БИШКЕК, 14-дек. — Sputnik. Чыңгыз Айтматовдун "Кылым карытар бир күн" аттуу биринчи романын белорус тилинде басып чыгаруу пландалып жатат. Бул тууралуу Маданият, маалымат жана туризм министрлигинен кабарлашты.
Шаршемби күнү Бишкектеги экинчи эл аралык китеп-полиграфиялык жарманкесинин ачылышы алдында маданият, маалымат жана туризм министринин орун басары Айнура Темирбекова Белоруссиянын элчиси Андрей Страчко, "Народная асвета" басмаканасынын директору Виктория Калистратова, "Звезда" басма үйүнүн жетекчи орун басары Алексей Чарота жана белоруссиялык полиграфкомбинаттын директору Игорь Маланяк менен жолугушту.
"Народная асвета" басмаканасынын директору Айтматовдун "Кылым карытар бир күн" романын белорус тилинде басып чыгарууга даяр экенин маалымдады.
Анын айтымына караганда, Айтматовдун үй-бүлөсүнөн алдын ала уруксат алынып, учурда тиешелүү келишим иштелип жатат.
Ал эми "Звезда" басма үйүнүн директору басмакананын сайтындагы "Созвучие" баракчасына улуу жазуучу Чыңгыз Айтматовдун чыгармаларын жыл бою чыгарып туруу сунушун берди. Мындай иш-чаралар жазуучунун 90 жылдыгына карата пландалууда.
