ишкананы көрдү. Сүрөт

14
(жаңыланган 15:11 17.01.2021)
Ишкананын ээси мурда шприцтер менен түштүк аймагын гана камсыздап келишсе, жакынкы убакыттарда республиканы камсыздап жатышканын айткан.

БИШКЕК, 17-янв. — Sputnik. Саламаттык сактоо министри Алымкадыр Бейшеналиев Оштун Кара-Суу районундагы шприц чыгаруучу ишкана менен таанышканын мекеменин маалымат кызматы кабарлады.

Белгилей кетсек, соңку күндөрү министр түштүк жергесинде иш сапары менен жүрөт.

Жеке ишкер Канатбек Кадыров ишкана 5 жана 10 граммдык шприцтер менен инсулин алганга ылайыкталган шприцтерди чыгарарын айткан.

"Мурда шприцтер менен түштүк аймагын гана камсыздасак, жакынкы убакыттарда республиканы камсыз кылганга жетиштик. Эми медициналык кол каптарды дагы чыгаралы деп турабыз", — деген ишкер.

Министр мындай кадамдар өлкө үчүн жеңилдик экенин айтып, ишкана жетекчисине ыраазычылыгын билдирген.

14
Белгилер:
ишкер, ишкана, Алымкадыр Бейшеналиев, КР Саламаттык сактоо министрлиги, Кара-Суу району, Ош
Тема боюнча
Ош облусунун ооруканаларына 26 тез жардам унаасы берилди