Турсунбаев: "Салиманын ыры" тасмасынын сценарийи Таттыбүбү үчүн жазылган
(жаңыланган 17:11 13.06.2019)
Кыргыз ССРинин эмгек сиңирген артисти Таттыбүбү Турсунбаеванын бир тууган агасы, КР эмгек сиңирген артисти Нуркан Турсунбаев карындашы 15 жашында алгачкы тасмасына тартылып, башкы ролду жаратканын айтты.Турсунбаев: "Салиманын ыры" тасмасынын сценарийи Таттыбүбү үчүн жазылган
"Салиманын ыры" көркөм фильминин сценарийи атайын Таттыбүбү Турсунбаева үчүн жазылган. Бул тууралуу Нуркан Турсунбаев Sputnik Кыргызстан радиосунун "Туяк" программасына маек куруп жатып билдирди.
Анын айтымында, Таттыбүбү Турсунбаева кытайлык кыргыздардын "Гүлкайыр" деген ырын жогорку чеберчиликте аткарып, республикалык сынактын баш байгесин багындыруу менен калыстар тобун жана көрүүчүлөрдү таң калтырган.
"Кыргыз ССРинин эл артисти Ашыралы Боталиев жаш таланттарды издеп жүрүп Жумгалдан Таттыбүбү экөөбүздү тандап алды. Кийин биз Нарынга келдик. Ал жактан да атайын кароо-сынакка катышып, мыкты делген 100 жаш таланттын катарына кошулдук. Ошентип Тянь-Шань, азыркы Нарын облусунун атынан республикалык сынакка жөнөдүк. Таттыбүбү кытайлык кыргыздардын "Гүлкайыр" деген ырын жогорку чеберчиликте аткарып, калыстар менен көрүүчүлөрдү абдан таң калтырган. Ал учурда Татыкем 15 жашта гана болчу. Таттыбүбүнүн талантын байкаган маданият чөйрөсүнүн өкүлдөрү аны дароо тасмага тартууну туура көрүп, ал үчүн "Салиманын ыры" аттуу көркөм фильмине сценарий жазышкан. Анда Таттыбүбү башкы каармандын ролун жаратып, өзүн актриса катары да көрсөттү. Кийин биз Ташкенттеги А.Н. Островский атындагы театр искусствосу институтуна окууга тапшырдык. Окуп жүрүп да Таттыбүбү бир катар тасмаларда роль жаратты. Аны менен катар ырчылык өнөрүн да өркүндөтүп, ар кандай концерттерге катышып жүрдү. Ошол кезде Өзбек ССРинин бийлик төбөлдөрү чет мамлекеттен сыйлуу коноктор келгенде атайын Таттыбүбүнү чакыртышып, Алябьевдин "Булбул" аттуу ырын ырдатышчу эле", — деди Турсунбаев.
Ошондой эле ал Таттыбүбү Турсунбаева Кыргыз драма театрында 15 жыл эмгектенип, 30дан ашуун пьесада жана 15тен ашуун көркөм тасмада башкы ролдорду жаратып кеткенин кошумчалады.
Белгилер:
Кыргыз режиссёрунун "Көл" тасмасы Кытайдагы ири фестивалга чакыруу алды
(жаңыланган 11:50 04.07.2020)
Режиссёр ыйык көлдө балык түрүндө жашаган байыркы ата-бабалардын жан дүйнөсү тууралуу уламышты кадрга түшүргөн.БИШКЕК, 4-июл. — Sputnik. Кыргызстандык режиссёр Эмил Атагелдиевдин "Көл" аттуу тасмасы Шанхайда өтө турчу абройлуу эл аралык кинофестивалга катышат. Бул туурасында Кинематографисттер союзунун катчысы, фильмдин со-продюсери Талант Төлөбеков билдирди.
Аталган кино Shanghai International Film Festival 2020 (SIFF) деп аталган Кытайдагы ири кинофестивалга чакыруу алган. Ал 23 жылдан бери өткөрүлүп келет, А категориясындагы дүйнөдөгү 15 кинофестивалдын катарында турат.
"Бул абдан чоң ийгилик, кыргыз режиссёрлорунун тасмалары А категориясындагы кинофестивалдарга акыркы ирет 2018-жылы катышкан. Ошондой эле Кыргызстандын фильмдери Шанхай фестивалы түзүлгөндөн бери биринчи ирет катышып жатат", — деди Төлөбеков.
"Көл" драмалык жанрда Ысык-Көлдөн тартылган. Сюжетинде ыйык көлдө балык түрүндө жашаган байыркы ата-бабалардын жан дүйнөсү тууралуу уламыш баяндалат.
1,5 млн. долларга мыкты тасма тартышты. Токаев кыргыз киносуна суктанды
Кинонун сценарийин Эрке Жумакматова менен КРдин эмгек сиңирген артисти Эмил Атагелдиев жазган. Башкы ролдорду Артыкпай Сүйүндүков, Болот Тентимишов, Малика Айдабосунова, Айнура Качкынбек кызы, Санжар Өмүрбаев аткарган.
Продюсерлери Эрке Жумакматова, Садык Шер-Нияз. Со-продюсерлер Талант Төлөбеков менен Айжан Чыныбаева.
Комада жаткан ырчы Асел Кадырбекова көзүн ачып, эсине келе баштады
(жаңыланган 13:46 03.07.2020)
Эстрада ырчысы комадан толук түрдө чыга элек. Буга чейин дарыгерлер Аселдин мээси катуу жабыркап, моюн омурткалары менен акыреги сынып кеткенин айтышкан.БИШКЕК, 3-июл. — Sputnik. Ырчы Асел Кадырбекова көзүн ачып, тамак ичип калгандыгын Травматология жана ортопедия илим-изилдөө борборунун жетекчиси Сабырбек Жумабеков билдирди.
Дарыгердин айтымында, Асел толук түрдө өзүнө келе элек.
“Комадан толук чыга элек. Аселди мурда түтүк менен тамактандырып жатканбыз. Азыр “тилиң, мурдуң кана?” деп сураганда көрсөтүп, кашык менен тамак берсек өзү жутуп калды. Буюрса жылыш бар”, — деди ал.
Асел Кадырбекова менен сүзүшкөн айдоочуга иш козголуп, камакка алынмай болду
Эске сала кетсек, 26-июнда 15:30дар чамасында Медеров жана Тыныстанов көчөлөрүнүн кесилишинде Toyota Camry жана Ыкчам аракетке келчү топтун (ГБР) Honda Odyssey автоунаалары кагышкан. Анын кесепетинен Camry автокөлүгүндө бараткан Асел Кадырбекова жана экинчи машинадагы эки киши жабыркаган.
Буга чейин дарыгерлер ырчынын мээси катуу жабыркап, моюн омурткалары менен акыреги сынып кеткенин айтышкан.
Акысын төлөп беребиз! Ош шаары медиктерди жардамга чакырууда
(жаңыланган 22:11 04.07.2020)
Дарыгерлер дээрлик төрт айдан бери күчөтүлгөн режимде иштеп, айрымдары ооруп калгандыктан адистер тартыш болууда.БИШКЕК, 4-июл. — Sputnik. Ош шаарында COVID-19 инфекциясына байланыштуу абал оорлоп бараткандыгынан улам ыктыярчы дарыгерлерди жардамга чакырабыз. Мындай билдирүү менен калаа мэриясы ак халатчандарга кайрылды.
Маалыматта март айынан бери медицина кызматкерлери, эпидемиологдор күчөтүлгөн режимде иштеп, айрымдары оору жугузуп алгандыктан медиктер тартыш болуп жатканы айтылат.
Азайбай койду. Дагы 71 медицина кызматкери коронавирус жуктуруп алды
"Биз кайдыгер эмес жогорку, орто билимдүү жана тажрыйбасы бар медицина кызматкерлерин, ординаторлордун жардамга келишин өтүнөбүз", — деп жазылат кайрылууда.
Өз ыктыяры менен иштөөнү каалаган адистер Ош шаардык ооруканасы менен келишим түзүп, айлык акысы төлөнөт.
Байланыш телефондору: (0772) 45 49 49, (0550) 29 26 24