Коркут ата спектакли. Архив

"Коркут Ата" спектакли Астанада өтчү "Самгау" фестивалына жолдомо алды

43
(жаңыланган 15:39 06.06.2018)
Эл аралык маданий иш-чара 10-16-июнь күндөрү өтмөкчү.

БИШКЕК, 6-июн. — Sputnik. Драматург Кайрат Иманалиевдин калемине таандык, режиссер Марат Козукеев койгон "Коркут Ата" спектакли Казакстандын Астана шаарында өтө турган эл аралык "Самгау" фестивалына жолдомо алды. Бул тууралуу Токтоболот Абдымомунов атындагы улуттук академиялык драма театрынын адабий бөлүмүнүн жетекчиси Нуркыз Рыскул кызы билдирди.

Анын айтымында, учурда чыгармачыл топ фестивалга кызуу даярдык көрүүдө. Маданий иш-чара 10-16-июнь күндөрү өтмөкчү.

Башкы ролдорду Адыл Болорбек уулу, Шайгүл Алсеитова, Альбина Имашева, Жылдызбек Касеинов, Канболот Атакан уулу, Сонун Батырова аткарган.

Спекталь буга чейин бир топ эл аралык фестивалдарга катышып, байгелүү орундарды да алып келген.

"Коркут Ата" — оомал-төкмөл дүйнөдө кандай даражадагы адам болбосун, акыры өлүм анын эшигин черте турган күн келерин эскертүүчү философиялык чыгарма. Коркут жалпы түрк дүйнөсүнө таанымал, IX кылымда жашап өткөн даңазалуу кыл кыякчы, дастанчы, күүчү болгон. Коркут табияттын мыйзамына каршы туруп, эртеби-кечпи келе турган өлүмдөн качууга аракет кылат. Спектаклде ал өзү издеген өлбөстүктү күүгө салып, чыгармаларында түбөлүккө калтырып, өлүмдү акыры жеңгендиги тууралуу баяндалат.

43
Белгилер:
фестиваль, спектакль, Астана
Тема боюнча
Айтматов боюнча жаштар жана журналистер арасында сынак жарыяланды
Бишкекке Алтайдан көмөкөй үндүү ырчылар келди. Концерт өтчү жай