БИШКЕК, 12-фев. — Sputnik. Казакстанда өтө турган "Ушкын" студенттик тасмалар фестивалына Кыргызстандан төрт фильм катышат. Бул тууралуу Кинематографты колдоо фондусунан билдиришти.
Иш-чара 22-24-февраль күндөрү Астана шаарында өтмөкчү.
Фестивалда Кыргызстандын атынан "Оймок" (режиссеру "Манас университетинин студенти "Касиет Кубанычбек кызы), "Киноман" (режиссеру "Манас университетинин студенти Аскар Нуракун уулу), "Манеж" (режиссеру Бүбүсара Бейшеналиеав атындагы окуу жайдын студенти Бекинай Токтосунова) жана "Калифорния" (режиссеру окуусун Бүбүсара Бейшеналиева атындагы окуу жайдан баштап, кийин Россиядагы Сергей Герасимов институтунда улантып жаткан Дастан Мадалбеков) тасмалары ат салышат.
"Бул фестивалга жаш режиссерлор Касиет Кубанычбек кызы менен Бекинай Токтосунова катышуучу гана эмес, студенттерден турган калыстар тобунун мүчөсү катары дагы чакырылган", — деп айтылат маалыматта.
Белгилей кетсек, Темир Бирназаровдун "Түнкү кырсык" тасмасы Таллин шаарында өткөн "Темные ночи" Эл аралык кинофестивалында утуп алган баш бейгеси февраль айынан башында Бишкекке алып келинди.
