БИШКЕК, 27-окт. — Sputnik. Лос-Анжелесте кинорежиссер жана Жогорку Кеңештин депутаты Садык Шер-Нияз тарабынан негизделген III Аsian World Film Festival (AWFF) кинофестивалы өтүп жатат. Бул тууралуу "Айтыш" фондусунун өкүлү Чолпон Идрисова билдирди.
Аталган фестиваль 25-октябрда башталып, 2-ноябрга чейин уланат. Ага Кыргызстандан кинооператор Мурат Алив, режиссер Актан Арым Кубат жана Садык Шер-Нияз барган. Ал эми дүйнөлүк кинематографияга кошкон салымы үчүн Мурат Алиевге фестивалдын биринчи ардак сыйлыгы ыйгарылган.
Кинофестивалдын максаты — эл аралык маданий кызматташтыкты өрчүтүү жана Азия менен Голливуддун киноиндустрия жаатындагы байланыштарын чыңдоо. Анын алкагында Азиянын 50 мамлекетинен барган мыкты тасмалар көрсөтүлөт. Ошондой эле фестивалга катышкан кинолорго "Оскар" сыйлыгына көрсөтүүлүүгө мүмкүнчүлүк түзүлөт.
