БИШКЕК, 3-июл. — Sputnik. Түрк режиссёру жана продюсери Өнер Кылыч 2019-жылы Талас облусунда "Жамийла" повести тууралуу тасма тартууну пландап жатат. Бул тууралуу режиссёру Sputnik Кыргызстан радиосунда маек куруп жатып билдирди.
Анын айтымында, учурда эки өлкө арасында сүйлөшүүлөр жүргүзүлүп, тасма тарттууга кам көрүлө баштады.
"Мен алгачкы жолу "Жамийла" повестин 14 жашымда окуп, абдан таасирленгем. Кийин Айтматовдун дүйнөсү менен таанышып, тасма тартууга бел байладым. Француздар чыгарманы "Махабат тууралуу улуу дастан" деп аташса, мен Жамийланын күчтүүлүгүнө баа берем. Тасмада алдыңкы планга сүйүүнү эмес, Жамийланын эрктүүлүгүн чыгарууну көздөп жатам", — деди Өнер Кылыч.
Ал чыгармадагы Жамийланын турмуштагы сыноолорго сынбай, кыйынчылыктарга тик караган мезгилдерине тасмада өзгөчө басым жасай турганын кошумчалады.
